الأربعاء، 21 أكتوبر، 2009

الخلع من وجهه نظر صعيديه

بسم الله الرحمن الرحيم
الحقيقه انا مش حابه انى اطول عيد الميلاد اكتر من كده لانه مش يستاهل اصلا ولا انا كان قصدي منه الاحتفال ..ولكن انا انسانه طبيعتى انى بحب احتفظ بكل وادق ذكرياتى
سواء كانت ذكريات حلوه او حتى مؤلمه .. المهم انها تخصنى ومش برميها في اى حال من الاحوال
وعلشان منطولش في الحوار ده خلينى ادخل في الموضوع
عاوزه اتكلم عن الخلع .. بس مش اى خلع
الخلع بتاعنا ده بقه شئ عادى جدا زى الطلاق ويمكن اسهل كمان
بنات القاهره والمدن الكبيره بقوا بيتعاملوا مع الراجل وكانه شئ مهمل ولا ليه اى لازمه ولو مش هيوافق على شروطهم قضيه خلع مستعجله وترميه برا حياتها وعفوا في لفظ ترميه
ولكن هوا ده اللفظ الشائع بين البنات .. غير طبعا كلام تانى كتير ...ويمكن دى اسهل ما يقال
ده الخلع في بلدنا
لكن تعالوا نرجع للبلاد اللى لسه فيها الراجل محتمل يكون لسه راجل .. ولسه الست عارفه انه راجل .. يا ترى لسه الحال مظبوط ولا بدا في الاعوجاج ؟؟؟؟؟؟
هلخص كلامى في حوار دار بينى وبين احد اصدقائي ... لما تخيلنا نفسنا على خشبه المسرح وسيبنا خيالنا ينطلق وخرجلنا بالابداع ده
الصعيدي : عتريس ..... ومراته بهيه
وسمعنى سلام : عتريس مقفل راسه وحالف ما اخرج تانى من الدار ..قال ايه الغيره مشعلله قلبه وعمال يضرب نار
بهيه : بخخخخخ
عتريس : عاتخوفي ديب ؟
بهيه : انت ديب ؟
عتريس : يدوب
بهيه : لع متتكلمش عن الديابه .. انت مش عارف انها عيلتى ولا ايه ؟
عتريس : عارفكوا ديبه ديبه ...خليهم ياجوا يستخبوا ورايا
بهيه : احنا منخافش واصل
عتريس : يا بوووووى هع هع هع
بهيه : بجولك ايه يا واد عمى
عتريس : جولى
بهيه : جريت البوست الجديد بتاعى ؟
ملحوظه : بهيه مثقفه وبتتكلم انجليزى بتعطيش الجيم
عتريس : عا تجولى ايه يا مره انتى ؟
بهيه : يا بووووى ع المخ التخين .. عا جولك جريت البوست الجديد ؟
عتريس: احنا مخنا تخين واااااصل .. آنى لا بوست ولا عضيت .. عيب يا حرمه كلامك الماسخ ديه عاد
بهيه : هع هع بوست اييه وعضيت اييييه ؟ آنى اجصد الموضوع الجديد يا راجل
عتريس : يا مره و انا عا روح اشوف ايه و اهبب ايه ؟ اذا كنت ااااني اللي مجطع الموضوع بالفاس .. عاروح اسخمط ايه عاد
بهيه : يا راجل روح شوف شكله الجديد ولا آنى مستاهلش؟
عتريس : انتي ؟ دا انتي تستاهلي الدبح قمااان
بهيه: به به به ... لييييه عاد ؟
عتريس: عندبح لك خروف يا وليه
بهيه : تشكر يا خوى
عتريس : وتستاهلى الشي قمان
بهيه: خلاص يا راجل انت بطل حديتك الماسخ ديه عاد .. انت فاكرنى مفهماش اللى انت تجصده
عتريس : انا اللي حديتي ماسخ يا مره محسوبة غلط ع الحريم ؟
بهيه : لع بجه آنى واخده على خاطرى منيك
عتريس : عا تزعلي ليه ؟ هو اااني غلطت فيك و اللا حاجه ؟ دا اني حتى بارص لك كلام ملييييح جوي
