الخميس، 30 أبريل، 2009

اللهم اشفيها


بسم الله الرحمن الرحيم

انا الحقيقه كان لالالالالازم اقطع الاجازه التدوينيه واقدم اعتذار كبير جدا لماما اموله لانى مش سالت عنها بقالى فتره .. ومعرفتش اللى حصل لابنتها غير حاللا والله

انا اسفه يا ماما والله

ربنا ياااااااااااااااااارب يشفيها ويقومها بالسلامه وتطمنى عليها


ارجو من الجميع بالدعاء ليها ......



اللهم اننا عبيدك وبك املنا فاجعل الشفاء في اجسادنا ..واليقين في قلوبنا ..والنور في ابصارنا ..والشكر في صدورنا ..وذكرك بالليل والنهار ما بقيت على السنتنا ..وارزقنا منك رزقا غير محظور ولا ممنع ..يا مسهل الشديد , ويا ملين الحديد , ويا منجز الوعيد , ويامن هو كل يوم في امر جديد .. اخرجنا من حلق المضيق الى اوسع طريق ..بك ندفع ما لا نطيق ..ولا حول ولا قوه الا بالله العلي العظيم

اسال الله العظيم رب العرش العظيم ان يشفيها

ربنا الذي في السماء عرشه ، ربنا الذي في السماء تقدس اسمه، أمرك ماض في السماء والأرض ، وكما رحمتك في السماء ،فاجعلها في الأرض، اغفر لنا ذنوبنا وخطايانا، إنك أنت الغفور الرحيم ، اللهم أنزل رحمة من رحمتك ، وشفاء من شفائك ، على ما بامانى من وجع .

اللهم ربَّ الناس ، أذهب البأس اشفِ أنت الشافي لا شفاءَ إلا شفاؤك شفاءً لا يغادر سقمًا

الأحد، 26 أبريل، 2009


بسم الله الرحمن الرحيم

اولا قبل م احل التاج الصعب اللى جالى ده .. عاوزه انوه بان ان شاء الله ده اخر بوست ليه قبل الامتحانات
لانى هذاكر بقه .. انا قلقانه جدا الترم ده مش عارفه ليه يمكن لانه اخر ترم .. ولسه مش فتحت الكتب خااااااالص
ادعولى

وان شاء الله لى عوده بعد الامتحانات.. وان شاء الله ايضا هحاول اتابع مدوناتكوا الفتره دى
نيجي بقه للكارثه.. تاج مش كان لا على البال ولا على الخاطر جايلي من ايناس ( عاشقه الاحزان )

ولازم نعمل الواجب
بس لان التاج انا حساه فلسفي شويه وانا بكره الفزلكه .. انا هجاوب بطريقتى الخاصه بدون فلسفه لانى بحسها كدب ف كدب


بسم الله

من أنت ؟ وما الذي تفعله هنا ؟

انا حامل الهوى التعب .. من يستخفه الطرب .. ان بكيت فهو حق لى فليس ما بي لعب
كلما انقضي سبب منى عاد لى سبب ..تعجبون من سقمي ؟ صحتى هى العجب
تضحكون لاهون والمحب ينتحب ؟؟؟؟؟؟؟؟؟

ماذا افعل هنا

اخرج ما يستحق الخروج من الاعماق

إسرائيل تقصف كل جنوب ممكن بحثا عنك ، أي شمال ستقصد ؟
حضن امى لانى بحس فيه بالامان من اى شئ ايا كانت قوته .. ولو متنا احنا الاتنين يبقي انا وصلت للشمال المطلوب باذن الله

أنت مكلف بحذف حرف من حروف اللغة العربية .. أيها ستختار ولماذا ؟

يمكن لو السؤال كان اى كلمه مثلا كانت تبقي اسهل .. لانى لو حذفت كلمه مش هتاثر على حد .. وحروفها ممكن تفضل موجوده بس منفصله
لكن احذف حرف معين مش هينفع لان عدم وجوده هياثر على وجود كلمات تانيه

لو قدر لك أن تدخل السجن فما هي القضية التي تتمنى ان تدخل بها إليه؟

بكل صراحه كالعاده ... تهمه القتل ... لان في اتنين في حياتى اتمنى اموتهم مهما كانت العقوبه

