الخميس، 4 يونيو، 2009

تماثيل


بسم الله الرحمن الرحيم

عاوزه اتكلم النهارده على التماثيل ... اصلي اكتشفت النهارده بس انى طول عمرى بحب التماثيل

على فكره انا باتكلم بجد انا فعلا بحب التماثيل اللى هى في البيت دى رغم انى عرفت انها حرام وانها تقريبا بتعد اصنام

لكن لو حتى مش بحطها في البيت ف انا لسه بحب شكلها ولسه بحب اروح اتفرج عليها في المحلات واشوف اسعارها

بس ده بالنسبه للتماثيل الصامته .. اللى غالبا مصنوعه من حجر

في بقه نوع تانى جديد جدا من التماثيل .. متكلم وفيه روح لكن مفيش قلب

يعنى اشباه بنى ادمين تقريبا

ودول لقيت منهم كتير .. كنت معتقده انهم مش مجرد تماثيل عاديه ..لكن طلعوا زيهم زى اقل تمثال صامت ممكن اعجب بيه

كان احساس جميل اوى لما لقيت التماثيل الجديده دى ...لقيتهم صدفه ومش روحت بنفسي ادور عليهم كالعاده

حبيت التماثيل الجديده دى اوى واعتبرتها اكتشاف جديد ..وكنت بخاف عليهم من اىحد يقرب علشان ياذيهم

تمثال منهم .... احتميت بيه لانه كان كبير اوى .. في ضهرى دايما .. كل اما اجى اقع يسندنى

تمثال تانى ....ضعيف في البنيه صحيح لكن حسيت فيه حنان ودفئ واصاله كبيره( شكله حلو )

والتمثالين دول كانوا اهم تمثالين في التماثيل اللى عندى .. بس للاسف وقعوا اتكسروا

لان التمثال الاول وقع جزء منه فمقدرش يصمد اكتر من كده واتهد

والتمثال التانى كان حنين اه .. بس مش عليّه

اتكسرت التماثيل ... بس انا لسه مش مكسوره

ومش محتاجه تماثيل تانى اعتقد

والسبب الوحيد ان مفيش تماثيل تساويهم عندى مهما لفيت

فعلشان كده مش هلف .. ومش هدور .. ومش عاوزه تماثيل

ومش هقبل حتى التماثيل بتاعتى تانى ...لانى مش هتمسك باى تمثال مكسور ..لان كسره ممكن يكسرنى معاه

مينفعش اقف ادام تمثال مكسور ... لانه مش هيقدر يحمينى ... ومع اول ضربه هيقع واقع معاه

بجد خلاص مش عاوزه تماثيل تانى

انا عاوزه اعيش كده

غروب

36 التعليقات:

طـــائر الليــــل الحـــــزين يقول...

اول تعليق

طـــائر الليــــل الحـــــزين يقول...

جميل قوى موضوع التماثيل
تعرفى فعلا عندك حق
التماثيل اللى حوالينا كتير
اه ممكن تكون بتتكلم وتتحرك لكنها من غير روح
وده اللى بيخليها على طول هتفضل تماثيل
على الرغم من اننا ممكن نتخدع فيها
الا برده بنعرف ده على طول
والاحسن اننا منسمحش ان يكون فى حياتنا ناس من النوعية دى
تحيااااااااااتى يا قمر
البوست جميل قوى

عاشقة الأحزان يقول...

السلام عليكم



غروب الجميله


بجد كلامك جميل عن التمثايل

اصلا كل اللى فى حياتنا حاليآ كلهم تماثيل ومعتش حد ليه لزمه أصلآ


الله عليكى

هايله والله


ربنا يوفقك يارب ويكرمك خير

ياأحن اخت فى الدنيا كلها

بس ليه مش جاوبتى على التاج

مش هسيبك برده

وراكى وراكى

هههههههه
تحياتى لكى

انوسه

الشاعر الحزين يقول...

