الجمعة، 27 مارس، 2009

بعيد شويه ...رساله موجهه


بسم الله الرحمن الرحيم


معلش يا غروب ........... ملحقتيش تفرحى بنجاحك بين الناس ولا حتى بينك وبين نفسك

وللاسف بسبب ناس قريبين منك وعاملين حبايبك ....


علشان انتى هبله ومتوقعه كل الناس طيبين ومتوقعه انك هتقدرى تواجهى ....

واستحملتى كتير .... وجيتى على اعصابك


صعب اوى يا غروب انك تاخدى قرار مش هتبقي قارده على تنفيذه

صعب اوى انك تضكى على نفسك وتقولى انا هقفل المدونه بالمره مع الحاجات الكتير اللى هتقفليها


الحقيقه انا جربت اقفل مدونتى قبل كده .. وانا اللى تعبت لانى مش لقيت مكان تانى ممكن افضفض فيه وارمى حمولى


لكن المره دى انا مش عاوزه اقفلها لان في ناس وحشين حواليه وعاوزين تعبي باستمرار لكن علشان انا عاوزه ارتاح شويه


علشان كده قررت انى ابعد شويه ... يمكن مش كتير وده بسبب الحاله اللى انا فيها حاليا واللى بانتهاءها هرجع لنفسي


انا عاوزه ارجع لوحدى .. مش عاوزه حد جمبي ...انا كنت مرتاحه اكتر


لما اختلطت بالناس وافتكرت انى ممكن اعوض بيهم غدر ناس قبلهم برضه مش حاسيين بيه وبيجرحوا ومش بيراعوا شعورى


خلاص بقه دى مش اول مره .. وانا مش زعلانه الزعل اللى يقتلنى

علشان كده انا قررت ابعد ..


هبعد عن كل الناس دول .. ومش عاوزه حد منهم


انا قررت اسيب المدونه شويه .... واقفل تيلفونى شويه .....والميل كمان


ومن فضلكوا ( هما عارفين نفسهم) مش تتصلوا بيه على البيت علشان انا مش عاوزه اتكلم معاكوا فعلا


تقدروا تقولوا عليه خاينه ... ببيع بسرعه

وعارفه انى بظلم ناس بذنب ناس تانيه ... انا اسفه


بس انا مش هستنى ان الناس اللى بحبهم يتسرسبوا من بين ايدي حد ورا التانى


من فضلكوا سيبونى ابعد.......... انا عاوزه ارجع لوحدى


الرساله للاسف موجهه


غروب

28 التعليقات:

عاشقة الأحزان يقول...

ساره
حبيبتى مالك فيك ايه من اللى زعلك بجد طمنينى عليكى انا بجد أتعودت عليك قووى ومش بقدر أستغنى عنك ابدآكنتى طمنينى قبل ما تقفلى ياحبيبتى انا كده هكون قلقانه قوى عليك ياساره
ساره أرمى حمولك على الله وحده
قال الله تعالى:(إن الذين آمنوا ولم يلبسوا إيمانهم بظلم أولئك لهم الأمن) الأنعام: 82
فإن الظلم تكون نتيجته سيئة، ولكن من باب أن كل شيء في الكون بمقدار ومتدرج، فإن تلك النتيجة قد تتأخر وقد تتقدم، كالسرطان الذي ينتشر في الجسم فإنه سيؤدي ال هلاك صاحبه لكن وقته مرتبط بنوعية المرض وعدم محاولة العلاج وسائر الظروف الخاصة.

قال الله تعالى:(وتلك القرى أهلكناهم لما ظلموا وجعلنا لمهلكهم موعداً) الكهف: 59.

وحينما يحل الموعد لا يتأخر إطلاقاً (فيقول الذين ظلموا ربنا أخرنا إلى أجل قريب.. فلا تحسبن الله مخلف وعده رسله) إبراهيم: 44-47. وفي الحديث الشريف (إن الله يمهل ولا يهمل).
ساره معلهش الدنيا فيه الحلو والوحش ومش كل الناس ذى بعض
حاولى تنسيهم يا اختى
أنا منتظرااااااااااااك
منتظراااااااااااااااااااك
بفرحتك وطيبتك وهدوءك الجميل
وحسبى الله ونعم الوكيل
أختك اللى بتحبك قووووى
إيناس

عاشقة الأحزان يقول...

