الجمعة، 29 مايو 2009

حلم متحققش


حلم متحققش

يا اجمل حلم متحققش ...وعاش جوايا تاه منى
وراح للى سبق قلبي ...وداب قبـــــــــــــــلي

وساب قلبـــــــــــــــى...لبعد وغيبه تقتلنى

يا اجمل حلم متحققش

بقي لغيري مهوش ليا ...يا اجمل حلم ف عنيا

مهوش ذنبك......وايه ذنبي ؟؟؟؟

عشان الحزن يهزمــــــنى

ويبعد قلبي عن قلــــــبك

وكان حقي وكان حقك

نعيش الفرح لو مره ...ونمحى خوفنا بالمره
يحلّى حبنا المرّه

تشيل عنى ......واشيل عنك

وتمسح دمعتى يدك....وانا عارفه مهو بيدك
تفارقنى
كإن الحلم محلمنيش

عشقته .....بس معشقنيش

وكان بينى وما بينه بلاد

سرااااب عامى القلوب تعشق

وحابس كلمتى تنطق

وسايب قلبي الضعيف يغرق

يا اجمل حلم متحققش

ليه مش راضي تحلمنى
دانا طول عمرى بحلم بيك

وكنت اتمنى تتحقق


غروب

الجمعة، 22 مايو 2009







بسم الله الرحمن الرحيم



الاول : عاوزه اطمن كل اصحابي على بلوجر انى الحمد لله حليت كويس في ماده اللغه



انا حليت ورقه كويس جدا وورقه نص نص يعنى ان شاء الله اعدى





تانى حاجه بقه هقولها هى يومى التاريخي امبارح في المطبخ






امبارح راح كل افراد العيله الكبار القاهره في زياره عائليه وفضل الصغيرين اللى زى حالاتى في البيت




انا واختى في بيتنا .. وولاد خالتى في بيتهم .. وولاد خالى في بيتهم




حتى الانسه تيته راحت معاهم القاهره




انا بقه قعدت مع اختى وزهقانه اوى من غير ماما .


. فقولت اتسلي ومش لاقيه حاجه اعملها .. فقررت انى اعمل كيكه





اتصلت ببنت خالتى اخد المقادير وفعلا اخدت المقادير بس نسيت



اخد الطريقه فقولت اكيد كل الحاجات بتتحط على بعضها وتبقي كيكه عادى ولازم اثبت انى شاطره



جبت الطبق وحطيت اول حاجه الدقيق ... وبعدين حطيت البيض وقلبت لقيت شكلهم بقه غريب اوى



... قولت احط بقه السكر وحطيت سكر خشن يعنى مش باودر بقه شبه الحبوب



وبعدين قولت اعملها بالبرتقال فلقيت برتقال عندنا بس كسلت انى



اقشره واعمله عصير فلقيت تانج روحت عامله منه كوبايه عصير وحطيته على المكونات السابقه




وبعدين قولت اكيد لازم يتحط ماده دهنيه بس نسيت بنت خالتى



قالتلى ايه قمت حاطه زيت فلقيتها سايله اوى مش عجينه كده وماسك


ه نفسها فقولت خلاص احط شويه كاكو باودر وهى هتمسك شوي


ه وحطيت فعلا وبقه لونها حلو اوى



وبعدين افتكرت ان ماما بتبقي تحط فانيليا وبيكنج باودر ..


فلقيت البيكنج باودر بس لفيت على الفانيليا مش لاقيه قولت اكيد مش مهمه ..



.وخلاص كده قلبت كل الحاجات دى في بعضها




وحطيتها في القالب وتوجهت للفرن ... ان ان ان اااااه تششششششششششششششششش





جريت بقه فتحت الانبوبه وبعدين مش لاقيه الشعل


ه بتاعت الفرن يا ترى بيتفتح منين ؟؟؟؟؟؟؟




بعدين اختى شارت عليه انى اشيل الصاج اللى على الفرن دي



هلاقي الشعله واولعها وعملت كده فعلا شيلت الصاج ده لقيت الشعله شكلها غريب كده




روحت مولعه وفعلا ولعت ياهوووووووو فرحت اوى ورجعت الصاج مكانها


.. بعدين حسيت ان الشعله بتضعف كده وفجاه ................. ان ان ان اااااااااااااه



هووووووووووووووووووووووووووووب ..........



