الأربعاء، 30 ديسمبر، 2009

تفسيرات خاطئة




عجبي على أيامنا

..........................................................

أو زى مقالت جهاد مشالي :


إوعاك تقولي في يوم دا حالنا مش واحد

دا الشكل زي الصوت حتى السكات واحد

والحال كدا تعبان والقسمة على واحد

خليك في حال الناس وحالنا مهو واحد


وعجبي

...................................................


في أيامنا بقينا بنوصف فاقد الثقه بنفسه أنه مؤدب

وشديد الخجل بأنه عاطفي

وفي المقابل ... نصف الواثق بنفسه أنه مغرور أو غير مؤدب


عجبت لك يا زمن

..........................................................


إلا بالحق ... هو فين دورنا في حق بعض وفين حقوقنا على بعض كبشر في النصيحه ؟


ولا تكون المفاهيم دى ماتت وأنا مش حاسه ؟


انتى بتخرفي ولا إيه اللى جرالك يا غروب .. كنتى بعقلك .. مكنش يومك يا شابه

الجمعة، 25 ديسمبر، 2009

أنا ونفسي




: هاتف

: هل لم ينتشلك لحنك الخاص من تفاصيل الأشياء إلي شمولية الرؤية إلي وقتنا هذا ؟... وهل ما زلت تدفن رأسك بين كفيك ؟

: المعادلة ببساطة هي كيفية توظيف الإمكانيات في المكان الأنسب وكيف تتلاقى عاطفتى بعاطفة مكملة لها ومماثلة وهذا شئ لا يمكن تعلمه .

( إمبارح التقينا قعدنا ع حجر .. برد وحوالينا عريان الشجر )

: لا تنتظر أن تسمع بأنك فرخ نادر السلالة ربما أوقفه كسر جناحه عن مواصلة الرحلة .

: ولم لا أتمايل على النهر عصرًا ممسكة بيديه وهي آيلة للغروب بحضن النهر .

: إذًأ للدفاع عن ذلك الحلم فلتحيطي نفسك بشرنقة من الوحدة , حتمًا ستتحلل مع الوقت ويهتف بك داخلك " أنت طبيبة نفسك "

: أين الرضا ؟

: انتهى



إنتظر ..........؟؟؟؟؟؟


غروب

السبت، 19 ديسمبر، 2009

صدمه



مازال يسمعنى .. ينظر في عينى بقوه


يسألنى عما أريد .. وأجيب عما أراد


تتسارع الأنفاس ليشيد لنا الأغراب بدفء المكان


أنا لحبيبي ( فيروز )

........................................

زي الهوى ( حليم )


لما ذا توقفنا هنا حبيبي ؟


ولما أصبحت حكايتنا


أصعب حب ( خالد عجاج )

.......................................


غروب

الثلاثاء، 15 ديسمبر، 2009

وماذا بعد ؟
















تعتلي منصة .... أنتفض .... أدمع .... غصة في حلقي .... الروح تنسحب من الأظافر .... أفتح النافذه , الجو
غائم .... داخلي أشبه بصوت يتردد في كهف مهجور ........فيعاود صداه أنات جرح قديم .

زوايا الروح في أحد أركان الغرفة تتحدث عن السلام النفسي الذي يعانق الرياح متراقصًا معها في طمأنينة , ولا يبقي لي
سوى أن أزرع زيتونة بيني وبين ظلي فقد تحيل قدري إلي قدر أفضل منه .

أتحدث إلى نفسي فلا أجد سوى دموع طفل صغير لا أعرفه يهرب من حديثي
........
إنتظر ... عليك أن تتحلي بالصبر .

سنوات وتزيد محاولا تأليف لحنك الخاص .. غداإما يكتمل وإما تقطع الأوتار فينزف ذاك اللحن وتشربه الأرض .

" التضاد الظاهر في الكون هو في حقيقته تناغم فالضد يعمل لصالح ضده " هل هى حقيقة.

ااااااااااه لو أن هذا الانسان هندس فراغيا لاسقاط عمود عليه من رحمة الله فلن يسقط ابدا

وصوت من بعيييييييييييييييد يأتى " انتظر "



غروب

الأحد، 6 ديسمبر، 2009

الحب والغيره




بسم الله الرحمن الرحيم


ازيك يا مدونتي العزيزه : وحشانى بجد

بعيد عنك بس في بالي دايما


النهارده يا مدونتى الحبيبه عاوزه اتكلم معاكى شويه صغيرين كده

عاوزه اقولك شويه كلام سر ... ماشي ؟


الأول انا عاوزه أسالك ؟

هو الحب بيجي الاول ولا الغيره اللى بتيجي الاول ؟

فهمانى ؟؟؟؟؟؟؟؟؟؟؟
يعنى هو انا احب الاول وبعدين أحس إنى باغير على حبيبي مثلا ؟
ولا أغير على شخص ما .. وتكون دى علامة تؤكد حبي للشخص ده ؟


