السبت، 16 مايو، 2009

شويه هزار




بسم الله الرحمن الرحيم


الاول انا متشكره اوى لاى حد سال عنى وانا مغرقه المدونه دموع


ثانيا اقدر اقول انى الحمد لله كويسه وان الدموع نزلت وجفت خلاص لكن سببها لم ينتهى بعد يعنى هى بس متاجله شويه لبعد الامتحانات لانى لازم افصل والا هسقط


ثالثا بقه : عاوزه اقول حسبي الله ونعم الوكيل فيك يا دكتور على الغريب يا .... تييييييييييييييييت


الراجل ده مش عارفه عاوز مننا ايه ؟؟؟؟


اولا احنا قسم انجليزى يعنى ملناش علاقه بالعربي غير بالصدفه


مااااشي معندناش مشكله ندرس عربي اهى معلومات عامه برضه .. لكن لازم يقدر بقه اننا غير متخصصين يعنى براحه كده وبالهداوه ويكون المنهج مناسب لناس اختارت قسم انجليزى يعنى بالحداقه كده مستواهم في العربي وحش ... ولا اقولكوا انا هاتكلم عن نفسي بس انا مستوايا في اللغه العربيه صفر على الشمال ومش بحب اذاكره وللاسف كانت اول مره اشيل ماده في الجامعه كانت في سنه تالته وكانت ماده لغه عربيه ... يبقي ينفع بقه انى لما اجى اعيد الماده الاقي ادامى كتابين مش فاهمه فيهم حاجه خالص ؟؟؟؟؟؟؟؟؟؟؟

هو دايما دكتور العربي يدخل القسم عندنا يقولنا انتوا بقه بتوع انجليزيى اللى شايفين نفسكوا طيييييييييييب هنشوووووووف ؟

طيب احنا ذنبنا ايه ؟؟؟؟؟؟؟؟


حسبي الله ونعم الوكيل

ادعولى بقه علشان همتحن عربي يوم الاربعاء


نيجي بقه لشويه التهييس اللى بيجي دايما في اوقات المذاكره


مهو التهييس بيبقي حلو اوى في الوقت ده


امبارح بليل وانا عماله اعييييييييييييط من العربي افتكرت كام موقف وكام حاجه كده ضحكونى اوووووى قمت سايبه العربي والمذاكره وقمت اتعشي بلا وجع دماغ


المهم ايه بقه اللى افتكرته ؟؟؟؟؟؟؟؟؟؟ واللى مش عارفه ليه افتكرته في الوقت ده اساسا ؟؟؟؟؟

افتكرت يوم من ايامى في الجامعه مع الانسه آيه انتيمتى ... كان يوم بشع


اللى حصل انى انا وآيه قضينا اليوم في الجامعه عادى وخلصنا المحاضرات وكان المفروض نروح ... طبعا قبل منروح الطفاسه حلت علينا وقولنا ناكل الاول


روحنا الحمد لله لمطعم جرين كورنر وياريتنا مروحنا هههههههه

المطعم شيك جدا ونايس اوى ... فيه دور اول وده لطلبه الجامعه والاكل السريع وطبعا اسعاره مناسبه للطلبه وبعدين دور فوق زى مبيتقال كده للبيزنس مينز هههههه


قولت انا وآيه نجرب الدور اللى فوق .. طلعنا وقعدنا وطبعا كل اللى فوق ناس كبيره في السن وبدل رسميه في عز الظهر وحاجه كده رسمي اوى .. المهم قعدنا زينا زيهم بالللللللظبط


وطلبنا الاوردر واللى طبعا راعينا حسابه الاول ... واكلنا وكله بقه تمام جداااااااا وبعدين طلبنا الشيك .. واحنا حاسبين الفلوس بالظببببببط


المهم جه الشيك زايد تقريبا سبعه جنيه وربع خدمه والخ الخ


وطبعا لمينا كل اللى معانا ونفضنا الشنط ووقفت معانا على اتنين جنيه وربع خلالالالالالاص هنتفضح وهنمسح الارض


المهم نعمل ايه ؟؟؟؟؟؟؟؟؟ قولنا نتصل بسمر صاحبتنا هى قريبه من المطعم في شغلها تيجي تنقذنا ... جت آيه تتصل بيها لقت موبايلها فاصل شحن


اتصلنا بيها من معايا مع العلم ان سمر متعرفنيش اوى ...ههههههه


المهم قولنا لسمر تلحقنا ..


