الأحد، 23 أغسطس 2009

الهرم




بسم الله الرحمن الرحيم


الاول : كل سنه وكل الناس طيبين بمناسبه شهر رمضان الكريم


شهر الخير اللى بنستناه من سنه للتانيه


ثانيا : انا بقول شكرا لكل اللى اتصلوا بيه يطمنوا عليه اليومين اللى فاتوا واتصلوا يقولى كل سنه وانتى طيبه يا غروب


واللى سابوا رسايل هنا كمان


ثالثا بقه وهو الكلام اللى عاوزه اقوله النهارده وهو بخصوص الهرم


بس مش خوفو ولا خفرع ولا الثالث الصغير ده


لا انا كلامى النهارده على هرم التعاملات اللى موجود عند كل واحد فينا واللى بناه صاحبه


وعمر الهرم ده مش بيكون مساوى لعمر صاحبه كما جرت العاده .. الهرم ده عمره بيكون مع بدايه نضج صاحبه


وتكوينه لاساسات الهرم


هاتكلم انا بقه على هرمى الخاص


هرم غروب


.......................................................


الهرم بتاعى كان لحد فتره قريبه اوى واخد الشكل الطبيعي لاى هرم وهو قمه ووسط وقاعده


كان في القمه الناس اللى مفيش معاهم حدود واللى ممكن اتقبل منهم اى شئ بدون زعل


ودول في الغالب مش بيبقي بايدنا نختارهم ..دول ناس بتخترق حياتنا بكل قوه وبتحتل مركز اول


وفي نص الهرم : كان موجود الناس اللى ممكن تربطنى بيهم علاقات اسريه او علاقات حميمه


او بمعنى تانى : اللى هما غصب عنى ممكن اقبل منهم بعض التصرفات وممكن تكون مش عجبانى


بس لازم اعمل مش واخده بالي


وقاعده الهرم : كان فيها الناس اللى دايما بتربطنى بيهم الخطوط الحمرا واللى مش يقدروا يتجاوزا المنطقه دى



ودول المعارف والزمايل والعلاقات الطفيفه واى حد ممكن ينزل من فوق لتحت


لكن من قريب ومع بدايه النضوج اللى اتكلمت عنها بدا الهرم ياخد شكل جديد عندى


اولا بغض النظر عن ماما لان دى فوق الهرم اساسا


وكده اقدر اقسم الهرم نصين بس


قمه وقاعده


قمه الهرم بقه فيها الناس اللى اخترقت حياتى زى مقولت وممكن اتغاضي عن اى شئ يحصل منهم


بس الغريب ان معظم اصحاب القمه مش من العائله


ومفيش حد فيهم الحمد لله على شفا حفره او آيل للسقوط في قاعده الهرم لحد دلوقتى


اما بقه الطبقه اللى في النص نزلت للقاعده ومقدرتش توصل لفوق


طبقه العيله والاصحاب والعلاقات الحميمه دى معتش ليها مكان عندى منفصل


هما موجودين بالفعل في حياتى ومش هقدر الغي وجودهم ومش معنى وجودهم في مؤخره الهرم انهم مش مهمين


لكن هما بقوا مساويين لطبقه القاعده


يعنى بقى في خطوط حمرا


اتناقشت امبارح مع اولاد خالى في الهرم ده والاتنين شايفينه غلط


وان مش هينفع ان الطبقه اللى في النص تنزل تحت وده علشان هما الاسره والعيله والظهر والسند زى مبيتقال


بس انا شايفه ان كده افضل لان الطبقه اللى في النص دي كان لازم اتغاضي ليهم عن حاجات ممكن اوى تحرق الدم


لكن دلوقتى لو بموقف عرفوا انهم تحت زى اى حد وان في خطوط حمرا هيفكروا قبل اى تصرف يحرق الدم


