السبت، 4 أبريل 2009

التاج علينا حق

بسم الله الرحمن الرحيم
الحقيقه دى اول مره اجاوب فيها تاج .. جالى من ايناس (عاشقه الاحزان )
معلش يا نوسه انا مش عارفه اكلمك بقالي يومين لانى فعلا عندى برد شديد
بعتذر كمان للناس اللى مش بروح عندهم اليومين دول لنفس السبب ... ادعولى
حابه كمان اقول انى بجد زعلانه جدا لرحيل زوجه عنيده عن التدوين لفتره غير معلومه المدى
بحس كده لما حد بيسيب التدوين ان حد من بيتى ماشي والله .. يلا ربنا يصلح حالها وتقدر تقنع جوزها
نيجي بقه لحل التاج .. ومش عاوزه حد يتريق فاهمين ؟؟؟؟؟؟؟؟

أسمك ؟
ساره
المشهور بيه وسط أصحابك ؟
ساسو او غروب ... بحب اسم غروب جدااااا بحس انه جزء منى
سنك ؟
كسرت العشرين
مجال دراستك ؟
نهائي اداب انجليش جامعه المنصوره
أسم مدونتك ؟
ما بعد الغروب
صورتك الرمزيه فى المدونه بتعبر عن أيه ؟
الحقيقه الصوره الرمزيه دى ليها قصه ... ان المدونه دى كان اسمها كلمات وكنت قفلتها وفتحت مدونه تانيه بلينك تانى اسمها ما بعد الغروب ومش اعلنت فيها عن شخصيتى او عن انى صاحبه مدونه كلمات فالصوره كانت شبه تخفي ولما اعلنت عن شخصيتى كنت حبيت الصوره جدا زى حبي لاسم الغروب فسيبتها ومش ناويه اغيرها .. بس كده
هل فكرت بإغلاق المدونه ؟ والسبب ؟
انا فعلا قفلت مدونتى قبل كده ... والسبب كان بعض المشاكل الغير طبيعيه ورا بعضها وبسبب غلط بعض الناس فيه متعرفنيش اساسا
لكن حاليا مش بفكر اقفلها خالص ممكن ابعد عنها فتره لكن مش هقفلها
إيه رد فعلك لوحد قل أدبه فى تعليق ؟
اما برد عليه بطريقه تحرجه بس ده اذا كانت قله الادب تتعلق بالذوق او موضوع ممكن يتناقش واحيانا برد على كل الناس ما عدا هو او هى ومش بمسح التعليق
اما لو الرد فيه سفاله او جارح بحذفه طبعا
أسوأ مدونه ؟
مش عارفه بس اللى مضايقنى اوى وجود بعض المدونات الشاذه بيينا واللى بيطالبوا بحقوقهم ههه جتهم كسر حقهم
هيحصل أيه للأيميل بعد ما تموت ؟
هيموت معايا
أديتى الباسورد لحد قبل كده؟
باسورد ايه بالضبط؟؟؟؟؟؟
لو المدونه فالاجابه اه لاخويه
اما الميل الحالى لا مش مع حد ومش هيكون
بتعملى أيه فى أوقات فراغك ؟
بقرا اشعار لانى بحب الشعر جداااا واحيانا روايات لاحسان عبد القدوس وحاليا مهتمه جدا بالقرايه في مجال التنميه البشريه
الأكله المفضله ؟
المكرونه والبطاطس بكل الاشكال حد عازمنى؟؟؟؟؟؟؟؟؟؟؟
الصفات التى اخذتها من والدك؟
العصبيه .. والتسامح وطيبه القلب
الصفات اللى اخدتها من والداتك ؟
سرعه البكاء والحرص على صله الرحم
أكتر ست حاجات بتكرهم ؟
1. الخيانه اكتر شئ بكرهه
2. الكدب خصوصا اذا كان مصحوب بالحلفان
3. النفاق
4. القسوه وعدم القدره على الغفران
5. الامصه ( يعنى لما حد يزعل منى ياخد جمب بدون نقاش
6. عدم احترام اداب الحوار او المناقشه
وفي حاجات تانيه كتير طبعا
أكتر ست حاجات بتحبهم ؟
1. الاخلاص والاكتر انى اكون مخلصه لحد اكتر ميخلص هو ليه
2. الصدق حتى في الغلط
3. الصداقه الوفيه الدائمه
4. الاحتفاظ بالذكريات
5. عيلتى
6. احلامى كبنت
شخصيتك نوعها أيه ؟
عصبيه .. متسامحه جدا .. طيبه ..سريعه رد الفعل ربما في الخطا احيانا بس مش بخسر الناس بسرعه .. صريحه بغباء ..حساسه جداوبزعل بسرعه جدا وبتصالح برضه بسرعه يعنى ممكن ابكي واضحك في نفس الوقت والله ( عبيطه صح؟؟؟
لماذا دخلت عالم التدوين من الاساس ؟
دخلت علشان اعرف ناس هنا كنت عاوزه ابقي معاهم وبعدين حبيت فكره الفضفضه جدا
أحلى جمله قيلت فى وصف مدونتك ؟
كل رد جميل من انسان جميل يحسسنى انى موجوده في حياته ولو بنسبه قليله او حتى الوقت اللى بيرد فيه بس
أهمية التعليقات بالنسبه لك ؟
بتكون مهمه جداااااااااا في حالات غضبي وانفعالى بحس انى محتاجه لناس جمبي وطبعا ردود الثناء والمجاملات احيانا مطلوبه لرفع معنوياتى
احلى بوست كتبته؟ضع اللينك بتاعه؟
بحب جدا القصه اللى كتبتها بعنوان ( حينما اغلقت الابواب )
وقصه تانيه بعنوان اليوم مات حبيبها
أفضل مدونه قرأتها ؟
كتير جدا ... مش هينفع اقول حد واسيب حد
أفضل بوست قرأتيها ؟
برضه كتير بس في بوست لاشرف توفيق مدونه ( اخف دم )عن الماء في مصراسمه نيلها هو دمى عجبنى جداااا وضحكنى جدا ده اللينك بتاعه
الشغل بالنسبه لك أيه ؟
لسه مش اشتغلت بس بحس انه ممكن يحقق ذاتى اذا كان الشغل اللى انا بتمناه
وفي نفس الوقت انا عارفه انه شئ مؤقت بالنسبه ليه لانى مجرد م ارتبط بشخص هسيب الشغل ده بمزاجى مش بناء على طلبه
انا افضل بيتى واسرتى واولادى باذن الله
الأنترنت بالنسبه لك أيه ؟
شئ مهم جدا بوصل من خلاله لاى شئ عاوزه اعرفه وفي نفس الوقت طريقه سهله بتوصلنى باعز الناس
تمرر التاج ده لمين ؟
يااااااه اقول بس مين ولا مين ؟؟؟؟؟؟؟
الحقيقه انا مش عاوزه اهديه لحد مش بيحب التيجان فياريت اللى شايف انه حابب يحل التاج يتفضله
تحياتى
غروب