بالمناسبة.. منذ متى اكتشفت نفسك؟

مش من فتره بعيده .. اكتشفت نفسي بجد لما لقيتنى باقدر اضحك في الوقت اللى بيفترض انى ابكي فيه
واكتشفت نفسي لما عرفت كلمه لا .. من بعد م اتعودت اقول حاضر ونعم

على مفترق طريق لافتتان ، اليمنى تقول ( إلى حلمك ) واليسرى تقول : ( إلى ما يحلم به البشر ) ، أي الطرق ستسلك ؟

والله بالنسبه ليه ممكن الاتنين .. لان احلامى مش مختلفه اوى عن البشر .. احلامى عاديه جدا
انا بحلم انى اخلص تعليمى على خير .. واعمل مشروع ناجح .. وارتبط بانسان بحبه وبيحبنى .. واحلام كتير شبه كده ممكن جدا تتشابه مع احلام ناس كتير
مش عارفه بقه هل ده المقصود من السؤال؟؟؟؟؟؟؟

لو كان المقصود انى هل اختار تحقيق حلمى ولا حلم الاخرين يعنى من ناحيه الايثار ؟؟؟؟؟
فالاجابه برضه بصراحه ... هحقق حلمى انا
لانى هعيش مره واحده بس اتمنى اعيش فيها سعيده وغيري يحاول يحقق حلمه بنفسه
الا في حاله واحده .. وهى انى ارتبط بانسان يكون حلمى وحلمه واحد مستعده في الوقت ده احقق حلمه

نحن لا نعيش حياتنا بل نتعلم فيها كيف نعيش» ما تعليقك؟

احنا عايشين وبنتعلم في نفس الوقت .. مينفعش اقول اننا عايشين ومش بنتعلم ولا اقدر اقول ان كل حياتنا تعلم لكيفيه المعيشه
لاننا اذا اتعلمنا من موقف معين واتكرر يبقي احنا بنعيشه .. مش لسه بنتعمله

بجملة واحدة فقط أكتب تعريفاً لكل كلمة من الكلمات التالية


الوطن
بيتى الكبير

الأم
استحاله اعبر بجمله واحده عن معنى الام

الليل
حبيبي بنتظره يوميا

الحب
عذاب حتى في حلاوته

امريكا
دوله ليس اكثر من ذلك

المراه
( الام .. الزوجه .. الحبيبه .. الصديقه .. الخ

الصمت
لغه قويه

الانترنت
عالم جميل

المسنجر
اختراع نص نص

أخترمنصباً واتخذ قرارا؟

رئيس الجمهويه ...
قرار جمهورى رقم راحد : مصر دوله اسلاميه فقط ولا مكان لغير المسلمين

قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟

لان الرجل ... رجل
والمراه ما هى الا جزء ضعيف منه
والتغييب ده جميل بالنسبه لبعضهن وانا منهن

أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل

لا طبعا ... لا اوافق
لان مش معنى انى غير مطلوبه ان الغلط عندى ... لكن انى اكون مطلوبه لارتكاب جريمه يبقي انا خبيره جرائم

إلى أين تمضي كلمات الحب .. بعد أن تقولها؟
تمضي الى من يستمع لها

هل تجد علاقة بشكل أو بآخر بين المرأة وقطاع الطرق ؟
ايوه .. قطاع الطرق بيقطعوا الطريق ويسرقوا ماديات والمراه بتعترض طريق الراجل لتسرق قلبه

هذا فراق بيني وبينك .. متى ولمن تقولها ؟
انا قولتها فعلا .. متى ولمن .. لا داعى

كيف هو غداً ؟
الله اعلم

لمن تمرر التاج ؟؟
بلاش تدبيس بقه
اللى عاوزه يتفضل طبعا

تحياتى للجميع
وهتوحشونى جدا
غروب

الجمعة، 17 أبريل، 2009

كلمتين



اللى يجرح قلبي مره مبنسهاش


اللى باعنى ف يوم هبيعه وببلاش


هبعد بعيد وهثبتلك


ان قلبي بعدك عااااااااااااااااااااااااااااااش

الثلاثاء، 14 أبريل، 2009

البقاء لله .. ام غاليه




بسم الله الرحمن الرحيم

الحقيقه البوست النهارده يمكن يطول معايا شويه ولانى لما بدخل مدونه فيها كلام كتير ورغي على الفاضي بزهق وبسيبها

فانا مش عاوزه حد يكون زهقان منى .. اللى مش عاوز يقرا بلاش وياريت محدش يرد عليه علشان مجرد المجامله

لان بجد البوست النهارده اكتر بوست مش مستحمل مجاملات ...واكتر بوست بكتبه بقلبي مش بقلمى .. كلام بكتبه مش غصب عنى صحيح لكن بكتبه وانا تعبانه انى هصدم ناس في وشها بصراحتى اللى ساعات بتقتل ناس عزيزه عليه

حاجات كتير اوى عاوزه اقولها دلوقتى .. ودلوقتى بس لانى يمكن مش هقولها تانى

مش عاوزه حد يزعل من صراحتى ...