انتى طبعا عارفه انى غيوره خالص ... صحيح مش لدرجة الجنان لكن أكيد باغير زى اى بنت يعنى


تعرفي رغم ان الغيره شعور انسانى ساعات بيكون مؤذى .. الا إنه كتييييييييييير بيكون شعور لطيف اوى


مش بس أنك تحس ان فلان غيران عليك .. او فلانه غيرانه عليك

لا انك تحس العكس ... تحس ان انت اللى غيران ... والاجمل انك تكون غيران على حد لسه مفيش بينك وبينه كلمه ( بحبك)


لسه بينك وبينه ...( نظره ...كلمه...ابتسامه...وقت ............وقت جميل ممكن تقضيه معاه )


مش عاوزين الغيره دى تتحول لسكينه تدبح بمجرد م تحس انها اخدت وضعها الطبيعي وانها خلاص بقت حق مشروع

انا خطيبك: من حقي اغير عليكي ....... من حقي اخنقك ......؟؟؟؟؟؟؟؟؟؟؟!!!!!!!!!!!

انا خطيبتك: مين فلانه ؟؟؟؟؟ وكانت بتقول ليك ايه ؟؟؟؟؟؟؟؟؟؟؟


الغيره مجرد سماعها لكلمه الحب بتتحول لشبح بيحاول يكسر كل شئ حلو

لكن في بدايتها جميله

يا ترى هتفضل كده علطول ؟؟؟؟؟؟؟؟؟هاديه ؟
ولا هو تحورها طبيعي زى وجودها ؟؟


طولت عليكي يا مدونتى ولا ايه ؟


سورى بقه ... مش ورايا شغل


اشوفك تااااااااااانى


بااااااااااااى

السبت، 28 نوفمبر، 2009

يوم مختلف تماما

بسم الله الرحمن الرحيم

اولا بشكرك يا نوسه يا قلبي على البوست بتاعك واكيد انا زيك اليوم كان مختلف عندى وكان يوم جميل ويستاهل انى اكتب عنه

http://d0rna.blogspot.com/

انا مبسووووووووووطه اوى انى في اجازه وقادره ادخل مدونتى براحتى

استغل الموقف بقه والحق ارغي باى كلام يجيب صداع قبل الشغل ووجع الدماغ تانى

الحقيقه انا كل سنه في اول يوم العيد مش بخرج عادة من البيت خالص ... بصحي بدرى ساعات بروح اصلي وساعات لأ والسنه دى مروحتش

كنت جعاااااااااانه نووووووووم ... لان بحكم انى اشتغلت وبقيت الست الموظفه على راى ماما فانا بقالي شهر تقريبا مش بمد ايدي في حاجه في البيت

وازاى بقه يكون ده الحال وفي عيد جاى ؟؟؟؟؟؟

فكان لازم انضف قبل العيد ( يوم الوقفه وقد كان ) وعلشان كده نمت كتير

صحيت على الساعه تسعه .. المفروض في الميعاد ده بنكون منتظرين عمو بيجي لينا بعد الصلاه علطول بس هو في الحج السنه دى ومجاش

وكان الدور على بابا هو اللى يروح لاخواته الصبح

قمت فطرت .. وكان مطلوب منى اكوى بقه لان المفروض انا وجهاد معزومين عند ايناس ودى اوووول مره تحصل انى اروح لحد اول يوم العيد ده

بس ظروف شغلي انا وجهاد حكمت بكده

سلمى مش قدرت تيجي .. كان نفسنا والله يا سمسم تيجي بس احنا مقدرين الظروف

المهم ... رتبت انى هتقابل انا وجهاد على الساعه اتنين كده ونروح لسلمى ناخدها ونطب على نوسه

اتقابلت انا وجوجو وكانت وحشانى مووووووووووووووووووووووووووووت مووووووووووووووووت

فضلنا نرغي ونهزر في التاكسي اللى لم يقبل باقل من خمسه جنيه في مسافه لا تتعدى ربع كيلو ههههههههههه

المهم : نزلنا الاول لسلمى فضلنا نخبط نخبط نخبط محدش فتح وكاننا شحاتين بالضبط ههههههههه لحد م طنط فتحت وقالت سلمى مش هتقدر تيجي وخلاص

نزلنا مشينا لحد ايناس

يدق الباب : تفتح البت الشغاله ( ايناس ) وهى رابطه شعرها وماسكه الشرشوبه بتمسح البلاط علشان ستها ساره وستها جهاد هينوروا البيت هههههههه

دخلنا طبعا على طراطيف صوابعنا بعد قلع الشوزات على الباب الداخلى

وبعدين قعدنا في الصالون ودخل عمو ( بجد يا نوسه باباكى رغم انى مش اول مره اتعامل معاه الا انى اكتشفت سر حبك ليه بجد ) ربنا يخليه ليكي

وبعدين فضلنا نرغي ونستعيد الذكريات وكل واحده تقول الجديد لديها في عجاله لان ايناس كانت زى الشغاله رايحه جايه على المطبخ وبتلقط رزقها من هوناك