رساله موجهه لكل إنسان غدار بالدنيا دى وخاصة الأصحاب المقربين ولأحباب
غدر الأصحاب




جيتك يابحر ابشكي غدر الأصحاب .. ليه يابحر غدر بي أعز أصحابي ..


ليه قاطعني وابتعد عني .. ليه هجرني ورحل .. ليه هدم جسور المحبة ..


قصته يابحر قصه غريبة .. هجر صاحبه ع أبسط الأسباب .. تعاهدنا


يابحر ع طاعة الرحمن .. وحفظ كتابه القرأن .. تعاهدنا ع المحبة ف الرحمن ..


وفي لحظة غدر طعني بسهم غدار .. طعني يابحر بليا أسباب .. ضاع


العهد بعد ماكان .. بعد ما ضاع الوفى جا أعز أصحابي يطعني بذاك


السهم .. ورحل بليا موادع .. بذمتك يا بحر وش تسمي اللي حصل غير انه


غدر الأصحاب
ساره حبيبتى
اوعى تستسلمى وأكيد انتى أتعلمتى مين بيحبك ومين بيغدر بيك
خليكى قويه وربنا منتقم جبار صدقينى
وخلى إيمانك بالله هو الأقوى ياحبيبتى
وياريت كل اللى يقرء كلامى يعمل بيه ومايستهونش لأن انا حاسه بيها قووى لانى أنجرحت من أعز الناس
ومش بينجرح قووى غير اللى بيحب بالقووووى
تقبلوا تحياتى
إيناس

ahmed_k يقول...

أيه الحكايه؟؟؟؟
أنتي لسه كنتي كويسه وزي الفل
ويادوبك فرحتك بالنتيجه مظهرتش

أرمي الحمول على الله
وتعاملي مع الناس بحسن نيه دايما
مع أخذ بعض الحيطه والحذر

وكوني قويه
انتي بالشكل ده حتتعبي جدا في حياتك
واجهي الناس
بنفس مواجهتهم ليكي
ولا تشعري أحد بلحظة ضعف او هروب
أنا مش عارف ايه الموضوع بالظبط
بس هو ده المفروض يحصل دايما

مع اخلص امنياتي بعوده سريعه

مـجـنـووون يقول...

من حقك تبعدي شويه علشان ترتاحي

بس خدي بالك من حاجه ببعدك هتبقي ريحتيهم وعملتي الي هم عوزينه ودي طبعا هتبقي هزيمة وهروب

ومين قالك ان البعد عن الناس افضل

بلعكس لما تعرفي الناس وتخطلطي بيهم وتجربي حزنهم وفرحهم احسن من لبعد والوحده

وانتي بتقولي ميتصلوش بيكي

طب فين رقم التلفون علشان متصلش بيكي ههههههه


ترجعي بالسلامه

تقبلي مروري
مجنووون

Lady E يقول...

زعلتيني بجد يا غروب

ربنا يفك كربك ويسعدك ويارب الفترة دي متطولش

اصحى يا مصر : اسلام ديو يقول...

مالك يا غروب فى ايه
طيب انتى هتقفلى المدونة علشان فى ناس انتى مش مستحملاهم عندك وعايزة ترتاحى منهم
بس مفكرتيش ان فى ناس فعلاً اتعلقوا بالمدونة وبقوا بيجوا هنا علشان يشوفوا احساسك؟؟ ، هيكون ذنبهم ايه؟؟

عموماً اى شخص ليه الحق انه يزعل ، بس فى نفس الوقت لو فى حد مزعلك فى حياة التدوين دا عندك الفرصة انك تنتقديه وتفتحى عليه ابواب جهنم بس بقلمك وتفهميه غلطه
بس حكاية انك تقفلى المدونة دى هتبقى فى دماغة كسور وانكسار منك انتى وانتصار له
عموماً انا منتظر رجوعك ، لإن بجد انسانة زيك مينفعش انها تحرمنا من ابداعتها الجميلة دى

تحياتى وفكرى فى كلامى كتير
اخوكى

ABOALI يقول...