قولت انا بقه اصلح موقفنا في التاخير في الدفع واننا قاعدين نتفرج على بعض بانى اطلب شاى واهى سمر جايه تدفعه وخلاص ..وطلبت فعلا الشاى


لقيت ايه في ثانيه ندهت للمتر ولغت الشاى احراااااااااج وطبعا البيه الرخم طلب الفلوس .. راحت آيه بكل بساطه قالتله يستنى صاحبتنا جايه وكانها بتتوسل اليه ههههههههه


المهم جت سمر وحاسبنا وخرجنا من المطب ده وراحت سمر شغلها


وبعدين المفروض انا وايه كل واحده فينا باقي معاها جنيه علشان نركب مواصله داخليه للبيت


والطفاسه حلت تاااااانى ففي مواصله تانيه بخمسن قرش بس قولنا نركبها بقه ونصرف الجنيه الباقي


دخلنا سوبر ماركت فظظظظظيع علشان نشترى لبان وطبعا جريت انا جبت بسكوته بربع جنيه على اساس ان آيه هتجيب حاجه هى كمان بربع جنيه ونمشي


لقيت آيه جابت كله لبان ووقفت انا ادام الراجل في نص هدومى وهى بتقولى اجرررررررى رجعى ده مكانه ورجعته زى الشطوره


بعدين ركبنا المواصله دى ودفعنا اللى بااااقي معانا ومروحين بقه اخر زقططه ... واذ فجاتن المواصله تعطل في نص الطريق


والسواق نزلنا نركب مواثله تانيه .. احنا بقه فكرنا انها فور فري ببلاش يعنى لقينا السواق الجديد بيقول لالالالالا ادفعوا نص اجره ههههههههههههه


وطبعا انا وآيه منفضين خاااااالص .. وكنا هنعيط


المهم الناس كلها حاسبت واحنا لا والراجل بدا يبص لينا في المرايه واحنا ولا كاننا شايفينه لحد مولنا وهننزل وطبعا الموضوع بدا ياخد شكل الجد واحمرينا واصفرينا وهتبقي فضيحه


المهم قولنا للراجل ثوانى نطلع نجيب الفلوس ... وفعلا جريت اروح اجيب الفلوس وسبت آيه لقيت الراجل مشاها وقالها يا ابله مش مشكله وانتوا باين عليكوا ولاد ناس


ومشينا طبعا ووشنا في الارض من الاحراج


وحرمنا نعمل كده تانى . بس والله كان يوم دمه خفيف رغم البلاوى دى الا اننا ضحكنا كتتتتير جدا



متنسوش تدعولى


غروب


43 التعليقات:

غير معرف يقول...

الحق اول تعريف
وانا متخفي

غير معرف يقول...

هههههههههههه
هههههههههههه
الفكرة عنك ثابتة انك بنت غلباوية وبتاعت مشاكل
عموما في مثل بلدي بقول
زمن شكالب مقالب الأرنب من قصر ديله ماشي مع التعالب

بلاش تروحي المطعم ده تاني لياخدوكي تحري
هههههههه
أخوك الصغنن (حلاوة)
متخفي
اصل عليا ربع جنيه مواصلة للمدونات مش دفعتها
ههههههههه

مسدس صغير يقول...

ربنا يوفقك
هتعملى ايه امرك لله حكم القوى
ربنا يسهلك

غروب يقول...

البيه الغير معرف

عرفتك

ومش هقبل تعليقات غير معرفين عندى

اتفضل سجل دخول وتعالى تانىىىىىى

مش هرد على تعليقاتك دلوقتى بقه

غروب يقول...

مسدس صغير

اهلا يا متر

عاش من شافك

ربنا يستر بقه

نورت

BAsMA يقول...

ههههههههههه

مسخرة
ايه اليوم اللطيف ده
بجد بجد روعه
يلا تعيشوا وتاخدوا غيرها....

ولو ازنقتوا ف قرشين انا سداده مش هديكوا حاجه لان محلتيش حاجه هههههههههه

وحشتينى يا غروووووب
ادعيلى بقى امتحاناتى قربت

غروب يقول...

