الثلاثاء، 31 مارس 2009

الخيانه

بسم الله الرحمن الرحيم


اولا : انا متشكره جداااااااا جدا لكل حد سال عنى وكل حد رد عندى رد جميل حسسنى اد ايه انا حواليه ناس جميله ممكن ارمى عليها حمولى


ثانيا : الحمد لله انا كويسه نفسيا .. ومرتاحه الى حد ما عن اليوم اللى كتبت فيه البوست اللى فات واللى كنت فيه في حاله سيئه جدا

بس الحمد لله الحاله زالت بزوال السبب الى حد ما


ومش عاوزه حد يعتقد ان انا في قصه حب شنيعه وهى سبب ازمتى يعنى لانى حسيت من بعض الردود ان في تخيلات انها قصه حب سببت ليه الحزن ده

الحمد لله انا قلبي حاليا فاضي خالص من اى حب عاطفي


مفيهوش ناس كتير صحيح لكن اللى موجودين فيه حاليا مالينه

الى ان ياتى الحبيب اللى هطرد الكل علشانه ههههههههه


الموضوع ببساطه كان مشكله مع انسانه من اللى جوا قلبي دول وعلشان كده قلبي وجعنى

والسبب مش اننا مش بنحب بعض لكن السبب هو اختلاف الطبع شويه وده شئ عادى طبعا


عاوزه كمان بجد اقول لماما اموله انا بحبك يا ماما ومعلش قلقتك عليه شويه ... واقول لاستاذ احمد انى متشكره جدا على سؤاله الدائم واهتمامه

وايناس كمان ( عاشقه الاحزان ) ... متشكره جدا يا نوسه على اهتمامك وسؤالك



وبجد انا كنت بقرا التعليقات بتعاتكوا وانا سعيده جدا جداااااااا والله فوق متتصوروا .. اد ايه الانسان بيكون سعيد وهو شايف حب الناس ليه

وحب بدون مقابل ولا غرض ... جميل اوى الشعور ده



نيجي بقه للموضوع اللى ولع في اعصابي اليومين اللى فاتوا واستفزنى لدرجه انى اكتبه في لحظه كده بدون ترتيب مسبق


الموضوع هو عن الخيانه ... واقصد هنا الخيانه العاطفيه ... يعنى بالبلدى بين ( زوج وزوجه ... او واحد وخطيبته ولو انها نادره شويه او بين واحد وحبيبته ودى منتشره جدااااا)


انا مش عاوزه اتكلم عن الخيانه نفسها او بتحصل ازاى ؟ ... لان كل واحده وواحد بيشوف الموضوع من وجهه نظره الخاصه

في بنات بتشوف نظره الراجل لواحده تانيه خيانه عظمى .. وناس بتشوف ان الخيانه في التفكير وغيره وغيره لحد منوصل لاشد انواع الخيانه


وللاسف في ناس بقه بترتاح على الخيانه دى .. صحتها بتيجي عليها

مش راحه اللى بيخون او الخائن يعنى لالالالالالالالالا راحه المغفل اللى بيتخان وهو مش عارف


اه والله صدقونى .. في ناس كده بتحب تكون مخدوعه بس مش عارفه ... المهم انها تكون مش عارفه وفاكره انها مسيطره على الموقف


الغريب بقه اكتر .. ان كل واحد بيخون فعلا بيكون مدرك جداااا هو بيعمل ايه

لو ولد : عارف ان ده هيرتد ليه

لو بنت : عارفه كويس انها بتخسر سمعتها لانها لو خانته مش هيسيبها في حالها


لكن اللى بيحصل كمان ان لو الولد خان يجرى يتكلم على البنت هنا وهنا وهنا .. ويغلط فيها وفي سمعتها


طب يا بنى آدم ازاى هى ملوثه كده وانت كنت هتتجوزها ؟؟؟؟؟؟؟؟؟ او حتى مصاحبها على حد التعبيرات السائده