اهربى
مع الهروب يحلو الغروب
واكيد هايكون فى شك فى شروق
لاءن الهروب
عنوان قلة الصمود
وضعف النفس وحب السكون


ماتزعليش من حد
وارفعى روحك المعنوية
وكونى مؤثره فى الناس
مش الناس هى اللى تسيطر عليكى
فى شروقها وغروبها


الشخص نفسه هو الادرى بنفسه
وانت اكيد عقلك كبير
ولا ايه

نفرتارى يقول...

جميلتى وحبيبتى انت مالك مافيش حد تستاهل زعلك واوعى تكون لوحدك اكتبى وخرجى اللى جواكى ومتخليش فى حاجة فى نفسك ابداً وعلى فكرة ان ضيفت ايميلك عندى وهتلاقى اول ايميلى ew ولو فى اى حاجة ادخلى نتكلم مع بعض شوية يمكن تخرجى شويه من اللى انت فيه .
وعلى فكرة مبروك مبرووووووووووووك على نجاحك وعقبال نجاحك فى كل شئ فى الدراسة والحياة وفى اخراج غروب من اللى هى فيه .

دمتى بكل سعادة ،،


نفرتارى

ماما أمولة يقول...

استغفر الله العظيم يارب

في ايه يا بنتي ما أنا سايباكي امبارح زي الفل ايه اللي حصل تاني

ياريت تكلميني وتطمنيني عليك

ربنا يفرج همك اللهم امين

اتحسدتي ولا اييييييييييييه

طمنيني ها استنى التليفون

ضحكات الحياة يقول...

أول مرة اشارك فى البوست بس بصراحة هو الهروب حل مؤقت بس اكيد مش حل نهائى

و اسم المدونة ما بعد الغروب و لازم تعرفى انه اكيد بعد الغروب شروق جميل و لا يحلى الشروق بجمالة الا بعد الغروب

و توكلى على الله فمن توكل على الله فلا مضل له

و تمنياتى بالعودة سريعاكل الكمونتات بتقول ان انتى انسانة طيبة فلا يكون لكى هذا الحزن

تمنياتى بالسعادة

ماء تشرين يقول...

انا عارفه انو كل واحد بيجى على اوقات بيحتاج يكون لو حده
بس ياريت الحاله دى مش تستمر بجد ومش تستسلمى لانك يما هتقبلى في حياتنا فلو كل مشكله قررنا اننا نعتزل فيها الحياه الاجتماعيه هنقضي حياتنا اعتزل خدى وقتك وفكرى وعيدي ترتيب حياتك وارجع تانى اكثر اشراقا واهم حاجه ترجعى تانى لينا هنا وتعرفي انو الحياه فيها ناس كتير اوووى ومش بتقف على حد


دمتى بكل الود والحب
ماء تشرين

زوجة عنيدة يقول...

انا مش عارفة ايه اللى حصل
بس هقولك حاجة الحياة فيها صعوبااااااااااااااااااات كتييييييييييير جدااااااااا

شوفى انا طولت فيها ازاى يعنى ممكن اللى انتى فيه دلوقتى يكون الهين من الصعوبات دى

ربنا معاكى ولازم تكونى اقوى من كدة

دمتى بود ولو دة اخر قرار يارب مش تطولى

aidy يقول...

غروب او اقول سارة زى ما بينادوكى :

انا مقدرة الحالة اللى انتى فيها عشان افتكر انى اتحطيت فى موقف زى ده قبل كده

بس انا مبعدتش بالعكس وقفت ضد التيار واتحديت الناس دى وصدقينى كسبت فى الاخر لأن معايا الحق

مش عايزاكى تخسرى حاجة عشان خاطر اى حد مش يستاهل

مش عايزاكى تخسرى الحاجات الجميلة اللى فى حياتى وتبوظى لحظات فرحتك

عايزاكى اقوى من كده كتييييير
عافرى اتعبيهم هما بعنادك وصلابتك

متتنازليش عن الحاجات اللى بتحبيها وتقولى كده هترتاحى لأنك بتتعبى اكتر كده ومتنكريش

عايزة اشوف كشاركة ليكى تقولى انك مش هتبعدى عن المدونة بتاعتك لأنها بتاعتك واللى مش عاجبه يخرج منها

وان شاء الله نتكلم مع بعض قريب ,,

E73 يقول...

بسم الله الرحمن الرحيم
السلام عليكم ورحمة الله وبركاته

لاحول ولا قوة الا بالله العلي العظيم
خير يا عروسة أخويا؟!

