الاثنين، 17 أغسطس، 2009

حاله

بسم الله الرحمن الرحيم
مش عارفه ليه عندى احساس انى بقالى سنه غياب عن المدونه .. لا باكتب حاجه جديده ولا بتابع مدونات حد
يمكن يكون السبب هو حاله الاكتئاب اللى مريت بيها الفتره اللى فاتت ..مش عارفه ايه سببها الحقيقي مع انى حواليه اسباب كتير تدعو للحاله دى
اولا بنت خالتى وصاحبتى اتجوزت وبعدت شويه والتانيه مش في مصر وانا لوحدى شويه
ثانيا انى من يوم النتيجه وانا زهقانه ومش عارفه اعمل ايه وبصراحه عاوزه اشتغل بس مش اى شغل برضه وده تاعبنى جدا
ثالثا ان صاحبتى الانتيم كانت هى كمان في نفس الحاله ومش بترد على اى حد ولا بتشوف اى حد حتى انا
وانتيمتنا التانيه في مصر ومش بنشوفها
يعنى اسباب كتير ..واللى مزعلنى بقه من نفسي ان الحاله دى استمرت تقريبا اربع ايام خسرت فيهم كذا حد مش كنت اتوقع ابدااااااا انى اخسرهم او يعنى مش خساره بالمعنى المفهوم
لكن يمكن علشان انا اعصابي كانت مشدوده شويه فمش كنت بتحمل كلام حد وللاسف كانت الاشخاص دى امى وبابا وخالى .. بس انا صالحت طبعا ماما وبابا بحكم اننا في بيت واحد
لكن بصراحه كرامتى وجعانى اوى اروح اعتذر لخالو ..اقولكوا الصراحه .. انا بغير من معامله خالو لشهد بنت خالتى ويمكن ده دايما اللى بيخلينى ازعل منه حتى لو مش في داعى للزعل
هي اول حفيده واقرب واحده لخالو .. لكن هو مش عارف انى انا وسمكه ممكن نزعل من فرق المعامله خصوصا واننا احنا اللاته بنحبه بنفس المقدار
ما علينا من الموضوع ده بقه
المهم: ان في نفس الوقت المفروض عندى امتحان في برنامج معين على الكمبيوتر وللاسف البرنامج ده مش كان عندى والمستر مش فاضي
وطبعا اتاجل للنهارده ادعولى بقه
من يومين بقه راحت حاله الاكتئاب دي واتبدلت بحاله حلوه اوى من السعاده والحب ولقيت ان كل شئ حواليه بيتغير من نفسه وبيتصلح لوحده
ان شاء الله تستمر الحياه كده
بما انى بقه كنت مطنشه حاجات كتير فانا كان جايلي تاج او يعنى سؤال من عاشقه الاحزان وهجاوبه دلوقتى
وان شاء الله ابدا اتابع تانى
السؤال :
اذكرى 10 اشياء صادقه في حياتك ؟
بسم الله
اولا طبعا انا مؤمنه علشان كده عارفه ان الله حق ..ورسله حق.. وملائكته حق ..وكتبه حق ..والموت حق ..والجنه والنار حق
اما بالنسبه لحياتى الشخصيه فالحقايق فيها ممكن تبقي زى اى حد
يعنى عمرى حقيقه غير قابله للتغيير ومش ممكن يرجع بيه الزمن
الحب حقيقه كبيره اوى في حياتى ومؤمنه جدا بوجوده
الماضي حقيقه وده برضه لانه مرتبط بالزمن
العائله وشروطها وقوانينها الاجتماعيه حقيقه احيانا بتعوقنى بغض النظر عن ماما وبابا
الصداقه حقيقه جميله احب دايما اصدقها حتى لو مش صادقه
الفراغ احيانا حقيقه.... لسه لحد دلوقتى مش عارفه اغيرها ولا استغلها صح
ظروف البلد اللى عايشه فيها حقيقه مش خيال ههههههههه وده مش قادره استوعبه ربنا يستر على مصر بجد
اختلافي المستمر في وجهات النظر مع بابا حقيقه لم ولن تتغير والسبب مجهول
حبي الجنونى لجوز خالتى حقيقه جامده جدا ..وده اكتر حد بحبه في الدنيا واكتر حد ممكن اتكلم معاه وانا مطمنه
سذاجتى وثقتى السريعه في الاخرين حقيقه وحشه اوى بس حقيقه
كده عشره صح ؟ كفايه
السؤال بقه اديه لمين ؟؟؟؟؟؟؟؟؟؟
انا جيت اجرب دلوقتى اديه لحد لقيت انى ممكن انسي ناس وتزعل منى فبلاش احسن
يلا سلام بقه
غروب

34 التعليقات:

ماء تشرين يقول...

حمد لله على سلامتك ياقمر والله ليكى واحشه

مش تغبي كده تانى كل سنه وانت طيبه يارب والسنه الجايه دى تكون اسعد سنه على قلبك يارب

فراشة يقول...