أشباه بنى آدمين تماثيل بلا قلوب

تعرفى لو كل انسان عرف السبب اللى ربنا خلقه فى الدنيا عشانه ؟

صدقينى مش هتلاقى غير بشر جقيقين ومش هتلاقى تماثيل ولا هتلاقى أشباه بشر

ربنا خلقنا عشان نعبده ونتوكل عليه وبس

تشبيهاتك جميله ومفيده

تسلم ايدك بعد الغيبه

Soul.o0o.Whisper يقول...

غروب الجميلة

السلام عليكم و رحمة الله و بركاته

بصى يا قمر

لما نتعلق بحد لازم نتأكد انه مش تمثال

انه انسان حى

عشان نقدر نتعامل و نتفاهم معاه

ناخد زى مابندى

لكن كدا

اعتقد قرارك صح

بس حاولى تبحثى عن الانسان



دمتى بود

yoyo يقول...

صباحك سكر يا قمر

والله وحشتنى جدا
يارب تكونى بالف خير يارب

التماثيل رغم جمالها الا انها تفقد اهو شىء وهو الروح و بالتالى تفقد الحياة
قطعة فنية جميلة بلا ادنى روح
فستصبح مع الوقت بلا ادنى قيمة
فابالك حين تكسر فقد اصبحت شىء لا يحمل اى معنى
اصبحت شىء متلاشى نابع من العدم

عجبنى تشبيهك اوى يا غروب فعلا والله الدنيا مليان تماثيل
تسلمى و يسلم احساسك الجميل
دمتى اختى بالف خير
تحياتى
يويو

مصعب صلاح يقول...

السلام عليكم

سابع تعليق ، جديدة مش كده

بصراحة يا طانت أنا مش بحب أي نوع من التماثيل دي

لأني احسن حاجة الوضوح

تقبلي مروري

الأمير يقول...

بسم الله ...

المدونه " غروب "

مش عارف ليه بيبقى كلامك مختلف
اللى بيقرأ كلامك يحس انك بتكلميه لوحده هو بس ..!!!!

تحسى كده كأنه حد قريب منك اوى
اخوكِ .. اختك .. او يمكن نفسك ..

المهم انك بتفضفضى وتتكلمى بسلاسه
جميله

-------------

البوست

الامر رغم انه مؤلم ومحزن
الا انى عجبنى اوى تبسيطك له
يعنى ولا همك اى حاجه
مجرد تماثيل واتكسرت
يبقى ليه ابكى عليهم باقى عمرى

اى انسان اقصد تمثال
يكون متحرك متكلم ولكن القلب حجر
او حتى اشد قسوه من الحجر
يبقى نحمد ربنا انه اتكسر

ولا تقف حياتنا على من لا يستحق

بجد عجبتنى اوى فلسفتك للامر كله

بكل ... بساطه ...

تحياتى
الامــــــــــيــــر

لاسع افندى يقول...

اللى يفرق بين الانسان والتمثال هو القلب الحى المليان مشاعر



تقبلوا تحياتى

شيماء جمال(شيمو القمر) يقول...

واااااااااااااااو
يا غروب تشبيهك مع بساطه الا انه عميق المعنى جدا
كتير بنقابل تماثيل فى حياتنا وهى مجرد تماثيل اقتنتيها ولما ما قدرتش تحمينا وانكسرت لا يعنون لنا شيئا لأنها ليس بها قلب

كلامك حلو قوى
تحياتى
شيمو القمر

محمد عتلم يقول...

طيب والناس اللى شبه التماثيل ؟؟
مش فيه منهم كتير اوى حوالينا ؟؟

فراشة يقول...