بهيه: مش عيزاه .. الله يسامحك .. بس آنى عاشتكيك لامك
عتريس : انتي قلتي ايه ؟؟؟ عا تشتكيني لامي ؟ احنا برضك عندنا بيشتكوا الردااالة للحريم ؟ يا بووووي .. انتي مش صعيدية واااصل
بهيه : لا يا خوى صعيديه .. بس انت كلامك مش زين ولازملك كبير يردك وامك كبيرتنا
عتريس : الصعيدية الصح ما تجولش الكلام الماسخ اللي عا تجوليه ده
بهيه : عتريس : طلجنى
عتريس : مين ميتى يا حرمة ولد الصعيد بيكون كبيره حرمة ؟؟؟؟
بهيه : معرفاش .. بس من يوم مسافرت و انت جاعد عنديك وتلاجى البنته رايحين جايين جصادك وناسي اهلك وناسك
عتريس : ليييييه ؟؟؟ حصل اييييه ؟ ماااااني لسه جاااي من عند ناااسي من اسبوعين
بهيه : خلص الكلام يا ولد العم طلجنى بدل ما عاخلعك
عتريس : انتي شكلك ها تباتي في تربتك بريحة دمك يا مره
بهيه : احنا صعايده ايوه .. لكن الخلع للجميع ومرت ابو حمدان خلعت جوزها اولت امبارح
عتريس : جلت لك اجفلي خاااشمك يا حرمة
بهيه : مجفلاشي
عتريس : عا ادشدش لك دمااااغك كيف البصلة
بهيه : متجدرش .. الجانون الجديد مع النسوان
عتريس : و من ميتي احنا بنمشي بجانون ولاد البندر يا حرمة ؟
بهيه : من دلوج
عتريس : طب روحي من وشي عاد احسن العفاريت عا تتنطط نططططيط قدامي
بهيه : طلجنى احسنلك
عتريس : لك اهل يترد عليهم يا مره
بهيه : انى رايحه لدوار آبه العمده عاشتكيك ليه
عتريس : تبقي بنت بوك صحيح لو خرجتي من البيت .. لو خرجتي ما عا ترجعيش على رجليك واصل
بهيه : اما نشوف يا ولد العم .. آنى خالعه ..وعاخليك عبره لكل رجاله الصعيد
عتريس : خالعة ؟ يا بت عيب .. عا تخلعي باب ؟
بهيه : الرجاله بجوا اكده ..ملهومش عازه عندينا
عتريس : دي تبجى معرة لاهلك يا ام مخ تخييين
بهيه : لع آنى مثجفه وعارفه حجوجى والجانون معاى
عتريس : الكلام ده يجولوه بنات البندر .. انما بنااااتنا بنات الصعيد ما يجولوش اكدييه
بهيه : لو راجل صح طلجنى .. آنى مش طيجاك
عتريس : لو راجل ؟؟؟؟؟؟؟؟؟؟؟ ... انا راااااجل غصب عنك و عن بوك و اهلك كلااااتهم كليلة .. و ما عاطلجش .. و اعلى ما ف خيلك اركبيه انتي و اللي جابووك
بهيه : احترم نفسك يا واااااااد .....عاتغلط ف بوووووى ؟؟؟؟؟
عتريس : و يا تجعدي اهنيييه زي الجزمة الجديمة يا هاجقطع رجبنك و اغسل عارك يا فااااجرة
بهيه : به به .. يا وجعتك السوده..جزمه ؟ وفاجره
انتهى الحوار هنا .. واتفقنا ننشره في كل مجلات الصعيد ههههه وكانت هنا البدايه
يا ترى وصلنا يا بنات لحد فين ؟؟؟؟ ووصل بينا الاحترام لحد فين ؟ ؟؟ وكلمه راجل بقت تعنى ايه ؟
وهل لو البنت فعلا مقدره معنى الراجل والرجوله بتلاقي مقابل .يعنى هل الراجل نفسه بيقدر ده ولا بيستغل الموقف
طب سؤال اخير بقه ايه هى الرجوله اصلالالالالا ؟؟؟؟؟..وتفتكروا الرجوله بعد الحوار ده بتختلف باختلاف المكان ولا باختلاف الاشخاص ؟