اه مهو انتوا مش عارفين ... ان حتى الولاد الفافي اللى بيصاحبوا بنت النهارده ويسيبوها بكره بيبقي عندهم مفهوم ان دى صاحبتى انا

برضه مش من حق حد يكلمها


سبحانك يارب


طيب وانتى يا بنت الناس ياللى بتلعبي بواد وبتخونيه ... ولو انها قليله لان معظم البنات بتدور على الامان والستر يعنى

لكن اللى بتعمل كده فعلا عاوزه توصل لايه ؟؟؟؟؟


انتى لما بتخونيه مش هتخسريه هو .. تؤتؤ

دا انتى خسرتى نفسك الاول .. بقيتى تعرفيه وتعرفي غيره والخ الخ بقيتى سلعه رخيصه يعنى


ويوم مواحد يسيبك لانك وحشه بتبقي هتتجننى وبتشدى في شعرك


والحكاوى اللى بتحصل على النت كمان داهيه سودا والله ... الولد يوهم البنت انه بيحبها او العكس ويتبادلوا الصور ومع اول مشكله الصور تبقي على النت كله


والراجل اللى يبقي متجوز ويبص لواحده تانيه اد بنته .. ايه يا عمو؟؟؟؟؟؟؟ عاوز ايه تانى ؟؟؟؟؟؟؟ استفدت ايه من كلمه او نظره هتخرب بيتك؟؟؟؟

والست اللى تبص لعيل اد اولادها ...... ايه يا طنط فين ضميرك ؟؟؟؟؟؟؟؟ راجلك اولى

والولد اللى يوعد بنت وتانى يوم تلاقيه بيتجوز غيرها ؟؟؟؟؟؟؟ اه البنت غلطانه لكن برضه ليه الخيانه

بدام كلمتها اتجوزها ايه مشكلتك؟؟؟؟؟؟؟؟؟؟



هى الدنيا جرى فيها ايه ؟؟؟؟؟؟؟؟

خيانه بجميع اشكالها

اللهم احفظنا


انا نفسي بجد كل انسان بيتخان يكون اقوى ويعرف ان حقه محفوظ ده لو هو مش غلطان ويرمى حموله على الله ويسيبها للخالق

انا في كلمات كنت كتباها من فتره نفسي كل واحد متخان يقولها للخاين ويعرفه اد ايه هو فاهمه وانه صغييييييييييييييير
اسمها كدبك اصبح مكشوف ودى كنت نزلتها زمان في بوست قديم يارب تعجبكوا
كدبك اصبح مكشوف
كدبك اصبح مكشوف....... بكره هتعرف وتشوف
وتلف ف وسط الوف .......على قلبي وتبكي عليه
قلبك يبقي بيتمنى .......لو فكرنى هقوله استــنى
مهو برضه مهوش معقول ... نازل ف كلام علطول
اعمل نص ما بتقول يمكن ربنا يهديك
مهو لا انا هخرج م الجنه.... ولا قلبي معاك اتهنى
ده فاكرنى هقوله استنى؟؟؟؟؟؟؟؟ قلبك يبقي بيتمنى
وكفايه انا قلبي اتعلم ...... قبل ميختار يتأنى
تحياتى
غروب

الجمعة، 27 مارس 2009


بسم الله الرحمن الرحيم


معلش يا غروب ........... ملحقتيش تفرحى بنجاحك بين الناس ولا حتى بينك وبين نفسك

وللاسف بسبب ناس قريبين منك وعاملين حبايبك ....


علشان انتى هبله ومتوقعه كل الناس طيبين ومتوقعه انك هتقدرى تواجهى ....