بسومه

اخيرا نورتى

انتى كمان والله العظيم وحشانى مووووووت

ربنا معاكى يارررررررب

انا كمان امتحاناتى خلاص كمان ايام

بس انا مفلسعه شويه من الكتاب

ربنا يستر يا مفلسه هانم هههههههه

مواااه

الفراشة الصغيرة يقول...

ههههههههههههههههههههههه
هههههههههههههههههههههههه
يخربيتك يا غروب

فطست من الضحك

ربنا يوفقك

ذاكرى و بطلى لعب

بنجاواتى يقول...

يا رب العربى يكون سهل كده وتعرفى تحلى وما تلاقيش اى صعوبة فيه ان شاء الله

مش عارف ليه صحيح الواحد ايام الامتحانات بتبقى الذكريات تنأح عليه اوى كده

بس ذكرياتك جميلة كلها والله

نصيحة اتعلمتها مش فاكر من مين:
لما فلوسك تخلص او تضيع احسنلك تاخدى تاكسى لحد باب البيت وتقولى له ثانية واحدة هجيب الفلوس -دى النصيحة اللى اتعلمتها-

نصيحة بقى انا بقولهالك:
لما تنزلى من التاكسى علشان تجيبى الفلوس تختارى تنزلى قدام عمارة تكون قريبة من بيتك ويكون لها بابين وطبعا هتدخلى من باب وتخرجى من التانى ولا من شاف ولا من درى وخلى السواق يستنى بقى وكلكسات للصبح وانتى تكونى نمتى وشبعتى نوم-
اوعى تعملى كده علشان هتلاقيه مستنيكى عند الباب التانى وساعتها هيبقى الموقف صعب اوى

ربنا يعينك ع الامتحانات ويوفقك يا رب
نومستا

ريمان يقول...

السلام عليكم

ازيك يا ساسو

يا رب تكونى بخير الوقتى واحسن

سعيده اوى انك بقيتى كويسه


تحياتى ليك

عاشقة الأحزان يقول...
أزال المؤلف هذا التعليق.
غروب يقول...

الفراشه الصغيره

ههههههههههه

ربنا يسعد ايامك وتضحكى دايما

علشان تعرفي بس زى مبكيتك ضحكتم ماشي خليكي فاكره الجمايل دى

هههههههه

ادعيلي

غروب يقول...

بنجاواتى

نصيحه عسسسسسسسسسسسسسل

تودى في داهيه علطول هههههههههههههه

بس فعلا النصيحه الاولى تمام انا عملتها قبل كده بس مش لانى اتطافست لالالالالالا لان الفولس ضاعت

ربنا يتر ادعيلي في العربي الرخم ده والنبي

غروب يقول...

ريمان

الحمد لله يا ريمو

انا سعيده بزيارتك وخلى بالك من مذاكرتك امتحاناتك قبلي

ركزززززززززززززى

غروب يقول...

عاشقه الاحزان

اشكرك يا ايناس

اللهم امين

نورتى

شيماء جمال(شيمو القمر) يقول...

هههههههههههههههههه
ده أنت مصيبة ومشكلة كبيرة قوى

دمك زى العثل
حصلت معانا حاجات مشابهة

بس تقريبا دول كانوا متفقين عليكوا

الحمد لله انك أحسن
ربنا معاكى فى الامتحانات

تحياتى
شيمو القمر

الأمير يقول...

بسم الله

بجد الواحد ضحك بجد ..
مع انى الوم عليكواا
بس يلااا اهو يوم وعدى

الغريب بجد ان الايام والمواقف دى لما بنكون عايشنها

بنبقى مضايقين اووى
وزى ما حضرتك قولتى
اصفرينا واحمرينا الخخخخ
بجد الواحد ممكن يولع

لكن بعد مرور الايام بتبقى الحاجات دى
من اجمل ايام عمرنااا ...!!!!!

سبحان الله ..

اضحك الله سنكم اختنا
وكتب لكم النجاح
وربنا يسترها فى اللغه العربيه
وربنا معاكم ...؛؛

ماء تشرين يقول...