الاول هبدا بشويه رسايل لاشخاص بعينها

اولهم اخويه : وحشتنى جداااااااااااااااااااااااااا والبقيه في حياتك ومنتظراك يا اجمل اخ .. امر بالتعديل

تانى حد : واحده .... عارفه نفسك صح ؟؟؟؟؟؟؟؟؟؟
عارفه انتى عملتى ايه ؟؟؟؟؟؟؟؟؟؟؟؟؟؟ مبسوطه دلوقتى ؟؟؟؟؟؟؟؟؟؟؟؟؟؟
اخدتى اللى انتى عاوزاه ؟؟؟؟؟؟؟؟؟؟؟؟ امتلكتى ؟؟؟؟؟؟
وصلتى لهدفك ؟؟؟؟؟؟ حققتى حلم عمرك ؟؟؟؟؟؟؟؟
كسرتى اللى عاوزه تكسريهم ؟؟؟؟؟؟؟؟؟؟
مرتاحه ؟ ضميرك مرتاح ؟؟؟

بتقولى تعبانه ؟؟؟؟؟؟؟؟ واللى عملتيه مش يستاهل عقاب من ربنا ؟؟؟؟؟؟

بجد لاول مررررررررره .. اقول فيكي انتى ... حسبي الله ونعم والوكيل

ربنا هو المنتقم

الثالث جالى امر بالحذف

رابعهم : بنت .. معرفهاش كويس

اقتحمتى حياتى اوى ودخلتينى في حياتك وانا مش ليه علاقه بيكي ؟
عاوزه تثبتيلي ايه ؟؟؟؟؟؟

انتى صادقه ؟؟؟؟؟؟ هو كداب ؟؟؟؟؟؟؟؟؟؟؟

مش مشكلتى

انا معرفكوش انتوا الاتنين

ومش عااااااااااااااوزه
فرحانه بشكلك وانتى بتثبتى للكل انك صاحبتى
لالالالا
انتى مش صاحبتى وانا تعبانه من وجودك في حياتى
انا مش عاوزه اكلمك تانى بجد..

يمكن مش قادره اقولك الكلمه دى صريحه
لكن ادينى قولتها
من فضلك اخرجى من حياتى انتى واللى يخصك


خامسهم :

انتى ..... ايوه انتى ......انا مش فهماكى ومش عارفه انتى عاوزه توصلي لايه ؟؟؟؟

بس اللى عرفاه انى هبعد .. وانى مش هعاتب لان لسه بيننا عتاب اخير ونخسر بعض وانا مش عاوزه كده

انتى شايفه ان عدم العتاب لاننا بالفعل خسرنا بعض ... اوك

براحتك بقه
انا تعبت


سادسهم :
مثلث
جرى ضلع تايه علشان يلتصق فيه ويبقي مربع لكن من اول يوم وهو مربع غير متساوى الاضلاع

كل ضلعين متقابلين متوازيين بس مش متساويين
ضلع من المربع مهزوز اوى لكن موجود

موجود علشان يحفظ شكل المربع ... علشان يفضل مربع
وضلع عاوز يتكسر ... بس كسره سمح للهوا يدخل جوا المربع ويهز باقي الاضلاع

والضلعين الباقيين متوازيين ... عمرهم مهيتقابلوا .... ماشيين سوا في طريق واحد ورايحيين لسكه واحده

ومكنش واضح ابدا بعدهم في وجودهم داخل المربع ...... لكن المربع بيتهد

الضلعين اكتشوفوا ان في ضلعين كانوا واقفين بينهم باعدينهم عن بعض بس في نفس الطريق

الضلعين مش عارفيين يكونوا شكل ثابت لوحدهم

المربع بيتكسر ..............
بيدخل هوا ملوث ..............

بيخرج هوا نضيف ........... لكن بيخرج

المربع اتكسر ................