واستحملتى كتير .... وجيتى على اعصابك


صعب اوى يا غروب انك تاخدى قرار مش هتبقي قارده على تنفيذه

صعب اوى انك تضكى على نفسك وتقولى انا هقفل المدونه بالمره مع الحاجات الكتير اللى هتقفليها


الحقيقه انا جربت اقفل مدونتى قبل كده .. وانا اللى تعبت لانى مش لقيت مكان تانى ممكن افضفض فيه وارمى حمولى


لكن المره دى انا مش عاوزه اقفلها لان في ناس وحشين حواليه وعاوزين تعبي باستمرار لكن علشان انا عاوزه ارتاح شويه


علشان كده قررت انى ابعد شويه ... يمكن مش كتير وده بسبب الحاله اللى انا فيها حاليا واللى بانتهاءها هرجع لنفسي


انا عاوزه ارجع لوحدى .. مش عاوزه حد جمبي ...انا كنت مرتاحه اكتر


لما اختلطت بالناس وافتكرت انى ممكن اعوض بيهم غدر ناس قبلهم برضه مش حاسيين بيه وبيجرحوا ومش بيراعوا شعورى


خلاص بقه دى مش اول مره .. وانا مش زعلانه الزعل اللى يقتلنى

علشان كده انا قررت ابعد ..


هبعد عن كل الناس دول .. ومش عاوزه حد منهم


انا قررت اسيب المدونه شويه .... واقفل تيلفونى شويه .....والميل كمان


ومن فضلكوا ( هما عارفين نفسهم) مش تتصلوا بيه على البيت علشان انا مش عاوزه اتكلم معاكوا فعلا


تقدروا تقولوا عليه خاينه ... ببيع بسرعه

وعارفه انى بظلم ناس بذنب ناس تانيه ... انا اسفه


بس انا مش هستنى ان الناس اللى بحبهم يتسرسبوا من بين ايدي حد ورا التانى


من فضلكوا سيبونى ابعد.......... انا عاوزه ارجع لوحدى


الرساله للاسف موجهه


غروب

الأربعاء، 25 مارس 2009

ليسانس الا حته

بسم الله الرحمن الرحيم
ازيكوا كلكواااااا
النهارده انا مبسوطه جدااااااااا وحبيت افرح معاكوا وعارفه ان في ناس كتير هنا هتفرحلى
استقبلوا الخبر بقه
انا نجحــــــــــــــــــــــــــــــت يا نااااااااااااس
وبتقدير جيد
بس انا في حاجه مضيقانى
انى اكتر من جيد بخمس درجات بس اقل من جيد جدا بنفس الخمس درجات
حاجه تزعل
يلا الحمد لله
كده بس فاضلي زلطه واطلع برا .... ان شاء الله لسه الترم ده واخد الليسانس
وابقي الانسه غروب هااااااااااانم ( احم احم ) ليسانس آداب انجليزى
واخد بعده دبلومه الترجمه الفوريه اللى نفسي فيها ( يااااااااارب )
انا سعيده جدا جدا ......
ملحوظه : في ناس وشها حلو عليه جداااااااااا ...... اولهم ماما اموله طبعا لانها كانت مشغوله عليه
والاستاذ احمد ( دردشه عربي ) .. وشه حلو عليه خالص
وطبعا انا بحبكوا كلكوا
سلام بقه
الهدايا متنسوش
كانت معكم : غروب هانم ... ليسانس اداب انجليزى الا حته

السبت، 21 مارس 2009

كل سنه وانتى ماما

بسم الله الرحمن الرحيم


الحقيقه انا مش عارفه كتابتى للموضوع ده هتعتبر بدعه ولا لأ ؟؟؟

بس انا مش كتباه يعنى علشان النهارده عيد الام ولا حاجه لكن هو مجرد يوم الكل فيه بيعبر عن مشاعره تجاه مامته فانا لقيتها فرصه بقه

اشمعنه مامتى يعنى

بس فعلا مش عارفه هقول ايه لماما

اصل انا مامتى مفيش كلمه ممكن تتقال ليها حقيقي

طبعا كل واحد بيشوف مامته اعظم ام ... لكن انا حتى لو قلت انها اعظم ام هتبقي كلمه قليله والله

