الحب المستحيل
منذ أسبوع مضى
01 يناير, 2012
كانت أجمل ليلة رأس سنة مرت عليها
طبعا .. مهي السنة دى مختلفة جدا عن أى سنة فاتت
السنة دى مش هتحتفل بيها لوحدها .. ولا حتى مع أصحابها ,, أو قرايبها ,, أو .. أو
السنة دى احتفلت بيها مع حبيبها اللى بيموت فيها .. زى مبيقول دايما
أول م الساعة دقت 12 بالضبط ,, رن تليفونها بأجمل نغمة هى اختارتها تكون ليه
" بحبك أد عمرى ,,,, قبل عمرى ,,,, بعد عمرى "
حب يكون اول ساعات السنة الجديدة معاها هي
اختارها دون الناس كلهم تكون معاه في اول ساعات السنة الجديده
ردت عليه : قالت مش معادك تتصل دلوقتى !!
قالها : النهارده مش اى يوم .. ولا احنا زى اى حد
كل سنة وانتى مراتي وحبيبتى
كل سنة وانت كل حاجه
اوعى ف يوم تزعلى مني .. وان كنت زعلتك غصب عني ... " انا اسف "
اوعى انت تتأسف تانى .. انت اكبر عندي من اى كلمة اعتذار
بس انا غلطت وزعلتك من شويه صغيرين
قصدك السنة اللى فاتت
هتنسي بسرعه ؟؟
فاتت سنة حضرتك
بحبك
بحبك
وفضل معاها لحد م نام
وفضلت بعده تقرأ كل رسايل السنة وتستعيد مناسبة كل كلمة منه ونامت على رسالتة
" ب ح ب ك "
وفتحت عيونها على أجمل حلم وأجمل هدية وأجمل سنة باذن الله
سنة هتجمعها بيه في بيت واحد ان شاء الله
انتهى
غروب
25 ديسمبر, 2011
انا في حاجة بتحصل قلقاني أوى
بس غروب عارفه كمان ان في فرق بين القلق والزعل
ماشي ماشي
الفتره دي انا بتعامل في البيت معامله سندريلا
بس مش سندريلا الخدامة طبعا هههههههه
لا بس انا اقصد انها معامله كويسه لدرجة انى بقيت أدى أوامر
تقريبا انا المحرك الأساسي لشخصيات كتيرة في العيلة حتى الكبار منهم
بقول نروح يبقي نروح .. نيجي يبقي نيجي
بقالي خمس شهور مقيمه مع تيته علشان ظروفها الصحية
حبيت أكون جانبها في الظروف دي
بس طبعا امى بتوحشنى وبيتى
فبرجع كل فتره اقعد معاها يومين واجيب تيته معايا
الفتره الاخيرة الظروف اتغيرت وبقيت محتاجه النت ضرورى
علشان بس احس بوجوده طول النهار حتى لو مش هنتكلم
بقيت لو لسه رايحه لتيته النهارده واقول يلا نمشي .. يبقي نمشي
لو زعلت في البيت ( الكبير ) يبقي كلة يسكت وينام
مفيش هزار .. مفيش لعب .. مفيش كلام
غروب متضايقه
عاوزه اخرج دلوقتى
حاضر
يلا بينا والكل بيجهز
هو انا هموت وانا مش عارفه وبيحاولوا يرضونى قبل ما اموت ؟؟
انا بقيت حاسه بجد ان الدنيا بتلف حواليه
بتتحرك حسب رغبتي
بس ده في اطار العائلة بس
وده اللى مخوفنى بقه
او مسبب ليه القلق اللى قولت عليه في الاول
لانى خايفه أحب ده او اتعود عليه
وبعدين مع تغيير حياتي
وتغيير الاشخاص المحيطيين بيه مش الاقي نفس الدوران
قلقانه انى مفضلش سندريلا
الدنيا هتقف
والناس هتتغير كمان كام شهر
وهو يمكن ميقبلش يعمل ده معايا
ويمكن يقبل وميقدرش
ويمكن يتضايق
ويمكن ويمكن ويمكن
بدأت أحس انى حمل تقيل
محدش هيقدر يشيله .. خصوصا اللى بحبه
مش هيستحمل منى اكون العضو المسيطر
اللى بيتنفذ كلامه
هيزهق من كلامى
من اوامرى
من الزززززززززززن
انا مرهقه
وتعبانه
ومتضايقه النهارده
غروب
24 ديسمبر, 2011
شوقيه وسوكا
احلى بنتين في الدنيا
من احلى راجل في الدنيا
شوقيه الكبيره
وسوكا الصغنونا او زى م باباها قال ( الست الصغيرة )
انا بحبهم خاااااااااااااالص
21 ديسمبر, 2011
بسم الله الرحمن الرحيم
انا عندي حاجات كتير أوى عاوزه اقولها
مش هتطلع مترتبه ولا متوازنه ابدا
كلام هبعد فيه عن قواعد اللغه وعن اى قيود
..................................................
