الخميس، 9 سبتمبر 2010

توب العيد


كتبت اسمك بحبر الدمع من خوفي

ونقشت رسمك الغالي علي كفوفي

حروف اسمك بتمحي كل أحزاني

تعيد تكويني بعد المر من تاني

تناجي في الهوي روحي

تداوي الباقي في جروحي

أجيلك أجري من ألمي

يفيض الحبر من قلمي

حبيبي يا ريحة المسك في حريري

مين ده اللي يقدر يعشقك غيري

ومين اللي يوقف في الخطا سيري


أزرعك جنينة بلون الورد أرويها

أنقشك مركب في عرض البحر أرميها

أعدي بيك شاطئ الحزن اللي كان

وأبدر نجوم الكون حواليك

يخدم سماك ميت ألف جان

ولو يخون حلمك طريقه

أخطفك وأركب مع الحلم الحصان

لملم كل الشوارع والطرق

هات كل الذكريات

لجل ما نصبح ماضي

وسط أحلام السكات

هات أصحابك وناسك

وأترك وراك قلب مات

إحي قلبك من هوايا

وأدفن العمر اللي فات

شق قلبك من ضلوعه

لو في يوم خانك وقال

إن حلمك مش حقيقة

وإنه أغرب م الخيال

ألبس في عيدك توب المحبة

أفتح دراعك للأحبة

حسس قلبي بالأمان

قبل ما يفوت الأوان

ونبقي غنوة ف كوم دخان

تتبعتر في يوم العيد

أو تتحرق نجمة في قلب قطر

مسافر بحلمك للصعيد

ويبقي مش باقي مني

غير شوية ضي في عنيا

مش هديهوملك

وهعبر طريقي سكوت

يقلعك توب الهنا والعيد

ويشيد لي في كل لحظة تابوت

يفصل ما بين الحب

ويفرق حياة من موت

تدور بينا أيامنا وتجرحنا

مع كل لحظة شوق بتدبح جوارحنا

في عز الغنا الغالي

نلاقي المر شمسه تصّبحنا

الحلم يطلع ع البيبان ضايع

ولو ننده لنور الفجر يسمعنا

بس يا خسارة ما هوش طايع

علقم يا طعم الحب

سودة يا دروب السنين

علقم يا طعم الأسي

والأهة يبلعها الأنين

نور ليلي ليه إنطفي ؟


شباكي من غير هوا


ونهاري من غير ضو


فاقد حروف الكلام


مش لاقي خيط في الجو

11 التعليقات:

شخـا بيــط مـحـجـوب يقول...

كل عام وانتى بخير
عيد سعيد عليكى

الازهرى يقول...

بجد رااااااااااائعة

ولكن
علقم يا طعم الحب

هو جميل وكن هناك ما يعكره ويحوله إلى الأسوأ

تحياتى وتمنياتى بعيد سعيد لك ولكل أحبابك

أتنين حبيبين يقول...

غروب

حبيبتى

اخبارك ايه

يارب تكونى بخير

وحشتينى اوووى
وكنت قلقانه عليكى يارب يسعدك ويطمنى عليكى اووووووووووووووووى

أتنين حبيبين يقول...

بكون مبسوط لما بلاقيكى عامله بوست رغم انى بكون مفتقداكى موت والله


عيد سعيد عليكى وعلى كل حبابيك ويارب تحققى كل ما تتمنى ياحبيبتى

أتنين حبيبين يقول...

الله الله الله ياغروب بجد انتى هايله

كلامك رائع وكلماتك اروع

ربنا يسعدك حبيبتى ويوفقك بكل حياتك

وياترى ايه احبار شغلك ياريت تطمنينى عنكى
لانى بجد قلقانه عشانك

بحبك اوووووووووى

richardCatheart يقول...

تسلم ايدك والله

كل سنه وانت طيبه وينعاد بالخير والصحه

فشكووول يقول...

السلام عليكم غروب
تحياتى وعيد سعيد وكل عام وانتم بخير
حلوه .. والله حلوه
بس هو الحب ابن الكلب كده
شويه عسل وشويتين بصل
بس انت مش هامم عندك البصل
تحياتى

ahmed_k يقول...

كلمات رائعه يا غروب
كل عام وانتي بخير
وكل أحبابك واسرتك الكريمه بخير

أتنين حبيبين يقول...

وحشتينى جيت اطمن عليكى

يارب تكونى بخيررررررررررر

غير معرف يقول...

مصر فى مهب الريح

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 – العدالة الاجتماعية .. وأطفال الشوارع والذين يملكون كل شىء .
5 – ضرورة الاتحاد مع السودان لتوفير الغذاء وحماية الأمن القومى المصرى.
6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

لمزيد من التفاصيل أذهب إلى مقالات ثقافة الهزيمة بالرابط التالى www.ouregypt.us

romansy يقول...

بهديكم بوكيه من الورورد على أنغام أحلى عود ودايما العيد عليكم يعود كل سنة وانتم دايما بخير

عيد سعيد على كل الناس الطيبين

 

ما بعد الغروب © 2008. Design By: SkinCorner