الجمعة، 7 مايو 2010

علاقات خاصة جدا



بسم الله الرحمن الرحيم




بما ان الرغي شغال معايا تمام اليومين دول .. فأكمل رغي بقه مش مشكله


النهارده كان يوم الجمعه .. وده اليوم اللى متعودين كلنا كعائله نتجمع فيه عند تيته




وفعلا اتجمعنا كلنا .. وطبعا كالعاده هزار وضحك وخناق احيانا وشد شعر عادي يعنى


لكن في الآخر كلنا اخوات وحبايب




النهارده وانا قاعدة في وسط عائلتى حسيت إنى فعلا بحبهم أوى وكل واحد بحبه بشكل مختلف عن الآخر


انا طبعا مش باتكلم على الكبار لان دول خارج الحسابات دلوقتى


أصل احنا كعيال يعنى , فينا عادة حلوه أوى ألا وهي :




لو واحد فينا مثلا زعلان من خاله أو زعلان من عمته أو مقموص من جوز خالته أو ... أو ... أو


ف بنفصل خالص .. احنا مع بعض نفضل كويسين بغض النظر علاقتنا بالكبار ازاى


مثال بسيط : انا زعلانه من خالى الفتره دى .. لكن ولاده اصحابي وحبايبي اكتر من الاول كمان عادي يعنى




المهم : انى وانا في وسطهم النهارده في موجه من الضحك الهيستيري لقيتنى ببص لكل واحد فيهم وبحدد شكل حبي ليه عامل أزاى ؟


وكانت النتيجه كالآتي :


شهد ودى الكبيره بتاعتنا : مش كانت موجوده لانها مع جوزها برا مصر : بجد حسيت انها وحشانى والقاعده نقصاها


سمكه : بنت خالتى وحبيبتى أوووووى ومن أقرب أقرب الناس ليه وتعرف عني حاجات محدش في الدنيا ممكن يعرفها


عاصم : أبن خالتى وصاحبي اللى بحب أهزر دايما معاه وكتير بحس انى لو وقعت في مشكله هاجرى عليه واقوله الحقنى ورغم غلاستنا كتير مع بعض وده لتقارب السن الا انى بحبه جدا .. بحب ساعات رخامته كمان .. لكن يا عاصم لما بتتنرفز عليه بتبقي غلس


عمار : ابن خالتى وراجلنا بجد .. محترم اوى... وحد جد جدا .. وبرضه بحس ان لو في مشكله مهما كان حجمها ممكن يشيلها


عمرو : ابن خالى .. دمه خفيف بس عبيط اوى ههههههه بحسك ساذج .. بس بحبه برضه .. اخويه الصغير


محمد : الفتره الاخيره بجد يا محمد احترمت دماغك جدا .. لدرجه انى حسيت انى ممكن ارتبط بيك عاطفيا ههههه مع العلم انه اصغر منى يجي بخمس سنين .. لكن بجد اعتقد فيك شخصية الاخ اللى كنت اتمناه


سميه : بنت خالتى وصاحبتى الجديده .. دماغ طاقه .. ضحكه جنان .. بنت مسليه اووووووووى ومتعرفش يعنى ايه نكد ولا اكتئاب


بحبها جداااااااااااا ومن اكتر الناس اللى بحب اقعد اضحك معاها في العيله ... لكن لما بتفق انا وهى على عاصم بتبقي وقعتنا سودا


عبد الرحمن : اخونا الصغير .. وتريقتنا كلنا .. بس واد طيب


اسراء : اصغر واحده .. بنوته مطيعه .. روحى يا اسراء تروح تعالى تيجي في ثوانى .. بنستغلها اسوء استغلال


يعنى .. بس بجد بحبها اوى وبشوف فيها نفسي وانا طفله في سنها


طبعا دول اللى موجودين حاليا : لكن مش هانسي فريد وعلى ولاد خالى حبايبي .. وحشونى اووووووووى ربنا يرجعهم

بالسلامه


وبلال كمان : ربنا يوفقك ويرزقك الذرية الصالحه


وأحمد ورنا ولاد خالى : مش بتجمعنا الظروف كتير .. لكن برضه ولاد خالنا وبنحبهم كلنا