لحد و اخييييييييييييييرا جه وقت الغدا بعد معذبتنا

وبلالالالالالالالالاش اقول ان ايناس كانت عامله رز تشحففففففففففه لدرجه انى مقدرتش اكل منه غير معلفه واحده يدووووووووب

اما باقي الاكل كانت طنط اللى عملاه وكان بجد ممتاز تسلم ايدك يا طنطى واسفين على تعب حضرتك وانا عارفه انك هتقراى الكلام ( عوووووووووو )

بعدين جهاد طلبت شاى وما ادراكم بشطاره ايناس في عمايل الشاى بصراحه

السؤال الال : جهاد تحبي شاى فتله ولا عادى ؟
السؤال التانى : تحبي الشاى مغلى اوى ولا نص نص

السؤال الثاللث : تحبي كام معلقه سكر ؟
السؤال الرابع : في كوبايه ولا فنجان ؟
السؤال الخامس : تقيل ولا خفيف ؟
جهاد قالتلها انتى ناقص تقوليلي سكر ابيض ولا سكر بنى ؟؟؟؟؟؟؟؟؟ ههههههههههههههههههههه

الحمد لله انى مش بشرب شاى ( اشرب كازوزا انا )

بعدين فضلنا نضحك بقه ونهزر بس بطريقه هيستيريه وانا كنت سعيدده اوووووووى والله

وطلبت جهاد من طنط انها تدعى ليها بالتوفيق في الشغل

سالتنى طنط ادعيلك بايه يا ساسو ؟ قولتلها بعريس هههههههههههه

واتسحبت ايناس من لسانها وحددت اسم ليه واسم لجهاد

يلا هنقول ايه غير ( آآآآآآآآآآآآآآآآآآآآآآآآآآمين يارب )

هههههههههههههههه

نزلنا انا وجهاد بعد يوم عائلي جديد وممتع جدا علشان نتكشي شويه ونرغي بقه وشويه ضحك اصفر وبعدين تروح كل واحده بيتها على امل اللقاء تالت او رابع يوم العيد باذن الله

كان يوم جميل اوى لازم اسجله وافضل فكراه دايما

انا بحبك اوىىىىىىىىىىىىىىىىىىىى يا نوسه وبحبك اوووووووووووى يا جهاد وبحبك اووووووووى يا سلمى

وانتوا اصحاب العمر بجد وربنا يخليكوا ليه

يلا تصبحوا على خيييييييير

غروب

المود بتاعى :

( انا دلوقتى بعيش في حياتى اجمل قصة حب جديد .. فرحة قلبي بحبك فرحة طفل بيحلم ليلة العيد )

الخميس، 26 نوفمبر، 2009

عيدكم سعيد

بسم الله الرحمن الرحيم

باختصار شديييييييييييد بقول للكل كل سنه وانتوا طيبين وان شاء الله تكون سنه سعيده عليكوا

عاوزه بالمره اعتذر للكل لانى نادر اوى لما بقدر اقعد على الكمبيوتر وادخل مدونات

اهداءات خاصه :

اقول لربنا : اغفرلي يارب

اقول لماما : انتى حياتى

لايناس : بحبك اوووووووووووى

لجهاد : وحشتينى اووووووووووووى

لسلمى : غيابك طااااااااال (انتى فين )

اقول لماما اموله : انسي الزعل

لمحمود : مخصماااااك اووووووى

لاحمد : اسفه غصب عنى

لاسلام : عاااااادى

لآيه : مبقتش تفرق

لخالو : الجرح زاد برساله

لعمتو : الله يرحمك (اول عيد )

H : ....................

وعاوزه اقول لسااااااااره : افرحى

وبسسسسسسسسسسسسسس

سي يو : الله اعلم امتى؟

غروب

السبت، 21 نوفمبر، 2009

حبك اجمل قدر


زى السما والليل اما يضموا القمر
زى الندى ف الصبح اما يغطى الشجر
زى الدموع وقت الجراح اما تسيل على خدود البشر
زى الضنا والفرح والشوق والحنين.............زى السنين
حبك قدر ............اجمل قدر

زى الحنين اما ياخدنا فجأه نروح معاه
زى الغريق مستنى ايد رحمه ونجـــــاه
زى الطيور وقت البكور طايره تسبح للاله
زى الحبيب؟؟؟؟ اما حبيبه يكون معاه..........حاسس هواه

حبك حياه...........اجمل حياه
انت القدر .....انت الحياه
اجمل ميعاد مستنيـــــــــــــاه

حبك قدر...............حبك حياااااه
غروب ( في شئ جديد ؟؟؟؟؟؟؟ )

