السبت، 26 يونيو 2010

نادي ادب جامعة المنصورة


بسم الله الرحمن الرحيم



الاول : انا حاسه ان يمكن كلامي يطلع مش مترتب خالص بس ده شيء

مش مضايقني ولا مخوفني من رد فعل اللى هايقرأ

يمكن لأني ساعات كتير وانا صغيره لما كنت بامسك ورقة وقلم وأكتب أي كلام

مش مترتب كان بيعجب اللى حواليه من المقربين

ولما كنت بامسك قلمي الرصاص المفضل واحاول اشخبط كانت بتطلع الرسمة دقيقة

ويمكن ده اللى هحاول أعمله دلوقتي مع حكايتي مع نادي أدب جامعة المنصورة

كان المفروض أكتب الموضوع ده من زمان من وقت ما إنضميت للنادي وبقيت عضو فيه

لكن كل وقت وليه آذان

المهم

اللي حصل إني في سنه من السنين ومن خلال مدونتي الغاليه دي

اتعرفت على محمد فكري ( الشاعر الجميل )

صاحب ديوان ( البحث عن أشياء أخرى )

نصحني محمد بعد ما شاف بعض تخاريفي الخاصة بالانضمام

لنادي ادب الجامعه علشان هناك أقدر أتعلم أكتر وأستفيد من خبرات الموجودين


الحقيقة أنا كنت مستعده جدا لخطوة زي دي

وخصوصا لاني بحب الشعر لدرجة الادمان


روحت النادي طبعا مش عارفه أي حد خالص غير محمد

ومش عارفه حتى هل ممكن أقعد معاهم ولا لاء ؟
استأذنت انى انضم ليهم وقد كان واتعرفوا عليه شخصيا وأدبيا


ولقيتني قاعده جنب بنت استرخمتها من اول نظرة ما شاء الله

بس كنت مجبرة أتكلم معاها علشان اعرف بعض حاجات


البنت دي هي حاليا انتميتى ( جهاد مشالي )

اتعرفت كمان على بنت تانيه المفروض انها صديقه لجهاد وهى القاصة ( أمل نصر الدين )

بجد بنت ممتازه وشخصيه طيبه جدا وخدومه وممكن تدي اللى ادامها أي معلومه ادبيه

هو محتاج ليها ده غير ثقافتها الخاصة


بعدين اتعرفت على ناس تانيه منهم رضوان الهلالي وده شاعر عامية

وبعد إجراء انتخابات النادي أصبح هوالامين


شخصيه برضه خدومة الى حد كبير وحاول يساعدني ومنحني بعض الكتب علشان أطلع عليها .

كان في ناس تانيه الحقيقه علاقتى بيهم كانت محدودة جدا زى ( أحمد فرحات )

وده بيكتب نثر بس بصراحة ومش عارفه الناس اللى هاتشوف منهم الموضوع ده هايقولوا ايه؟؟

بس انا مش كنت بافهم ولا كلمة من احمد فرحات ده هو وشخص تاني اسمه ياسر المحمدي


كان بيكتب قصص غامضه جدا بالفاظ صعبة جدا عليه في وقتها

بعد كده فهمتها .. بس مش سهل فهمها من أول قراءه بجد


واتعرفت على حسام موافي صديق محمد فكري وزميل دراسة هو في نظري شاعر ممتاز

رغم النقد الكتير اللى اتوجه ليه في وجودي


هما بصراحه مش بيسبوا لبعض جوا النادي .. كله بينقد في كله لكن برا الكل أصحاب . وده شيء رائع .

بدأت بقه أتعرف على أعضاء النادي الجدد والقدامى واحد واحد وبخطوات ثابته .

بس بدات علاقتى بجهاد الرخمه تتطور كتييييير لحد موصلنا للى احنا فيه دلوقتى

المهم .. جهاد قادتني لأني اتعرف على أشرف توفيق

من خلال حفل توقيع كتابه ( مبسوطة يا مصر ) في المنصورة

انا كنت اعرف أشرف المدون ( مدونة اخف دم ) واعرف أشرف الشاعر العامي الممتاز في نظري

وصاحب ديوان ( مرسال لحبيبتي )


لكن لسه مش اتعرفت على أشرف البنى آدم ذو الدم الخفيف والصديق .


وفي اليوم ده حصل كل ده وعرفت أشرف عن قرب وخصوصا انه كان صديق لأمل وجهاد عن قرب .


