الثلاثاء، 30 يونيو 2009

حاله من عدم الرضا


ياسامع الدعاء يارافع السماء ياعالم بحالنا نحن راضون بك وراضون عنك فزيدنا رضا بك يارب العالمين

الخميس، 25 يونيو 2009

كام يوم في عمرى



بسم الله الرحمن الرحيم


ازيكوا كلكواااااااااااااا وحشتونى خالص بالص مالص


اخيرا اخيرا ومش قادره اصدق نفسي خلصت الامتحانات .....اااااااخر امتحانات اجباريه في حياتى ....الحمد لله وعدت بسلام


خلصت يوم الاتنين وبعدين لسه يدوب مروحه علشان ارتاح شويه لقيت الانسه شهد بنت خالتى بتكلمنى بتقولى انا نازله علشان عاوزه اشترى اكسسورات واللذى منه علشان الفرح


عقبال عندكوا .. فقولت اووووك مش مشكله ...اشترينا الحاجات وبعدين قررنا اننا نروح نقضي الليله في بيتهم وقد كان .. صحينا الصبح قصدى العصر لقينانا مقررين اننا نروح لتيته ولسمكه هانم نقضي معاهم كام سنه ...ههه قصدى كام يوم


روحنا لتيته بقه وقعدنا سوا نفتكر الذكريات ....احنا التلاته ( شهد وساسو وسمكه ) ذكريات طفولتنا الجميله واللى ممكن تكون دى اخر مره نقدها سوا في الوقت الحالى وده طبعا لان ده موسم التزاوج البشري....وعلشان كده فرح سمكه اخر شهر سبعه وفرح شهد بعدها بكام يوم بس مش في مصر


تخيلوا يا عيال اننا صعب بعد كده نقعد كده ونحكى ونضحك بصوت يسمع الشارع اللى جمب اللى جمبنا ؟؟؟؟؟؟؟؟؟


المهم واحنا قاعديت اكتشفنا ان ال ايه ؟؟؟ظ خير اللهم اجعله خير فرح بلال ابن خالنا اول شهر تمانيه ماشاء الله ..يارب زود افراحنا


وساسا انا فرح ابن عمى انا يوم 77


والاهم بقه من ده كللللللللللللللللله : خبر انا نفسي مش مصدقاه وفرحانه اووووووووى اووووووووى اووووووى وسعيده جدااااااا جدااااااااااا جدااااااااااااا


جاءنا البيان التالى :


تم خطوبه الانسه آيه ( انتيختى ) على الاستاذ هشام ....... لولولولولوولوووووووووووووووووى


مش مصدقه والله البت ايه اتخطبت وبقت عروسه وبتتكسف من خطيبها والذى منه ؟؟؟؟؟؟؟؟؟؟؟؟ سبحان مغير الاحوال


غير فرح صحباتى بقه ( ساره وريفان وايه ..واحده تانيه )

ياه يا جودعان .........ده موسم فعلا الناس دى كلها بتتجوز ورا بعضها ليه كده ؟؟؟؟؟؟

انا في حاجه واقفه في زورى عاوزه اقولها : تيته .......الست تيته .........الانسه تيته ......اه من اللى عملته فيه انا وشهد اليومين اللى كنا عندها فيهم ههههههه


اصل تيته من النوع اللى يعز الصحيان بدرى وانا وشهد العكس ...


اول يوم نامت شهد على سرير لوحدها وانا قولت هنام جمب تيته حبيبتى ..المهم انى فوقت على زغزغه في الرجلين وال ايه ؟؟؟؟تيته بتقولى قووووووومى كفايه نوم هنتغدى ايه ؟؟؟؟؟؟؟؟؟؟؟؟
ههههههههه ايه ده يا ست انتى هنتغدى ايه ؟؟؟؟؟؟ طب قولى هنفطر ايه ؟؟؟؟

اصل بجد تيته من اولويات حياتها هو تجهيز الغدا لازم تكون عارفه هناكل ايه وامتى والساعه كام ؟؟؟؟؟؟

المهم طبعا لولا انها تيته كان هيبقي ليه تصرف تانى ...صحيت وامرى لله


تانى يوم بقه اخدنا الكارو وروحنا راس البر من ورا تيته ههههههههههههه روحنا بقه على البحر وعلى النيل واشترينا حجات حلوه خالص مهى يمكن تكون اخر مره نروح سوا