50 التعليقات:

لاسع افندى يقول...

اول تعليييييييييق

لاسع افندى يقول...

بصفتى صعيدى ....اعتقد ان الحوار ده مش موجود اساسا انا شايف ان المرأه فى الصعيد وضعها افضل كتير وحياتها اكثر راحه
ده مش تعصب للصعيد لكن ملاحظات



تحيه لاسعه

لاسع افندى يقول...

تحيه ليكى لانك فتحتى موضوع واجب علينا نهتم بيه....لان الاحترام فى لغة الحوار بين الزوجين بيأثر بشكل مباشر فى خبرات اولادهم لما يكبروا..وطريقة تعاملهم فى المستقبل مع شريك الحياه



تحيه لاسعه

3mr wa2el يقول...

ياااة ثاني تعليييييييييييق

3mr wa2el يقول...

لا لسة فية راجلة و ليهم كلمة مش الصعايدة بس دي بيكون اختلاف بس وجهات النظر مش معني ان فية خلع ان كل واحدة جوزها يشد معاها تروح تخلعه اصل مش درس هتروح تخلعة عند دكتور الاسنان دة لو حتى درس بتخاف تخلعة و بتفكر مرة و اتنين و تلاتة

همســات عــلى ضــوء الــقمر يقول...

صباح الخير

انا بقدر الراجل
بس اللى يستحق الكلمة دى

حلو اوى الحوار بتاعك ويمكن دا بيبقى الحوار
لما بتكون البنت عاملة الند بالند
يعنى تغلط فيا هغلط فيك
مافيش احترام ولا تفاهم

ودا اكبر غلط واللى بيخلى معظم الجوازات تفشل

انها بتعامله زى صحبتها
مش بتعتبر ان دا راجل

Saso يقول...

انا الرابع
من غير عد التكرار
هارجع كمان شويه اعلق على البوست

غروب يقول...

لاسع افندى :

اول وتانى وتالت تعليق

يا مرحب

مساله ان الحياه المريحه في الصعيد تمنع الحوار ده انا الحقيقه مش مقتنعه

لكن النظره للراجل وصلت لفين هو ده كان قصدي

كمان انا قولت هنرجع للبلاد اللى فيها الراجل ممكن يكون لسه راجل صح ونزلت للصعيد

بس واضح ان كله باظ

واكيد زى مقولت حضرتك ان الحوار ده اكيد هياثر في سلوك الاطفال

تخيل بقه الخلع بيعمل ايه

صوره الاب هتكون ايه ؟؟؟؟؟؟

انا شيفاه خطر كبيييييييييير هاجم

غروب يقول...

عمرو وائل

تانى تعليق كويس

المره الجايه تكون الاول بقه

تؤ تؤ

انا كاتبه موضوع هزار وحوار خفيف طبعا لكن اكيد مش هو ده سبب الخلع

واكيد مش كل واحده جوزها بيشد معاها بتخلعه

لكن اكيد الخلع موجود وبيزيد بغض النظر عن الحالات


مساله بقه الرجوله اللى بتختلف باختلاف وجهات النظر تقصد وجهات نظر مين البنات ؟؟؟؟؟؟؟؟؟

غروب يقول...

همسات على ضوء القمر

تخيلي بقه لما يكون الحوار اللى شوفتيه ده واللى بتمى البنت فيه غير محترمه للراجل وعامله نفسها ند بالند تخيلي في القاهره والاسكندريه والمناطق الراقيه والطبقات الهاى كلاس بيخلعوهم علشان بيشخروا

هههههههههههههه

نورتينى

غروب يقول...

saso:

رابع ايه يا ساسو

انتى باسمك ده تدخلى الاول بدون اى منازع انتى على اسمي وانا قولتلك قبل كده انى قبل غروب كنت saso

منتظراكى يا قمر

همســات عــلى ضــوء الــقمر يقول...

بصى يااحلى غروب

هو انا مش معايا اميلك
بس لو فاكرو نور

كنت كلمتك على ميل من اللى انت مش بتدخليهم دول ههههه

انا لما لقيتك مش بتتدخلى افتكرتك مسحتينى وانت زعلانة
لما عرفتى انى دموع القمر
فعلشان كدا انا قولتلك لو زعلانة


هههه
بصى انا لما كلمتك وسميتك شروق
لانى لما اتعرفت عليكى واتكلمت معاكى
وحكيتلك على الموضوع المعقد دا
الموضوع اتحل ومشى الحال
وانت مكنتيش تعرفى انا مين

ولما جيت فى يوم دخلت على مدونتك
وكتبت تعليق وقولت فيه ازيك شروق
انت مزرتنيش فانا افتكرت انك زعلتى
انى مقلتش من الاول انا مين
وقولت انا نور

معلش رغيت وطولت عليكى انا عارفة الكلام ملعبك شويتين ههه

بس اتمنى انى اتعرف عليكى

غروب يقول...