بعد كده طلبت مني جهاد برضه أنى أحضر معاها لقاء لبعض أعضاء النادي القدامى وقد كان

الحقيقه كان يومها الجو مش مضبوط معايا وكانت معانا ايناس انتيمتنا ومش حبيت القاعده أوي ومشيت .

ومن يومين بس ( أول امبارح ) ندمت على تضييع فرصة التعرف على الناس دي

لان الناس دي كانوا :

رمزي .. واللى تشاء الظروف بعد مرور أكتر من سنه ونص على رفض تكلمة اللقاء ده

أنى أشتغل معاه عن طريق جهاد برضه .


ورغم اننا مش استمرينا في الشغل كتير الا انى احترم الشخص ده جداااااااا

أدبيا وثقافيا وفكريا وعمليا كمان .


عنده مكتبه تهبل . ربنا يكرمه ويوفقه في حياته


وكان كمان فيها الدكتوره أماني ( كاتبة قصه رائعه ) ورغم مصارحتي ليها

عن انطباعي الأول بالحدة الشديده الا انها قدرت تغير الانطباع ده معايا ( مش مع الكل )

وفهمت وجهة نظرها العقلانية جدا .

وبرضه تشاء نفس الظروف ان يجمعنى بيها العمل بعد أكتر من سنه ونص .

واللى بجد ندمت انى رفضت أكمل اللقاء معاه هو الشاعر ( مصطفى حسان )

في اللقاء كنت متنشنه منه اوي

لكن كنت باسمع اسمه كتير اوى مع رمزي وأمانى

وقدرا اعرف من يومين مين هو مصطفى حسان الشاعر

صاحب ديوان ( حدوتة الشاطر ... مفيش )

عاوزه أقول ان مصطفى ليه قصيدة اسمها طلب إعادة نظر

انا كل ما اقرأ القصيدة دي أبكي وعلى نفس الجمل بطريقه هيستيريه

بجد من أكتر الشخصيات اللى ندمت انى ضيعت على نفسي فرصة التعرف عليهم أكتر

وكان فيه ناس تانيه مش عاوزه انسي حد .


بس الخلاصة ان بجد نادي أدب جامعة المنصورة بيطلع منه مواهب ممتازة

وشعراء على قدر عالي جدا من الثقافه والتعليم

مش أي كلام يعني . مبدأهم ( يا تكتب صح يا ...... لالالا مش تسكت يا تسمع صح )

بجد اتعلمت منهم كتير وكلهم على قدر عالى جدا من الاحترام والثقافه

احترم جدا انضمامي لهذا النادي ومعرفتي لناسه واتمنى للجميع منهم كل التوفيق

لان معظمهم يستاهلوا يكونوا .

وفي الآخر حابه أضيف قصيدة مصطفي ( طلب إعادة نظر وعاوزه رأيكوا فيها )








غروب

4 التعليقات:

ليله شتاء يقول...

السلام عليكم

حبيبتى ازيك عاملة اه يارب تكونى بخير

واحشتينى أووووووووووى

أتنين حبيبين يقول...

السلام عليكم

جميله والله رغم الالم الكبير اللى جوه الكليب والصور بجد ماشيه مع الاداء

ربنا يبارك فيه ويجعله من الاوائل يارب

مدونتك جميله رقيقه
انا ضيفتها عشان اتابعك

دمتى بكل ود
توتا

وحي القلم يقول...

السلام عليكمم
يبختك يا طانت غروب انا كان نفسي لو انم لنادي زي الندي ده
بس التعليم وكوني لسه طالب ثانوية معطلني كتير

الازهرى يقول...

طبعا المجموعة جميلة
ويا ريت عندى زيها
بس عندى حاجة قريبها منها فى أمور الحياة مش الأدب نختلف ونقلبها غم ووعلى ماتخلص المناقشة نرجع تانى أحلى أصحاب

حلوة طلب إعادة نظر بش فى مشكلة
إننا شعب مناسبات ودا قلت قبل كده محل رهان من الكل وبيعاملونا بصبر علشان عارفين إننا بنطلع شوية ونرجع تانى على مفيش

لازم نفضل فاكرين تارنا ونحارب علشانه أكيد فى يوم هننتصر

 

ما بعد الغروب © 2008. Design By: SkinCorner