السبت، 27 نوفمبر 2010

وحشتينى اوى


بسم الله الرحمن الرحيم




مش عارفه غبت اد ايه ؟؟

مش عارفه حتى ايه اللى حصل في الفتره اللى فاتت


كل اللى عارفاه انى رجعت في احسن احوالى الحمد لله


وحشتينى اوى يا مدونتى وعندي كلام كتير اوووووووى


يمكن هتسمعيه بس ويمكن اقدر اكتبه

بس انا حبيت اطمنك انى لسه معاكى


غروب

الخميس، 9 سبتمبر 2010

توب العيد


كتبت اسمك بحبر الدمع من خوفي

ونقشت رسمك الغالي علي كفوفي

حروف اسمك بتمحي كل أحزاني

تعيد تكويني بعد المر من تاني

تناجي في الهوي روحي

تداوي الباقي في جروحي

أجيلك أجري من ألمي

يفيض الحبر من قلمي

حبيبي يا ريحة المسك في حريري

مين ده اللي يقدر يعشقك غيري

ومين اللي يوقف في الخطا سيري


أزرعك جنينة بلون الورد أرويها

أنقشك مركب في عرض البحر أرميها

أعدي بيك شاطئ الحزن اللي كان

وأبدر نجوم الكون حواليك

يخدم سماك ميت ألف جان

ولو يخون حلمك طريقه

أخطفك وأركب مع الحلم الحصان

لملم كل الشوارع والطرق

هات كل الذكريات

لجل ما نصبح ماضي

وسط أحلام السكات

هات أصحابك وناسك

وأترك وراك قلب مات

إحي قلبك من هوايا

وأدفن العمر اللي فات

شق قلبك من ضلوعه

لو في يوم خانك وقال

إن حلمك مش حقيقة

وإنه أغرب م الخيال

ألبس في عيدك توب المحبة

أفتح دراعك للأحبة

حسس قلبي بالأمان

قبل ما يفوت الأوان

ونبقي غنوة ف كوم دخان

تتبعتر في يوم العيد

أو تتحرق نجمة في قلب قطر

مسافر بحلمك للصعيد

ويبقي مش باقي مني

غير شوية ضي في عنيا

مش هديهوملك

وهعبر طريقي سكوت

يقلعك توب الهنا والعيد

ويشيد لي في كل لحظة تابوت

يفصل ما بين الحب

ويفرق حياة من موت

تدور بينا أيامنا وتجرحنا

مع كل لحظة شوق بتدبح جوارحنا

في عز الغنا الغالي

نلاقي المر شمسه تصّبحنا

الحلم يطلع ع البيبان ضايع

ولو ننده لنور الفجر يسمعنا

بس يا خسارة ما هوش طايع

علقم يا طعم الحب

سودة يا دروب السنين

علقم يا طعم الأسي

والأهة يبلعها الأنين

نور ليلي ليه إنطفي ؟


شباكي من غير هوا


ونهاري من غير ضو


فاقد حروف الكلام


مش لاقي خيط في الجو

السبت، 17 يوليو 2010




بسم الله الرحمن الرحيم


وبعد طوووول انتظار رجعت لمدونتي العزيزه

بجد من أسوء أيام حياتي الأيام اللى فاتت

يمكن أكون مريت بصدمات أصعب في حياتي .. لكن إنى أزعل انا واصحابي الانتيم لاول مره في عمر صداقتنا

كان شئ سيء جدا ,, شيء بجد وجعني أوي

مش حابه أحكيلك يا مدونتي على تفاصيل الزعل ,, بس المهم انى عارفه انى مش هاقدر ابعد عنهم اكتر من كده

وانى مهما اخدت موقف كان لازم اهدي وارجع تاني

انا زعلت وزعلتهم مني .. عموما بالنسبه للموضوع ده احنا بقينا تمام الحمد لله

لسه بس عاوزه اكلم جهاد .. واتمني تشوفي البوست واقولك انا اسفه لانك مكنش ليكي دعوه بالموضوع غير بسيط وانا ظلمتك


نيجي بقه لموضوع تاني

عارفه ايه اللى حصل يا مدونتي في الموضوع اياه ؟؟؟؟؟

انتى اكيد عارفه انى من الاول مش متحمسه للموضوع وشيفاه موضوع فاشل

وردود افعالي فيه كانت غريبه .. عارفه ايه كمان ؟؟

الموضوع ده هز ثقتي في نفسي أوى وخلاني أتصرف بعض التصرفات ضد مبادئي

لكن برضه عدت الحمد لله ورجعت تاني احسن ..

ومش واخده موقف من أي حد ( واضح ؟؟؟)

يعنى كل أشخاص الموضوع بالمسبه ليه ناس أعزاء محترمين وعلى قدر عالى من الثقافه

وربنا يوفقهم


عارفه هاقولك ايه كمان ؟؟؟

هاحكيلك على اللى عملته الاسبوع اللى فات

مش انا روحت رأس البر ؟؟

اه والله

انا وكلللل العائله

احنا وخالتو وخالتو وتيته وولاد خالى وهيييييييصه

بجد كان اسبوع تحفه رغم كل الاصابات اللى حصلتلى فيه

طبعا انتى عارفه ان ضهري تعبان من زمان

شوفتى اللى حصل واحنا بنلعب لعبة المنديل خالتو وقعتني وكسرت اللى باقي من ضهري هههههه

وروحنا سينما وانتى لالالالالالا ( مطلعه لساني )