ربنا معاكى ياساره وبعدين مش تقولى انك مبتعرفيش عربي واختك مدرسه عظيمه لغه عربيه الدرس الساعه 50 جنيه وعمللك دسكوند اهو استغلال بقه
هههههههههه
بس اوعى تقولى لسمر تدفعهم ضحكتينى بجد وبتحصل كتير بس انا معى المقوله الشهيره المعهوش ميلزموش وكمان رايحين السوبر ماركت ياظلمه

ربنا معاكى ياقمر

تقبلى مرورى

aidy يقول...

ساااااااااااااارة

وحشتيييييييييييينى اوووووووى

ايوة كده مفيش احلى من الطفاسة ههههههههههههههههههههههههه

افتكر انى بقع فى مواقف من دى بس بتاعة المطعم مش المواصلة

هههههههههههههههههه

المهم بقي انا هقعد ادعيلك عشان الامتحان بس كمان اقعدى ذاكرى


يلا اذاكر انا كمان عشان انا عندى مادة زفتتتتتتتتتتتتت إدعيلى ........

yoyo يقول...

صباحك سكر

وحشتنى مووووووووووت يا غروب

ههههههههههههههههههه
هههههههههههههههههههههههه
والله انت زى العسل
المواقف دى مش بتنسى ابدا ابدا رغم انها بيكون فيها احراج
ربنا يسعد كل ايامك يارب

ان شاء الله ربنا يعدى العربى دل على الف خير يارب

ربنا يوفقك يارب وتعدى من الامتحانات كلها على الف خير

تحياتى
يويو

ابو صهيب ( الجمعاوي الاصيل)سابقاً يقول...

السلام عليكم ورحمة الله

اختى الكريمة

اما عن الامتحان فاعانكم الله كانت اصعب ايام تمر على الواحد هي ايام الامتحانات دي

اما عن الموضوع التاني فبجد محرج جداً

وحصل معايا بس بشكل مختلف
كنت خارج وبعدين الحاجة الله يكرمها كانت كويا بنطلون وقميص فلبستهم ومشيت علطول وافاجأ وانا في العربية ووصلت لنصف الطريق ان انا نسيت كل حاجة في البنطلون اللي كنت لابسه

وانا ابيض لافلوس ولا بطاقة ولا حاجة خالص

وكان شكلي زبالة بصراحة المهم قلت للسواق بانزحة بقى ما العربية محملة اربعات والواحد كان مزنوق

قلتله هديك لما انزل ياسطى علشان مش عارف اطلع فلوس

وكنت بدعي ربنا ان اللي جانبي محدش ينزل في الطريق واتصلت بواحد معايا في الشغل ستناني في الموقف

المهم وصلنا الموقف ولاقيت صحبي جاي خدت من الاجرة ودفعت بس بعد ما دمي اتصفى

بس بتبقى مواقف لاتنسى وذكريات حلوة

تقبلي تحياتي

شجر الليمون يقول...

هههههههههه
السلام عليكم
ايه يا غروب هلنم
القصة اللي انتي حكتيها دي ضيعت اللقب خالص منك
من هنا ورايح انتي مش هانم
هههههههه
كأنك في كي جي تو
ربنا يكرمك
ياريت تقدري تعيشي عمرك كله كدة
الطيبة والطفولية المحبوبة

اعشق فى الليل ضوء القمر يقول...

فكرتينى يا غروب زمانكان والدى بيقول لى دائما خلى معاك خمسة جنية فى محفظتك و إنساها لوقت زنقة فى أى مكان و توهت و معرفتش ترجع طلعها و اركب تاكسى يجيبك للبيت ولو إحتاج فلوس لما توصل و خذ فلوس من أى حد و حاسبة

موقف صعب شوية بس ظريف ذلك ما سيظل معك فى أخر عمرك تلك المواقف المهلكة المضحكة

غير كده لما تزنقى فى فلوس علطول إبعتى كلمنى و الفلوس تيجى لحد عندك
هههههههههه
بس أى حد غير العاشق علشان انا عارفة ولد مبيسترش فى حته ممكن جدا يسيبك غرقانة و يمشى
هههههههههههه

غروب يقول...

شيمو القمر

انا مصيبه


ههههه د انا طيوبه جداااا

فعلا اليوم كللللله كان ضدنا مش عارفه ليه

بس الحمد لله عدت وبقت ذكريات لطيفه

ان شاء الله احاول اجى اشرب شاى عندك قريب

مواااه

غروب يقول...