لان ماما عملت معايا حاجات واستحملت حاجات ممكن امهات مش تستحملها

يعنى مش مجرد تربيه واهتمام وبس

انا سعيده جدا في الوقت الحالى بعلاقتى بماما ... لانى حاسه انى كبرت لدرجه انى بقيت صاحبتها

ببقي مبسوطه اوووووووووووووووووووووووووى لما ماما تيجي تحكى معايا

يااااااااااااااه ........... ماما بحالها تيجي تكلمنى انا ؟؟؟؟؟؟؟؟؟؟؟؟

تفضفض معايا انا ؟؟؟؟؟؟؟؟؟؟؟؟؟

مش عارفه اقولك ايه بجد يا ماما

انا بجد اكتر من بحبك ... ونفسي اعوضك عن كل دمعه بكتيها بسببي

وانا عارفه ان دموعك بسببى كانت كتير اوى

عارفه يا ماما انا كل ما افتكر اد ايه انا كنت حمل تقيل عليكي ببكي اوى

طبعا مش في هديه في الدنيا كلها تساوى اللى انتى عملتيه
عموما اكيد انا اكبر هديه ههههههههه صح يا مامتى ؟؟؟؟؟؟؟؟؟؟؟؟

عارفه انها هتقولى لا ههههه

الكلام ده طبعا لمامتى البيولوجيه ... اللى هى اغلى حاجه عندى بجد

وعاوزه اهديها الورد ده ....

احلى ورد حسيته يا ماما والله




نيجي بقه لنقطه مهمه خالص

دايما كنت بالاقي اولاد بيقولوا لناس غير مامتهم يا ماما فلانه وده مثلا لكونها غاليه او عزيزه

الحقيقه انا عمرى معملت كده لانى عمرى م لقيت واحده تستحق الكلمه دى غير مامتى


لكن في فتره قريبه من حياتى لقيت الانسانه دى

انسانه حبيتنى بجد .. واعتبرتنى بنتها وانا حسيتها امى حقيقي

لو اتكلمت عن حنانها مش هخلص

انا اتعرفت عليها قدرا لكن كان احلى قدر ومن يومها وهى دى الانسانه اللى بقولها ماما غير مامتى

بس معتقدش بقه انى هقول الكلمه لحد تانى

مش لان مفيش حد تانى يستاهل ..لا

لكن لان انا راضيه بدول وبس ومش محتاجه اكتر من اللى هما بيعطهونى

الست دى هى ....
هى .....

هى.....

هى امى الروحيه

ماما اموله

امى وحبيتى وصاحبتى

كل سنه وانتى طيبه يا اموله

طبعا اول مره اقولك اموله كده بس

اقولك ليه ؟؟؟؟؟؟؟؟؟؟؟؟


لانى بقول لمامتى باسمها وانتى غلاوتك من غلاوه ماما

وطبعا نقيت احلى بوكيه ورد لاحن واغلى ام ( ماما اموله)

اتفضلي يا قمر


لون قلبك يا مامتى ( احلى من الابيض

وعلى فكره .......... ماما اموله مامتى انا بسسسسسسسسسسسس

ماشي؟؟؟؟؟ علشان نبقي على نور ... علشان انا بغير بجد

وقد انذر من اعذر ( هى بتتقال كده صح؟)

ده بقه ورد لكل ام .... وكل سنه وكل الامهات بخير وربنا يخلي كل ام لابنها وكل ابن لامه

غروب

الخميس، 19 مارس 2009

انا كده.... وده حقي



بسم الله الرحمن الرحيم


مش عارفه هبدا ازاى ؟؟؟؟؟

بس بجد انا اتحنقت وعايزه اتكلم بصراحه بقه واطلع كل اللى جوايه ومش هيهمنى زعل حد علشان انا واثقه انى مش غلطانه في حد