كان نفسي اخدك معايا يوم بيوم والله بس مكنش فيه نت بقه

بس اقولك حاجه مش كنتى هتتبسطي من الخروجه بتاعت السينما انا اصلا مش كنت عاوزه اروح

بس العيال اجبروني .. والفيلمين اللى شوفتهم رخمين جدا جدا

فيلم الثلاته يشتغلونها ( لا موضوع ولا قصه ولا حتى كوميديا ولا هدف )

وفيلم ( لا تراجع ولا استسلام ) كوميديا خفيفه وقصه قديمه جداااااااااا


ما علينا .. عارفه انى تعبت اليوم ده اووووووووووى

انتى طبعا عارفه انا اد ايه بكره الشروق وبتعب لما اشوفه

واليوم ده روحنا الساعه سته الصبح وشوفت الشروق واتقفلت جدا


وعارفه روحت كمان الملاهي ,, ودي بقه انا اللى عاوزه اروحها اووى

رغم تعب ضهري بس ضحكت اوى وكانت لذيذه


وروحت اللسان : خروجه حلوه اوووووووووى

وروحت النيل وفكرنا ناخد مركب لقينا ان مركب يدوب على اد عيلتنا بس

واخدنا المركب فعلا لوحدنا هههههه

انتى هتحسدينا ولا ايه ( قولى ما شاء الله )


وروحنا البحر ونزلت الميه وانا اصلا نسيت العوم

ههههههه بقه يا عينى عمرو ابن خالى شايلنى طول م انا في الميه بدل م اغرق

( الله يكون في عونه ) شايل تهمه


اااه الواد عمرو ده طله رقاصه معتبره

لدرجه اننا اجرنا واحد بيطبل مخصوص علشان يرقص ههههههه

والراجل بقه مستغرب اصل هو كان بيبع غزل البنات ومعاه طبله

روحنا جبناه واديناه فلوس وقولناله مش عاوزن غزل البنات عاوزين طبله ههههههه


وطبعا لعبنا راكت وكلنا حريفه خصوصا عاصم بيه امتيااااز وخالتو جي جي

ههههههههههههههه بتضرب في الكوره ضرب ( انتقام )


كان اسبوع حلو اوووووى

عارفه كان مزاجي وحش اووووووى لما عرفت ميعاد المصيف وانى مش هاعرف اخد اجازه

وهرروح كل يوم من المنصوره لراس البر

كانت هاتبقي بهدله جامده وتعب وقلة مزاج بقه

بس الحمد لله ( قدرا ) المدير يعطي لقسم المبيعات كله اجازه لاخر الاسبوع من نفسه

كنت مروحه يومها اااااخر انبساط

الحمد لله يارب


ااااه نسيت اقولك انى قبل م اروح المصيف بكلم يوم روحت لساره درويش

حفل توقيع كتاب زوجي مازال حبيبي

بجد بنت لاسعه عسوله جدا

كان نفسي احضر من بدري بس للاسف روحت في النهايه اخدت نسختى وحظيت بتوقيع من ساره ومشيت

بس كنت مبسوطه ليها اوى ربنا يكرمها


مش عارفه حاسه انى ناسيه حاجات كتير


بعدين بقه لان ايام الشغل شكلها هتاخد منك ورق كتير


كمان لسه السبت اللى جاى هحكيلك كلللل تفاصيل خطوبة احمد بيه الديب ابن خالي

والثلاثاء فرح اميره اخت ايه صاحبتى

مبسوطه اوووووى


الدنيا بتضحك ليه ؟؟


على فكره يا مدونتي يا كوكي انتى ,, انا مبسوطه علشان حاجه سر بقه هابقي اقولك عليها بينى وبينك مش ادام الناس


اوك ؟؟؟؟؟


هشششششششش


باااااى


غروب


الاثنين، 28 يونيو 2010

وداعًا


الموت علينا حق بس الفراق ... وجيعته مرّه يا أغلى م الأصدقاء




وداعًا




رسالة إليها


إحساسي الليلة غريب .. أول مرة احسه معاكي

دايما حاسة إن انا بشتاق لك

أول مرة اكون كرهاكي


حضنك كان دايمًا مفتوح .. هوا روحي بيعيش بهواكي

علطول أذكر إسمك قبلي

اول مرة اكون نسياكي


شغلتي عقلي وحيرتيني .. بين شرياكي وبين بيعاكي

والمرة دي ما فيها عتاب

أول مرة مش عوزاكي


دمعة عيني تمنها وداع .. مش محتاجة خلاص لهواكي

بعد ما كنت باقول عايشه لك

أول مرة هاقول ذكراكي


غروب

الأحد، 27 يونيو 2010

أمير الشعراء

أرى مسابقة أمير الشعراء 2007 كانت بين كل من :

مصر و فلسطين

تميم البرغوثي ومصطفى الجزار

مطري يمطر في سحابك و في القدس

وفقط






السبت، 26 يونيو 2010


بسم الله الرحمن الرحيم



الاول : انا حاسه ان يمكن كلامي يطلع مش مترتب خالص بس ده شيء

مش مضايقني ولا مخوفني من رد فعل اللى هايقرأ

يمكن لأني ساعات كتير وانا صغيره لما كنت بامسك ورقة وقلم وأكتب أي كلام

مش مترتب كان بيعجب اللى حواليه من المقربين

ولما كنت بامسك قلمي الرصاص المفضل واحاول اشخبط كانت بتطلع الرسمة دقيقة

ويمكن ده اللى هحاول أعمله دلوقتي مع حكايتي مع نادي أدب جامعة المنصورة

كان المفروض أكتب الموضوع ده من زمان من وقت ما إنضميت للنادي وبقيت عضو فيه

لكن كل وقت وليه آذان

المهم

اللي حصل إني في سنه من السنين ومن خلال مدونتي الغاليه دي

اتعرفت على محمد فكري ( الشاعر الجميل )