الامير

فعلا هى بتبقي في وقتها مواقف لا تطاااااق لكن لما بتعدى بنفضل نضحك عليها

وطبعا اللوم الموجه لينا في محله م احنا اتعلمنا بقه بس مش اوى بصراحه هههههه

اصرف ما في الجيب ياتيك ما في الغيب

ده شعارنا الدنيوى

ربنا يكرمك

نورتنى

غروب يقول...

ما تشرين

هههههه
اللى معهوش ميلزموش؟؟؟؟؟

انتى فكرانا بنشحت ولا ايه

لالالالالالا

احنا دخلنا السوبر ماركت بكرامتنا بجنيه كااااامل مش ربع ولا نص جنيه

هههههههه

كمان يعنى ينفع تبقي بتاعت عربي وسيبانى محتاسه الحوسه دىىىىىىىىىى؟؟؟؟؟؟؟

وايه الاسعار اللطيفه دى؟؟؟

بلاه العربي خالص

مينفعش اخد الليسانس بدون عربي؟؟؟؟؟؟؟؟

غروب يقول...

ايدي

عااادى جدا

كلنا بنشوف المواقف دى مهو احنا جيل واحد التفكير اكيد متقارب

واكيد نفس المبادئ الهايله

ههههه

انتى كمان والله العظيم وحشانى موووووت وناس كتير جدا وحشاااااانى اووووى بس الوقت ضيق اووووى

ان شاء الله ربنا يوفقنى في العربي ده

وربنا معاكى ياااااارب في مادتك الزفت كلنا لها

مواااااه

غروب يقول...

يويو

صباحك زى العسل

وحشتينى اوووووووووووى والله

ربنا ميوقعك في ضيقه

هههههههههه

ان شاء الله تعدى الامتحانات على خير

غروب يقول...

الجمعاوى

ههههههههههه

كلنا لها بس موقفك عسل اووووى لو كان حد نزل من جمبك

طلع بقه الاجره يا حلو هههههههههه

ربنا سترها معاك والله والا كان اق هيفضل يبصلك ويزغرلك في المرياه زينا كده

خير خير

نورتنى

غروب يقول...

شجر الليمون

يا اهلا يا صعيدي

انا هفضل هان دايما فااهم متزعلنيش منك

ياريت والله الواحد كان استمر في الايام دى مكنتش العين بكت

نورتنى

غروب يقول...

عاشق ضوء القمر

ماما برضه كانت بتقولى كده

كمان مش عاوز تسلفنى شكرااااااا

انا هتصرف كالعاده

سمر موجوده لسه ههههههه

نورتنى وسامحنى على التاخير

Dr.A.S. black armor يقول...

اول مرور ليا ان شاء الله مش الاخير
ربنا يوفقك فى العربى
اما بالنسبة للموقف اللى حكيتيه فدا بيحصل مع احسن الناس ههههههههههه
والله لسه من يومين كنت فى مشوار شغل فى بلد بعيدة عننا بحوالى 150 كيلو المهم دخلت اكلت ودفعت اخر فلوس كاش معايا وان طبعا مطمن ان معايا كارت البنك والفيزا وببص فى العربية لقيتها محتاجة بنزين المهم رحت لاقرب ماكنة صراف علشان اسحب كاش لقيتها رفضت الكارت... قلت بايظة رحت واحدة تانية برده رفضت الكارت
طبعا قلبى وقع فى رجليه وانا مش معايا حد...المهم فكرت ارجع لحد من العملا استلف منه بس بصراحة اتكسفت
المهم قبل ما خرج من البلد بنص كيلو لقيت صراف قلت اجرب حظى لاخر مرة
والحمد لله الحلوة اتكلمت وطلعت قماش قصدى طلعت فلوس واخيرا قلبى رجع لمكانه
فعادى يعنى يوم جميل
دمتى بخير

3abratalsabeel يقول...