الأحد، 15 نوفمبر، 2009

السلطانيه

بسم الله الرحمن الرحيم
اولا : حابه اعتذر لكل حد مش بقدر ارد عليه الفتره دى بس غصب عنى حقيقي .. اول مره اعرف يعنى ايه شغل وتعب وصحيان بدرى ونوم بدرى وارهاق
ومصطلحات كتييييييير كانت غايبه عنى
عموما ان شاء الله ازور الكل قريب
اما بقه النهارده ف اجاوب تاج جالى من البنوته العسوله همسات على ضوء القمر وانا مش اقدر ازعلها خالص
واحل التاج بسررررعه قبل النوم
انت مين بقى؟
انا باختصار : ساره او غروب
بنت عاديه في زمن مش عادى
عندك كام سنه؟
لسه من يومين كنت عامله عيد ميلادى الواحد والعشرين
هل انت متزوج ؟ وهل عندك اولاد؟
لا
دراستك ايه؟
ليسانس اداب انجليش
كم طولك...وما لونك..؟
احم احم .. ليه بس الاحراج ده ..... قصيره ولونى اصفر مايل للاخضر ههههههههههه
هل تمارس عملا بشهادتك ام عمل حر وماهو ؟
هو عمل حر وبشهادتى برضه ... ( سنتر تدريس لغات ودعايه واعلان وخدمات تعليميه )
ماهى مدة عملك اليوميه ؟
7 ساعات
ماذا تفعل بوقت فراغك ؟
بقرأ شعر واكلم اصحابي واشوف مدونتى واسرح شويه بقه مع نفسي وحاليا مفيش اصلا وقت فراغ كتير .. بستغله في النوم بصراحه
هل لديك هوايات....وهل تمارسها ؟
اكيد ... باكتب وبرسم احيانا وبسمع مزيكا وبمارسها اكيد
هل تشعر برضا ربنا عنك ؟
لا
هل تحب؟...ومن بقلبك الان؟
احم احم .. محدش بيعيش من غير حب حتى لو في خياله
مين بقلبي ؟؟؟؟
اذا كان على قلبي مليان .... بس حاليا ماما مالكه نص القلب ده
والنص التانى في عالم المجهول
لو لم تجد من تحب ....فماذا ستفعل ؟؟
اخلقه في خيالي
عندما تكون فى موقف اتخاذ القرار..تخالف الجماعه.. ام تشرك معك الاخرين ؟
بستشير اتنين في حياتى في المواقف المهمه
هل تتعامل بواقعيه؟
احيانا
ماهو الشيء الذى فعلته وندمت عليه طول عمرك ؟
انى حبيت
هل تصارح غيرك بالحقيقه ؟ ام ام تقول له مايريد سماعه؟
جدتى كانت دايما تقولى ( قوله في وشه ولا تغشه ) وانا باعمل كده دااااااااااااااااااايما
صف انسان يمكن ان تحبه عمرك كله ؟
انسان هيقدر يكسر حاجز كبير بينى وبين الحب ويمتلك النص اللى باقي من القلب
متى يقسوقلبك ؟
وقت الخيانه
من هو اول من قلت له احبك؟
احم احم ... هو اول حد قولتله بحبك ههههههههههه
سؤال بيجاوب نفسه
هل يمكن ان تحب احد من المدونين؟
حب اخوى ممكن ... حب عاطفي ... م اظنش
وهل يمكن ان يكون شريك حياتك؟
الله اعلم... كل شئ نصيب
ماذا تعنى لك المرأة او الرجل؟
المراه تساوى كلمات والرجل يساوى كلمه
فى زمن البحث عن الماده ..عن ماذا تبحث انت ؟
كلنا بندور على الماده في ظل ظروف بلدنا الحاليه .. لكنى مازلت بدور على زمن الحب الجميل
متى تعرف انك تحب ؟
لما مش بقدر انام من التفكير في حد
لما ببتسم لو فكرت فيه او انه موجود في حياتى
ماهى الشخصيه التى اثرت بحياتك ؟
كتير
ماما
ايناس صاحبتى وجهاد جداااااااااااااااااااااااا
واخ
هل يوجد من تراه سعيدا فى الدنيا ولماذا ؟
محدش بقي بيرضي عن حاله .. كله بيسعى وراء اللا نهائي
ماهى درجة صراحتك ؟
اعتقد اقصي درجه
وماهى المواقف التى يمكن ان تكذب فيها ؟
مش عارفه .. بس يمكن احيانا بتكون لما اكون عاوزه اتفادى مشكله مش ليها معنى
هل يتغير الحب بعد الزواج؟
لسه مش عارفه
فيما تفكر الان ؟
بفكر في مشكله جامده في شغلى مش قادره اتصرف فيها ... ويا ترى هقدر احلها واسلم شغلي في ميعاده ولا لا ؟