صاحب ديوان ( البحث عن أشياء أخرى )

نصحني محمد بعد ما شاف بعض تخاريفي الخاصة بالانضمام

لنادي ادب الجامعه علشان هناك أقدر أتعلم أكتر وأستفيد من خبرات الموجودين


الحقيقة أنا كنت مستعده جدا لخطوة زي دي

وخصوصا لاني بحب الشعر لدرجة الادمان


روحت النادي طبعا مش عارفه أي حد خالص غير محمد

ومش عارفه حتى هل ممكن أقعد معاهم ولا لاء ؟
استأذنت انى انضم ليهم وقد كان واتعرفوا عليه شخصيا وأدبيا


ولقيتني قاعده جنب بنت استرخمتها من اول نظرة ما شاء الله

بس كنت مجبرة أتكلم معاها علشان اعرف بعض حاجات


البنت دي هي حاليا انتميتى ( جهاد مشالي )

اتعرفت كمان على بنت تانيه المفروض انها صديقه لجهاد وهى القاصة ( أمل نصر الدين )

بجد بنت ممتازه وشخصيه طيبه جدا وخدومه وممكن تدي اللى ادامها أي معلومه ادبيه

هو محتاج ليها ده غير ثقافتها الخاصة


بعدين اتعرفت على ناس تانيه منهم رضوان الهلالي وده شاعر عامية

وبعد إجراء انتخابات النادي أصبح هوالامين


شخصيه برضه خدومة الى حد كبير وحاول يساعدني ومنحني بعض الكتب علشان أطلع عليها .

كان في ناس تانيه الحقيقه علاقتى بيهم كانت محدودة جدا زى ( أحمد فرحات )

وده بيكتب نثر بس بصراحة ومش عارفه الناس اللى هاتشوف منهم الموضوع ده هايقولوا ايه؟؟

بس انا مش كنت بافهم ولا كلمة من احمد فرحات ده هو وشخص تاني اسمه ياسر المحمدي


كان بيكتب قصص غامضه جدا بالفاظ صعبة جدا عليه في وقتها

بعد كده فهمتها .. بس مش سهل فهمها من أول قراءه بجد


واتعرفت على حسام موافي صديق محمد فكري وزميل دراسة هو في نظري شاعر ممتاز

رغم النقد الكتير اللى اتوجه ليه في وجودي


هما بصراحه مش بيسبوا لبعض جوا النادي .. كله بينقد في كله لكن برا الكل أصحاب . وده شيء رائع .

بدأت بقه أتعرف على أعضاء النادي الجدد والقدامى واحد واحد وبخطوات ثابته .

بس بدات علاقتى بجهاد الرخمه تتطور كتييييير لحد موصلنا للى احنا فيه دلوقتى

المهم .. جهاد قادتني لأني اتعرف على أشرف توفيق

من خلال حفل توقيع كتابه ( مبسوطة يا مصر ) في المنصورة

انا كنت اعرف أشرف المدون ( مدونة اخف دم ) واعرف أشرف الشاعر العامي الممتاز في نظري

وصاحب ديوان ( مرسال لحبيبتي )


لكن لسه مش اتعرفت على أشرف البنى آدم ذو الدم الخفيف والصديق .


وفي اليوم ده حصل كل ده وعرفت أشرف عن قرب وخصوصا انه كان صديق لأمل وجهاد عن قرب .


بعد كده طلبت مني جهاد برضه أنى أحضر معاها لقاء لبعض أعضاء النادي القدامى وقد كان

الحقيقه كان يومها الجو مش مضبوط معايا وكانت معانا ايناس انتيمتنا ومش حبيت القاعده أوي ومشيت .

ومن يومين بس ( أول امبارح ) ندمت على تضييع فرصة التعرف على الناس دي

لان الناس دي كانوا :

رمزي .. واللى تشاء الظروف بعد مرور أكتر من سنه ونص على رفض تكلمة اللقاء ده

أنى أشتغل معاه عن طريق جهاد برضه .


ورغم اننا مش استمرينا في الشغل كتير الا انى احترم الشخص ده جداااااااا

أدبيا وثقافيا وفكريا وعمليا كمان .


عنده مكتبه تهبل . ربنا يكرمه ويوفقه في حياته


وكان كمان فيها الدكتوره أماني ( كاتبة قصه رائعه ) ورغم مصارحتي ليها

عن انطباعي الأول بالحدة الشديده الا انها قدرت تغير الانطباع ده معايا ( مش مع الكل )

وفهمت وجهة نظرها العقلانية جدا .

وبرضه تشاء نفس الظروف ان يجمعنى بيها العمل بعد أكتر من سنه ونص .

واللى بجد ندمت انى رفضت أكمل اللقاء معاه هو الشاعر ( مصطفى حسان )

في اللقاء كنت متنشنه منه اوي

لكن كنت باسمع اسمه كتير اوى مع رمزي وأمانى

وقدرا اعرف من يومين مين هو مصطفى حسان الشاعر

صاحب ديوان ( حدوتة الشاطر ... مفيش )

عاوزه أقول ان مصطفى ليه قصيدة اسمها طلب إعادة نظر

انا كل ما اقرأ القصيدة دي أبكي وعلى نفس الجمل بطريقه هيستيريه

بجد من أكتر الشخصيات اللى ندمت انى ضيعت على نفسي فرصة التعرف عليهم أكتر

وكان فيه ناس تانيه مش عاوزه انسي حد .