همسات على ضوء القمر

ههههههههههه

ملعبك اوووى انتى كده مكلمانى على سري جدا

وانا والله لا زعلت ولا شئ ولا عدم ردى كان مقصود

انا اصلا مش بدرجه التركيز دى

وانا افتكرتك اكيد

ومش زعلانه من اى شئ

وانا سعيده بمعرفتنا

همســات عــلى ضــوء الــقمر يقول...

لوووووووووولوووووووووولى

طب كدا انا مبسوطة والله

انت زى العسل

اكيد معاكى اميلى
ابقى ضفينى عندك واكيد عايزة اكلمك

اوك

(Joudy) يقول...

الحقيقة يا غروب قانون الخلع ده وضع للمرأة المقهورة اللى هى عايشة مع زوج لا يستحق هذا اللقب بس بينى وبينك الحكاية قلبت لموضة وبقت ماشية أصبح أسهل الحلول لأى مشكلة علشان فكرة احنا هنوجع دماغنا ليه فى حل مشكلة ممكن ترجع من تانى

دمتى بكل الخير والسعادة

همســات عــلى ضــوء الــقمر يقول...

THEWHIET_HORSE@YAHOO.COM

دا ميلى بس مبدخلش عليه

انت لما تضيفينى قوليلى وانا هديكى ميلى التانى

اوك

Saso يقول...

طبعا انا عارفه انك كنتى ساسو قبل غروب بس ماحبتش استغل الوسطه وقلت كفايه وسايط بقى
لكن مادمتى مصره اصرارن عنيدا فاننى سوف اقبل ان استخدم الوسطه وطبعا كدا انا الاول حتى لو جيت الاخر واللى موش عاجبه يخلعنى
هههههههههههههه
ازيك ياغروب ياقمر
المشكله مابقاتش فى الست المشكله بقت فى الراجل اللى موش بقى راجل
دا يابنتى الرجاله خلصوا فى 73
محدش قالك ولاايه
تحياتى على البوست الحلو دا
اموووووووووووووه

غروب يقول...

همسات على ضوء القمر

تمام يا فندم

غروب يقول...

جودى

دي بعض حالات

لكن انا باتكلم في سوء الاستخدام اللى ضيع الاحترام بيننا

غروب يقول...

ساسو

هههههههههه

واسطه

واى واسطه يا بنتى

الرجاله خلصوا يا لهوووووووووى

قبل م الحق واحد

يادى المصيبه

مصعب صلاح يقول...

السلام عليكم
طبعا الاحترام بين الزوجين والتفاهم والحب هيلغي كل ده

غروب يقول...

مصعب صلاح

اكيد يا مصعب

وكلمتين بجد من الاخر الحب والاحترام

كلامك اليومين دول جاامد ولا البوست الاخير عندك حلو جدا

بس اسه مش بعاده يعنى تمشي من غير ماتقول سلام يا طنط وولا العواف حتى ؟؟؟؟؟

Saso يقول...

شفتى بقى ياغروب ياختى خلصوا خلاص
هتعملى ايه ياضنايا غير انك تقبلى ببواقيهم اللى موجودين دلوقتى

Saso يقول...

شفتى بقى ياغروب ياختى خلصوا خلاص
هتعملى ايه ياضنايا غير انك تقبلى ببواقيهم اللى موجودين دلوقتى

غروب يقول...

ساسو

لالالالالالالالالالالالالالالالا

بواقي ايه نوواااااااى

انا برضه غروب هانم ولا ايه ؟ههههههههههه

لازم راجل بجد بس اما الاقيه هموته هقوله كنت فين كل ده يا راجل انت

ماء تشرين يقول...

بص ياغروب بجد موضوعك جامد هى الست دلوقتى بجد مبقتش بتحترم الراجل ولا بتكبره زاى زمان لانه بقه صغير صغير في شغلو صغير في الشاعر في طريقه معملته في كل حاجه حتى ولاد البلد بتوع زمان خلاص اتلغوا من زمان وبعدين الموضوع اكبر من اننا نخلي بس داخل العلاقه الزوجيه هى لغه الحوار بين اى حد اصلا بقت مترديه السبب ايه انا مش قادره اعرفه


عموما بوست جميل زاى ماعودتينا زمان

تقبلى مرورى

ghorBty يقول...

