والله زمان
قبل 9 أعوام
الثلاثاء، 22 سبتمبر 2009
أنا... عرفت معنى الحياة من تانى
هنا... نهيت بلمسه ايديك احزانــى
وهواك مالوش حدود.... انت الناس والوجود
قلبك نادانى رديت عليه.... قالى بحبك اقوله ايه ؟
قلبك نادانى رديت عليه.... قالى بحبك هقوله ايه ؟
قرب وخدنى وغصب عنى.... لقتنى دايبة مابين ايديه
بقولك ليه هواك فى القلب ياساكن جوة قلبى؟؟؟؟
وصحيت الغرام والحب حبيبى ازاى اخبى؟؟؟
وخبيت السنين والعمر عشان افضل معاك
معاااااااااااااك....... نسيت كل الى جمبى
( اغنيه لــ ..جنات )
هو في ايه ؟؟؟؟؟؟
السبت، 19 سبتمبر 2009
بسم الله الرحمن الرحيم
يا نااااااااااااااااااااس يا لوكل يا شعبيين ...كل سنه وانتوا طيبيبن
العيد بكره ...هييييييييييييييييه .. انا مبسوطه اوووووووى
مش بس علشان العيد .. مش عارفه عندى حاله جامده جدا من الزقططه
ادعولى تستمر .. وبعدين نحكى في الاسباب
وبما اننا في ايام كويسه اى حد زعلان منى انا اسفه واى حد انا زعلانه منه ..هو اكيد اسف صح ؟ ههههههه خلاص سماح
غروب هااانم
الثلاثاء، 15 سبتمبر 2009
بسم الله الرحمن الرحيم
مش باقى منى غير شوية ضى فى عنيا
انا هديهملك وأمشى بصبرى فى الملكوت
يمكن فى نورهم تلمحى خطوة
تفرق معاكى بين الحياة والموت
مش باقى منى غير شوية نبض فى عروقى
خدى وعيشى و أفتحيلى تابوت
افرح بريحة ورد فرعونى
وربنا فى عونى
اذا دخلت الجنة ولا النار
هشتاق الى ضحكتك وقاعدتى فى الدار
و القهوة متحوجة من طيبة العطار
فى كل يوم الصبح اشرب حليب قبطى
وفى النهار
و المسا
امسك ستار الكعبة لو سبتى
و اثبت اذا هربتى
أهديكى عمرى و حسى وجوارحى
أهديكى جرحى
هو الى باقى فى دنيتى لما خلص فرحى
مش باقى منى غير شوية لحم فى كتافى
بلاش يتبعتروا فى البحر
بلاش يتحرقوا فى قطر الصعيد فى العيد
بلاش لكلب الصيد تناوليهم
خدى اللى باقى من الأمل فيهم
وابنيلى من عضمهم فى كل حارة مقام
وزورينى مرة وحيدة لو كل ألفين عام
ألم الجراح يتلم
مش باقى منى غيرشوية دم
متلوثين بالهم
مّــرين وفيهم سم
كانوا زمان شربات
والنكتة سكرهم
شربتهم الخفافيش فى قلب اوكارهم
مش باقى منى غيرشوية دم
مقدرش اسقيكى مواجعهم
وبرضه مقدرشى ارميكى و أبيعهم
يمكن فى مرة تعوزى تطلبينى شهيد
هاحتاج يوميها الدم
يمضى على شهادتى
مش باقى منى غير شوية قوة فى ارادتى
على شوية شعر من خطى
حاسبى عليهم وانتى بتخطى
وانتى فى صبح الدلال بتعطرى شطى