دموع بتنزف ... لكن بلا امل


معلش يمكن الكلام اخدنى شويه ونسيت اقول انى كنت سعيده جدا بلقاء اليوم .. وسعيده بالناس اللى شوفتها

بس انا فعلا رايحه اللقاء وانا فعلا فاصله ونفسيا تعبانه مش عاوزه حد يكون استرخمنى

بس حقيقي انا كسبت اليوم ناس لطيفه جدا وناس كنت مش حباها اوى على صفحات التدوين لكن طلعت ناس جميله جدا

بشكر كل حد جه

وانشاء الله نتقابل في لقاء كبير بعد الامتحانات

معلش البوست دمه رخم شويه .. بس دي مدونتى ومش عندى مكان تانى اتكلم فيه

غروب

الأحد، 12 أبريل، 2009

بسم الله الرحمن الرحيم
طبعا بما انى كنت متغاظه اووووووى علشان مش روحت بورسعيد لماميتى اموله والناس الجميله اللى كانوا هناك
ففضلت بقه اعيط واعيط ... واعييييييييييط ... ولسه بعيييييييييييييييييييييييييييييييييط
هههههه
واذ فجأتن .. ( بتتكتب كده) لقيت البنت ريمان جايه تقولى امسحى دموعك يا امال قصدى يا غروب
هنعمل لقاء لينا ... لينا دى تعنى ( حزب فلاحين مصر ) بما ان دايما بيتبص لاهل المنصوره على انهم فلاحين مصر
مش عارفه ليه بجد ؟ مع ان بقه لا مؤاخذه احل ناس في المنصوره
الشياكه والحلاوه والجمال والطعامه وكله ...... في المنصوره .. احم احم
حد معترض ولا حاجه ؟؟؟؟؟؟؟؟؟؟؟؟؟؟
فقولنا انا والبت ريمو نعمل لقاء لطيف لمجرد التعارف بيننا كاصحاب واخوات ونسيب اللقاء الكبير اللى هندعو فيه اهل البندر لبعد الامتحانات باذن الله
خصوصا وان ماميتى اموله مشغوله في الامتحانات حاليا
فاللقاء ده باذن الله هيككون على ادنا احنا حزب فلاحي مصر المحروسه .. اهل المنصوره ( ام الدنيا )
ان شاء الله اللقاء هيكون يوم الثلاثاء اللى هو بعد بكره .. اعتقد اى حد من المنصوره هيلحق يلبس الحته اللى على الحبل ويجي ولا ايه ؟؟؟؟؟؟
ان شاء الله في نادى اطباء طلخا .......وخدوا بالكوا مش البيطرين لانه جمبه اوى .......................وان شاء الله ريمان موجوده من تسعه الصبح ( هتوزع اللبن )
وهننتظر الكل والدعوه مفتوحه لكل اللى من المنصوره وبجد هكون سعيده جداااااااااا جداااااااااا لو قدرت اشوف اكبر عدد من مدونى المنصوره بعد بكره
وان شاء الله :
هنقعد سوا كلنا في نادى اطباء طلخا وبعدين هتشوفوا المفاجاه اللى ريمان هتصدم الكل بيها وانا مش هقولها بقه .... هههههه ( فضيحه )
محدش يتاخر بقه وكل المنصوره تيجي فاهمين .. هزعل من اللى مش هيجي
ودول الناس اللى ان شاء الله جايه اكيد :
غروب ..... ما بعد الغروب
ريمان .....ملائكيه
جهاد مشالى.......حاجات عيال
ايناس .........معجزات
عبد الرحمن الشافعى ....... انا مصري
حسن حنفي ....... شيفا
حسام .....صوت الحريه
جيلان ..... بنت القسام
امجد........ محدش فاهم حاجه
بطوط...... لسه بفكر
خالد فوده........الباحث عن المتاعب
محمد العتر........ خواطر انسان
شمس الحريه
جويريه
دول اللى اكيد اكيد موجودين باذن الله
وفي ناس قالت انها هتيجي بس لسه مش عارفين الحقيقه
زى :
مسدس صغير .... لو مش جيت هخاصمك وياريت تجيب قلم رصاص زى مقولت
والشاعر الحزين
عموما .......... الدعوه عامه لكل عساسيل المنصوره .. واللى مش هيجي واكتشف بعد كده انه من المنصوره مش هكلمه بقه ماشي؟؟؟؟
سلام ومنتظراكوا .. ولو حد قرر انه ييجي ياريت يسيب ليه تعليق بانه اكيد جاى باذن الله
تحياتى
ست الكل .. هههههه ماشي يا ابو على؟؟؟؟؟؟ هههههههه
غروب هانم