النهارده بقه كنا بنتفق على المصيف وبنحدد مواعيد كل واحد فينا علشان اللى بيدرس واللى بيشتغل واللى مسافر




اعتقد هايكون مصيف جامد جدااا لاننا بقالنا اربع سنين مش صيفنا سوا




واكيد ان شاء الله هاكتب نشرة أخبار المصيف هنا




افتركت حاجه دلوقتى : دايما عند تيته في البيت الكبير كنا نفتح أى دولاب حتى دولا جدي الله يرحمه كنا نلاقي أسامينا مكتوبه حسب الترتيب كالآتى :




أحمد


شهد ( إستشهاد )


عاصم


أسماء


سارة




بس لان الباقي كلهم كانوا صغيرين واحنا كنا الكبار




الله يرحمك يا جدو




الحمد لله بجد انى عندى عائله زى دي بحبهم جدا وبيحبونى جدا وبنشيل بعض كلنا فى أى أزمة من أى نوع


خصوصا النفسيه






ملحوظه بقه على الهامش : ايناس صاحبتى ومرايتى


عاوزه اقولك : ان مهما حصل بينا من خلافات فانا لا يمكن ازعل منك ولا استحمل زعلك منى


انتى مجنونه ؟؟؟؟؟
صح ؟؟؟


يا بنتى انتى وجهاد وسلمى خلاف علاقاتى كلها ليكوا مكانة تانيه خالص مينفعش حد يقرب منها




ركزى في مذاكرتك بلا عادى ؟




غروب

21 التعليقات:

E73 يقول...

أول تعليق هقرأ وأرجع تاني

فضيالك أنا بقى ولا ورايا امتحانات بكرة ولا حاجة

ياكش يتمر وتدعيلي دعوة حلوة كدة

E73 يقول...

أعلق على ايه ولا ايه طيب

خليني أبدأ ببدايتي المعهودة الأول

بسم الله الرحمن الرحيم
السلام عليكم ورحمة الله وبركاته

الملحوظة الأخيرة ......... إممممممممم طيب عادي بقى

P: P: P:

غلاسة هي دعواتك انتي بس

نرجع بقى من فوق تاني ربنا يخليكم لبعض يا رب دائما ويجمعكم عالخير دائما

بالنسبة لمحمد كنت مندهشة لوصفك ليه يمكن لأني مكنتش متخيلاه كشخصية كدة بس والله كويس انه طلع واد راجل ويتحب كمان

نييجي بقى للأسماء اللي في الدواليب ولاوني زعلانة انكم لما بتتجمعوا مش بتتجمعوا في البيت الكبير عشان تفتكروا كل الذكريات

هو أحمد دا اللي هو خطيبك يعني ولا فيه واحد اسمه أحمد تاني وأنا معرفش؟

ربنا يرحم جدو يا رب ويسكنه فسيح جناته

وربنا يجعلكم مصيف السنادي جميل وسعيد على قلوبكم يا رب ويجمعكم عالخير دائما يا رب

غروب يقول...

نوسه موزه

ولا اقولك

E73

عبيطه انتى

ربنا معاكى يا نوستى روحى يا بت ذاكرى اجرررررررى

محمد بقه يا ستو

بجد طلع حاجه برضه انا مش كنت متخيلاها انا قاعده بكلمه بقالي تلات ساعات متواصل

انا شكلى هاحبه

ههههههههه

اسماء الدواليب بقه

البيت الكبير خلاص يا نوسه مبقاش ينفع

بس على فكره في خطة قائمه بتوضيب البيت والرجوع ليه باذن الله

لكن لسه شوية وقت

احمد يا ستو لالالا مش خطيبي

احمد ده ابن خالى اللى مش بنشوفه

هو ورنا

تمام كده

E73 يقول...

أهااااااااااا
يمكن عشان مشفتوش فإسمه مش راكب في بالي

أوك أنا بذاكر أهو ربنا يسهل

دعواااااااااتك

لاسع افندى يقول...

ربنا يخليكو لبعض


تحياتى

القمرالباكي يقول...

السلام عليكم ورحمه الله وبركاته

ربنا يسعد ايامك وتبقي كلها زي يوم الجمعه الي عشتيه ده في دفئ اسري وسعاده
وحلو انك تشاركينا احساسك واحداثك اول باول

دومتي بخير

2otety يقول...