ازيك يا غروب عاملة ايه
موضوعاتك جميلة ومحيرة ومتجددة
تعرفى انى لحد آخر ثانية وآخر كلمة كنت معتقدة انك حتقولى فى الآخر ان التماثيل دى اشخاص ضعاف مثلا اتكسروا فانتى مش بتحبى الضعف يعنى حاجه على سبيل كده

ومازالت اعتقدت ان حديثك من ورائه معنى آخر

التماثيل فعلا ممكن تكون تحفه فنيه جميلة لكن صعب نملىء بيها البيوت عشان ديننا بيحظر من ذلك

لكن من ناحيه الاعجاب والفن فهى طبعا جميلة

بحيكى على موضوعك ومازلت مصرة انك تقصدي معنى آخر

beautiful mind يقول...

بعيدا عن التماثيل المكسورة واشباه الادميين عديمي المشاعر والروح تبقي انتي كما هي
لن يكسرك اي تمثال مهما كان كسره
ولن يجبرك علي الصمت مهما سجن في صمته

دائما ستسيري في الحياه ولن يعطلك اي تمثال

هذه هي حياتك فاقبليها بلا تماثيل
ماشاء الله علي البوست وعلي الاحساس العالي
سلمت يمناك
ودومتي بود وخير

صوت من مصر يقول...

معلش انا مسلم لكنى مقتنع مليون بالمئه انها ليست حرام
لاننا بقيت فى زمن نقدر نعرف ان ده احنا الى عملناه
مش حد تانى
فكره البوست هايله

reem يقول...

عزيزتي غروب
ايه الكلام الجميل ده عن التماثيل وتشبيهاتها فعلا في حياتنا ناس بتكون زي التمثال بنتسند عليها يا بتكون قويه وثابته وبتسندها يا بتكون ضغيفه وبتتكسر ومش بتقدر تحمينا
بس ايه فكرة البوست الجميل ده
على فكره احنا كمان ممكن نكون تماثيل في حياة غيرنا
دمتي بحب

aidy يقول...

التماثيل

عنوان حلو والمضمون بتاعه احلى

بس مش كل الناس تماثيل

لازم يكون فى امل ان الناس حتى لو عندهم نقط ضعف بس عندهم حاجات كويسة يعرفوا يدوها

موضوع حلو اوى يا غروب

غروب يقول...

طائر الليل الحزين

متشكرهخالص يا قمر على الزياره والتعليق

بس انا مش معاكى في اننا بنعرف التماثيل دى علطول

لانها بتاخد شكل جميل وبتفضل ماسكه نفسها ومش بتحاول تكسر نفسها دايما

بس لازم بيكون بقه في غللاطه احنا نعرف كسرهم بيها .. لكن مش منهم هما

فهمانى طبعا

نوتينى يا جميله

غروب يقول...

عاشقه الاحزان

اهلا يا ايناس منوره

لا انا مش معاكى ان كل اللى حوالينا تماثيل في اصلي كتييييييييييييييير

ان شاء الله هجاوب التاج حاضر

نورتى

غروب يقول...

الشاعر الحزين

اهلا يا علاء

ياريت فعلا كل واحد يفهم هو مخلوق ليه

والاحلى كمان لو فهم نفسه ومش حاول يبقي تمثال

نورت

غروب يقول...

سول ويسبر

وعليكم السلام يا قمر

وحشانى

عندك حق المفروض نكون حريصيين جدا

وان شاء الله احاول ابعد عن حبي للتماثيل ده شويه شويه

ادعيلي

نورتينى

غروب يقول...

يويو

مساءك شربات احمر من اللى بموت فيه

عجبنى تعليقك اوى يا يويو

اووووووووووى بجد

ما بالك فعلا لو اتكسرت

هههههههههه...ضحكه سخريه من التماثيل دى

انتى كمان وحشانى جدااااااااااااااااا

نورتينى

غروب يقول...

مصعب صلاح

وده اجمل شئ يا مصعب

ياريت تفضل كده دايما

ربنا يسعدك

نورت طانطك غروب

غروب يقول...