لو لم تعيش بمدينتك؟؟؟فاى مدينه اخرى تفضلها ؟
بموووووووووووووت في المنصوره وممكن اتخنق لو طلعت براها
من اول من ياتى ببالك لتحكى له اسرارك؟
ماما
من هو الد اعدائك؟
لسه مش اكتشفته
من هو صديقك؟
زماننا يندر فيه وجود الصديق ... ولكن عندى ايناس وجهاد وسلمى ودول الحاليين
وكانت آيه ( بتبعدنا الظروف )
وطبعا ماما اموله : امى وصديقتى وحبيبتى
وكان فيه حلم اخ ورااااااااااح لحاله
لو الدنيا كلها زيك....لمن تقول هذه العباره ؟
لعمو احمد ( جوز خالتى )
راجل لو الدنيا كلها زيه يمكن كان حال الدنيا اختلف
ربنا يخليه لينا
ماذا تكره فى الحياه ؟
الخيانه غير المبرره
ماذا تحب ؟
بحب الحياه وبساطتها وبحب اعيش
كيف تواجه مايضايقك وماذا تفعل عند المفاجآت ؟
لومتضايقه افضل اقعد لوحدى .. بس لو متضايقه لدرجه البكاء بروح لماما جررررررررررى
والمفاجات بقه : اكيد بتفاجئ ههههههههههههه
لو معاك فلوس اكثر مما تتخيل...فماذا ستفعل بها ؟
هشترى عربيه ليه لوحدى ومش هدى المفتاح لحد
هل الفقر يصنع حبا؟؟
مستحيل ... الفقر بيقتل لحب بس
وماذا لو وجد الحب فى زمن الفقر المادى؟
هو اكيد موجود .. لكن يا ترى نهايته ايه ؟
ماهى اقسى صدمه تعرضت لها حتى وقتنا هذا؟
الخيانه والفراق
كان رد فعلك؟
انهيار عصبي والعلاج لفتره طويله
هل تعلمتى منها شىء؟
قسوه القلب
هل انت على استعداد لتلقى صدمات اخرى؟؟
قبل الصدمه الاولى كان لا لكن حاليا بكل امتنان(الضربه اللى متموتش صاحبها بتقويه )
كيف ترد على من لاتصدقه ؟
لوحد حسيت انه بيكدب عليه بقول غالبا بسخريه شديده ( امممم يمكن !!! )
اذا احببت انسان ما ...هل تصرح له بحبك ؟
ايوه ....بس لو سيت انه بيبادلنى الشعور واكيد مش هتكون صريحه
ماذا ا تفعل لو لم يتجاوب معك؟
سؤال صعب .. مش عارفه
هل تؤمن بالمثل القائل:انا احب فانا اعيش ؟
جداااااااااااااااااااااااااااااااااااااااااا
ماهى القضايا التى تشغل بالك؟
العلاقات الاسريه والتفكك اللى حاصل في بيوتنا حاليا
هل تستطيع تحقيق كل احلامك؟
لو ربنا اراد ... ليه لا ؟

هل تمتلك طموحا...وماهو؟
شغلي يكبر ... وانجح ... واتجوز بقه ههههههههههههههه
كيف ستحقق طموحك...ام سيبقى حلما فقط!!!!!!!!!!
ان شاء الله يتحقق بالصبر والاجتهاد
ماهى علاقتك بالدنيا؟
بحبها وبتكرهنى
لو لك اختيار زمن تعيش به....فماهوذلك الزمن ؟ ولماذا ؟
زمن الرسول عليه الصلاه والسلام .. علشان اخف ذنوبي
هل يمكن ان ارا ك وانت غائب؟؟؟؟؟؟؟
يمكن .. لو مهتم ... تشوفنى في كلمه في جمله في حرف
ماذا ترى فى نفسك مميزا عن الاخرين؟
مش عارفه
من اذا اقترب منك ...هربت منه بعيدا؟
امممممممم حاليا .... شبح اسمه الحب
من تقول له : قرب منى قرب ...ياقلبى يا متغرب ؟

ده سؤال واجابه .. الاجابه قلبي المتغرب
ماذا تريد ان تقوم به قبل ان تموت؟
احج
اهداء التاج ؟؟؟؟؟؟؟؟؟
اقول مثلا :
معجزات ( E73 )
واى حد عاوز يجاوبه
بس كده
سورى بقه الاجابات مختصره وكان نفسي ارغي اكتر واصدعكوا بس فعلا تعبانه وعاوزه انام علشان هصحي بدرى اوى
ادعووووولى

الخميس، 12 نوفمبر، 2009

بسم الله الحمن الرحيم
12/11
كل سنه وانت طيبه يا ساسو

والله وكبرتى يا بنتى وبلغتى سن الرشد ( 21 ) مش صح كده برضه ؟؟
يمكن مع الظروف الحاليه يكون ده اسعد عيد ميلاد ويمكن تكون سعاده مؤقته ... لكن المهم انى سعيده .. الحمد لله
مش هاقدر للاسف احتفل كتير لانى باكتب البوست وانا في شغلى الجديد ( حلمى مع اعز اصحاب )
بس اكيد برضه مش هحرمكوا من التورته
ومنتظره بقه الهدايا ... ( القيمه طبعا )

يااااااه افتكرت دلوقتى ان فات سنه كامله على حفل توقيع كتاب اشرف توفيق مبسوطه يا مصر وانى كنت يوم عيد ميلادى اللى فات في الحفل ده والنهارده بالصدفه والله انطلب منى نفس الكتاب لشخص عاوز يقراه ... يعنى الكتاب كان في ايدي في نفس اليوم من سنه
الايام بتجرى اوى

مش عاوزه انسي : ان اول حد قالي كل سنه وانتى طيبه يا ساسو هو استاذ( احمد ك ) .