مش باقى منى غير شوية ضى فى عنيا
انا مش عايزهم
لو كنت يوم هلمحك وانتى بتوطّى
فى معركة مفيهاش ولا طيارات ولاجيش
وانتى فى طابور العيش
بتبوسى ايد الزمان ينوّلك لقمة
من حقك المشروع
مش باقى منى غير .. شهقه فى نفس مقطوع
بفتحلها سكة ما بين رئة وضلوع
ما بين غبار و دموع
وانا تحت حجر المقطم فى الدويقة بموت
انا والعطش و الجوع
يئن تحت التراب وانا صوتى مش مسموع
يا حلمنا الموجوع
من المرور ممنوع
مستنى لما يمرموكب سلاطينك
مش باقى منى غير شوية رحمة من طينك
على شوية صبر من دينك
مش باقى منى غير حبة غنى تايهين
فى الضلمه
مش لاقين
حس الفواعلية
ولاصوت مراكبى المعّدية
ولا صوت بناتى العزارى فى كل صبحية
والغنوة امنية
ياما نفسى اقابل حبيبى وانا ع الزراعية
صوتك و صوتهم غاب
وانا تحت حجر المقطم باموت لوحديه
الليلة راحت عيونى تطل ع البستان
وجناين الرمان
رجعتلى توصف عناد الغل و الدخان
وسحابة سودة تضلل على الغنى الغلبان
رجعتلى توصف هبوب الموت على الألوان
رجعتلى توصف خيال الزل فى موائد الرحمن
رجعتلى توصف
مش باقى منى غير شوية كفر بشروقك
وانا منبع الأيمان
مش باقى منى غير شوية ضى
وعنيا مش قادرة تلمحنى
في وحدتى محنى
خايف اموت من الخوف والضعف يفضحنى
السجن عشش فى قلبى وماشى فى شوارعك
نفس الى باعنى انا بالرخيص بايعك
أشيل حمولى انا ولا هاشيل حملك
ما عدت املك شئ فيكى ولا فيا
ولا قيراط ولابيت ولانسمة صافية
تلاغى النيل بحرية
مش باقي منى غير شويه حب جارحنى
ولا باقي منى غير شوية ضى فى عنيا
جمال بخيت ....وقصيده ابكتنى
الأحد، 23 أغسطس 2009
بسم الله الرحمن الرحيم
الاول : كل سنه وكل الناس طيبين بمناسبه شهر رمضان الكريم
شهر الخير اللى بنستناه من سنه للتانيه
ثانيا : انا بقول شكرا لكل اللى اتصلوا بيه يطمنوا عليه اليومين اللى فاتوا واتصلوا يقولى كل سنه وانتى طيبه يا غروب
واللى سابوا رسايل هنا كمان
ثالثا بقه وهو الكلام اللى عاوزه اقوله النهارده وهو بخصوص الهرم
بس مش خوفو ولا خفرع ولا الثالث الصغير ده
لا انا كلامى النهارده على هرم التعاملات اللى موجود عند كل واحد فينا واللى بناه صاحبه
وعمر الهرم ده مش بيكون مساوى لعمر صاحبه كما جرت العاده .. الهرم ده عمره بيكون مع بدايه نضج صاحبه
وتكوينه لاساسات الهرم
هاتكلم انا بقه على هرمى الخاص
هرم غروب
.......................................................