بس الخلاصة ان بجد نادي أدب جامعة المنصورة بيطلع منه مواهب ممتازة

وشعراء على قدر عالي جدا من الثقافه والتعليم

مش أي كلام يعني . مبدأهم ( يا تكتب صح يا ...... لالالا مش تسكت يا تسمع صح )

بجد اتعلمت منهم كتير وكلهم على قدر عالى جدا من الاحترام والثقافه

احترم جدا انضمامي لهذا النادي ومعرفتي لناسه واتمنى للجميع منهم كل التوفيق

لان معظمهم يستاهلوا يكونوا .

وفي الآخر حابه أضيف قصيدة مصطفي ( طلب إعادة نظر وعاوزه رأيكوا فيها )








غروب

الخميس، 24 يونيو 2010

Dancing with my loneliness



I'm dancing with my loneliness again

i'm dancing with my loneliness again

slowly to the music from within

i'm dancing with my loneliness again

feeling it can be my only friend

and i won't let myself go it's too near

too near to hear, near to hear

to hear

i'm dancing with my loneliness inside

knowing there's no place where i can hide

dancing with my loneliness inside

there's no other place for me to hide

and i won't let myself go out and cry

i wonder why, i wonder why

i'm dancing ... romancing

الاثنين، 21 يونيو 2010

My baby you + تحديث



تحديث هام

الوفاة يا أصدقائي لم تكن حالة اعتباريه كما ظن البعض وانما هي شخصية عزيزة توفت.. ليست قرابه من الدرجة الأولي

الحمد لله على كل شئ ...ربنا يرحمها ويسكنها فسيح جناته

اشكر الجميع

وانا بحالة جيده الحمد لله

ادعوا لي

الأحد، 20 يونيو 2010

عيد ميلاد









6/21




عدت سنة




والليله هاطفي شمعة الجرح الغريب




جرحي أنا





جرحي اللي عشته من فراق أغلى حبيب





شمعة دموع




شمعه ألم




شمعة حنين




شمعة ندم




قرب ياقلبي من الشموع.....اليلة عيد أصعب دموع




عيد ميلاد جرحي أنا




الذكريات المؤلمة والجرح والاحزان ضيوفي




والورد معزوم انما خجلان وحيد يشبه لخوفي




لا الشوق ياقلبي بأمرنا ولا كان بأيدي اختار نصيبي




يبفى خلاص مكتوب لنا رغم البعاد يفضل حبيبي




شمعة دموع




شمعه ألم




شمعة حنين




شمعة ندم




قرب ياقلبي من الشموع .....الليلة عيد أصعب دموع




عيد ميلاد جرحي انا




فاضل ثواني قليلة ويعدي اول ( رابع ) عيد لجرحي




والجرح هيعيش جوه مني مش هيمحيه اى فرح




الذكرى مش ممكن تموت او ييجي يوم وتختفي




الذكرى هيكون لها صوت مع كل شمعة بتنطفي




شمعة دموع




شمعه ألم




شمعة حنين




شمعة ندم




قرب ياقلبي من الشموع ......الليلة عيد أصعب دموع




عيد ميلاد جرحي انا



أنا أيامي مبتعديش ... أنا أحزاني مبتسبنيش

أيوه تعبت خلاص مليت ... أنا مش قادره حبيبي أعيش




غروب

الأربعاء، 16 يونيو 2010


الثلاثاء، 1 يونيو 2010

مغلق مؤقتا


إغلاق مؤقت

الخميس، 27 مايو 2010

ورقة ليلية



في الحب فقط يعمل الضد لصالح ضدة

نجد طرفي الخيط يقف كل منهما حارسًا لمرمى الآخر

رافضًا دخول آية اهداف في شباكه .

في الحب أكثر القرارات حكمة ,,,, تلك التي تأتينا عبر الدموع

أرى رأسي تركب أرجوحة الأفكار الليلية ,,, اهو حقًا ما يسمى بالوحي

أم انه صداع وأرق متكرر ؟؟؟

ولما أقود نفسي إلى تصديق الأولى دون الثانية ؟؟؟

أعي تمامًا انني لم ولن أكن يومًا روائية جيدة أو حتى قاصة متميزة ..

إنما انا فقط انجح في تسجيل الخواطر

لا اكثر من ذلك

ولكن لماذا هذه الليلة بالذات أخالف الكلمات ؟؟ .. وأشذ عن اللحن ؟؟

أيمكن ان يكون قادني هذا المجهول إلى هذه الورقة على تلك الوسادة في تلك الساعة المتأخرة من الليل

إلى التصديق بأنني أجيد لغة الحروف ؟؟

غروب

الاثنين، 24 مايو 2010

stop




إنني في حاجة إلى ان أموت أحيانًا .. لأعي بعد ذلك أنني مازلت على قيد الحياة

الجمعة، 21 مايو 2010

كروت حمراء


بسم الله الرحمن الرحيم


لكل ساذج يحاول عرض فكرة خاصة من خلال مناقشة فكره عامة


وتشويه صورة الاخرين غير مهتم بعقل القارئ : كارت أحمر


لكل متطفل يحاول اقتحام المنطقة اللامرئيه في حياة اللآخر والتدخل فيما لا يعنيه : كارت أحمر