هههههههههههه
سلام عليكم الاول

تصدقى انا كنت دايما اقول رغم ان الامتحانات والجامعة دى حاجة رخمة وغلسه ومالهاش اى لزوم ...لكن كانت بتنفع وقت ما يكون عندى مشكلة ...كنت فعلا بفصل عشان الامتحانات ومش عايزة المشكلة تبقى مشكلتين ...وعلى الامتحانات ما بتكون خلصت بتكون المشكلة صغرت كتير على الاقل جوايا

بالنسبة للطفاسة ... اهو يوم مش هيتكرر وساب زكرى حلوة ...والحمد لله انها ما وصلتش للقسم والبوليس
ههههههههههههه

ربنا معاكى ان شاء الله وخليكى فاكرة :
"فلما استحكمت حلقاتها فرجت وكنت اظن انها لن تفرج " سلام يا جميل

Soul.o0o.Whisper يقول...

السلام عليكم و رحمة الله و بركاته

غروب الجميلة
أولا الحمد لله على جفاف الدموع
النوع دا من الجفاف كويس
هههههههههههههه

ثانيا بجد يوم تحفة
ايه دا يا بنتى؟؟

ربنا يكرمك يارب يا غروب
و تعيشى و تاخدى غيرها
;)
ياللا روحى ذاكرى و بطلى شقاوة
:)


دمتى بود

akeed يقول...

اولا ربنا يوفقك فى الامتحانات

ثانيا المدونة جميلة جداً

والموقف ده بصراحه لا تحسدوا عليه و وواجهتنا مواقف زى ديه ايام الجامعه ولاكن بعد كده بنضحك كل مانفتكر المواقف ديه بس كانت ايام جميله

تحياتى

ايمان روحي يقول...

ههههههههههههههههههه
لا بجد تححححححححفه
ايه ده
ياريتني كنت معاكووووووووووووو
بس بجد
هيك مواقف رغم
انها بتخنق
لاكن مابننساها
وبتفضل ذكري حلوة
هههههههههه
بس اوعو تعيدوها تاني
تبقي بجد
مصييييييييييييييييبه
ههههههههههه
بجد ربنا يوفقك يارب
ويسر قلبك
يابتوع الانجليزي
هههههههههههههه
تحيــــــــاتي

بحـــر الدموع يقول...

السلام عليكم

أخيتي..غروب

هههههههه
موقفك في المطعم والله ما يحسدك عليه عدوك
بس منيح انك طلعتي منه بسلامة
انتي يومك كله ما شاء الله عليه
مواقف في مواقف ...
بارك الله فيك ، وحفظك الرحمن من كل سوء

لا تنسوا اخوانكم في غـزة من دعائكم

||..بحـر الدموع..||

غروب يقول...

د: بلاك ارمور

اهلا وسهلا بيك في اول زياره واتمنى مش تكون الاخيره

الاول اشكرك جدا على دعوتك الجميله اما بالنسبه للمواقف فهى فعلا بتبقي كتير

وبعهد كده بتبقي ذكريات حلوه نكتبها في مكان زى بلوجر ههه

نورتنى

غروب يقول...

عابره سبيل

ازيك يا قمر وحشانى

الحمد لله الامتحانات دى قدر

ومصيبه لازم نواجهها

يعنى هاجي اشتكى دلوقتى وانا في اخر زلطه واطلع برا

اه الحمد لله فعلا اانا مروحناش القسم

ههههه

والا كانت تبقي فضيحه ونبقي سوابق تخيلي ههههههه

نورتينى

غروب يقول...

سول ويسبر

اخد غيرها ايه لالالالالا احا كبرنا دلوقتى بعد مشيبت كده ؟؟ متجيش

ههههه

نورتينى يا قمر

غروب يقول...

اكيد

اولا اشكرك جدا

ثانيا ربنا يسعد ايامك باى طريقه حتى لو كانت مواقف من دى

علشان متقولش بدعى عليك

نورت

غروب يقول...

ايما روحى

لغتك شرباااات

نورتينى يا قمر

وياريتك تكونى معانا فعلا انتى بس نوريناواحنا نخليكي تعمل المواقف دي وندبسك اما ففي الحساب او مسح الارض

ههههههههههه

ربنا يكرمك

نورتى

غروب يقول...

بحر الدموع

صاحب احلى مدونه بشوفها بجد

لكن بتوجع قلبي كتير

متشكره جدا على المرور والتعليق

وربنا معاكوا ياااااارب

نورتنى

 

ما بعد الغروب © 2008. Design By: SkinCorner