الجمعة، 10 أبريل، 2009

تحديث بسيط لزوم حرقه الدم:
ماميتى اموله كلمتنى دلوقتى وهما مبسوطين ربنا يسعدها كمان وكمان يارب
وكمان استاذ احمد ك كلمنى وبيغيظنى عااااااااا انا زعلانه اوى
بس يا ويل اللى مش هيجي المنصوره
عموما واضح ان يومهم جميل ربنا يكرمهم ويجازيهم خير
بسم الله الرحمن الرحيم
انا بعيط دلوقتى
مليش دعوه بقه .. اهئ اهئ اهئ
كنت عاوزه اروح النهارده مع ماما اموله واستاذ احمد ك والناس كلهم للقاء بتاع بورسعيد
بس مش نافع اروح لوحدى وايناس انتيمتى مش قادره تروح لانها رجعت الثلاثاء من الاقصر واسوان وروحنا الاربعاء دريم بارك فهى تعبانه جدا
انا بجد كان نفسي اروووووووووووح ..
انا زعلانه خالص ..................... كان نفسي ابقي مع ماميتى اموله
وكمان استاذ احمد ك قالي امبارح انه مش رايح ولسه مش اخد قرار وجاى يقولى دلوقتى انه في الطريق اهئ اهئ اشمعنه انا بقه ؟؟؟؟؟؟؟؟؟؟؟
استنوا كده .. انا مش بعيط دلوقتى
بصوا بقه قرار ............. ان شاء الله هنعمل لقاء في بلدنا المنصوره ام الدنيا هحدد معاده ومكانه مع ايناس انتيمتى ( معجزات ) وجهاد ( حاجات عيال)
وان شاء الله هبقي انا على اتصال مع اصحابي اللى من خارج المنصوره علشان ييجوا وطبعا اللى من المنصوره لو حد فيهم مجاش هخاصمه جداااااااااااااااا ماشي؟؟؟؟؟
ويايت اللى من المنصوره يعرفونى نفسهم بقه ويعرفونى ممكن ييجوا امتى علشان خاطرى
علشان انا متغاظه اووووووووووووى ... ليه كل اللقاءات في القاهره واسكندريه وبورسعيد
مع ان المنصوره احلى بكتيييييييييييييييييير يعنى احم احم
خلاص اتفقنا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
قولولى بقه رايكوا هتيجوا ولا لا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لو هتيجوا مش هعيط بقه ولو مش هتيجوا هعيط ...يلا بس
سلام

الخميس، 9 أبريل، 2009

احساس متاخر


بسم الله الرحمن الرحيم

انا مش عارفه ايه اللى بيحصلي ومش متوقعه الاحساس ده في اليوم ده بالاخص

النهارده انا لسه صاحيه من شويه بالظبط الساعه تلاته من امبارح بعد رجوعى من رحله دريم بارك اللى قلتلكوا عليها

الحقيقه كانت رحله جميله جدا ... مش عارفه احكى التفاصيل ولا اركز في اللى بيحصلي دلوقتى ... بس الغريب ان الاحساس اللى انا فيه دلوقتى بسبب الرحله

سبحان الله احساس مجاليش من فتره كبيره وكنت بدات اقول انه خلاص مش هيجي تانى .. اتاخر عليه اوى الاحساس ده

بصوا ... انا بكون تعبانه جدا لما بحس انى مقصره دينيا ... بس اللى بيريحنى اوووووى انى برجع ابكى واندم على اى شئ غلط بعمله

بجد والله مش هتعرفوا اد ايه الدموع دى في وقتها بتبقي مريحه وجميييييييييييييييييله

من زمان اوى الدموع دى منزلتش ... مع انى حاسه انى بغلط كتير ... كتير اووووووووووى

تخيلوا بسبب الرحله الدموع دى نزلت النهارده ..