لكل متسلط يحاول السيطرة وفرض الرأي على شخص ليس من مستحقاته في الأصل : كارت احمر


لكل أحمق يحاول العبث بالمربع الديني والاخلاقي لمجرد نظرة الاختلاف : كارت أحمر


لكل غبي يحاول ارتداء قناع الغموض : كارت أحمر


لكل خبيث يّدعي سعادته في إسعاد الآخرين : كارت أحمر


لكل رجل يدّعي الاخلاص : كارت أحمر


لكل إمرأة تتدّعي النسيان : كارت أحمر



كروت حمراء كثيره في حياتنا اليومية قد نكون غافلين عنها


غروب

الثلاثاء، 11 مايو 2010


بسم الله الرحمن الرحيم

تحدثت منذ فترة عن هرم العلاقات الإجتماعية , ذلك الهرم الذي ينسب كل إلى صاحبة .



حينها كان هرمي الخاص قد استقر على الشكل الثنائي , وذلك بسقوط الطبقة الوسطي

وانزلاقها إلي قاعدة الهرم حيث لم يك هناك أي داعي لوجود محتلي هذه الطبقة ,

بل كانت هناك أسباب نفسية أدعي بتسربيهم والتخلص منهم .

واسقر الهرم في وضع ثابت .. من طابقين

قمة ......................... قاعدة


بحيث تستقر أمي بعيدا عن ذلك الهرم تماما


ولم أشعر طوال هذه الفتره بأي خلل في التوازن


أجد في قمة الهرم أناس تربطيني بهم علاقات غريبه , أعتقد انهم الاكثر دهاء

حيث استطاعوا تسلل كل المنحنيات واختراق كل الزوايا وازالة كل الخطوط الحمراء

ليستقروا أخيرا في هذا المكان الأكثر علوا ...وهم ليسوا بالعدد الكثير

وذلك أن الهرم يأخذ الشكل المخروطي فيضيق عند قمته بحيث لا يسمح بالتزاحم هناك .


أما عن القاعدة ..أجد بها السكان الأصليين ممن تربطني بهم تلك الخطوط الحمراء وكلمة ( stop ) .

وأجد أيضًا بعض المنزلقين من الطبقة الوسطي ( رحمها الله)


وما أسعدني حينها هو عدم وجود الاحبال الداخلية التي يمكن استغلالها في الصعود من طبقة لاخري

فكل يعرف مكانه ويستقر به راضيا بذلك دون محاولة التسلق لأعلى رغما عني

فربما تكون النتيجه مما لا يحمد عقباه .


ولكن ماذا لو عادت الآن هذه الطبقة الوسطي ؟؟؟؟


انها لم تود العودة لمطالبة بعض الأشخاص بها أو أن أحد المنزلقين عاد ليطالب

بحقه في مكانه اعلى من ذلك وضيقه من سكان هذه الطبقه الدنيا


لكنى أراها تعود حين تجد مؤسس جديد ... لم يرق للطبقة العليا ولا هو ممن يجب وضعهم في القاعدة .


أين أضعه لا اعلم ؟؟؟


هو أقل من أن يوضع في القمة خصوصا وأن القمة ممتلأه بأهلها

ولا يستحق مني أن يوضع في الطبقة السفلي ( فهو عندى أهم )


لا أعرف أين يمكن وضعه في هذا الهرم الضيق ؟؟؟؟


أم أحاول إعادة الطبقة الوسطي .. وعلي وقتها أن أتحمل النتائج ؟؟؟؟

نتائج ربما تخص بعض المنزلقين إلي القاعدة بالعودة الي منازلهم المهجورة

منذا أكثر من عام تقريبا


وربما تكون نتائج متعلقة بتطفل البعض طمعا في هذا المكان الجديد


ماذا عن هذا الغريب ؟؟؟؟؟


لم اتخذ القرار بعد

غروب

الأحد، 9 مايو 2010

تاج الفل


بسم الله الرحمن الرحيم


بقالي كتير مش اتعرضت للمسائلة التاجية وقد حان الوقت


قوانين التاج كالآتي


اذكر اسم من طلب منك حل هذا الواجب


اذكر القوانين المتعلقة بهذا الواجب


تحدث عن ستة أسرار قد لا يكتشفها من يقابلك للمرة الأولى


حّول هذا الواجب إلى ستة مدونين، واذكر أسماءهم مع روابط مدوناتهم في موضوعك


اترك تعليقًا في مدونة من حّولت الواجب عليهم؛ ليعلموا عن هذا الواجب



وصلني التاج من ( سحر حازم ) فلة الكنانة .. صديقتى وشقيقة ايناس انتيمتى


تم ذكر القوانين


ستة أسرار


أذكر أني جاوبت على هذا السؤال مسبقًا وكانت الاجابة باختصار شديد


( أننى من الشخصيات المرئيه .. ببساطة يمكن معرفة ما بداخلى من أول لقاء )

وهذه هي وجهة نظر الأخرين عني


لكن إذا تحدث عن نفس الأشياء من وجهة نظري


من يراني لأول مرة ربما يعتقد أني شخصية جادة

ولكن بعد أقل من نصف اللقاء يكتشف الوجه الآخر الأكثر مرحًا

شئ غريب لاحظته مؤخرا وهو أن كل من يراني يوجه إلي تهمة ( الحزن الشديد ) وذلك من خلال عيني