الهرم بتاعى كان لحد فتره قريبه اوى واخد الشكل الطبيعي لاى هرم وهو قمه ووسط وقاعده
كان في القمه الناس اللى مفيش معاهم حدود واللى ممكن اتقبل منهم اى شئ بدون زعل
ودول في الغالب مش بيبقي بايدنا نختارهم ..دول ناس بتخترق حياتنا بكل قوه وبتحتل مركز اول
وفي نص الهرم : كان موجود الناس اللى ممكن تربطنى بيهم علاقات اسريه او علاقات حميمه
او بمعنى تانى : اللى هما غصب عنى ممكن اقبل منهم بعض التصرفات وممكن تكون مش عجبانى
بس لازم اعمل مش واخده بالي
وقاعده الهرم : كان فيها الناس اللى دايما بتربطنى بيهم الخطوط الحمرا واللى مش يقدروا يتجاوزا المنطقه دى
ودول المعارف والزمايل والعلاقات الطفيفه واى حد ممكن ينزل من فوق لتحت
لكن من قريب ومع بدايه النضوج اللى اتكلمت عنها بدا الهرم ياخد شكل جديد عندى
اولا بغض النظر عن ماما لان دى فوق الهرم اساسا
وكده اقدر اقسم الهرم نصين بس
قمه وقاعده
قمه الهرم بقه فيها الناس اللى اخترقت حياتى زى مقولت وممكن اتغاضي عن اى شئ يحصل منهم
بس الغريب ان معظم اصحاب القمه مش من العائله
ومفيش حد فيهم الحمد لله على شفا حفره او آيل للسقوط في قاعده الهرم لحد دلوقتى
اما بقه الطبقه اللى في النص نزلت للقاعده ومقدرتش توصل لفوق
طبقه العيله والاصحاب والعلاقات الحميمه دى معتش ليها مكان عندى منفصل
هما موجودين بالفعل في حياتى ومش هقدر الغي وجودهم ومش معنى وجودهم في مؤخره الهرم انهم مش مهمين
لكن هما بقوا مساويين لطبقه القاعده
يعنى بقى في خطوط حمرا
اتناقشت امبارح مع اولاد خالى في الهرم ده والاتنين شايفينه غلط
وان مش هينفع ان الطبقه اللى في النص تنزل تحت وده علشان هما الاسره والعيله والظهر والسند زى مبيتقال
بس انا شايفه ان كده افضل لان الطبقه اللى في النص دي كان لازم اتغاضي ليهم عن حاجات ممكن اوى تحرق الدم
لكن دلوقتى لو بموقف عرفوا انهم تحت زى اى حد وان في خطوط حمرا هيفكروا قبل اى تصرف يحرق الدم
هيعرفوا ان كلمه العتاب والعشم ....ماتت
هقولكوا على حاجه : طبعا كل واحد فينا ليه قدوه في حياته
انا قدوتى في الحياه هو ابن عمى الكبير
دايما بشوف تصرفاته صح ..وتخطيطه لحياته وشغله وبيته صح
ابن عمى ده طبق المبدا ده من سنين
مبدا ان الهرم يكون طابقين بس
وانا شايفه انه مرتاح جدا وغير كده عرف يرسم لنفسه خطوط ومكانه محدش يقدر يتخطاها حتى افراد العيله
كنت بقول كده غلط لان دول الاهل وانك تعمل كده هتكون شخصيه مكروهه وتتهم بالغرور
وده اللى حصل معاه ..لكن نجحت فكرته في الاخر
وبقه معروف انه عنده طبقتين بس وان العيله والزمايل والاصحاب النص نص دول في الطبقه اللى تحت
وان اى واحد منهم هيعدى طبقته هيترسمله خط احمر
انا شايفه الهرم كده مضبوط وان تطبيقي ليه في اول موقف يحتاج تطبيق كام تصرف سليم
وكانت نتيجته ان اعصابي مش مشدوده بسبب تصرف حد
مش حاسه ان نزول شخص معين من درجه لدرجه تحت ماثر عليه سلبا ..بالعكس
عموما انا عاوزه رايكوا في الهرم كده ..ويا ترى ايه اشكال الهرم عندكوا ؟
غروب
الاثنين، 17 أغسطس 2009
بسم الله الرحمن الرحيم
مش عارفه ليه عندى احساس انى بقالى سنه غياب عن المدونه .. لا باكتب حاجه جديده ولا بتابع مدونات حد