انا طبعا عارفه السبب ... عارفه مين السبب في انى احس بالذنب وابكي ندم على اخطائي

حاسه ان ربنا عاوزنى تانى ........... انا حقيقي مقصره ووحشه اوى

ومن زمان مجاليش اى رسايل تنبيه وكان ده تاعبنى اكتر

هو خلاص ربنا مش عاوزنى ؟؟؟؟؟؟؟؟؟؟؟؟؟؟؟؟؟؟؟؟؟

بس النهارده حسيت ان ربنا بينادينى تانى والله

وياااااااااااااااااارب انا بكتب وعارفه انك عارف انا عامله ازاى دلوقتى وشايف دموعى


يااااااااااااااااااااااااااااارب : انا اسفه ورجعالك بكل ذنوبي واخطائي

يااااااااااااااااااااااارب : سامحنى

يااااااااااااااااااااااااااااااارب: اغفرلي

ياااااااااااااااااااااااااااااااااارب : خلينى معاك

يااااااااااااااااااااااارب : اقبل دموعى واحساسي بالذنب

انا خايفه ....

يارب : انا بدعيك وعارفه انك سامعنى وشايفنى وعارفه كمان انك هتسامحنى وهتهدينى

علشان كده بعتلى الرساله اللى وصلتنى


يارب ابعد عنى كل شئ يبعدنى عنك

يسر لى كل الامور وابعدنى عن الناس اللى ممكن يبعدونى عنك

وانا عارفه اخطائي وهبعد عنها ............ساعدنى يارب

بحمدك يارب على الرساله دى وانها وصلت .. هى صحيح اتاخرت والاحساس اتاخر

بس الحمد لله انها وصلت دلوقتى ...


يااااااااااااااااااااااااااااااارب


انا العبد السقيم من الخطايا .. وقد اقبلت التمس الطبيب

انا العبد الشريد ظلمت نفسي .. وقد وافيت بابكم منيب

انا العبد الذى كسب الذنوب .. وصدته الامانى ان يتوب

الاثنين، 6 أبريل، 2009

انا مش ربنا



بسم الله ارحمن الرحيم


الحقيقه مكنتش ناويه اكتب النهارده خالص وكنت ناويه انزل البوست الجاى بعد يوم الجمعه باذن الله علشان احكى ليكوا اللى هيحصل معايا يوم الاربعاء مع اصحابي في دريم بارك

واللى هيحصل يوم الجمعه في اللقاء التدوينى في بورسعيد


بس الحقيقه اللى عاوزه اقوله دلوقتى مش هينفع يتأجل


اللى عاوزه اقوله : انى والله مش بنت قاسيه .. وممكن اسامح جداااااا

بس الوضع الحالى مش هينفع اسامح فيه .. السبب الوحيد مش هو انى محتقره الموضوع واصحابه وعاوزاهم يبعدوا عنى

السبب الاكبر انى مش بحب القصص الملوثه ومش بحب اعرفها لانها بتسبب لى اكتئاب


انا عارفه ان في ناس مش هتفهم كلامى ... بس مش هينفع اوضح اوى يعنى


انا عرفتها قدرا ... والحقيقه مش ارتحت ليها من اول كلمتين .. وقولت لاصحابي المقربين انى مش مرتاحه ابدا

ونصحونى ابعد مش لشكهم في الشخصيه لانهم مش يعرفوها لكن لراحتى وبس


وبعدين حسيت انى ممكن اكون ظالمه .. وقاسيه وشكاكه


وانا عارفه انى شكاكه اساسا جداااااااا ... خصوصا في معارفي اللى على النت

يعنى بمعنى اوضح علاقات النت معظمها لا يتعدى حدود الشاشه وفي كلام معين لا يمكن تجاوزه


المهم : قلت في نفسي مش تبقي شكاكه كالعاده حرام عليكي

وفعلا طلعت شخصيه سويه .. لكن برضه مش عارفه ليه دايما كنت بحس بنقطه كدب او ملاوعه مش عارفه بس دايما كنت بحاول اكون حريصه


في حاجات كتير في الشخصيه دى مش هتناسبنى كصديقه .. بس رجعت اقول لنفسي بطلي كبر نفس حرااااااااااااااااااااااااام

ورجعت تانى ... بس برضه لالالالالالالالالا في حاجه مش مريحه يا غرووووووووووب


ليه ؟؟؟؟؟؟؟؟؟؟

ما علينا

صارحتنى بحاجات كتير ... ونصحتها وساعدتها علشان تكون شخصيه قويه ثابته


بس الحقيقه جت عند نقطه معينه تصارحنى بيها ..... مقدرتش اتمالك نفسي غير وانى بقفل كل ابوابي في وشها