ولكن العكس هو الصحيح وان كانت هناك بعض لحظات الحزن بالطبع مثل باقي البشر

شئ ربما لا يعرفه الكثير وهو قدرتي على الضحك والبكاء في نفس الوقت

ليس من منطلق الخبث أو غرض الخدعه .. ولكن هى طبيعتي

فأنا ملوله لا أحب أبدا الاستمرار في شئ مدة طويله وبذلك يكون كلا من الضحك والبكاء صادقين إلي حد كبير

احب الجلوس بمفردي أطول وقت ممكن

شئ ربما عرفه البعض مؤخرًا وهو كراهيتي الشديدة لمنظر الشروق

فإذا تعرضت لرؤيته رغمًَا عني يظل يومي قاتمًا وحالتي النفسيه أسوء ما يكن

ذاكرتي دائمًا تلاحقني

that's enough


أقدم هذا التاج إلي كل من


دندنة قيثارة الوجد





ميلاد جديد

وحالا سوف يتم اتخاذ اللازم بالنسبة للشرط الأخير

غروب

الجمعة، 7 مايو 2010

علاقات خاصة جدا



بسم الله الرحمن الرحيم




بما ان الرغي شغال معايا تمام اليومين دول .. فأكمل رغي بقه مش مشكله


النهارده كان يوم الجمعه .. وده اليوم اللى متعودين كلنا كعائله نتجمع فيه عند تيته




وفعلا اتجمعنا كلنا .. وطبعا كالعاده هزار وضحك وخناق احيانا وشد شعر عادي يعنى


لكن في الآخر كلنا اخوات وحبايب




النهارده وانا قاعدة في وسط عائلتى حسيت إنى فعلا بحبهم أوى وكل واحد بحبه بشكل مختلف عن الآخر


انا طبعا مش باتكلم على الكبار لان دول خارج الحسابات دلوقتى


أصل احنا كعيال يعنى , فينا عادة حلوه أوى ألا وهي :




لو واحد فينا مثلا زعلان من خاله أو زعلان من عمته أو مقموص من جوز خالته أو ... أو ... أو


ف بنفصل خالص .. احنا مع بعض نفضل كويسين بغض النظر علاقتنا بالكبار ازاى


مثال بسيط : انا زعلانه من خالى الفتره دى .. لكن ولاده اصحابي وحبايبي اكتر من الاول كمان عادي يعنى




المهم : انى وانا في وسطهم النهارده في موجه من الضحك الهيستيري لقيتنى ببص لكل واحد فيهم وبحدد شكل حبي ليه عامل أزاى ؟


وكانت النتيجه كالآتي :


شهد ودى الكبيره بتاعتنا : مش كانت موجوده لانها مع جوزها برا مصر : بجد حسيت انها وحشانى والقاعده نقصاها


سمكه : بنت خالتى وحبيبتى أوووووى ومن أقرب أقرب الناس ليه وتعرف عني حاجات محدش في الدنيا ممكن يعرفها


عاصم : أبن خالتى وصاحبي اللى بحب أهزر دايما معاه وكتير بحس انى لو وقعت في مشكله هاجرى عليه واقوله الحقنى ورغم غلاستنا كتير مع بعض وده لتقارب السن الا انى بحبه جدا .. بحب ساعات رخامته كمان .. لكن يا عاصم لما بتتنرفز عليه بتبقي غلس


عمار : ابن خالتى وراجلنا بجد .. محترم اوى... وحد جد جدا .. وبرضه بحس ان لو في مشكله مهما كان حجمها ممكن يشيلها


عمرو : ابن خالى .. دمه خفيف بس عبيط اوى ههههههه بحسك ساذج .. بس بحبه برضه .. اخويه الصغير


محمد : الفتره الاخيره بجد يا محمد احترمت دماغك جدا .. لدرجه انى حسيت انى ممكن ارتبط بيك عاطفيا ههههه مع العلم انه اصغر منى يجي بخمس سنين .. لكن بجد اعتقد فيك شخصية الاخ اللى كنت اتمناه


سميه : بنت خالتى وصاحبتى الجديده .. دماغ طاقه .. ضحكه جنان .. بنت مسليه اووووووووى ومتعرفش يعنى ايه نكد ولا اكتئاب


بحبها جداااااااااااا ومن اكتر الناس اللى بحب اقعد اضحك معاها في العيله ... لكن لما بتفق انا وهى على عاصم بتبقي وقعتنا سودا


عبد الرحمن : اخونا الصغير .. وتريقتنا كلنا .. بس واد طيب


اسراء : اصغر واحده .. بنوته مطيعه .. روحى يا اسراء تروح تعالى تيجي في ثوانى .. بنستغلها اسوء استغلال


يعنى .. بس بجد بحبها اوى وبشوف فيها نفسي وانا طفله في سنها


طبعا دول اللى موجودين حاليا : لكن مش هانسي فريد وعلى ولاد خالى حبايبي .. وحشونى اووووووووى ربنا يرجعهم

بالسلامه


وبلال كمان : ربنا يوفقك ويرزقك الذرية الصالحه


وأحمد ورنا ولاد خالى : مش بتجمعنا الظروف كتير .. لكن برضه ولاد خالنا وبنحبهم كلنا




النهارده بقه كنا بنتفق على المصيف وبنحدد مواعيد كل واحد فينا علشان اللى بيدرس واللى بيشتغل واللى مسافر




اعتقد هايكون مصيف جامد جدااا لاننا بقالنا اربع سنين مش صيفنا سوا




واكيد ان شاء الله هاكتب نشرة أخبار المصيف هنا




افتركت حاجه دلوقتى : دايما عند تيته في البيت الكبير كنا نفتح أى دولاب حتى دولا جدي الله يرحمه كنا نلاقي أسامينا مكتوبه حسب الترتيب كالآتى :