المهم ان تيته كانت متوقعه رجوعنا الساعه تسعه بالكتير اوى .......واحنا متاخرناش جامد يدوب وصلنا الساعه تلاته وتلت الصبح


نخبط بقه على تيته مش بتفتح ..... انتى يا ست انتى .... مفيش


هنبات في الشارع؟؟؟؟؟؟؟ روحت اخدت طوبه من الارض وحدفتها على البلكونه وبرضه مفيش فايده


المهم في الاخر جالنا فكره اننا نجيب العربيه لحححححححد قرب السور اووووووى ونطلع على شنطه العربيه وننط من البلكونه لانها دور ارضي طبعا


شهد طبعا عملتها ببراعه وانا معرفتش فجابتلى كرسي وطلعت عليه وطبعا تيته مش طيقانا .....نمنا بقه وتانى يوم تيته كاالعاده بتصحينا بدرى ههههه


بس على مين بقه مقمناش غير الساعه 12 لما مامتى جت وعملنا الغدا وارتاحت تيته


وبعدين مشينا بقه وتيته زعلالالانه واحنا التلاته زعلانين لان ربما تكون دى اخر لقاء لينا قبل سفر شهد وجوازها برا مصر وجواز سمكه ومحتمل تسافر كمان


وانا هفضل زى القرده لوحدى .....هههههههه



بس كده دول يومين غاليين في حياتى حبيت اسجلهم


وعاوزه اقول ليويو انتيختى الف مبروووووووووووووووووووووووووك يا حبيبي وعقبال الفرح وربنا يسعدك يارب بس من غير تريقه هههههه


سلام بقه


غروب هانم

السبت، 20 يونيو 2009

عيد ميلاد


عدت سنه... و الليله هطفي شمعه الجرح الغريب

جرحى انا

جرحى اللى عشته من فراق اغلى حبيب

شمعه دموع.....شمعه الم

شمعه حنين ....شمعه ندم

قرب يا قلبي من الشموع.....الليله عيد اصعب دموع

عيد ميلاد جرحى انا

الذكريات المؤلمه والجرح والاحزان ضيوفي ....والورد معزوم انما خجلان وحيد يشبه لخوفي

لا الشوق يا قلبي بامرنا ولا كان بايدي اختار نصيبي ...يبقي خلاص مكتوب لنا رغم البعاد يفضل حبيبي

شمعه دموع ..شمعه الم

شمعه حنين ...شمعه ندم

قرب يا قلبي من الشموع..الليله عيد اصعب دموع

عيد ميلاد جرحى انا


فاضل ثوانى قليله ويعدى اول عيد لجرحى والجرح هيعيش جوا منى مش هيمحيه اى فرح

الذكرى مش ممكن تموت او يجي يوم وتختفي الذكرى هيكون ليها صوت مع كل شمعه بتنطفي


شمعه دموع...شمعه الم

شمعه حنين ....شمعه ندم

قرب يا قلبي من الشموع...الليله عيد اصعب دموع

عيد ميلاد جرحى انا

غروب

الخميس، 11 يونيو 2009

شروق


انسانه عايشه بالغنا
نفسي اسمع للنجوم
لحنى اللى لسه متعزفش
وبايدي اطلع للسحاب واكلمه
عن قلب لسه منهزمش
ولحنى دايما ينطلق ........وبدون قلق
يغلب اعاصير الالم والانكسار
ويروح مع صوت النهار
يرجع يغيب ..ويتوه بعيد
وبيفتكر
اول ما كان
اول زمان
اول ما دق القلب كان
علشانها بس لوحدها
لكنه يصحي من جديد
نفسه يعيد حلم السنين
دقه حنين
من بين عيونها كلمتين
سامعه بكاها وحسّها
اول ما كان الرد لأ
ورجعلى قلبي بحسرته
رجع يعافر من جديد
عايش تعيش ... عايش سعيد
ميهمنيش
عايشه بموت من غير الم
فنانه بحلم بالورق
ميت بايد من غير قلم
لكنى واثقه بانى يوم
هلاقي حلمى اللى اختفي
بفعل الغنا