مش هينفع خاااااااااااااالص......الالالالالالالا


مش هينفع حتى اسمعها وهى بتصارحنى بده ... انا مش ربنا

مش هقدر اغفر .........المغفره صفه الهيه فقط فعلا


انا مش هفغر بس مش علشان انا قاسيه او انى مش متسامحه لالالالالا بالعكس انا يمكن قولت في التاج انى بحب التسامح جدا

بس لانى حسيت بقرف ....... القصه مقرفه بالنسبه ليه ...... الحكاوى خلتنى احس انى لازم اكون بعيده عنها وعن الطرف الاخر الى ابعد الحدود


انا بحب اوى القصص الحلوه .. ومش شرط تنتهى بالجواز يعنى ..... لكن تفضل نضيفه ( عفوا ) ملهاش تفسير غير كده

لكن اى قصه عكس ذلك صدقونى بتجيبلي حاله من القرف والاكتئاب الشديد وده اللى حصل معاها



علشان كده انا قررت ابعد ........... الشخصيه اكيد هتعرف نفسها من البوست

سامحينى ........ مش هاقدر اكمل خطوات الصداقه دى واللى يدوب ماخدتش مننا غير اقل من خطوه



ملحوظه بقه مهمه جدااااااااا : يا جماعه انا غيرت الميل بتاعى واى حد كان عندى هبعت ليه اضافه من الايميل الجديد وهو هيعرف انى انا غروب



بس كده انا خرجت اللى جوايه


اشوفكوا بقه بعد رحلتى الى دريم باااااااااااااارك وانتوا لالالالالالالالالا ....... نياهايهاهاهاها ( ضحكات شريره متقطعه )

وبعد يوم اللقاء التدوينى في بورسعيد باذن الله


غروب


السبت، 4 أبريل، 2009

التاج علينا حق

بسم الله الرحمن الرحيم
الحقيقه دى اول مره اجاوب فيها تاج .. جالى من ايناس (عاشقه الاحزان )
معلش يا نوسه انا مش عارفه اكلمك بقالي يومين لانى فعلا عندى برد شديد
بعتذر كمان للناس اللى مش بروح عندهم اليومين دول لنفس السبب ... ادعولى
حابه كمان اقول انى بجد زعلانه جدا لرحيل زوجه عنيده عن التدوين لفتره غير معلومه المدى
بحس كده لما حد بيسيب التدوين ان حد من بيتى ماشي والله .. يلا ربنا يصلح حالها وتقدر تقنع جوزها
نيجي بقه لحل التاج .. ومش عاوزه حد يتريق فاهمين ؟؟؟؟؟؟؟؟