اسيبكوا مع التورته بقه
باى

الأحد، 1 نوفمبر، 2009

دموع القمر

من ذا يعلو اليك يا قمرى ؟
ومن يجفف دموعا لست تملك غيرها الان
منذ متى وانت تبكي ؟
اتعود كوكبا ؟
لقد اعتدتك باسما لا تفهم معنى البكاء
وليس غضب السماء بشئ جديد
ولا ثوره الارض
ولا الشمس دورانها
فاعلو الى مكانك ولا تجعل الدموع وسيلتك الوحيده في التعبير
غروب

الاثنين، 26 أكتوبر، 2009

انا قلبي دليلي

( انا قلبي دليلي قالي هتحبي ... دايما يحكيلي وبصدق قلبي )
يعلم أننى الغروب ويأتينى قبل الشروق

لنبدأ سويا في استغلال الاشياء العاديه للتعبير عن اشياء غير عاديه
أشياء كانت بالماضي وسائل وتحولت لاهداف
فجر امس كنا غرباء
وليل امس اصدقاء
واليوم صرنا ......واحترقت الدنيا

واشتعل الطريق بينى وبينه ...........وهو لا يتجاوز خطوات
اشتعل بنار ابرد من لهيب قلوبنا عند اللقاء

يحتضنى وكأنى اغرق في بحر لم اسبح فيه ولم أره يوما من قبل
ويطالبنى بشعور الامتلاك

ماذا اقول ؟؟؟
( تركت له يدى لتنام كالعصفور بين يديه )