يمكن يكون السبب هو حاله الاكتئاب اللى مريت بيها الفتره اللى فاتت ..مش عارفه ايه سببها الحقيقي مع انى حواليه اسباب كتير تدعو للحاله دى
اولا بنت خالتى وصاحبتى اتجوزت وبعدت شويه والتانيه مش في مصر وانا لوحدى شويه
ثانيا انى من يوم النتيجه وانا زهقانه ومش عارفه اعمل ايه وبصراحه عاوزه اشتغل بس مش اى شغل برضه وده تاعبنى جدا
ثالثا ان صاحبتى الانتيم كانت هى كمان في نفس الحاله ومش بترد على اى حد ولا بتشوف اى حد حتى انا
وانتيمتنا التانيه في مصر ومش بنشوفها
يعنى اسباب كتير ..واللى مزعلنى بقه من نفسي ان الحاله دى استمرت تقريبا اربع ايام خسرت فيهم كذا حد مش كنت اتوقع ابدااااااا انى اخسرهم او يعنى مش خساره بالمعنى المفهوم
لكن يمكن علشان انا اعصابي كانت مشدوده شويه فمش كنت بتحمل كلام حد وللاسف كانت الاشخاص دى امى وبابا وخالى .. بس انا صالحت طبعا ماما وبابا بحكم اننا في بيت واحد
لكن بصراحه كرامتى وجعانى اوى اروح اعتذر لخالو ..اقولكوا الصراحه .. انا بغير من معامله خالو لشهد بنت خالتى ويمكن ده دايما اللى بيخلينى ازعل منه حتى لو مش في داعى للزعل
هي اول حفيده واقرب واحده لخالو .. لكن هو مش عارف انى انا وسمكه ممكن نزعل من فرق المعامله خصوصا واننا احنا اللاته بنحبه بنفس المقدار
ما علينا من الموضوع ده بقه
المهم: ان في نفس الوقت المفروض عندى امتحان في برنامج معين على الكمبيوتر وللاسف البرنامج ده مش كان عندى والمستر مش فاضي
وطبعا اتاجل للنهارده ادعولى بقه
من يومين بقه راحت حاله الاكتئاب دي واتبدلت بحاله حلوه اوى من السعاده والحب ولقيت ان كل شئ حواليه بيتغير من نفسه وبيتصلح لوحده
ان شاء الله تستمر الحياه كده
بما انى بقه كنت مطنشه حاجات كتير فانا كان جايلي تاج او يعنى سؤال من عاشقه الاحزان وهجاوبه دلوقتى
وان شاء الله ابدا اتابع تانى
السؤال :
اذكرى 10 اشياء صادقه في حياتك ؟
بسم الله
اولا طبعا انا مؤمنه علشان كده عارفه ان الله حق ..ورسله حق.. وملائكته حق ..وكتبه حق ..والموت حق ..والجنه والنار حق
اما بالنسبه لحياتى الشخصيه فالحقايق فيها ممكن تبقي زى اى حد
يعنى عمرى حقيقه غير قابله للتغيير ومش ممكن يرجع بيه الزمن
الحب حقيقه كبيره اوى في حياتى ومؤمنه جدا بوجوده
الماضي حقيقه وده برضه لانه مرتبط بالزمن
العائله وشروطها وقوانينها الاجتماعيه حقيقه احيانا بتعوقنى بغض النظر عن ماما وبابا
الصداقه حقيقه جميله احب دايما اصدقها حتى لو مش صادقه
الفراغ احيانا حقيقه.... لسه لحد دلوقتى مش عارفه اغيرها ولا استغلها صح
ظروف البلد اللى عايشه فيها حقيقه مش خيال ههههههههه وده مش قادره استوعبه ربنا يستر على مصر بجد
اختلافي المستمر في وجهات النظر مع بابا حقيقه لم ولن تتغير والسبب مجهول
حبي الجنونى لجوز خالتى حقيقه جامده جدا ..وده اكتر حد بحبه في الدنيا واكتر حد ممكن اتكلم معاه وانا مطمنه
سذاجتى وثقتى السريعه في الاخرين حقيقه وحشه اوى بس حقيقه
كده عشره صح ؟ كفايه
السؤال بقه اديه لمين ؟؟؟؟؟؟؟؟؟؟
انا جيت اجرب دلوقتى اديه لحد لقيت انى ممكن انسي ناس وتزعل منى فبلاش احسن
يلا سلام بقه
غروب
الاشتراك في:
الرسائل (Atom)
