السبت، 17 يوليو، 2010

عدنا بكلام كتيييييير




بسم الله الرحمن الرحيم


وبعد طوووول انتظار رجعت لمدونتي العزيزه

بجد من أسوء أيام حياتي الأيام اللى فاتت

يمكن أكون مريت بصدمات أصعب في حياتي .. لكن إنى أزعل انا واصحابي الانتيم لاول مره في عمر صداقتنا

كان شئ سيء جدا ,, شيء بجد وجعني أوي

مش حابه أحكيلك يا مدونتي على تفاصيل الزعل ,, بس المهم انى عارفه انى مش هاقدر ابعد عنهم اكتر من كده

وانى مهما اخدت موقف كان لازم اهدي وارجع تاني

انا زعلت وزعلتهم مني .. عموما بالنسبه للموضوع ده احنا بقينا تمام الحمد لله

لسه بس عاوزه اكلم جهاد .. واتمني تشوفي البوست واقولك انا اسفه لانك مكنش ليكي دعوه بالموضوع غير بسيط وانا ظلمتك


نيجي بقه لموضوع تاني

عارفه ايه اللى حصل يا مدونتي في الموضوع اياه ؟؟؟؟؟

انتى اكيد عارفه انى من الاول مش متحمسه للموضوع وشيفاه موضوع فاشل

وردود افعالي فيه كانت غريبه .. عارفه ايه كمان ؟؟

الموضوع ده هز ثقتي في نفسي أوى وخلاني أتصرف بعض التصرفات ضد مبادئي

لكن برضه عدت الحمد لله ورجعت تاني احسن ..

ومش واخده موقف من أي حد ( واضح ؟؟؟)

يعنى كل أشخاص الموضوع بالمسبه ليه ناس أعزاء محترمين وعلى قدر عالى من الثقافه

وربنا يوفقهم


عارفه هاقولك ايه كمان ؟؟؟

هاحكيلك على اللى عملته الاسبوع اللى فات

مش انا روحت رأس البر ؟؟

اه والله

انا وكلللل العائله

احنا وخالتو وخالتو وتيته وولاد خالى وهيييييييصه

بجد كان اسبوع تحفه رغم كل الاصابات اللى حصلتلى فيه

طبعا انتى عارفه ان ضهري تعبان من زمان

شوفتى اللى حصل واحنا بنلعب لعبة المنديل خالتو وقعتني وكسرت اللى باقي من ضهري هههههه

وروحنا سينما وانتى لالالالالالا ( مطلعه لساني )

كان نفسي اخدك معايا يوم بيوم والله بس مكنش فيه نت بقه

بس اقولك حاجه مش كنتى هتتبسطي من الخروجه بتاعت السينما انا اصلا مش كنت عاوزه اروح

بس العيال اجبروني .. والفيلمين اللى شوفتهم رخمين جدا جدا

فيلم الثلاته يشتغلونها ( لا موضوع ولا قصه ولا حتى كوميديا ولا هدف )

وفيلم ( لا تراجع ولا استسلام ) كوميديا خفيفه وقصه قديمه جداااااااااا


ما علينا .. عارفه انى تعبت اليوم ده اووووووووووى

انتى طبعا عارفه انا اد ايه بكره الشروق وبتعب لما اشوفه

واليوم ده روحنا الساعه سته الصبح وشوفت الشروق واتقفلت جدا


وعارفه روحت كمان الملاهي ,, ودي بقه انا اللى عاوزه اروحها اووى

رغم تعب ضهري بس ضحكت اوى وكانت لذيذه


وروحت اللسان : خروجه حلوه اوووووووووى

وروحت النيل وفكرنا ناخد مركب لقينا ان مركب يدوب على اد عيلتنا بس

واخدنا المركب فعلا لوحدنا هههههه

انتى هتحسدينا ولا ايه ( قولى ما شاء الله )


وروحنا البحر ونزلت الميه وانا اصلا نسيت العوم

ههههههه بقه يا عينى عمرو ابن خالى شايلنى طول م انا في الميه بدل م اغرق

( الله يكون في عونه ) شايل تهمه


اااه الواد عمرو ده طله رقاصه معتبره

لدرجه اننا اجرنا واحد بيطبل مخصوص علشان يرقص ههههههه

والراجل بقه مستغرب اصل هو كان بيبع غزل البنات ومعاه طبله

روحنا جبناه واديناه فلوس وقولناله مش عاوزن غزل البنات عاوزين طبله ههههههه


وطبعا لعبنا راكت وكلنا حريفه خصوصا عاصم بيه امتيااااز وخالتو جي جي

ههههههههههههههه بتضرب في الكوره ضرب ( انتقام )


كان اسبوع حلو اوووووى

عارفه كان مزاجي وحش اووووووى لما عرفت ميعاد المصيف وانى مش هاعرف اخد اجازه

وهرروح كل يوم من المنصوره لراس البر

كانت هاتبقي بهدله جامده وتعب وقلة مزاج بقه

بس الحمد لله ( قدرا ) المدير يعطي لقسم المبيعات كله اجازه لاخر الاسبوع من نفسه

كنت مروحه يومها اااااخر انبساط

الحمد لله يارب


ااااه نسيت اقولك انى قبل م اروح المصيف بكلم يوم روحت لساره درويش

حفل توقيع كتاب زوجي مازال حبيبي

بجد بنت لاسعه عسوله جدا

كان نفسي احضر من بدري بس للاسف روحت في النهايه اخدت نسختى وحظيت بتوقيع من ساره ومشيت