أحمد


شهد ( إستشهاد )


عاصم


أسماء


سارة




بس لان الباقي كلهم كانوا صغيرين واحنا كنا الكبار




الله يرحمك يا جدو




الحمد لله بجد انى عندى عائله زى دي بحبهم جدا وبيحبونى جدا وبنشيل بعض كلنا فى أى أزمة من أى نوع


خصوصا النفسيه






ملحوظه بقه على الهامش : ايناس صاحبتى ومرايتى


عاوزه اقولك : ان مهما حصل بينا من خلافات فانا لا يمكن ازعل منك ولا استحمل زعلك منى


انتى مجنونه ؟؟؟؟؟
صح ؟؟؟


يا بنتى انتى وجهاد وسلمى خلاف علاقاتى كلها ليكوا مكانة تانيه خالص مينفعش حد يقرب منها




ركزى في مذاكرتك بلا عادى ؟




غروب

الخميس، 6 مايو 2010

أنا لسه صغيرة


بسم الله الرحمن الرحيم


الاول : لينك الجزء التانى من نسيان دوت كوم على مدونة ( قرأت اليوم )



مش عاوزه حد يستغرب من عنوان البوست بس هى دى الحقيقه



انا فعلا لسه صغيره



ناس بقه تسالنى يعنى ايه لسه صغيره ؟؟؟ وصغيرة على ايه بالضبط ؟؟؟ انتى فاكره نفسك سعاد حسني ولا ايه ؟؟


هاقول ببساطه احسن منها ههههههههههه



المهم : اللى خلانى اكتب البوست ده هى المواقف الآتيه :



اولا : حوار ليه مع سلمى ( واحده من مربع صديقاتي الانتيم) اتناقشنا فيه عن السن المناسب للانسان اللى المفروض



واحده في عمرنا ترتبط بيه



وبما اننا في بداية العشرينات .. يبقي المفروض نفكر في شخص في وسط العشرينات او تلتها الاخير بالكتير وده كان



رأى سلمى واللى كنت أنا باختلف معاها فيه ( ولازلت مختلفه )



انا شايفه انى في عمرى ده المفروض انى أرتبط بشخص لا يقل بأى شكل من الأشكال عن 30 سنه يدوب الفرق كده



كويس



طبعا بنات كتير هتشوف كلامي غلط بس انا لسه مقتنعه بيه .. ودى يمكن تكون النقطه الاولى اللى هاتخرج عن العنوان
ثانيا : الفتره اللى فاتت كنت على وشك الارتباط والشعور بالحب مع شخص ثلاثينى زى م انا محدده من الاول .. لكن



اكتشفت في وقت قصير انه مش هاينفع .. لانى ببساطه حسيت ( انى لسه صغيره )



مش صغيره عليه .. لكن صغيره انى احب اصلا دلوقتى



حاسه انى في مرحلة التكوين .. مش مرحلة الارتباط



واعتقد مش هافكر في الموضوع ده دلوقتى خاااالص .. عاوزه اخد وقتى خصوصا وانى مبقاش عندى استعداد لخوض



اى علاقة عاطفيه ..والحمد لله انى بدون جروح تتسب في انى اعجز بدري



ثالثا : لما جت الانسه ايناس ( واحده من مربع صديقاتي الانتيم برضه ) اتهمتنى بحب شخص ما بعينه .. وللاسف



وجهلى شخص آخر نفس التهمه وتخيلوا بقه مع نفس الشخص .. وأنا أحلف يا جدعان والله ما في اى شئ بالنسبة



للشخص ده ولكن لا حياة لمن تنادي



زعلت اوى لما صاحبتى اللى المفروض عارفه عنى كل شئ تتهمنى الاتهام ده



لدرجة انها توصلنى انى اقولها ( يا ايناس لو انا فعلا بحب فمش فلان هو اللى بحبه ومش هايكون )



وازاى ابقي لسه باقول انى مش مستعده للحب وارتبط بده .. وازاى اكون بافكر في رجل ثلاثينى وأحب ولد في أوائل


العشرينات ؟



لا حول ولا قوة الا بالله


غروب

الجمعة، 30 أبريل 2010

شوية رغي + تحديث

تحديث : تم نشر أول بوست على مدونتى الجديده ( قرأت اليوم )




قرأت اليوم





بجد حاسه انى بقالي فتره غايبه وساكته زى ميكون حد ظبطنى على الوضع صامت ونساني



واخييييييرا افتكر يعملنى فيبريشن يعنى هزاز بلغة الشعب المصري وترجمة الموبايلات الفاشله



حقيقي بقالي فتره مش حاسه بالحيويه والنشاط ويمكن السعادة اللى حساها دلوقتى

واللى مش كلها سعادة مبررة ( اى ان السبب يكاد يكون مجهول ) مااااا علينا

المهم بقه ان فيه شويه كلام عاوزه اقوله

الحاجه الاولى

انى عملت مدونه جديده بعنوان ( قرأت اليوم ) واللينك بتاعها في السايد بار على الشمال

ودى هاتكون ملخص اى شئ بقرأه ويعجبنى لعل وعسي حد يفوت على المدونه ويعجبه شئ ويستفيد ولو بمعلومه