السلامـ عليكمـ

الرجوله تكاد تختفي الا من رحم ربي

اكيد بتختلف باختلاف البيئه ومفهومها كمان بيختلف

يعني الرجوله ابدا لا تعني التحكمـ والسلطه والاهانه للمراه ومعاملاتها كانها شئ مهمل ابدا لا تعني ذلك

انما الرجوله الحق نجدها في هدي رسولنا الكريمـ الذي هو عليه الصلاه والسلامـ اكمل البشر .. حينما قال

خيركم خيركم لأهله، وأنا خيركم لأهلي

نجده في خدمه اهله ويشاور نساءه ويعاملهمـ بمعامله حسنه وقال للرجال استوصوا بالنساء خيرا فمن سار علي هذا الهدي فقد استحق لفظ الرجوله قولا وفعلا ..

غروب يقول...

ماء تشرين

اعلق الاول على ان الموضوع حلو زى زمان

انا فعلا حاسه انى مغيبه بقالي كتير

وعماله بتحط في مواقف بايخه غصب عنى بتجبرنى على البعد والاكتئاب

بس صدقينى مش هيحصل تانى باذن الله

اما تعليقك على الموضوع

انا متفقه في حاجات وحاجات لا

اولا انا شايفه ان الجوله اللى في الشارع ربما تكون لسه في منها البعض

يعنى لسه بحس النخوه في الرجاله المصريه بس في الشارع بس

لكن اتفرجى جوا البيت:

تسلط واوامر كان الست دي فازه ولا سجاده

لغه الحوار العامه هعتبدا من الاحتارم جوا البيت

يعنى علشان نحترم بعض برا

لازم الراجل يحترم زوجته او امه او اخته
الخ ويلاقي طريقه كويسه في معاملتهم

وبرضه البنت تلاقي احسن الطرق تتعامل بيها مع جوزها او ابوها او اخوها الخ

ده راى

نوريتنى يا قمر ووحشتينى جدا ولازم اجيلك حاااااااالا اشوف اخبارك

غروب يقول...

غربتى

يعني الرجوله ابدا لا تعني التحكمـ والسلطه والاهانه للمراه ومعاملاتها كانها شئ مهمل ابدا لا تعني ذلك


عجبتنى جداااااااااااااااااااا

جداااااااااااااااااا

والاقتضاء بالرسول طبعا اخر الكلام

لكن تخيلي لما راجل يخنق الست والحجه ان ده الدين

اعتقد الدين يسر

عموما كلامك بجد ورايك ليس عليه اى غبار ومينفعش اعلق كتير

كلام جميل ووياريت فعلا يكون ده الحل

نورتينى حبيبتى

الحــ ــزين يقول...

الحــ ــزين
عندك حق فى كل كلمة لما الست بتكون بتستهزء بجوزها يبقى البنت تعمل ايه فى حبيبها
ولا تبص اصلا ازاى للولد عموما موضوعك جميل
وانا شايف انو تبادل الاحترام بين الطرفين مش موجود..يعنى محدش بيحترم حد بمقداره
وسامحينى مش مهم تسألى انا بحب ادخل عندك علشان بكون مخرتاح لما بقرء فى موضيعك دا لو سمحتى
دومتى بخير

ماما يقول...

وحشتينى يا غروب
وكلامك مظبوط
القضيه هى ::من هو الرجل فى زمننا هذا
الرجل الذى تقول له زوجته انت رجلى انت حياتى...
فيرد عليها انتى عمرى وكل عمرى ليكى
الرجل الذى لاتستغنى عنه زوجته
ولكن رجالة اليومين دول عايزين يرتاحوا والست تعمل كل شيء
طيب بزمتك مش فعلا اللى زى دول مش يستحقوا الخلع بالتلاته

طـــائر الليــــل الحـــــزين يقول...

انا بقى بقول الرجالة ماتت فى الحرب اخرهم سنة 73
يا بنتى فى كمان بيقولوا لجوزهم يا منيل
شوفتى كده
انهى راجل ده اللى يقبل كده
يا سنة سوخه يا ولاد
نقرى الفاتحة بقى للمرجله

ريمان يقول...