الامير

بجد كلامك اسعدنى جدااااااااا


وطبعا كلكوا هنا زى اخواتى وعلشان كده زى مقولت بفضفض وخلاص

ثانيا بقه بالنسبه لعدم بكايا على التماثيل واهى تمايل واتكسرت وخلاص ومش هوقف حياتى فده المنطقي

لانهم كده كده اتكسورا يعنى مفيش امل

هو في تمثال بيتكسر ممكن يرجع سليم حتى لو اترمم ؟؟؟؟؟؟

لا اعتقد

وانا يا سيدي ياااما بكيت فكفايا بقه

كله رايح

نورتنى

غروب يقول...

لاسع افندى

تمام كده

نورتنى

غروب يقول...

شيمو القمر

متشكره يا قمر

والحمد لله ان البوست عجبك مع بساطته على حد قولك

نورتينى يا قمر وادعيلي بقه اخلص الامتحانات

غروب يقول...

محمد عتلم

ههههههه شكلك مقدرتش تاخد بالك انهم هما المقصضودين يا استاذ محمد

على فكره عجبتنى جدا المدونه بتاعت اخوك

نورت

غروب يقول...

فراشتى

ههههههههههههه

يا واد يا جامد ياللى بتفهمها وهى طايره

عموما عاجبنى اصرارك

خليكي مصره بقه ماشي

وانا معاكى

بس هي التماثيل اكيد حرام؟؟؟؟؟؟
انا بحبها فعلا

نورتينى

غروب يقول...

بيوتيفول مايند

اهلا وسهلا بيك

صح انا هفضل عايشه باذن الله واعتقد انى مش هتكسر كتير من التماثيل يعنى

مش فارقه بقه

ادعيلي بس

نورت

غروب يقول...

صوت من مصر

والله انا عن نفسي بحبها فعلا

بس كتير حرموها

بس برضه احرتم وجهه نظرك

واشكرك على التعليق

نورت

غروب يقول...

ريم

يااااه انتى جبتى كلمه مش كنت واخده بالي منها خاااالص

يا رى انا تمثال في حياه مين ؟؟؟؟؟؟

وهل انا بالنسبه ليه تمثال سليم ولا مكسور

بجد متشكره اوى انك خلتينى افكر في النقطه دى

نورتينى

غروب يقول...

ايدي

حبيبتى وحشانى اوى اوى

متشكره اوى على رايك واكيد طبعا مش كل اللى حوالينا تماثيل ومش كلهم مكسورين ده حتى في تماثيل ضد الكسر

ربنا يسعدك يا قمر

نورتينى

جارة القمر يقول...

غروب

لعل انكسار التماثيل فيه خير لكي

لماذا حياتك تجعليها مكانا لوجودهم

ابتري من حياتك كل تمثال معدوم الاحساس

حياتك اجمل بدونهم

كوني بخير

احترامي

وردة يقول...

انا بقي حختلف معاكي
رغم حبك للتماثيل
بس انتي كده بتعذبي نفسك
مهما بلغ جمال ورقة وحنية التمثال
فهو في الاخر بلا روح
طب ليه
حاولي تغيري فكرت
احتفظي بحبك للتماثيل كمقتنيات علي الرغم من انهم حرموها
ولكن لا تجعلي منهم رفقاء او احباء
فالتمثال في النهاية معرض للكسر
هههههههههه
فهمتيني
سلام يا حبيبتي
سلام

غروب يقول...

جاره القمر

متشكره لزيارتك يا قمر

وان شاء الله ربنا ييسر لى الخير

نورتى

غروب يقول...

ورده حبيبتى

فهمتك طبعا

بس لسه بحبهم

ربنا يعمل اللى فيه الخير

نورتينى

E73 يقول...

أتمنى تزول عادتك بحب التماثيل الصماء
وربنا يهديكي ويقدملك اللي فيه الخير ويهدي سرك بالنسبة للتماثيل التانية

 

ما بعد الغروب © 2008. Design By: SkinCorner