الفرن ولع والنار طلعت برا قمت بسررررررررررررعه طفيت الشعله وجريت قفلت الانبوبه




ولحد دلوقتى مش عارفه الغلطه جت منين ؟؟؟؟؟؟؟؟




طيب وبعدين اعمل ايه ؟؟؟؟؟؟؟؟؟ انا اساسا خفت اقرب من البوتاجاز تانى





فضلت العب على الكمبيوتر شويه وبعدين جاتلى فكره خطيره جدا ..


. ايه رايك يا بت يا ساسو لو حطيتيها على البوتاجاز عادى على نار هااادي



ه وبعدين لما تتسوى من تحت حطيها في الشوايه تتسوى من فوق




وااااااااااو فكره جنان وقمت انفذ علطول ..


حطيتها فعلا على البوتاجاز على نار هاديه اوى وبعدين حسيت ان ريحيته



ا طلعت بس مش ريحه كيك اوى يعنى .. فنقلتها على الشوايه




وفعلا استوت برضه بس ملهاش ريحه او ليها ريحه بس غريبه شويه



المهم جاتلى فكره تانيه انى اقسمها نصين او يعنى تبقي طابقين



واحط في النص كريمه وحاجات حلوه كده وشيكولاته

وقسمتها وطلع حتت زياده كده جيت ادوقها لقيتها استغفر الله العظي


م يارب وحشه اوووووووى وطبعا علشان شكلى ميبقاش وحش ادام اختى قولت انها فظيعه جدا

قولت طيب انا هاعمل ايه دلوقتى انا حاسه انها مش مسكره خالص



جاتلى فكره انى اعمل شربات واحطه عليها فهى تشرب الشربات ده هتبقي مسكره


وعملت الشربات فعلا وحطيته عليها .. بعدين عينكوا متشوف الا النور



بقت حاجه وحشه اوى وقررت انى اعترف انها وحشه وحطيتها في التلاجه لحد ماما متيجي وخلاص



جت ماما بقه الساعه تلاته الصبح فقولتها على الكارثه اللى


عملتها وطبعا زعقتلى جدا على توليع الفرن والمصيبه اللى كنت هاعملها .



. والحمد لله كانت جايبه بليله معاها وعوضت رغبتى في اكل حاجه حلوه



ودلوقتى الكيكه في التلاجه مش عارفه مصيرها ايه




بس خالتو بتقترح اننا نكتب عليها كيكه ونرميها في الشارع جايز القطط تاكلها



بابا من شويه كان نايم وصحي فقولتله تاخد حته يا بابا دى حلوه اوى .



.. وطبعا بابا مش بيرضي يكسفنى فقالي هاتى يا حبيبتى

عطيته حته صغيوره اوى كلها ونااااااااااااااااااااااااااااااااااااااام علطول كانها فيها مخدرات



الحمد لله على كل حال



اسكتوا مش حصل النهارده حاجه حلوه اوى ..



الموبايل وقع من الشباك من الدور التالت ونزل في الشارع فتافيت



يلا سلام بقه واشوفكوا في يوم تهييس تانى



غروب

السبت، 16 مايو 2009

شويه هزار




بسم الله الرحمن الرحيم


الاول انا متشكره اوى لاى حد سال عنى وانا مغرقه المدونه دموع


ثانيا اقدر اقول انى الحمد لله كويسه وان الدموع نزلت وجفت خلاص لكن سببها لم ينتهى بعد يعنى هى بس متاجله شويه لبعد الامتحانات لانى لازم افصل والا هسقط


ثالثا بقه : عاوزه اقول حسبي الله ونعم الوكيل فيك يا دكتور على الغريب يا .... تييييييييييييييييت


الراجل ده مش عارفه عاوز مننا ايه ؟؟؟؟


اولا احنا قسم انجليزى يعنى ملناش علاقه بالعربي غير بالصدفه


مااااشي معندناش مشكله ندرس عربي اهى معلومات عامه برضه .. لكن لازم يقدر بقه اننا غير متخصصين يعنى براحه كده وبالهداوه ويكون المنهج مناسب لناس اختارت قسم انجليزى يعنى بالحداقه كده مستواهم في العربي وحش ... ولا اقولكوا انا هاتكلم عن نفسي بس انا مستوايا في اللغه العربيه صفر على الشمال ومش بحب اذاكره وللاسف كانت اول مره اشيل ماده في الجامعه كانت في سنه تالته وكانت ماده لغه عربيه ... يبقي ينفع بقه انى لما اجى اعيد الماده الاقي ادامى كتابين مش فاهمه فيهم حاجه خالص ؟؟؟؟؟؟؟؟؟؟؟