غروب

الأربعاء، 21 أكتوبر، 2009

بسم الله الرحمن الرحيم
الحقيقه انا مش حابه انى اطول عيد الميلاد اكتر من كده لانه مش يستاهل اصلا ولا انا كان قصدي منه الاحتفال ..ولكن انا انسانه طبيعتى انى بحب احتفظ بكل وادق ذكرياتى
سواء كانت ذكريات حلوه او حتى مؤلمه .. المهم انها تخصنى ومش برميها في اى حال من الاحوال
وعلشان منطولش في الحوار ده خلينى ادخل في الموضوع
عاوزه اتكلم عن الخلع .. بس مش اى خلع
الخلع بتاعنا ده بقه شئ عادى جدا زى الطلاق ويمكن اسهل كمان
بنات القاهره والمدن الكبيره بقوا بيتعاملوا مع الراجل وكانه شئ مهمل ولا ليه اى لازمه ولو مش هيوافق على شروطهم قضيه خلع مستعجله وترميه برا حياتها وعفوا في لفظ ترميه
ولكن هوا ده اللفظ الشائع بين البنات .. غير طبعا كلام تانى كتير ...ويمكن دى اسهل ما يقال
ده الخلع في بلدنا
لكن تعالوا نرجع للبلاد اللى لسه فيها الراجل محتمل يكون لسه راجل .. ولسه الست عارفه انه راجل .. يا ترى لسه الحال مظبوط ولا بدا في الاعوجاج ؟؟؟؟؟؟
هلخص كلامى في حوار دار بينى وبين احد اصدقائي ... لما تخيلنا نفسنا على خشبه المسرح وسيبنا خيالنا ينطلق وخرجلنا بالابداع ده
الصعيدي : عتريس ..... ومراته بهيه
وسمعنى سلام : عتريس مقفل راسه وحالف ما اخرج تانى من الدار ..قال ايه الغيره مشعلله قلبه وعمال يضرب نار
بهيه : بخخخخخ
عتريس : عاتخوفي ديب ؟
بهيه : انت ديب ؟
عتريس : يدوب
بهيه : لع متتكلمش عن الديابه .. انت مش عارف انها عيلتى ولا ايه ؟
عتريس : عارفكوا ديبه ديبه ...خليهم ياجوا يستخبوا ورايا
بهيه : احنا منخافش واصل
عتريس : يا بوووووى هع هع هع
بهيه : بجولك ايه يا واد عمى
عتريس : جولى
بهيه : جريت البوست الجديد بتاعى ؟
ملحوظه : بهيه مثقفه وبتتكلم انجليزى بتعطيش الجيم
عتريس : عا تجولى ايه يا مره انتى ؟
بهيه : يا بووووى ع المخ التخين .. عا جولك جريت البوست الجديد ؟
عتريس: احنا مخنا تخين واااااصل .. آنى لا بوست ولا عضيت .. عيب يا حرمه كلامك الماسخ ديه عاد
بهيه : هع هع بوست اييه وعضيت اييييه ؟ آنى اجصد الموضوع الجديد يا راجل
عتريس : يا مره و انا عا روح اشوف ايه و اهبب ايه ؟ اذا كنت ااااني اللي مجطع الموضوع بالفاس .. عاروح اسخمط ايه عاد
بهيه : يا راجل روح شوف شكله الجديد ولا آنى مستاهلش؟
عتريس : انتي ؟ دا انتي تستاهلي الدبح قمااان
بهيه: به به به ... لييييه عاد ؟
عتريس: عندبح لك خروف يا وليه
بهيه : تشكر يا خوى
عتريس : وتستاهلى الشي قمان
بهيه: خلاص يا راجل انت بطل حديتك الماسخ ديه عاد .. انت فاكرنى مفهماش اللى انت تجصده
عتريس : انا اللي حديتي ماسخ يا مره محسوبة غلط ع الحريم ؟
بهيه : لع بجه آنى واخده على خاطرى منيك
عتريس : عا تزعلي ليه ؟ هو اااني غلطت فيك و اللا حاجه ؟ دا اني حتى بارص لك كلام ملييييح جوي
بهيه: مش عيزاه .. الله يسامحك .. بس آنى عاشتكيك لامك
عتريس : انتي قلتي ايه ؟؟؟ عا تشتكيني لامي ؟ احنا برضك عندنا بيشتكوا الردااالة للحريم ؟ يا بووووي .. انتي مش صعيدية واااصل
بهيه : لا يا خوى صعيديه .. بس انت كلامك مش زين ولازملك كبير يردك وامك كبيرتنا
عتريس : الصعيدية الصح ما تجولش الكلام الماسخ اللي عا تجوليه ده
بهيه : عتريس : طلجنى
عتريس : مين ميتى يا حرمة ولد الصعيد بيكون كبيره حرمة ؟؟؟؟
بهيه : معرفاش .. بس من يوم مسافرت و انت جاعد عنديك وتلاجى البنته رايحين جايين جصادك وناسي اهلك وناسك
عتريس : ليييييه ؟؟؟ حصل اييييه ؟ ماااااني لسه جاااي من عند ناااسي من اسبوعين
بهيه : خلص الكلام يا ولد العم طلجنى بدل ما عاخلعك
عتريس : انتي شكلك ها تباتي في تربتك بريحة دمك يا مره
بهيه : احنا صعايده ايوه .. لكن الخلع للجميع ومرت ابو حمدان خلعت جوزها اولت امبارح
عتريس : جلت لك اجفلي خاااشمك يا حرمة
بهيه : مجفلاشي
عتريس : عا ادشدش لك دمااااغك كيف البصلة
بهيه : متجدرش .. الجانون الجديد مع النسوان
عتريس : و من ميتي احنا بنمشي بجانون ولاد البندر يا حرمة ؟
بهيه : من دلوج
عتريس : طب روحي من وشي عاد احسن العفاريت عا تتنطط نططططيط قدامي
بهيه : طلجنى احسنلك
عتريس : لك اهل يترد عليهم يا مره
بهيه : انى رايحه لدوار آبه العمده عاشتكيك ليه
عتريس : تبقي بنت بوك صحيح لو خرجتي من البيت .. لو خرجتي ما عا ترجعيش على رجليك واصل
بهيه : اما نشوف يا ولد العم .. آنى خالعه ..وعاخليك عبره لكل رجاله الصعيد
عتريس : خالعة ؟ يا بت عيب .. عا تخلعي باب ؟
بهيه : الرجاله بجوا اكده ..ملهومش عازه عندينا
عتريس : دي تبجى معرة لاهلك يا ام مخ تخييين
بهيه : لع آنى مثجفه وعارفه حجوجى والجانون معاى
عتريس : الكلام ده يجولوه بنات البندر .. انما بنااااتنا بنات الصعيد ما يجولوش اكدييه
بهيه : لو راجل صح طلجنى .. آنى مش طيجاك
عتريس : لو راجل ؟؟؟؟؟؟؟؟؟؟؟ ... انا راااااجل غصب عنك و عن بوك و اهلك كلااااتهم كليلة .. و ما عاطلجش .. و اعلى ما ف خيلك اركبيه انتي و اللي جابووك
بهيه : احترم نفسك يا واااااااد .....عاتغلط ف بوووووى ؟؟؟؟؟
عتريس : و يا تجعدي اهنيييه زي الجزمة الجديمة يا هاجقطع رجبنك و اغسل عارك يا فااااجرة
بهيه : به به .. يا وجعتك السوده..جزمه ؟ وفاجره
انتهى الحوار هنا .. واتفقنا ننشره في كل مجلات الصعيد ههههه وكانت هنا البدايه
يا ترى وصلنا يا بنات لحد فين ؟؟؟؟ ووصل بينا الاحترام لحد فين ؟ ؟؟ وكلمه راجل بقت تعنى ايه ؟
وهل لو البنت فعلا مقدره معنى الراجل والرجوله بتلاقي مقابل .يعنى هل الراجل نفسه بيقدر ده ولا بيستغل الموقف
طب سؤال اخير بقه ايه هى الرجوله اصلالالالالا ؟؟؟؟؟..وتفتكروا الرجوله بعد الحوار ده بتختلف باختلاف المكان ولا باختلاف الاشخاص ؟