هيعرفوا ان كلمه العتاب والعشم ....ماتت


هقولكوا على حاجه : طبعا كل واحد فينا ليه قدوه في حياته


انا قدوتى في الحياه هو ابن عمى الكبير


دايما بشوف تصرفاته صح ..وتخطيطه لحياته وشغله وبيته صح


ابن عمى ده طبق المبدا ده من سنين


مبدا ان الهرم يكون طابقين بس


وانا شايفه انه مرتاح جدا وغير كده عرف يرسم لنفسه خطوط ومكانه محدش يقدر يتخطاها حتى افراد العيله


كنت بقول كده غلط لان دول الاهل وانك تعمل كده هتكون شخصيه مكروهه وتتهم بالغرور


وده اللى حصل معاه ..لكن نجحت فكرته في الاخر


وبقه معروف انه عنده طبقتين بس وان العيله والزمايل والاصحاب النص نص دول في الطبقه اللى تحت


وان اى واحد منهم هيعدى طبقته هيترسمله خط احمر


انا شايفه الهرم كده مضبوط وان تطبيقي ليه في اول موقف يحتاج تطبيق كام تصرف سليم


وكانت نتيجته ان اعصابي مش مشدوده بسبب تصرف حد


مش حاسه ان نزول شخص معين من درجه لدرجه تحت ماثر عليه سلبا ..بالعكس


عموما انا عاوزه رايكوا في الهرم كده ..ويا ترى ايه اشكال الهرم عندكوا ؟


غروب

29 التعليقات:

الازهرى يقول...

طيب أحجز أول تعليق الأول

الازهرى يقول...

وكمان التانى
من نفسى بقى

الازهرى يقول...

كفايه كده مش هاعمل زى ابو على
انا وهو وضع خاص

noon kiko يقول...

ايه الانانيه دى يا ازهرى تاخد التلت مراكز الاولى طيب ياعم
واشمعنا انا

noon kiko يقول...

معلش كنت بركن التعليق الاولانى بس وادينى هعلق بجد
اولا حلوه اوى فكرة الهرم ابو دورين
انا سمعت عن اتوبيس بدورين..بيت بدورين لكن هرم بدورين جديده دى
ثم يا بختك ان عندك دوري
دانا كله عندى ماشى دور واحد
معادش عندى vip
ولا حد له خاطر ولا عشمانه فيه فازعل منه
حطيت امى فى مكانه بعيده اوى
وغيرها كله مكانه واحده
بقول بس لما ربنا يكرمنى واتجوز هحط جوزى مع ماما فى قلبى واقفل عليهم
انا معنديش اصحاب مقربين اوى ولا اخوات مقربين ولا كلام فاضى
اقرب ماليا الورقه والقلم
عشان كده بقولك كويس ان هرمك بدورين
اناهرمى دور ارضى
او بدروم

كل سنه وانتى طيبه

الازهرى يقول...

لاااااااااا
موضوع الهرم ده كارثه
وأنا يا دب كنت بأناقشه مشكله بسببه فى ذكريات وقفلت التعليقات عليها قبا ما اجى على طول

انها الهرم عندى ابسط بكتير جدا
لان فوق الهرم عدد قليل جدا من اصحابى
اما باقى البشر فبحتلوا مكان بعيد عن الهرم أساسا لانى مش باحط لهم اعتبار تقريبا
وبكده مهما كانت تصرفاتهم ولا بتدى عندى اى رد فعل على الإطلاق
أما بالنسبه للأقارب بالنسبه لى فلأسباب خاصه العلاقه محدوده بقواعد منعنده هم
وده ريحنى أنا كتيييييييييييييير جدا

تحياتى دوما

الازهرى يقول...

واحده من الناس
لالالالا دى مش أنانيه صدقينى
انا طيب
أنما دا اسمه افترا

الازهرى يقول...

شوفى بقى كنت هانسى ازاى


كل سنه وانت وكل أحبابك فى إيمان وأمان وأمن وخير وسلام وطمأنينه

♥نبع الغرام♥♪≈ يقول...