هو دايما دكتور العربي يدخل القسم عندنا يقولنا انتوا بقه بتوع انجليزيى اللى شايفين نفسكوا طيييييييييييب هنشوووووووف ؟

طيب احنا ذنبنا ايه ؟؟؟؟؟؟؟؟


حسبي الله ونعم الوكيل

ادعولى بقه علشان همتحن عربي يوم الاربعاء


نيجي بقه لشويه التهييس اللى بيجي دايما في اوقات المذاكره


مهو التهييس بيبقي حلو اوى في الوقت ده


امبارح بليل وانا عماله اعييييييييييييط من العربي افتكرت كام موقف وكام حاجه كده ضحكونى اوووووى قمت سايبه العربي والمذاكره وقمت اتعشي بلا وجع دماغ


المهم ايه بقه اللى افتكرته ؟؟؟؟؟؟؟؟؟؟ واللى مش عارفه ليه افتكرته في الوقت ده اساسا ؟؟؟؟؟

افتكرت يوم من ايامى في الجامعه مع الانسه آيه انتيمتى ... كان يوم بشع


اللى حصل انى انا وآيه قضينا اليوم في الجامعه عادى وخلصنا المحاضرات وكان المفروض نروح ... طبعا قبل منروح الطفاسه حلت علينا وقولنا ناكل الاول


روحنا الحمد لله لمطعم جرين كورنر وياريتنا مروحنا هههههههه

المطعم شيك جدا ونايس اوى ... فيه دور اول وده لطلبه الجامعه والاكل السريع وطبعا اسعاره مناسبه للطلبه وبعدين دور فوق زى مبيتقال كده للبيزنس مينز هههههه


قولت انا وآيه نجرب الدور اللى فوق .. طلعنا وقعدنا وطبعا كل اللى فوق ناس كبيره في السن وبدل رسميه في عز الظهر وحاجه كده رسمي اوى .. المهم قعدنا زينا زيهم بالللللللظبط


وطلبنا الاوردر واللى طبعا راعينا حسابه الاول ... واكلنا وكله بقه تمام جداااااااا وبعدين طلبنا الشيك .. واحنا حاسبين الفلوس بالظببببببط


المهم جه الشيك زايد تقريبا سبعه جنيه وربع خدمه والخ الخ


وطبعا لمينا كل اللى معانا ونفضنا الشنط ووقفت معانا على اتنين جنيه وربع خلالالالالالاص هنتفضح وهنمسح الارض


المهم نعمل ايه ؟؟؟؟؟؟؟؟؟ قولنا نتصل بسمر صاحبتنا هى قريبه من المطعم في شغلها تيجي تنقذنا ... جت آيه تتصل بيها لقت موبايلها فاصل شحن


اتصلنا بيها من معايا مع العلم ان سمر متعرفنيش اوى ...ههههههه


المهم قولنا لسمر تلحقنا ..


قولت انا بقه اصلح موقفنا في التاخير في الدفع واننا قاعدين نتفرج على بعض بانى اطلب شاى واهى سمر جايه تدفعه وخلاص ..وطلبت فعلا الشاى


لقيت ايه في ثانيه ندهت للمتر ولغت الشاى احراااااااااج وطبعا البيه الرخم طلب الفلوس .. راحت آيه بكل بساطه قالتله يستنى صاحبتنا جايه وكانها بتتوسل اليه ههههههههه


المهم جت سمر وحاسبنا وخرجنا من المطب ده وراحت سمر شغلها


وبعدين المفروض انا وايه كل واحده فينا باقي معاها جنيه علشان نركب مواصله داخليه للبيت


والطفاسه حلت تاااااانى ففي مواصله تانيه بخمسن قرش بس قولنا نركبها بقه ونصرف الجنيه الباقي