اه هقول بقه كل اللى في نفسي ...... ورغم انى بكره الجمله دى بس فعلا انا بقولها دلوقتى بكل ثقه ( انا كده اللى عاجبه عاجبه واللى مش عاجبه الحيط موجود )


لما قولت الجمله دى قريب وسط اصحابي قاللولى لا غلط

وانا عارفه ان الجمله غلط ....... واتباعها غلط اكبر .......لكن فعلا مش هاعمل بعد كده غير بيها

لان عكسها مش نافع ... لما باحترم مشاعر الناس بيدوسونى


لا بقه معلش من هنا ورايح انا مش هراعي مشاعر حد ... وهدوس على اى حد عاوز يتعبنى او ياخد منى حاجه بتاعتى


لما كنت بقدر مشاعر الناس ... خدوا منى صاحبتى انتيمتى ........ ولسه بعانى من فتور علاقتنا رغم انها مستمره


راعيت مشاعر بنات جديده هى صاحبتهم والل حصل انهم وقعوا بينى وبينها ودمروا العلاقه لفتره


نقطه تانيه : انسان غالي عليه جدا وبعتبره اخ ... لما راعيت مشاعر الانسانه اللى هو مرتبط بيها بقيت انا اللى وحشه وانا منافقه والخ الخ

ويظهر ليه نفاق الناس ومدى تخليهم عن اخلاقهم يوم ورا التانى


نقطه تالته : واحده من اصحابي الحاليين كل اما نزعل مع بعض عايزانى اروح اعتذر حتى لو هى اللى غلطانه

وباعتبار انى انا اللى غلطانه .... انا قولتلها مليووووون مره ممكن ننهى المشكله بدون محد يعتذر وبدون كمان عتاب لكن ازاى لالالالالالا لازم انا اللى غلطانه

ولو قولت في يوم انى مش مرتاحه في علاقاتى الحاليه يبقي انا وحشه وعايزه الفراق وبسعى وراه او على حد قولهم ( احساسي بقرب الفراق هيوصلنى ليه )


منتدى كنت فيه وبتعامل مع كل اعضاؤه بحب وسذاجه و براعي مشاعر الكل وفجاه الاقي حوار كاااامل واصلنى من احد الاعضاء مليش علاقه بيها اساسا بتشتمنى

وتغلط فيه رغم انها متعرفنيش ...لكن اهو بقه مجامله او ان وقع العجل كترت سكاكينه لحد مسيبت المنتدى وامتنعت عن المنتديات اساسا ... لحد فتره قريبه


الانسان الى عطيته قلبي بجد وحبيته حقيقي وتحملت رفض الكل لشخصه برضه عرف واحده تانيه وسابنى علشانها لما انا اتنازلت عنه وقولتله روح لها متفرقش معايا


ايه ؟؟؟؟؟؟؟؟؟؟؟؟؟؟؟؟؟


انا بتنازل عن حقي كتير ليه كده ؟؟؟؟؟

صاحبتى... واخوبه ...ومنتداى....ومدونتى قبل كده .....واللى كان حبيبي ....بقول اللى كان لسبب ... الشخص ده انا فعلا مش عيزاه بمزاجى


وغيرهم كتير ..........ليه ؟؟؟؟؟؟


لا بقه من النهارده بجد انا مش هسيب حاجاتى ومش هتنازل عن اى حق بتاعى

الا اذا انا مش عاوزه الحق ده


وبقولها اهو باعلى صوت ...... انا كده واللى عاجبه عاجبه واللى مش عاجبه يقطع علاقته بيه


مش هسيب اى فرصه بتاعتى وهاخد كل حقوقى من هنا ورايح


وهبقي مستغله بجد .. بس مستغله لحقوقي انا


وهعيش لنفسي بس ... علشان غروب وبس ...