السلام عليكم

كل سنه وانتى طيوبه حبيبتى ورمضان كريم علينا وعليكو

وانا سعيده قووى انى اطمنت عليكى وسمعت صوتك يارب تكونى بقيتى احسن من الاول حبيبتى وربنا يوفقك يارب ويسعدك حبيبتى وينول ليكى كل اللى فى بالك

♥نبع الغرام♥♪≈ يقول...

انا بقا مافيش اى حاجه فى حياتى لانى اتعقدت وتعبت من البشر كلهم بيضحكو على بعض وبيمثلو ادوار مش لايقه عليهم

عزائى الوحيد
حسبى الله و نعمه الوكيل

مودتى

ahmed_k يقول...

هرم أيه وبتاع أيه يا غروب
أنا ضد قوقعة العلاقات في قوالب جامده
النفس البشريه وعلاقاتها ومؤثراتها أكبر وأعمق وأعقد من أنك تحدديها بأنماط وطبقات محدده
خدي نصيحتي متعقديش نفسك بنظريات فلسفيه باليه
خليكي على طبيعتك وأشربي سبرايت

E73 يقول...

بسم الله الرحمن الرحيم
السلام عليكم ورحمة الله وبركاته

وبما اني اعتبر اعرف طبقات الهرم
وبما اني اعتبر اعرف قدوتك

هقولك اه فعلا هترتاحي قوي
ومين قال ان العلاقات الحميمة الكتير مبتتعبش!

لكن مفكرتيش ليه بتتعب؟

انا مش هقولك هخليكي توصلي للاجابة بنفسك

هرمي زي ماهو زي اللي انتي ذكرتيه في البداية

متنسيش ان الطبقة الوسطى هي عمود الهرم اللي من غيرها ينهار

وربنا خلقلنا عيونا بتدرك الألوان مش علشان نتجاهلها ونقول لأ مفيش غير الابيض أو الاسود

في كلام كتير قوي عوزة أقوله
لكن مش عارفة اقوله
مش علشان مش هينفع هنا او في التليفون
لكن لأني مش عارفة اترجم افكاره لكلام

لاسع افندى يقول...

حرام عليكى ده 3 طبقات ومش نافع
احنا محتاجين هرم 7طبقات علشان نقدر نسكن اصحاب المصالح والمتطفلين على حياتنا والمنتفعين بمعرفتنا

كل سنه وانتى طيبه ورمضان كريم

تحياتى اللاسعه

وردشان smilyrose يقول...

كل سنة وانتى طيبة يا غروب

ورمضان كريم عليكى يارب

وكل احلامك محققه باذن الله

جميل اوى ان يكون لكل منا قدوة

مثل الهرم شامخه لا تنكسر

او تتحرك بس عارفة عجبتنى قوى

فكرة الهرم ذو الدورين بس ياترى

دى ممكن تنفع مع اى حد

دمتى حبيبتى الغالية


ورمضان كريم

وحي القلم يقول...

السلام عليكم
أولا كل سنة وانتي طيبة
ثانيا
أنا مش متفق مع حضرتك في فكرة الهرم
أنا عائلتي كانت ف قاع الهرم
لكن دلوقتي وصلوا لقمته تقريبا
ممكن نقول الوسط
ودا اتعلمته من والدي - رحمه الله - وعشان كدا لقى حب من كل العائلة
تقبلي وجهة نظري

سوسو الاموره يقول...

كل سنه وانتي طيبه يا غروب اابليها مني معلش متاخره رمضان كريم يا وزه ههههههه

ماء تشرين يقول...

كل سنه وأنت الى الله أقرب

معاكى اوى في الهرم ده بس بجد المفروض أنو ميكونش في حد في قمه الهرم الا بعد وقت كبير اوى مواقف كتير لانو الحياه بتبين الناس أوى

تقبلى مرورى

غير معرف يقول...