غروووووب بجد احلى حاجة هى لمة العيلة يوم فى الاسبوع كل واحد بيعد يحكى اسبوعة حصل فىة اية سواء الى بيدرس او الى بيشتغل و بيكون يوم حلو اوى احنا عندنا فى العيلة بنتجمع بس يوم الخميس بيكون يوم مقدس عندنا .... و كمان بتحسى انك عندك اخوات كتيييير ممكن تعتمدى عليهم لو وقعتى فى اى مشكلة .... ربنا يخليهملك و يدييم عليكوا الترابط .... و ربنا يخليكوا لبعض انتى و ايناس و الاصحاب ياما بيحصل بينهم بس بيفضلوا اصحاب و اصحاب جمدين اوى

ليله شتاء يقول...

السلام عليكم
الله على جو العائلة ده أنا بقالى حوالى 3شهور متجمعتش مع عائلتى كده ومفتقدهم جدااا

ربنا يخلكو لبعض وميحرمكوش من بعض ابداااااااا

وربنا يسعد أيامك

دندنة قيثارة الوجد يقول...

للرغي فنون .. وأنت تجيده جيدا ماشاء الله عليك ..

تحياتي للحلوين كلهم وربنا يجمع شملكم على الخير دائما

جارة القمر يقول...

حبيبتي وحشتيني

جارة القمر يقول...

اي خلاف ممكن يحصل خاصة بالعيلة

لكن اللي لازم تعرفيه ان الحب مابينهيش الخلاف على العكس

بس لازم تتوضح وجهات النظر

عائلتك جميلة

ربنا يديم عليكم الحب والسعادة

طمنيني عليكي عاملة ايه

؟

غروب يقول...

نوسه موزه

يا بنتى احنا اصلا مش بنشوفه يبقي انتى هاتشوفيه



ربنا يعينك

غروب يقول...

لاسع افندى

اشكرك

غروب يقول...

القمر الباكي

ربنا يخليكي يا قمر

ويسعد ايامك ونشوفك قريب القمر المبتسم او الضاحك او حتى المسخسخ ههههه

نورتينى يا قمر

غروب يقول...

قطتى

ميرسي يا قمر

وربنا يخليكي لعيلتك ويخليهم ليكي

نورتينى

غروب يقول...

ليلة شتاء

انا ليه مش عارفه اوصل لمدونتك الخاصه ؟؟؟؟؟؟

ياريت تعرفينى

وربنا يجمعك بيهم قريب يا حبيبتى ان شاء الله

نورتى

غروب يقول...

دندنه

معلمتى الخاصه

بجد سعيده ان حضرتكمتبعانى وانى كمتبعاكي كمان

باستفيد جدا منك

ربنا يكرمك

ومتزعليش بقه من الصداع بتاعي

اصلي بقالي يجي خمس شهور سايلنت

غروب يقول...

جارة القمر

انتى كمان وحشتينى يا قمر

انا بخير الحمد لله

انتى اللى اخبارك ايه ؟؟؟؟؟

مسلمة يقول...

السلام عليكم

أحب هذا النوع من العلاقت الذي يتجاهل الخلافات.. ونطبقه نحن أيضًا في عائلتنا.. فما ذنب الصغار في صغائر الكبار ^_^

على فكرة هديكي واجب ولازم تعمليه
ادخلي هنا

http://follatakenana.blogspot.com/2010/05/d.html

يللا سلام :)

SHAPE YOUR LIFE (ABOALI) يقول...

هههههههههههههههههه
جميل الجو العائلى الرائع ده ربنا يديمه عليكم ان شاء الله وتظلوا مجتمعين فى الخير دايما ..كلامك جعلنى اشعر بحنين وشوق لكل افراد عائلتى لان فعلا الجو العائلى ده بيترك راحه فى النفس كبيره وسعاده لا تعوضها شىء .

مهموهة أحمد يقول...

ربنا يخليكم لبعض يا حبيبتي يا رب

بجد العيلة و الاهل دول نعمة من نعم ربنا و الله

دول سندنا في الدنيا
و الايد اللي بتساعدنا في كل احوالنا و حياتنا

ربنا يخليكم لبعض و تفرحوا دايما ببعض

خالص حبي و تقديري

 

ما بعد الغروب © 2008. Design By: SkinCorner