بس كنت مبسوطه ليها اوى ربنا يكرمها


مش عارفه حاسه انى ناسيه حاجات كتير


بعدين بقه لان ايام الشغل شكلها هتاخد منك ورق كتير


كمان لسه السبت اللى جاى هحكيلك كلللل تفاصيل خطوبة احمد بيه الديب ابن خالي

والثلاثاء فرح اميره اخت ايه صاحبتى

مبسوطه اوووووى


الدنيا بتضحك ليه ؟؟


على فكره يا مدونتي يا كوكي انتى ,, انا مبسوطه علشان حاجه سر بقه هابقي اقولك عليها بينى وبينك مش ادام الناس


اوك ؟؟؟؟؟


هشششششششش


باااااى


غروب


15 التعليقات:

أم الخــلـود يقول...

إن شاء الله تكون آخر الأحزان .. ومرحبا بعودتك وربنا يوفقك.


اصحى يا نايم ووحد الدايم

(حملة الجسد الواحد)

أرجوا من المدونين الموقرين أن يضعوا شعار الحملة واسمها فقط فوقها (حملة الجسد الواحد) في الشريط الجانبي لمدوناتهم كدلالة على وحدة صف أمة محمد، ومن أجل قيام الولايات المتحدة الإسلامية

لمزيد من المعلومات

http://dndanh111.blogspot.com/2010/06/blog-post_14.html

جعله الله في ميزان حسناتكم .. آمين

دموع القمر يقول...

ازيك ياقمر وحشاااااااااانى كتير بجد

انا رجعت تانى اهو

وحمد لله على سلامتك
تعرفى والله بد كنت بدعيلك وحتى انا معرفكيش لكن من اخر يوم كلمتك فيه على لالميل واسلوبك كان مش مطمنى
ربنا يفرح قلبك ويسعدك

اوعى تخلى حاجة تهز ثقتك بنفسك مهما حصل

ابقى طمنينى عليك اوك

أتنين حبيبين يقول...

حبيبتى

يااااااااااااااااااااااااااه
كل دى غيبه لالالالا انا زعلانه وعاوزه حقى جااااااااااااااااااااااااااامد

وماليش دعوه وكلمتى مش هتنزل الارض ابدآ

أتنين حبيبين يقول...

بجد نورتى الدنيا كلها
وفعلا رجعتى بكلام كتير

شويه عتاب
شويه اعذار
شويه ملامه
شوية فرح
شويه مصيف
شوية حفل توقيع
ممممممممممممممممم

شوية افراح
وخطوبات

ممممممممممم
وايه تانى يا توتا
الف سلامه عليكى من التعب ياقلبى سلامة ظهرك وربنا يشفيكى يارب ويعفيكى ويحافظ عليكى قمرتى
ربنا يعوضك خير
وان شاء الله جاد تشوف البوست ويكفى انك اعتذرتى اكيد هى كمان قلبها كبير وهتسامح
ربنا يوفقك يارب ويكرمك خير
والاقيكى قمرايه منوره فى السما العالى قادر يا كريم

أتنين حبيبين يقول...

نسيت أقولك انى بحبك اوووووووووووووووووى
ومفتقداكى جامد


منتظراكى تنورى مكانك عندى بقا


كانت معاكم من امام الكيبورد وشاشة الكمبيوتر
توتا العاشقه الشقيه

مووووووووووووووووووووووووواه
بوسات وحضونات كتيررررررررر

أتنين حبيبين يقول...

وحشششششششششششتينى
جيت اطمن عليكى
انتى فييييين كل ده يارب تكونى بخير ويارب يطمنى عليكى

بلاش تغيبى كتير كده هقلق عشانك
ياريت طمنينى عليكى حبيبتى

امووووواه

أمير البلانكو يقول...

ازيك غروب

الدنيا دلوقتي بقت عبارة عن عتاب وعذاب وأحزان

خلاص مش بقى في جديد

لكن هانفضل نحاول لحد ما نقابل الأفضل في حياتنا

تحياتي ليكي

وعذرا على الغياب

سمو الأميرة سارة يقول...

غروب انا مبسوطة بجد بجد اني قابلتك

رغم انها كانت ع السريع كده بس مبسوطة اوي اني شوفتك

ومبسوطة اكتر انك هنا رجعتي تاني

ربنا يارب ما يعيد الأيام الوحشة تاني وتفضلي على طول منورة مدونتك

دموع القمر يقول...

وحشانى كتييييييييييير طمنينى عليكى
احبك فى الله

أتنين حبيبين يقول...

رمضان كريم
حبيبتى ليه الغيبه دى وحشتينى كتير يارب تكونى بخير

أحمد الصعيدي يقول...

السلام عليكم


كل سنة وانتي طيبة يا غروب هانم

أتنين حبيبين يقول...

كل سنه وانتى طيبه

رمضان كريم عليكى وعلى الامة الاسلاميه حبيبتى

ياريت عاوزه اطمن عليكى

لاسع افندى يقول...

كل عام وانتم بخير

ورمضان كريم


تحياتى

Mano يقول...

كل سنة وانتي طيبة
ورمضان كريم

أتنين حبيبين يقول...

وحشششششتينى

جيت اطمن عليكى
يارب تكونى بخير حبيبتى
ولا يحرمنى منك

طمنينى عليكى ضرورى
وبلاش الغيبه دى كلها

بحبك اوووووووووى

 

ما بعد الغروب © 2008. Design By: SkinCorner