عارفين ... زمااااااااان من وانا صغيرة كنت بتخيل حاجه غريبه اوى
مش عارفه كل الاطفال كده ولالأ ؟؟
انا كنت دايما بتخيل ان فيه كاميرا مرقبانى في كل تصرفاتى
والكاميرا دى كانت دايما شيفانى حلو
يمكن اللى كان بيجي في بالى وقتها هو التمثيل والممثلين
على اعتبار ان هما اللى بيتعرضوا للكاميرات كتير
وان دى هتكون كاميرا سينيمائيه مثلا
كنت بفكر كتير وتفكير جدي جدا ان حياتى مسلسل طويل وفي حد بيتفرج عليه
حد بيتفرج عليه وانا بلعب وبيضحك عليه
حد بيتفرج عليه وانا بعيط وبيعجب بدموعى
( على اساس ان الكاميرا فعلا دايما شيفانى حلو )
بيتفرج عليه وانا باكل وبشرب وبتكلم
كل تصرفاتى تقريبا حتى مشاكلى كنت بعتبرها الحبكة الدرامية
لحد امبارح بليل مكنش عندي اى تفسير لده غير انه مجرد ذاكرة طفولية
ممكن يتعرض ليها كتير من الاطفال بدون ان يبوح اى طفل بيها
امبارح عرفت ان الكاميرا دي هى عيونه
لما قالى :
انه بيشوفنى في كل حاجه
وانه نفسه يشوف كل حاجه بعملها
مش عاوزنا نبص لبعض
مش عاوز العيون تتقابل
عاوز اشوفك وانتى مش واخده بالك
وانتى بتعمل كذا وكذا وكذا
كل احلامى الطفوليه بالكاميرا لقيتها في عيونه اللى عاوزه تشوف منى كل حاجه
................................
انا انسانه خياليه اوى
مش في كل المواقف طبعا
بس انا في الحب خياليه لابعد الحدود وبحب اعيش زى الافلام والروايات اللى بقرأها
بحب أكون البطلة اللى الدنيا بتلف حواليها
البطلة اللى البطل بيجري وراها ويحايلها
اللى بيصالحها بكل الطرق حتى ولو هى اللى غلطانه
طبعا الواقع مش كده خالص
بس لقيت معاه حاجات كتير من اللى اتمنيتها
هو مش خيالى .. لكن عجبتنى واقعيته الممزوجة برومانسيه قربتها من الخيال
.................................................
عرف ازاى يخلينى اسكت
اسكت خالص ولما اجى انطق مش بعرف
مش لاقيه كلام
لما قالى
انا مش بحبك
والله العظيم مش بحبك
لان فعلا اللى جوايا مبقاش حب
في اول علاقتنا قولتلك بحبك وكنت راضي بيها اوى لانى كنت فعلا بحبك وبحس بالكلمة
لكن دلوقتى اقولك بحبك وهى مش بتعبر عن اى حاجه من اللى جوايا ؟
كلمة ضئيلة .. مش معبرة .. مش هترضينى
مش عارف اوصف اللى جوايا
بقيتى أكبر من كياني
بقيت احسك بتخرجى منى
ياااااااااااااااااااااااه .. انا سكت خالص مش عارفه اقول حاجه
قال اللى جوايا .. وبيقول معرفش يعبر ؟؟؟؟
وانا برضه صغيره كنت بتخيل ان البنت اللى من حقها المشاعر دى كله
والكلام ده كله هتكون البنت الفائقة الجمال
اللى مفيش منها اتنين
لكن هو شافنى استاهل
اسعدنى وبكاني من الفرحة وخلانى في حالة صمت لحد م نمت
...............................................
بحلم معاه بالبيت
بعمر وحليمة
بالدفا
بكل تفاصيل الحياة
أنا بحبه أوى ... بحبه أكتر م بحب نفسي
انا مقدرش انام وهو صاحي
ساعتى البيولوجية دايما بتتظبط لوحدها على مواعيد شغله حتى ولو اختلفت من فتره للتانيه
.............................................
احنا فرحنا قريب
...........................................
الدنيا ريشة ف هوا طايرة من غير جناحين .. واحنا النهارده سوا وبكره هنكون فين
انتهى
غروب
17 ديسمبر, 2011
هل لديك جديد ؟؟
نعم سأكمل .........
لحظات من فضلك ...
ستبدو إليكم عباراتي واهنة لما بين ظاهرها وباطنها
عندما يمكنني أن أتكاثر ذاتيًا ......... بالطبع سأرحل
احاول أن أقبض منه على شيء يبرد جوفي الملتهب في هذا السقيع
سيسمعني _ هو _ ودموع طفل صغير لا أعرفه
لم يهرب من حديثي اليوم ولم ير نفسه طائر يلهو على أطراف بحيرة جليدية وحيدًا
أنا معك
انتهى
غروب
الاشتراك في:
الرسائل (Atom)