قوليلي انتي بس مين داسلك على طرف وانا اقطعلك خبره


لألأ بقولك إيه إوعي يكون أنا وانا مش واخدة بالي

دانا حتى حلمت بيكي النهاردة ولما كلمتك لقيتك رايحة في سابع نومة

طمنيني يا تحفتي الصغنونة
احسن افركشلك الجوازة ;)

E73 يقول...
أزال المؤلف هذا التعليق.
الرومانسي الأخير ... يقول...

ابدا مكانش الهروب هو الحل ...

اذا كنتي بتقولي ان فيه ناس نواياهم مش كويسه و كانوا السبب في ضياع حاجات منك تيجي انتي تساعديهم اكتر و تضيعي بأديكي اللي باقي ؟!!

مش هقولك كلام كبير عن المواجهة و التحدي و الحياه و الكلام الجامد ده

لكن علي الأقل التجاهل سياسه سهله و فعاله ... اعتبريهم مش موجودين و استمتعي بالكام حاجه الجميله اللي في حياتك

ربنا يرعاكي و يقويكي ان شاء الله

مسدس صغير يقول...

مش فاهم حاجة
بس بجد انا زعلان ان وحدة محترمة زيك توصل للمرحلة النفسية دى.
الدنيا مش مستاهله ولا اى حد فيها يستاهل .
اللى انتى مش عايزة تكلميه واجهيه بده ولازم تكونى قوية وتخلى قوتك دى اقوى من اى شخص او اى عوامل ممكن تأثر عليكى.
اتمنى لكى الخير.
اسأل الله ان يفك كربك.

الشاعر الحزين يقول...

الجميله غروب

يمكن كل الناس اللى علقت على البوست ده بتطالبك بعدم اليأس والاستسلام
وبتطالبك بالرجوع بسرعه

لكن أنا تعليقى هيكون مختلف تماما
أنا بقولك أنتى فعلا عندك حق
لازم تدى لنفسك مهله للراحه
لازم تبعدى شويه عشان ترتاحى
لكن أتمنى ان المهله دى تكون هى بداية الطريق للوصول الى الراحه
راحة البال طبعا والضمير
وأيضا أتمنى أن تعودى الينا بكل الحب والتفاؤل والتفكير فى الحب فقط وليس فى الكراهيه

هذه هى رؤيتى لاحساسك
وأتمنى أن تأخذى القرار الصحيح

دمتى بالخير وأخرجك الله من كل ضيق وكرب

ولكى منى كل التقدير والاحترام

الشاعر الحزين علاء الدين

غير معرف يقول...

للأف ياسارة كلنا بنحبك ومش سهل تاحدي قرار زي ده لوحدك
لأنك لو سبتينا مش هنسيبك
ولو قفلتي موبايل والمدونةوالميل وكل الدنيا
هنط عليك في البيت
هتهربي مننا .
ما اعتقدش انت اخلاقك عليا مش هتسيبنا نرجع
وكمان عشان انت بتحبينا زي ماحنا بنجبك ..زعلتي مننا كل الزعل ده
ما تصدقيش حد لو قالك سيبك منهم اللي زعلوك
لكن اسمعي كلام اللي قولك خدي راحة ..وارجعي بالحب
واحنا كلنا مادين ادينا ليكي بالحب
ما تسمحيش لخد يفرق مابينا
احنا ما ظلمنكيش
لكن سوء تفاهم بيحصل بين اي اصحاب
لكن في الآخر هما لبعض
فاهمة .لبعض أوي
بنــحبك باسارة ..

اعشق فى الليل ضوء القمر يقول...

انا لن استطيع ان اقول مثل من سبقنى بالتعليق لكن إن كنتى تدخلين المدونه و تقرأى التعليق فقرأئى تلك الكلمات
قال النبى محمد صلى الله عليه و سلم :
اللهم إنى عبدك إبن عبدك إبن أمتك ناصيتى بيدك ماض فى حكمك عدل فى قضائك أسألك بكل إسم هو لك سميت به نفسك أو أنزلت فى كتابك أو إسثأرت به فى علم الغيب عندك أو علمته أحدا من كتابك أن تجعل القرأن الكريم ربيع قلبى ونور صدرى وجلاء همى و حزنى
صلى الله على محمد صلى الله عليه وسلم
فيه دعاء لسيدن عمر بن الخطاب كان يقول اللهم أرزقنى أخا لى فيك يقربنى إليك
على فكره دعاء النبى قوى جدا و انا مجربه لدرجه ممكن اقوله لمجرد وجود هم
باقى الدعاء من قالها فى هم أو حزن بدل الله همه فرحا وسرورا
لك هاله من قمر لعلها تنير ظلمات العقل المستنير

طـــائر الليــــل الحـــــزين يقول...