أسمك ؟
ساره
المشهور بيه وسط أصحابك ؟
ساسو او غروب ... بحب اسم غروب جدااااا بحس انه جزء منى
سنك ؟
كسرت العشرين
مجال دراستك ؟
نهائي اداب انجليش جامعه المنصوره
أسم مدونتك ؟
ما بعد الغروب
صورتك الرمزيه فى المدونه بتعبر عن أيه ؟
الحقيقه الصوره الرمزيه دى ليها قصه ... ان المدونه دى كان اسمها كلمات وكنت قفلتها وفتحت مدونه تانيه بلينك تانى اسمها ما بعد الغروب ومش اعلنت فيها عن شخصيتى او عن انى صاحبه مدونه كلمات فالصوره كانت شبه تخفي ولما اعلنت عن شخصيتى كنت حبيت الصوره جدا زى حبي لاسم الغروب فسيبتها ومش ناويه اغيرها .. بس كده
هل فكرت بإغلاق المدونه ؟ والسبب ؟
انا فعلا قفلت مدونتى قبل كده ... والسبب كان بعض المشاكل الغير طبيعيه ورا بعضها وبسبب غلط بعض الناس فيه متعرفنيش اساسا
لكن حاليا مش بفكر اقفلها خالص ممكن ابعد عنها فتره لكن مش هقفلها
إيه رد فعلك لوحد قل أدبه فى تعليق ؟
اما برد عليه بطريقه تحرجه بس ده اذا كانت قله الادب تتعلق بالذوق او موضوع ممكن يتناقش واحيانا برد على كل الناس ما عدا هو او هى ومش بمسح التعليق
اما لو الرد فيه سفاله او جارح بحذفه طبعا
أسوأ مدونه ؟
مش عارفه بس اللى مضايقنى اوى وجود بعض المدونات الشاذه بيينا واللى بيطالبوا بحقوقهم ههه جتهم كسر حقهم
هيحصل أيه للأيميل بعد ما تموت ؟
هيموت معايا
أديتى الباسورد لحد قبل كده؟
باسورد ايه بالضبط؟؟؟؟؟؟
لو المدونه فالاجابه اه لاخويه
اما الميل الحالى لا مش مع حد ومش هيكون
بتعملى أيه فى أوقات فراغك ؟
بقرا اشعار لانى بحب الشعر جداااا واحيانا روايات لاحسان عبد القدوس وحاليا مهتمه جدا بالقرايه في مجال التنميه البشريه
الأكله المفضله ؟
المكرونه والبطاطس بكل الاشكال حد عازمنى؟؟؟؟؟؟؟؟؟؟؟
الصفات التى اخذتها من والدك؟
العصبيه .. والتسامح وطيبه القلب
الصفات اللى اخدتها من والداتك ؟
سرعه البكاء والحرص على صله الرحم
أكتر ست حاجات بتكرهم ؟
1. الخيانه اكتر شئ بكرهه
2. الكدب خصوصا اذا كان مصحوب بالحلفان
3. النفاق
4. القسوه وعدم القدره على الغفران
5. الامصه ( يعنى لما حد يزعل منى ياخد جمب بدون نقاش
6. عدم احترام اداب الحوار او المناقشه
وفي حاجات تانيه كتير طبعا
أكتر ست حاجات بتحبهم ؟
1. الاخلاص والاكتر انى اكون مخلصه لحد اكتر ميخلص هو ليه
2. الصدق حتى في الغلط
3. الصداقه الوفيه الدائمه
4. الاحتفاظ بالذكريات
5. عيلتى
6. احلامى كبنت
شخصيتك نوعها أيه ؟
عصبيه .. متسامحه جدا .. طيبه ..سريعه رد الفعل ربما في الخطا احيانا بس مش بخسر الناس بسرعه .. صريحه بغباء ..حساسه جداوبزعل بسرعه جدا وبتصالح برضه بسرعه يعنى ممكن ابكي واضحك في نفس الوقت والله ( عبيطه صح؟؟؟
لماذا دخلت عالم التدوين من الاساس ؟
دخلت علشان اعرف ناس هنا كنت عاوزه ابقي معاهم وبعدين حبيت فكره الفضفضه جدا
أحلى جمله قيلت فى وصف مدونتك ؟
كل رد جميل من انسان جميل يحسسنى انى موجوده في حياته ولو بنسبه قليله او حتى الوقت اللى بيرد فيه بس
أهمية التعليقات بالنسبه لك ؟
بتكون مهمه جداااااااااا في حالات غضبي وانفعالى بحس انى محتاجه لناس جمبي وطبعا ردود الثناء والمجاملات احيانا مطلوبه لرفع معنوياتى
احلى بوست كتبته؟ضع اللينك بتاعه؟
بحب جدا القصه اللى كتبتها بعنوان ( حينما اغلقت الابواب )
وقصه تانيه بعنوان اليوم مات حبيبها
أفضل مدونه قرأتها ؟
كتير جدا ... مش هينفع اقول حد واسيب حد
أفضل بوست قرأتيها ؟
برضه كتير بس في بوست لاشرف توفيق مدونه ( اخف دم )عن الماء في مصراسمه نيلها هو دمى عجبنى جداااا وضحكنى جدا ده اللينك بتاعه
الشغل بالنسبه لك أيه ؟
لسه مش اشتغلت بس بحس انه ممكن يحقق ذاتى اذا كان الشغل اللى انا بتمناه
وفي نفس الوقت انا عارفه انه شئ مؤقت بالنسبه ليه لانى مجرد م ارتبط بشخص هسيب الشغل ده بمزاجى مش بناء على طلبه
انا افضل بيتى واسرتى واولادى باذن الله
الأنترنت بالنسبه لك أيه ؟
شئ مهم جدا بوصل من خلاله لاى شئ عاوزه اعرفه وفي نفس الوقت طريقه سهله بتوصلنى باعز الناس
تمرر التاج ده لمين ؟
يااااااه اقول بس مين ولا مين ؟؟؟؟؟؟؟
الحقيقه انا مش عاوزه اهديه لحد مش بيحب التيجان فياريت اللى شايف انه حابب يحل التاج يتفضله
تحياتى
غروب

 

ما بعد الغروب © 2008. Design By: SkinCorner