27 التعليقات:

طـائر الليــل الحـزين يقول...

ايه يا قمر
التاج منور بيكى بجد
اجاباتك حلوة قوى
وخصوصا الست حاجات اللى بتكرهيهم
وعاجبنى قوى انك محددتيش مدونة معينة بتحبيها
عموما كل تاج وانتى طيبة
تحيااااااااااتى يا قمر
اه وعلى فمرة انا برده بحب جدااا المكرونة والبطاطس
لو حد عزمك معاكى بقة
ها

mohamed ghalia يقول...

هو التاج ده راح للمدونين كلهم متقلقيش ههههههههههه
جميلة إجاباتك
ربنا يسعدك دوما

♥نبع الغرام♥♪≈ يقول...

السلام عليكم ورحمة الله وبركاته
روح قلبى وعمرى ساره
مبروك عليك التاج يا عسل
بجد إجابتك روعه
وكل شىء انا متفقه معاكى فيه
وبصراحه التاج لايق ليكى ياعمرى
مزيد من التوفيق ياساره
ويارب يحقق ليكى كل اللى بتتمنيه
ويسعدك يارب
اختك أيناس

أمل حمدي يقول...

جميلة يا ساسو وزي العسل

وكل تاج وانت بخير

وسلامتك ألف سلامة

ربنا يشفيكي يا ساسو يارب

SHAPE YOUR LIFE (ABOALI) يقول...

التاج علينا حق

عنوان مشوق كده وفيه تفاعل انسانى معنوى حسى نفسوى
وكمان فى رؤيه فى الرد على اسئلته وضحه وفيه بعد راقى

الى الامام والسمو دائما

تحياتى

مسدس صغير يقول...

اجابات سريعة
ولكن جميلة
احييكى على التاج الجميل ده.
سلاموز يا بلديات

الشاعر الحزين يقول...

غرووووووووووووب الجميله

ايه يا عم الاجابات النموزجيه دى ؟

تسلم ايدك والله

ولكى منى كل التحيه والتقدير

اعشق فى الليل ضوء القمر يقول...

100 % solution

ريمان يقول...

قبل ما اقرا التاج انا جايه اقولك



سلامتك الف الف الف سلامه يا حبيبه قلبى

ان شالله اللى يكرهوكى يا رب

واللى يزعلوكى يا رب

ابقى طمنينى عليكى يا حبيبه قلبى


امواااااااااااااااااااه

اروح اشوفه التاج واجى

ريمان يقول...