غروب انتى جميلة قوى ورقيقة قوى
بجد بحبك

اولا كل الحاجات اللى كانت مزعلاكى بالظبط وان اختلف الاشخاص مريت بيها وسبحان الله فى نفس التوقيت
صحابى الانتيم اللى اتجوزوا اول ماتخرجنا وحسيت انى خلاص مش حقدر اكون معاهم زى الاول بحكم المسئولية والظروف وتغيرات الحياة اللى كنت دايما اسمع عنها وحاجات كتيرة
المهم الحمد لله بعدها بيبان مين فعلا اللى مهما حصل مابيتغيرش ومين اللى مش فارقه معاه
وربنا يخليهملى بجد اتنين ماقدرش انساهم لأن اخلاصهم شىء مايتعوضش ولا يوصف

اما بالنسبة لاجابتك على السؤال فانتى رائعة عجبنى جدا اول اجابة
بجد ربنا يباركلك فى حياتك وانشاء حتشتغلى باللى يناسبك بس الموضوع محتاج صبر وثقة شديدة فى كرم ربنا

ربنا يسعدك وينورلك طريقك

كل سنه وانتى طيبة

ماما أمولة يقول...

كل سنةوانت طيبة حبيبتي ربنا يعيده عليك بالخير يارب

وبطلي تزعلي من حد مافيش حاجة تستاهل

سلام يا ساسو

دموع القمر يقول...

حمد لله على سلامتك ياغروب
والحمد لله ان النفسوية اتظبطت
بس لازم منستسلمش للاكتئاب
ونحاول نعالجة نتكلم مع حد

10 اشياء صادقه في حياتك ؟
اجابتك عليها جميييلة
وبجد انت انسانة رقيقة

http://www.egyfanz.com/beta2/do-1363.html

http://hmasat-halema.blogspot.com
تقبلوا مرورى

صمت الحنين يقول...

السلام عليكم

ربنا يسعدك ويبعد عنك الحزن والاكتئاب

كل عام وانتى بخير
رمضان كريم

لاسع افندى يقول...

الغم راح والفرح لاح
وبعد الغروب دايما صباح



حمدالله على سلامتك ويارب دايما مخاصمه الهم


تحياتى اللاسعه

نفرتارى يقول...

جميلتى غروب ،،

الله يبارك فيك وعقبالك .. بس اوعى تزعلى منى انا مقدرش على زعلك ابداااااااااااااً .

تحياتى ،،

نفرتارى

نفرتارى يقول...

اسفة نسيت اقولك كل سنة وانت طيبة وبخير .

نفرتارى

ahmed_k يقول...

ألف حمدالله على سلامتك يا غروب بعد رحلة الغياب التي قاربت السنه دي
وسلامتك من الإكتئاب ليه كده ؟؟ مفيش حاجه تستاهل
وكل سنه وأنتي طيبه ورمضان كريم

عاشقة الأحزان يقول...

غرووب الجميله ربنا يسعدك حبيبتى ويبارك فيكى وبجد انا سعيده انك رجعتى احسن من الاول وان شاء الله ربنا هيعوض صبرك خير لانك طيبه وتستهلى كل خير

وموضوع الشغل ده صدقينى مافيش فيه اى مشكله وهيجى بس تأنى بس فى اختيار المناسب ليكى

انتى بنوتايه رقيقه قووى وطيبه وحنينه وبتحبى تخدمى الناس وده يدل على كرم اخلاقك
وفى نفس الوقت قلبك نظيف مش بيحب يشيل من اى حد وبتسامحى بسرعه وده من خلال كلامى معاكى

واكيد انتى عارفه انا بحبك قد ايه وبحترمك
ربنا يسعدك حبيبتى ويحقق ليكى كل ما تتمنى ويبعد عنك الهم والحزن ويفك كربك

اللهم امين يارب العالمين
وبجد العشر اشياء الصادقه جمال قووى يا غروب بجد
انسانه ناصعة البياض من جواكى

كل سنه وانتى واسرتك بالف خير بمناسبة قدوم الشهر الكريم وعلى الامه الاسلاميه بالخير واليمن والبركات وربنا يحقق ليكى كل ما تتمنى


بحبك قووووووووووووووى

موووووووووووووواه
مودتى
رمضان كريم
انوسه

وردة يقول...

كل سنة وانتي طيبة يا غروب رمضان خلاص قرب علي الابواب
كلنا بيحصل معانا كده في الاجازات وخصوصا لو الدنيا حولينا مليانة ناس وفاجأة نلاقي روحنا لوحدينا
معلش ربنا يفك كرب ويزل همك
اما بخصوص خالك معلش استحملي وبرضو اعتذري علي فكرة ده حيكبرك في نظره جدا
ويمكن حاله يتعدل معاكي
بتمنالك الخير من جوه قلبي
ربنا يكرمك
كل رمضان وانتي بخير
سلام

blue-wave يقول...

نورتى البلوج من تانى
وياريت كفايه غياب بقى
اجاباتك رائعه زبك
تحياتى

سندس وأمل يقول...

الحمد لله يابنتى ان الحاله دى راحت

تعرفى انا برده سعات بتجيلى حاله

اكتئاب ..مبعرفش اعمل ايه

ع العموم الف حمدلله ع السلامه:)

امل

محمد عتلم يقول...