عندما ياتى الشروق ..........فلا مكان للغروب
when nothing go right .......Go left
النهااااااااااااااااااااااااااااايه

الثلاثاء، 9 يونيو 2009

بسم الله الرحمن الرحيم


النهارده يوم غريب عليه اوى .. عندى فيه كميه مشاعر متناقضه كتييييير

اولا فرحانه جدا ... لان الحمد لله فات من الامتحانات الكتير ومش باقي الا القليل والحمد لله ماشيه تمام

ثانيا : فرحانه اوى لان بمجرد نهايه الامتحانات عندى 3 افراح لاعز الناس عندى عقبالكوا جميعا

الاول فرح كيمو ابن عمى على مونى صاحبتى

ثانيا فرح شهد بنت خالتى وصاحبتى

ثالثا فرح سمكه بنت خالتى وصاحبتى

فرحانه اوى للتلاته من قلبي لكن في نفس الوقت زعلانه اووووووووووى

زعلانه لانى حاسه انى هبقي لوحدى ... اصل انا وشهد وسمكه عمرنا م افترقنا

اتربينا لمده عشرين سنه سوا ... وتقريبا في بيوت واحده

ولحد لما كبرنا واتخطبوا الاتنين واحنا بنشوف بعض دايما ومع بعض

دلوقتى حصل شئ غريب

سمكه فرحها اخر الشهر وهتروح بيت جديد .. وشهد هتتجوز وتسافر السعوديه ومش هترجع دلوقتى

احنا اساسا بنتجمع كل يوم تثلاثاء كلنا مهما كانت اشغالنا ..مش متخيله دلوقتى انى هروح ابقي لوحدى

مفيش سمكه ومفيش شهد .. انا وبس

حاسه بالوحده والحزن كتير اوى .. قلبي بيوجعنى فعلا

ده اول احساسين متناقضين ..غيرهم بقه

احساس غبي شويه ... حاسه انى عاوزه احب ..ههههههه محدش يضحك

ايوه والله حاسه انى عاوزه احب دلوقتى حالا وعاوزه اتحب

انا عارف ان كتير هيسال والاحساس ده يا بنتى جالك فجاه؟؟؟؟؟؟؟

انا عارفه ان كل احساس ليه دافع داخلى والدافع موجود مش مجنونه ولا حاجه .. بس النهارده بالصدفه سمعت مكالمه بين سمكه وخطيبها

كنت فرحانه بحاله الحب دى اوى .. بس في نفس الوقت اتمنيتها

اتجننت صح؟؟؟؟؟؟؟؟

ما علييييييييييييينا

احل بقه التاج اللى جالى من ايناس عاشقه الاحزان بالمره

أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟
اولا .. حلم عاطفي اتمنيته زمان بجنون ولو رجع بيه الزمن اعتقد عمرى مهفكر احلمه لانه كان كابوس واتخدعت فيه
ثانيا : حلمت حلم طبيعي بتصليح خطا اسرى وحاولت فعلا احول حلمى لواقع بس للاسف اتقلب على دماغي فلو رجع الزمن برضه عمرى مش هحلمه
ثالثا: حلمت من فتره بحاله حب جديده واكتشفت انها فاشله ولو رجع الزمن برضه مش هحلمها لانها متنفعش حب هى تنفع زى مهى ماشيه وبس ليس الا
رابعا : حلمت زمان انى اكون طبيبه بس حاليا مش متوقعه نفسي غير في مكانى وفي مجالى وعلشان كده ده كان حلم غلط برضه
خامسا : حلمت اوصل للنجوم اللى بعيده عنى اوى ولما حاولت اوصلها فعلا وقعت واتكسرت جامد ولسه الحلم ده بياذينى لمجرد انى افتكره


أذكر خمس أحلام على الأقل ..تخص مستقبلك ؟؟؟

زى اى بنت انى ارتبط بانسان اعرف احبه ويعرف يحبنى
نفسي جدا احج...ياارب اكتبها لى
نفسي اصلح علاقه معينه في حياتى كسرها سبب لي ازمه نفسيه وعلى الهامش ..مش علاقه عاطفيه
بحلم اشوف الحزن في عين بعض الشخصيات .. محدش ينقدنى
بحلو بصراحه بيوم فرحى وعيلتى الجديده هههههه كتير اووووووووى خصوصا تفاصيل الفرح
مجنوووونه والله

أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن ?
التمثالين اللى اتكسروا منى البوست اللى فات بس لسه مش عارفه اذا كانوا هيفضلوا معايا بكسرهم ولا هتخلى عنهم؟


ذكر شخصين على الأقل غير متواجدين فى حياتك حاليا كنت تود وجودهم الان
الرسول صلى الله عليه وسلم
تيته الله يرحمها وجدو
واتمنى بجد بجد ان يكون ابراهيم الفقي جمبي وموجود في حياتى بكتبه وبرامجه من زمان اوى

تحدث عن ستة أسرار قد لا يكتشفها من يقابلك للمرة الأولى ؟
انا شخصيه واضحه لدرجه ان اى حد ممكن يكشف كل شئ عنى من اول لقاء


تهدى التاج لمين ؟؟

انا دايما الحقيقه مش بحب ادبس حد لكن المره دى خلينى اهدى التاج لاتنين غاليين لمجرد تدبيسهم

جهاد مشالى ... حاجات عيال لما ترجع بالسلامه

ودورنا ....معجزات

بالهنا والشفا
انا طبعا مش خصيت الاتنين دول لاى سبب غير انهم انتيماتى واعرفهم بدون تدوين
لكن اصحابي المدونين كتير ونفسي اهديهم كلهم التاج لكن اخاف انسي حد فاللى عاوزه ياخده
غروب

الخميس، 4 يونيو 2009

تماثيل


بسم الله الرحمن الرحيم

عاوزه اتكلم النهارده على التماثيل ... اصلي اكتشفت النهارده بس انى طول عمرى بحب التماثيل

على فكره انا باتكلم بجد انا فعلا بحب التماثيل اللى هى في البيت دى رغم انى عرفت انها حرام وانها تقريبا بتعد اصنام

لكن لو حتى مش بحطها في البيت ف انا لسه بحب شكلها ولسه بحب اروح اتفرج عليها في المحلات واشوف اسعارها

بس ده بالنسبه للتماثيل الصامته .. اللى غالبا مصنوعه من حجر

في بقه نوع تانى جديد جدا من التماثيل .. متكلم وفيه روح لكن مفيش قلب

يعنى اشباه بنى ادمين تقريبا

ودول لقيت منهم كتير .. كنت معتقده انهم مش مجرد تماثيل عاديه ..لكن طلعوا زيهم زى اقل تمثال صامت ممكن اعجب بيه

كان احساس جميل اوى لما لقيت التماثيل الجديده دى ...لقيتهم صدفه ومش روحت بنفسي ادور عليهم كالعاده

حبيت التماثيل الجديده دى اوى واعتبرتها اكتشاف جديد ..وكنت بخاف عليهم من اىحد يقرب علشان ياذيهم

تمثال منهم .... احتميت بيه لانه كان كبير اوى .. في ضهرى دايما .. كل اما اجى اقع يسندنى

تمثال تانى ....ضعيف في البنيه صحيح لكن حسيت فيه حنان ودفئ واصاله كبيره( شكله حلو )

والتمثالين دول كانوا اهم تمثالين في التماثيل اللى عندى .. بس للاسف وقعوا اتكسروا

لان التمثال الاول وقع جزء منه فمقدرش يصمد اكتر من كده واتهد

والتمثال التانى كان حنين اه .. بس مش عليّه

اتكسرت التماثيل ... بس انا لسه مش مكسوره

ومش محتاجه تماثيل تانى اعتقد

والسبب الوحيد ان مفيش تماثيل تساويهم عندى مهما لفيت

فعلشان كده مش هلف .. ومش هدور .. ومش عاوزه تماثيل

ومش هقبل حتى التماثيل بتاعتى تانى ...لانى مش هتمسك باى تمثال مكسور ..لان كسره ممكن يكسرنى معاه

مينفعش اقف ادام تمثال مكسور ... لانه مش هيقدر يحمينى ... ومع اول ضربه هيقع واقع معاه

بجد خلاص مش عاوزه تماثيل تانى

انا عاوزه اعيش كده

غروب

 

ما بعد الغروب © 2008. Design By: SkinCorner