صغيره ...ويدعيلي

الحاجه التانيه

انى سعيده سعيده سعيده ...... ايون تلاته سعيده

لان صاحبتى الغاليه ويمكن تكون صاحبتكوا برضه ( اللى يفتكرها يعنى ) جهاد مشالي ( حاجات عيال )

راجعه بكره المنصوره اخيرا نهائي ومش هتسافر تانى

بجد كنت محتاجه نكون احنا الاربعه سوا ولما كانت جهاد غايبه حسيت ان المربع ناقص ضلع فبدأ يدخل الهوا من كل

الاتجاهات وبالتالى باظت باقي الاضلاع

جهاد اصلا من صحباتى اللى بتدينى امل في الحياه وبتشجعنى على الاستمرار وعدم التوقف مهما كانت الصعاب

الحاجه التالته

انى اكتشفت ان الغضب ممكن يهد علاقه بأكملها



بمعنى ان اذا تفوق الغضب على حدود العلاقه بين اتنين سواء احباب او اصحاب او ايا كانت العلاقه بينهم فبالتالى بيقوم




الغضب ده باسقاط الشخص من فوووووووق لتحت بمنتهى السرعه ليه بقه ؟


السبب ان الشخص ده اصلا اجتاز كل عقبات نفس الطرف الاخر علشان يوصل لمكانه معينه .. لكن عندما اتى الغضب




وقام باسقاط الطرف الاخر فكان الطريق سهل وسلس خالى من العقبات فكان السقوط سريع جدا


بمعنى انه صعب جدا شخص يطلع لمكانه معينه في حياتى .. لكن سهل جدا ينزل منها

وده حصل الفتره اللى فاتت مع اكتر من شخصيه كانت واخده عندى اكتر من اهميتها واكتشفت ان ( قلتهم احسن بكتييييييييييير )

الحاجه الرابعه

اعتقد ان الحب الناجح هو ذلك الحب الذي يبنى على الخطط .. وممكن كمان يكون هو الحب الذي يتحول الى وظيفه




مش عاوزه حد يفهمنى غلط

انا مش اقصد ان الحب نفسه يبقي وظيفه .. لا طبعا




لان عمر اهداء المشاعر مهتكون وظيفه حد ملزم بيها

يمكن المعنى المقصود هنا .. ان الحب يكون وسيله وليس هدف

وسيله للافضل .. وسيله للتغيير .. وسيله ليست للتعبير فقط عن المشاعر

واذا وصل الحب لنقطه التغيير من اجل الاخر .. ممكن ساعتها يتحول لهدف

مش عارفه كلامى مفهوم ولا انا بخرف .. ارجع واقول .. مااااااااااا علينا

الحاجه الخامسه

هى ممكن تاخد العنوان ده ( ما بين الطاعه والسلبيه )

صعب جدا يعيش انسان مهدد بالفشل لمجرد وجود مفهوم زى الطاعه



ايوه الطاعه واجبه علينا في بعض الاحيان ولا اقولكوا.. في كل الاحيان




لكن اذا كانت الطاعه جايه ضد التيار ؟



وفي ناس تانيه ممن يتوجب علينا طاعتهم او حتى على اخرين مثلنا طاعتهم بيقولوا لا الطاعه في المواضيع دى غلط



ساعتها هتتحول الطاعه لمفهوم جديد وهو السلبية

ساعتها اما الطاعه العمياء ( السلبيه ) واما ( البر وفقط )

الحاجه السادسه

عن الانتظار

اعتقد بيكون في بعض الاحيان لذيذ رغم احساس الخوف المصاحب له دايما




وده لان غالبا الانتظار بيكون له نتيجه



ولكن ماذا لو كان الانتظار في حد ذاته نتيجه



نتيجه نتوصل اليها عندما يسود الصمت



مين عارف ؟ يمكن النتيجه تخلينا مش نبطل كلام ( تفاؤل ) ويمكن تخلينا نعرف الدنيا ماشيه ازاى ( خبره )



بس في كل الحالات باذن الله مش هيؤدى انتظارنا لــ ( التشاؤم )



الحاجه السابعه




عن الاشتياق

هنا بقه جينا لشويه احاسيس على الماشي



فعلا احساس الاشتياق احساس حلو وكل مايزيد هايكون احلى



خصوصا لو حاسس ان الاخر كمان بيشتاق ليك بنفس القدر



ولو حتى مش كان كده كفايه انك ترسم لنفسك الصوره دى

وانا اشتقت بقه ههههههههههه



انا لازم اقوله انى باتعب في غيابه عنى والكبرياء ظلمنى صعبه في بعده الحياه


د انا حتى لما باغني بيبان في غنايا حزنى مهو قلبه حتى منى ازاى ميقولش اه ؟


ازاى بس ازاااااااااااااااااااى ؟؟؟؟؟؟؟؟؟؟؟


جزء من اغنية صابر الرباعي ( واحشنى جدا )

خلى ثقتك في الله كبيره

الحاجه الاخيره
هى انه احساس راااااااااااااائع لما تمسك موبايلك تنضفه فاهم ازاى؟

يعنى تشوف مين الناس اللى مش ليها لزمه تمسحها




الرسايل المجهوله



الناس اللى مبقاش ليها لزمه تمسحها وطبعا تفرق عن الاولى



نصيحه للكل



امسك موبايلك وامسكي موبايلك وشيلي كلللل الناس واللى عاوزك ييجي يقدم طلب ويكتب اسمه في ورقه



واعملى ابليكشن للتعارف افضل



كفايه كده النهارده




غروب

 

ما بعد الغروب © 2008. Design By: SkinCorner