الف مبروك ع التاج يا قمر


وكل تاج وانتى طيبه يا جبيبتى

بس حاولى بقه بطلى شويه العصبيه دى

ونصييحه منى بقى

اوعى تكونى عبيييييييييييييييطه

وطيييييه زياده عن الزوم

عشان تعرفى تعيشى فى البلد دى


اموااااااااااااااه يا ساسو

yoyo يقول...

الف مليون سلامة عليكى يا قمر

اممممم نجى بقى للاجابات التاج يا ساسو
ناس انجليزى زى بعضينا بقى ههههههههه
ربنا يوفقك يارب و تاخدنى الليسانس على الف خير
اجابات عرفتى عليك اكتر واكتر فى تشابهات كتير مش بقولك انجليزى بقى وكدا هههههههههههههه
على فكرة انا بموت فى البطاطس والمكرونة جداااااااااااااا خلاص تعالى اعزمك بقى

كل تاج وانت بالف خير يا قمر
الف مليون سلامة عليكى يا جميل
تحياتى
يويو

جارة القمر يقول...

مابعد الغروب ..
سارة العسل .. تلقائيتك وطيبتك تدخلك الى قلوبنا وتقربك منا
ردودك طبيعية بعيدة عن الزيف والتصنع وهذا ما أعجبني بشخصيتك
رائعة أنتي بالتوفيق والى الأمام
تحياتي

غروب يقول...

طائر الليل الحزين:

ربنا يخليكي والست حاجات اللى بكرههم اعتقد كل الناس ممكن تركههم الا اصحابهم

وانتى طيبه هههههه

بجد بتحبي المكرونه والبطاطس؟؟؟؟

طيب شوفي حد يعزمنا بقه
هههههههه

نورتى

غروب يقول...

محمد غاليا :

هههههههه اه لف كتير

متشكره جدا

وربنا يسعدك

نورتنى

غروب يقول...

عاشقه الاحزان:

وعليكم السلام ورحمه الله وبركاته

متشكره جدا

وربنا يصلح الحال

غروب يقول...

ماما اموله

مامتى العسل

ربنا يخليكي ليه

وانا الحمد لله بقيت احسن شويه

تسلمى

غروب يقول...

ابو على

هههه

حضرتك بتتريق
مااااشي

زعلانه بقه

بعد راقي؟؟؟؟؟؟؟

ايه الكلام الكبير ده

عموما ده اقل شئ عندى

انت عارف امكنياتى طبعا

هههههههه

نورتنى يا ابو على وسامحنى على التاخير عليك شويه

غروب يقول...

مسدس صغير

هى سريعه لانها طلعت بدون تفكير وده المطلوب تقريبا

يلا خير

بلديات ؟؟؟؟؟؟؟

ايه من المنصوره ام الدنيا ولا ايه؟؟؟؟

نورت

غروب يقول...

الشاعر الحزين

متشكره

غروب يقول...

عاشق ضوء القمر

انا مبفهمش انجليزى يا عمو بما انى اداب انجليزي يعنى فالمجال مختلف
هههههههههههه

نورتنى

غروب يقول...

ريمان

الله يسلمك يا حبيبتى يارب وميحرمنيش من سؤالك

مواااااااااااااااااااه

غروب يقول...

ريمو

وانتى طيبه يا قمر

والله يا بنتى كانت لسه ماما اموله بتقولى انتى عبيطه وهبله

ههههه وبتقولى بطلى هبل

قولتها مش عارفه

اعمل ايه ؟؟؟؟؟؟؟؟؟؟؟؟

غروب يقول...

الطبع يغلب يا ريمو

غروب يقول...

يويو

حبيبه قلبي انتى والله

بتوحشينى خااااااااالص بجد

الاجابات حلوه علشان عيونك يا حبيبتى اللى بتقراها

( وش بيغمز)

عزمانى طيب الحمد لله

بقولك ايه ممكن نجيب طائر الليل الحزين معانا

اصلها غلبانه وبتحب المكرونه والبطاطس زينا


وفعلا واضح ان في تشابهات كتير

طبعا يا بنتى احنا ناس عباقره واللى زينا قليلين اوى

خلى بالك من نفسك بقه علشان الحسد ماشي اليومين دول


ههههه

نورتينى يا عمرى

غروب يقول...

جاره القمر

بجد تعليقك من اجمل التعليقات اللى ممكن اشوفها ولو كنتى كتبته قبل التاج كنت هقول انه اجمل تعليق جالى

ربنا يخليكي يا حبيبتى

طوبه فضه وطوبه دهب يقول...

جميل اوى التاج ياغروب لاياساره بقى والاجمل اجاباتك البسيطه عليه تسلم ايدك

غروب يقول...

طوبه دهب وطوبه فضه

ربنا يخليكي يا قمر

ازى الفراخ
ههههههه

نورتى يا جميله

 

ما بعد الغروب © 2008. Design By: SkinCorner