بصراحه موضوع الخلع ده ميه ميه


والازواج اللى مش مظبوطين يستحقوا لقب المخلوعين



وكمان كان على ايام شىء زى الخلع ده



تحياتى

وحشانى يا قمر

فينك


؟؟؟؟؟؟؟؟؟؟؟

ريمان يقول...

بصراحه موضوع الخلع ده ميه ميه


والازواج اللى مش مظبوطين يستحقوا لقب المخلوعين



وكمان كان على ايام شىء زى الخلع ده



تحياتى

وحشانى يا قمر

فينك


؟؟؟؟؟؟؟؟؟؟؟

غروب يقول...

الحزين

كلامك معقول ولو ان الاحترام بين الحبايب ده مكنش موضوعى واعتقد انه لازم يفرق كتير عن الازوراج


مساله عدم سؤالى انا وضحتها عندك

نورت

غروب يقول...

ماما

انتى كمان وحشانى والله

كلامك تمام

بس مش كل الرجاله عاوزين الست تقوم بكل شئ

في رجاله كويسه بس البنات اللى اتغيرت كتير برضه

والله الواحد معارف العيب فين

غروب يقول...

طائر الليل الحزين

اولا منوره بجد ووحشانى مووووووووت والمدونه كلها

اما بقه حكايه يا منيل

هههههههه

دى اقل واجب التهزيق بقه الصفه السايده

غروب يقول...

ريمان
انتى كمان وحشانى والله

انا موجوده انتى اللى فينك

بس انتى ليه متحامله على الرجاله كده

ونسيتى عمايل البنات ؟

مـجـنـووون يقول...

والله الراجل راجل مهمها تغير الأزمان

وزي ما في راجل مش راجل أكيد في ر اجل راجل

والراجل الي هو ميرضاش علي نفسه انه يكون مش راجل قدام مراته
سواء بافعاله او تصرفاته او انه يغصب عليها تقعد معاه وهي مش عيزاه

تقبلي مروري
مجنووون

ستيته حسب الله الحمش يقول...

ههههههههههههههههههههههههههههههههه

ربنا يكرمك ضحكت من اول الحوار لأخره وكنت محتاجة اضحك
لذيذ جدا

بس لو تسمحي لي اقول لك تجارب ست تجاوزت الأربعين

اما عن الخلع فهو نظام عادي جدا
رغم انه جه كقانون في بلد الستات فيه طافحين الكوتة لكن لا أكثر معدلات الطلاق ولا قللها
مش كل واحدة واقفة وبتقول ها اخلعك ياراجل
حتى لو مكنش راجل قوي
الست المصرية عندها خمسين اعتبار لأضرار الطلاق والخلع وساعات كتير بتصبر صبر الجمال في الصحراء علشان تعفي نفسها من اللقب "مطلقة

طيب امال ايه فايدة الخلع
يااااااااااااااااااااه
ده انا شفت حالات بشعة فضلت مع رجال حيزبونات في المحاكم سنين طار مع السنين دي رونق جمالها وثقتها في العدل علشان بس تتفك من راجل اسرها لا هو زوج ولا هو طليق
لحد ما جه الخلع
رضيت الستات دي بأن يبخس الرجال حقوقهم المالية بس علشان يفكوا انفسهم من أسر انصاف رجال

العيب في ان رجل يوافق يتخلع علشان يهرب من اداء حقوق مادية
العيب انه ميجدش في ده عيب طالما ماله محفوظ

وبرضه خدي بالك
لو ست ظالمة وعاوزة تتخلع بغير بأس من زوجها وكان راجل كويس فهو كسب بعده عن ست متعتبرش ابدا ست ولا تفهم معنى الإنسانية .. زي لو راجل زمان كان يطلق ست بغير بأس لمجرد انه عاوز يجدد

تحياتي

حـــــــــــب الملائكه يقول...

السلام عليكم
احم احم
تحرير المرأة
اتحررتم
تمام
شوطوا فينا بقى براحتكم ياملايكة
ولا يهمكم
مش لاقيين حيطه مايله
ولا يهمكم
خلع ماشي ... مباح مباح مباح
وحيات امى هاتقعدونا فى البيت قريب
هانغسل ونطبخ ونكنس ونمسح
وكمان لو حبيتوا اننا نرضع ونولد
مافيش مانع
ههههههههه
معلش اصلي هافرقع منكم
طولت عليكى صح
سورى بس بجد انا مبسوط من تحريركم لدرجه انى هافرقع
معلش
طولت اوى
سلام بقي
الجزااااار
FATHI

غروب يقول...