لازم غروب تبقي فرحانه دايما ومش تبكي تانى ابدا ابدا


كفايه بقه



غروب

السبت، 14 مارس 2009



بسم الله الرحمن الرحيم


الحقيقه الشهر ده يا جماعه شهر حساه جميل وخفيف كده على عكس بقيت السنه دى اللى كلها مصايب والحمد لله


مع ان الشهر برضه حصل فيه شئ مش لطيف بالمره ....... لان موبايلي بعيد عنكوا اخد دوش ساااااااقع في الماء العذب


بس يلا الحمد لله ... وانا معايا موبايل تانى مفيش مشكله للنمر باذن الله


اما بقه المناسبات السعيده في الشهر ده فهى كتير لانه جمع بين اعياد ميلاد 3 اشخاص غاليين عندى جدا .. هما حسب ترتيب الايام


خالتى حبيبتى : ودى اقرب خاله لقلبي وبقولها كل سنه وانتى طيبه يا جي جي يا قمر وربنا يخليكي ليه وتحبينى اكتر ههه


ايناس انتيمتى: صاحبه مدونه معجزات واقولها انا بحبك اوووووووووى يا ايناس بجد وبرتاح معاكى جدا وبحمد ربنا انه جمعنى بصحبتك بعد الفتره دي


اخويه الكبير: كل سنه وهو طيب وعقبال مليون سنه وربنا يخليه ليه


اما انتهز الفرصه واغنيلهم بقه :
يلا حالا بالا بالا حيوا ابو الفصاد هيكون عيد ميلاده الليله اسعد الاعياد فليحيا ابو الفصاد




انتهى
غروب

الاثنين، 9 مارس 2009

تواريخ لن انساها


بسم الله الرحمن الرحيم


عايزه اتكلم النهارده على التواريخ اللى دايما الانسان بيكون فاكرها ومفيش شك طبعا ان كل واحد فينا فيه في ذاكرته تاريخ او اكتر مش بينساه ومرتبط بذكرى معينه على الاقل خالص ممكن يكون تاريخ ميلاده بس انا اراهن ان كل واحد فينا عنده اكتر من تاريخ مستقر في ذهنه ومش ممكن ينساه


التاريخ ده ممكن يكون ليه ذكرى كويسه وممكن يكون ذكرى سيئه بس في الحالتين هو موجود


بنبتسم ابتسامه عريضه اوى لما يجي اليوم اللى تاريخه مرتبط معنا بذكرى حلوه


وبنبكي او نكشر او حتى ممكن نكتئب لما يجي اليوم اللى تاريخه مرتبط بذكرى سيئه


اقبل اما اكتب البوست ده فضلت افكر وافكر وافكر ايه يا بت يا غروب التواريخ اللى انتى حفظاها ؟؟؟؟؟

ايه التواريخ اللى مرتبطه معاكى بذكريات ؟؟؟؟؟؟؟


قولت يا بنتى لازم علشان تكتبي موضوع زى ده على الاقل يكون عندك عشره خماشر تاريخ كده علشان يبقي الموضوع اتراكتيف


لكن الحقيقه بعد بحث طوووويل


لقيت ان التواريخ اللى عالقه في ذهنى قليله اووووووى ومنهم واحد تاريخ ميلادى يعنى طبيعي اكون فكراه


والتاريخين التانين مبقدرش انساهم ابدا .......... ابدااااااااااا ولما بتجي ايامهم باكون فكراها


مش عارفه بقه ممكن التواريخ دى تضيع منى ف يوم او تتمسح من ذاكرتى ؟؟؟؟؟؟؟ طب امتى ؟؟؟؟؟


انا عايزه اسجل التواريخ دى ... علشان لو جه يوم ونسيتها الاقيها ....



11......12

10.....20

6.......21

بس كده تخيلوا؟؟؟؟؟؟؟؟؟

غروب

 

ما بعد الغروب © 2008. Design By: SkinCorner