دخلنا سوبر ماركت فظظظظظيع علشان نشترى لبان وطبعا جريت انا جبت بسكوته بربع جنيه على اساس ان آيه هتجيب حاجه هى كمان بربع جنيه ونمشي


لقيت آيه جابت كله لبان ووقفت انا ادام الراجل في نص هدومى وهى بتقولى اجرررررررى رجعى ده مكانه ورجعته زى الشطوره


بعدين ركبنا المواصله دى ودفعنا اللى بااااقي معانا ومروحين بقه اخر زقططه ... واذ فجاتن المواصله تعطل في نص الطريق


والسواق نزلنا نركب مواثله تانيه .. احنا بقه فكرنا انها فور فري ببلاش يعنى لقينا السواق الجديد بيقول لالالالالا ادفعوا نص اجره ههههههههههههه


وطبعا انا وآيه منفضين خاااااالص .. وكنا هنعيط


المهم الناس كلها حاسبت واحنا لا والراجل بدا يبص لينا في المرايه واحنا ولا كاننا شايفينه لحد مولنا وهننزل وطبعا الموضوع بدا ياخد شكل الجد واحمرينا واصفرينا وهتبقي فضيحه


المهم قولنا للراجل ثوانى نطلع نجيب الفلوس ... وفعلا جريت اروح اجيب الفلوس وسبت آيه لقيت الراجل مشاها وقالها يا ابله مش مشكله وانتوا باين عليكوا ولاد ناس


ومشينا طبعا ووشنا في الارض من الاحراج


وحرمنا نعمل كده تانى . بس والله كان يوم دمه خفيف رغم البلاوى دى الا اننا ضحكنا كتتتتير جدا



متنسوش تدعولى


غروب


الاثنين، 11 مايو 2009

لازم اعيط بقه


لازم اكسر لوحه ضد الكسر
لازم اعيط دلوقتى

السبت، 2 مايو 2009

بطلت انام

من يوم ميلادى .. كان من عاداتى


اسرح ف حلم


احلم واشوف .. افرح بطيف


يجينى ضي ........ اعشق اغانى


يجينى ليل........وانام تانى





لحد مجاتنى ليله محلمتش


واقوم م النوم وكأنى مقمتش



سنين احلامى مخصمانى


وكأنها سافرت لمكان تانى




احلامى كانت دنيا


بس دنيا ناسها ماتت


والموت عليّه انا بس ساكت


بس ازاى ناسي دول


ف حلم جديد عليه هانت ؟؟؟؟؟



فضلت اسال كل الرموش


ليه اهل حلمى مبيحلموش ؟

وشوشهم سودا مبيضحكوش؟

بالذمه يا عينى دى تبقي وشوش؟؟؟؟


واشمعنه انا لسه بحلم ؟


واهل حلمى عليه تندم



جواب سؤالى لسه معرفته


وكل شئ ف حياتى وقفته




لحد ليله امبارح بس


وكنت خلاص عرفت اليأس


نمت وبدات بالحلم احس




الشاشه فاتحه


وهاجمه ايد....هجوم شديد


وقلب عنيد


والايد شدانى .. على فين وخدانى ؟؟؟


رجليه سابت نصي الفوقانى




وكل جسمى بيتالم


وسمعت الايد بتتكلم




قالت بصي قدامك.. شوفي نهايه احلامك



بصيت لقيت مبنى لعين .. قلت اكيد ده بيت شياطين



علشان احلامى كانت حلوه .. رسمتلى كل يوم غنوه



لكن دخلت ومش بايدي ... بايد خنقانى


قاطعه شريانى ووريدي ومش سيبانى




بصيت لقيت ابطال احلامى


كلهم معايا وقدامى


زى الملايكه بدون جناحات


والحلم ده احلى من اللى فات



مهو الاحلام عندى غيه



بس ليه مبصوش ليّه ؟؟




وسمعت واحد منهم قالي



انتهت مهمتنا خلاص


ادينا عملنا باخلاص


جينا الحلم علشان نموت


فصحيت وبصرخ بعلو الصوت




بطلت اناااااااااام


الحلم حراااااااااااام


والنوم اجراااااااااااام


وعلشان كده النوم في ضلام



غروب

 

ما بعد الغروب © 2008. Design By: SkinCorner