مجنون

نورت المدونه والله

وطبعا اتفق معاك انه زى ما في رجاله نص نص في رجاله بجد وانا شوفت كتير يعنى

وبرضه زى ما في ستات مش بتحترم الراجل في ستات لسه عارفه يعنى ايه راجل وخصوصا في البيت الزوج والزوجه

بس انا باتكلم عن اللى بيحصل دلوقتى في الاجيال الجديده واللى لسه هتيجي

في ظل وجود قانون زى الخلع

نورتنى

غروب يقول...

ستيته حسب الله الحمش

يا فهلا يا قهلا

منوره المدونه

ومبسوطه والله انى قدرت اضحكك

انا مش ضد الخلع بس مش مع كلمتك انه عادى جدا

واذا كان فعلا في ستات جبببال بيستحملوا كتير قبل اللجوء لقانون زى ده في برضه دلع كتير واستهتار وقله احترام كتير

طبعا كلامك صح جدا في الحالات الصعبه اللى بتكون الست مش غلطانه ومستحمله بلاوى الراجل اللى مش راجل اصلا ويقبل فعلا نظام الخلع لمجرد الهروب من حقوق ماديه عليه

لكن غلط جدا اننا نشوف النسبه بتعلى والبنات بتدلع والرجاله بقت مهمله

لا

لازم وقفه

نورتينى يا قمر

وبجد مبسوطه بكلامك ووجودك جدا

غروب يقول...

حب الملائكه

انت قريت البوست كويس ؟؟؟؟

انا مش بلاتكلم عن تحرير المراه خالص ولا انا معاها

انا باتكلم عن العكس بالضبط

هههههه

كلامك ضحكنى

نورت

سلمى يقول...

السلام عليكم
اولا البوست بتاعك حلو اوى
وكمان مدونتك جميله
ثانيا اتفقتى تنشرى البوست فى كل مجلات الصعيد عشان انتى مستغنيه عن نفسك هو العمر بعزئه لالا راجعى نفسك
ثالثا عمر ما فى واحده باقيه على العشره وباقيه على بتها حتعمل كده خصوصا لو جوزها شخص محترم اما لو مبهدلها ومش مخلى ليها كرامه يبقى هو اللى جابه لنفسه المفروض هو سندها بس لو مبهدلها يبقى حتبقى عليه ليه
دى وجه نظرى البسيطه
دمتى بخير

عبد من عباد الله يقول...

و الله انا على حسب معرفتي ، ان الرجوله صفات و ليست نوع الجنس ...

فصفات الرجوله ممكن تكون في راجل و ممكن لأ ، و برده ممكن تكون في ست و ممكن لأ ، لكن يمكن هى شويه متربطه بالراجل لان من اهم الصفات دي هى المسؤليه و التحمل و القياده و يمكن الصفات دي يحاسب عليها الراجل اكتر من المرأه لذلك تنسب اليه بكلمه الرجوله ....

غروب يقول...

سلمى

نورتينى يا قمر اول زياره

انتى مدونتك اللى جميله ورقيقه زيك

وانا مش خايفه على عمرى ؟؟؟؟؟؟؟؟؟
ليه بس ؟؟؟؟؟؟

عادى بتحصل

اما مساله احترام الراجل للمراه والعكس فده شئ اكيد واكيد هو الاساس

ميرسي يا قمر على زيارتك وتعليقك

واتمنى تيجي تانى

غروب يقول...

عبد من عباد الله :

كلامك صح اوى

واخد جانب تانى من الموضوع وهى الصفات الرجوليه اللى مش بتقتصر على الرجال فقط احيانا

جميل

عابرة السبيل = ام بقلظ باشا يقول...

سلام عليكم

ههههههههههههههههه
موتينى من الضحك

بجد حوار مش ممكن

وبالنسبة للحال اللى احنا فيه

الدنيا بتتغير والدماغ كمان بتتغير
ويبقى الدين والاخلاق هما اساس معاملة الست لجوزها ومعاملته ليها

غروب يقول...

ام بقلظ

عندك حق

يبقي الدين هو اساس المعامله

نورتينى

 

ما بعد الغروب © 2008. Design By: SkinCorner