الثلاثاء، 20 أكتوبر، 2009

كل سنه وانت طيب


بسم الله الرحمن الرحيم


10....... 20
Happy birth day to you
كل سنه وانت ...خاين زى ما انت
تعيش وتحب تانى .. وتجرح قلب تانى
تفضل غدار انانى وجارح زى ما انت
ولا اكون انا النهايه .. ولا اكون آخر حكايه
وتزيد الضحايا اللى جارحها انت
...............................................................

كل ما صوت البحر يفكرعينى بصورتك
اندم وارجع واحمد ربي انى خسرتك
نار الجرح خلاص خلتنى بكره سيرتك
كلامك...سلامك ...حنانك ..وغيرتك
كان كله كدب وخداع
كان كله وهم وضياع
كان حلم اخره الوداع
خلالالالالالالالاص
..................................................
ولا همك عذاب سنينى ..........ولا همك يموت حنينى
كان وهم بينك وبينى
خلالالالالالالالالالاص
طبعا واجب عليه
طبعا اقدم هديه
طبعا واجب عليه
طبعا بعد التحيه
اسمع ابسط هديه غنيتها عشانك انت
...............................................
انت غرامك اسود ذكرى عاشت فيه
انت مريض مولود بالجرح وبالانانيه
انا اتمنى الموت ولا انك ترجع ليه
انا والله ..لازم تندم اوى عليه
.......................................................
انا هكبر وهشفي دائى......انا قلبي معتش باقي
انا بعتك خلاص نهائي
انا بكره ساعات لقانا ......انا هقتل سنين هوانا
كفيانا كدب وخيانه
خلالالالالالالالالالالالالالالالالالالالالاص
.........................................................
انا سيبتك لعبت دورك........انا بعت عمرى في بحورك
انا سيبتك رضيت غرورك
خلاص
انا سيبتك لعبت بيه.......انا دورى كان الضحيه
اهى خلصت المسرحيه
خلاص
انا زيك شريك وجارح......كان غدرك طريقه جامح
وانا دايما اقول مسامح
خلاص
انا زيك ظلمت روحى.......انا خنت املى وطموحى
وانا بدفع تمن جروحى
خلاص
انا هكبر وهشفي دائي..........انا قلبي معتش باقي
انا بعتك خلاص نهائي
خلالالالالاص
غروب

السبت، 17 أكتوبر، 2009

بسم الله الرحمن الرحيم

اصحابي البلوجريه : بجد وحشتونى جدا بقالي 12 يوم مش شيفاكوا ولا عارفه بتعملوا ايه من غيري

انا الحمد لله حاليا مرتاحه جدا جدا نفسيا
راحت هموم كتير من على قلبي رغم ان لسه في بعض الاثار الجانبيه الا انى احسن من الاول كتير وبحاول امحى اى شئ ممكن يخلينى مش سعيده
بحاول كمان انى اشيل اى سبب ممكن يدخلنى في مود الاكتئاب ..ادعولى
جيت النهارده افرح مع صديقي الغالى : محمد فكرى
بقوله الف مبرووووووووك على اتخاذ قرار اول ديوان شعرى ليه
بجد محمد شاعر ممتاز جدا وانا بحترمه على المستوى الشخصي وكشاعر جدا جدا وشايفه انه شاعر المستقبل حقيقي
محمد شاعر فصحي ورغم انى بلاقي كتير صعوبات في الشعر الفصحي الا ان لغه محمد دايما بالنسبه ليه لغه سهله وبتعبر عن كتير من اللى جوايا
امثال :
البحر الغريق ودى اجمل ما قرات لمحمد فكرى
ونحو امطار : قصيده راااااائعه
واقرار : رررررائعه
احبكي بحرق الحاء : بس تقيله عليه شويه يا محمد ههه
وكتير كتير
وفيه رباعيه لمحمد انا بحبها جدااااا جدا وكل اما اقراها بسرح فيها وفي كلامها بتقول :

تغنوا فى قالوا ذاك بدر
وقالوا ساحر قيل العديد
وقيل بانى حرفي بحر شعر
فاسكب منه دوما ما اريد
وآه لو دروا ان ليس حرفي وان حبيبتى البحر المديد
فيا تلك الجموع كفاك مدحا
انا نصف ولى نصف بعيد
ديوانه اسمه ( البحث عن اشياء اخرى ) قريبا ان شاء الله زى مهو قال في مدونته
اتمنى ليه النجاح من كل قلبي والله وربنا يوفقك يا محمد
غروب

 

ما بعد الغروب © 2008. Design By: SkinCorner