كل عام وانتم بخير بمناسبة شهر رمضان الكريم

واحده من الناس يقول...

يابنتى انتى لسه صغيره
افتحى شباكك كده بصى منه هتلاقى حاجات غايه ف الروعه قدامك
لسه عندك احلام متحققتش
واحلام لسه هتحلميها
انا عديت من فتره قريبه بنفس حالة الحزن بتاعتك نتيجه لجواز اعز صحباتى خارج الوطن خالص
واحده راحت السعوديه والتانيه الكويت
وقعدت انا قردقطع
بس شويه كمان خسرت ناس كنت بحترمهم جدا بس بصراحه هما غلطوا معايا وانا مش بسامح اللى يهين كرامتى
انا زعلت شويه بس بصيت بره شباكى لقيت الدنيا حلوه ولسه فيها كتير
بلاش تشاؤم ويالا زورينى
اضحكى الدنيا حلوه

الحــ ــزين يقول...

الحــ ــزين

كل سنة وانتى طيبة

بس فعلا انتى غايبة من زمان وعنى انا بالذات مع انى اعرفك كويس


دومتى سعيدة

وياريت اتشرف بيكى عندى

طـــائر الليــــل الحـــــزين يقول...

ايه يابنتى
فينك بس كل ده
المهم
كل سنة وانتى طيبة
ويارب يكون رمضان كله خير وسعاده عليكى وعلى كل اللى بيحبوكى

غروب يقول...

ماء تشرين

الله يسلمك يا حبيبتى

وكل سنه وانتى طيبه

غروب يقول...

فراشه :

انتى اللى اجمل وارق فراشه والله

كلامك بيدل ان دى حاله بنمر بيها في القوت اللى بنحس ان اعز الناس ممكن تبعد عننا وزى مبيقولوا الدموع بتبقي وقتيه واحساسها وقتى

يعنى انا دلوقتى بكلم بنت خالتى يوميا في التليفون بس لسه مشوفتهاش ووحشتنى اووووى

وفعلا عندك حق بعدها بفتره بتحسي مين الللى منقدرش ننساهم مهما كانت الظروف

متشكره اوى على رايك يا قمر في الاجابات

وادعيلي

ورمضان كريم يا قمر

غروب يقول...

ماما اموله

كل سنه وانتى طيبه يا ماما

والاسره كلها بخير ان شاء الله

مودتى

غروب يقول...

دموع القمر

ربنا يخليكي اشكرك

وان شاء الله نحااااول نقلل من الاكتئاب ده

كل سنه وانتى بالف خير

نورتى

غروب يقول...

صمت الحنين

اللهم امين

وكل سنه وانت بالف خير

نورت المدونه

غروب يقول...

لاسع افندى

هههه شاعر حضرتك؟

نورت وكل سنه وانت طيب

غروب يقول...

نفرتارى

انا كمان مش زعلانه منك طبعا

ربنا يباركلك يارب ويسعد ايامك معاه

وكل سنه وانتى طيبه يا حبيبتى

غروب يقول...

استاذ احمد

الله يسلمك

وان شاء الله مفيش غياب

وكل سنه وحضرتك طيب

وشكرا جدا على اهتمامك وسؤالك عنى

غروب يقول...

عاشقه الاحزان

كل ده يا بت ؟

هههه

ربنا يخليكي يا ايناس ومتشكره ليكي بجد

على اهتمامك واتصالاتك وربنا يديم المعروف ويهدينا

وكل سنه وانتى طيبه يا حبيبتى

كلام المدح ده كله مش هقدر ارد عليه

اخجلتم تواضعنا يا ستى

غروب يقول...

ورده

بجد انا بحبك في الله جدا بدون م اشوفك والله

ودايما احساسي بيكون صح انك شخصيه جديره بالحب والاحترام

اشكرك على نصيحتك يا قمر وربنا يسهل باذن الله

وكل سنه وانتى طيبه

غروب يقول...

بلو ويف

ياااااه

انت بتيجي على فترات متباعده ليه بس يا دكتور دى المدونه بتسال عنك دايما


عموما نورت جدا

ومل سنه وانت طيب

غروب يقول...

سندس وامل

اهلا وسهلا يا امل

نورتى المدونه

وربنا يبعد عنك الحزن وعنى انا كمان يارب

كل سنه وانتوا طيبيبن

غروب يقول...

محمد عتلم

وحضرتك طيب

نورت

غروب يقول...

واحده من الناس

كلامك بجد جميل

وفتحت شباكى الحمد لله وان شاء الله دايما ابص لادام

نورتينى

وكل سنه وانتى طيبه

غروب يقول...

الحزين

اهلا وسهلا وانت طيب

وبرضه احب اعرف مبرر كلمه تعرفنى كويس دى؟

غروب يقول...

طائر الليل الحزين

ازيك يا قمر وحشانى والله

كل سنه وانتى طيبه يا حبيبتى وان شاء الله مفيش غياب تانى

غير معرف يقول...

انا ما قتلكش حكيلي حياتك OK انا راني نحوس على منظر الغروب

 

ما بعد الغروب © 2008. Design By: SkinCorner