تصور جديد ياغروب لشكل العلاقات مابينا انا أحييك عليه
لكن أنا مش معاكي في ان الهرم في حياتنا من طبقتين بس الهرم من طبقات كتير حتى مش من تلات طبقات داكمان كل طبقة ممكن يكون فيها طبقات كتير
لأن هيا دي الحياة ما ينفعش تكون مصنفة بالشكل الحاد ده
لكن أناة بحب آراءك لحد كبير
حبيبتك جهاد مشالي

*^*AL.7aAzZeEnN*^* يقول...
أزال المؤلف هذا التعليق.
*^*AL.7aAzZeEnN*^* يقول...

السلام عليكم

بجد بوست جميل اوووي و الهرم احلى ههههه

و غير البوست مدونتك جميله اوووي

ما شاء الله


اه اه اه نسيت اقول ل حضرتك كلسنه و حضرتك طيب

تحياتي و اتمنى تزوري مدونتي المتواضعه

TiTo

فشكووول يقول...

السلام عليكم غروب

كل سنه وانت بالف خير وصحه ورمضان كريم

شوفى انت اعملى الهرم اللى يناسبك وكل واحد له هرم وله اولوياته فى الحياه وكل واحد وله قناعاته اللى ممكن يبنى بيها الهرم اللى يناسبه

كل سنه وانت طيبه

آه من قلبي يقول...

والله أنا مش عارفة افيدك خالص في الموضوع دة
بس انا عندي العيلة حطاها في القمة
مش عارفة اقولك ايه
بس بجد انا اتمنى تشرفيني ف مدونتي عشان انا لسة جديدة

-_- يقول...

وقفت قدام الصورة يطلع نص ساعة

♥نبع الغرام♥♪≈ يقول...

وحشتنى قوووى
فينك بقا ليكى فتره ولا بتفتحى الميل ولا حاجه يارب تكون الامور تمام وزى ما كنتى عاوزة ربنا يكرمك يارب
ابقى طمنينى عليكى حبيبتى

ربنا يسعدك
مودتى
اختك ايناس

غير معرف يقول...

اهم حاجه نبص حوالينا صح .. عشان نرتب الهرم صح من غير ما نظلم حد ولا نظلم نفسنا ..

كل سنه وانتي طيبه ..

رمضان كريم :)
معلش جت متأخره شويتين :$

فجر يقول...

موضوع رائع ما شاء الله

الحــ ــزين يقول...

الحــ ــزين
وانتى طيبة

الحــ ــزين

aidy يقول...

حلوة فكرة الهرم دى

بس صعب ميكونش فيه وسط يعنى انتى كده يا ابيض يا اسود مفيش ألوان خالص

انا الهرم بتاعى متعدد الطبقات مش قمة ووسط وقاع بس لأ دة ادوار كتير

و كل دور له طريقة تعامل مع الناس اللى فيه وليه طريقة حب وليه طريقة تقبل لأخطائهم

والنزول من قمة لقاع مش بيكون سهل
لازم الشخص ده ينزل الاول دور دور
لحد ما يوصل للقاع وجايز يطلع بره الهرم خالص

حـــــروف متــبعترة " عــمرو الشــايب يقول...

اهلين يا غروووووووووووووووب

شكلك بتحبي المناقشة و المناكفةو انا اعشق دة

اولا الهرم زى ما بتقولي ف الاول جميل و حلو

بس انا من وجهه نظري ان العايلة بقت مش بتفيد غير باللقب و بس و بعد كدة كلة مشاغل و الحياة بتنسي

الاهم ف الهرم

الى بيكونوا معاكي و اصحابك و حبايبك الى بيخافو عليكي و بيتمنولك الخير

و الغالبية العظمي م ش بيكونوا من العيلة

و الهرم عندي هو الى بيحبني و بس سواء منالعيلة او من برة العيلة

و شكرا

 

ما بعد الغروب © 2008. Design By: SkinCorner