ترجعى بالسلامة
تعرفى كلنا بنمر بأزمات قوية
انا واحدة من الناس بحب وقتها ابقى لوحدى واقوى بيه ومش بحد تانى مهما كانت معزته او غلوته
بس عشان اتعود دايما ابقى قوية وضعفى يكون بينى وبين نفسى ومش لحد تانى ابدااااا
عموما خدى وقتك
واتمنالك اجازة كويسة واعصاب اهدى من كده
تحيااااااااااتى يا غروب

الفراشة الصغيرة يقول...

المهم يا غروب

ان البعد مينسكيش حبايبك

ماشى يا سيتى انسى الناس الوحشه

بس خلى الناس الحلوه معاكى

ولا انتى مبقتيش عارفه حتى تميزى

اتمنى تكونى بخير
وترمى حمولك على الله
يمكن كلنا بيعدى علينا لحظات كده كتير
بس حاولى متستسلميش ليها

ريمان يقول...

وماله حبيبتى

ابعدى شويه عن الناس

خدى اجازه منهم

اقفلى موبايلك

ابعدى عن مدونتك شويه

اقعدى لوحدك

خدى وقتك خالص

لحد ما ترتاحى

انا مش مستغربه من كلامك

لانى برضه بعمل كتير اوى كده

بس مش تتاخرى علينا حبيبتى

مستنياكى


بقولك اهو

مستنياكى

سمعانى؟

mahasen saber يقول...

طب قفلان مدونه يعنى فيه زعل ويعز عليا انك تكونى زعلانه
ربنا يصلحلك الحال


بس هتلففينى وراكى تانى صح

الشنكوتي الكبير يقول...

طب كويس ريحي شويه كده على بال ما نتعرف على مدونتك ونشوف انتي دماغك ايه
مش يمكن تطلعي رخمه وغلسه ونقعد ندعي انك تقفليها خالص ومترجعيش تاني
وممكن تطلعي انسانه طيبه وجدعه ودماغك حلوه ونقعد نقول يا خساره ان حد كويس كده ويبعد عننا علشان حد مزعله
وكأن ذنبنا اننا مقدرناش نبعد عنك ناس مش كويسه

----------

بصي مش هقولك ارجعي يا سعاد والكلام ده
لكن هقولك ان اللي اتعود يفضفض وجواه كتير عايز يخرجه لحد يشاركه فيه عمره ما هيقدر يبطل فضفضه وعمره ما هيبطل كلام
هترجعي تاني بس لما تبقى مستعده علشان كده هتلاقي الناس اللي فعلا حبوكي لسه مستنينك
والناس اللي ضايقوكي هتلاقيهم برده بس هتكوني اقوى وانشط وعندك استعداد تخشي حروبك تاني
بالتوفيق بقى

سلاااااااااااااااااااااااااااام

aidy يقول...

غروب البعد طول اوى

مستنياكى ترجعى قريب ..

3abratalsabeel يقول...

السلام عليكم
حاسة بيكى قوى قوى
لان اللى انتى فيه ده فى واحدة عزيزة عليا قوى بتعيشه كتير
وبتتصدم من الناس كتير قوى
لكن احنا معاكى يا غروب وبنحبك وبنحب كلامك

تعالى اقرى البوست بتاعى واضحكى شوية وفرفشى...ما تستسلميش للزعل ده ما حدش يستاهل تزعلى كده

Gemy يقول...

تسلم ايدك بجد على الموضوع الجميل ده
وانا معاكى ان فى ناس كتير بتحب انها تلعب بمشاعر الناس اللى بتحبهم
وده انا شايف انه مرض خطير جدا
وهو نوع من انواع الظلم...واكيد كله بيترد فى الاخر..
تقبلى مرورى
اخوكى جيمى

 

ما بعد الغروب © 2008. Design By: SkinCorner