والله زمان
قبل 9 أعوام
الاثنين، 17 أغسطس 2009
بسم الله الرحمن الرحيم
مش عارفه ليه عندى احساس انى بقالى سنه غياب عن المدونه .. لا باكتب حاجه جديده ولا بتابع مدونات حد
يمكن يكون السبب هو حاله الاكتئاب اللى مريت بيها الفتره اللى فاتت ..مش عارفه ايه سببها الحقيقي مع انى حواليه اسباب كتير تدعو للحاله دى
اولا بنت خالتى وصاحبتى اتجوزت وبعدت شويه والتانيه مش في مصر وانا لوحدى شويه
ثانيا انى من يوم النتيجه وانا زهقانه ومش عارفه اعمل ايه وبصراحه عاوزه اشتغل بس مش اى شغل برضه وده تاعبنى جدا
ثالثا ان صاحبتى الانتيم كانت هى كمان في نفس الحاله ومش بترد على اى حد ولا بتشوف اى حد حتى انا
وانتيمتنا التانيه في مصر ومش بنشوفها
يعنى اسباب كتير ..واللى مزعلنى بقه من نفسي ان الحاله دى استمرت تقريبا اربع ايام خسرت فيهم كذا حد مش كنت اتوقع ابدااااااا انى اخسرهم او يعنى مش خساره بالمعنى المفهوم
لكن يمكن علشان انا اعصابي كانت مشدوده شويه فمش كنت بتحمل كلام حد وللاسف كانت الاشخاص دى امى وبابا وخالى .. بس انا صالحت طبعا ماما وبابا بحكم اننا في بيت واحد
لكن بصراحه كرامتى وجعانى اوى اروح اعتذر لخالو ..اقولكوا الصراحه .. انا بغير من معامله خالو لشهد بنت خالتى ويمكن ده دايما اللى بيخلينى ازعل منه حتى لو مش في داعى للزعل
هي اول حفيده واقرب واحده لخالو .. لكن هو مش عارف انى انا وسمكه ممكن نزعل من فرق المعامله خصوصا واننا احنا اللاته بنحبه بنفس المقدار
ما علينا من الموضوع ده بقه
المهم: ان في نفس الوقت المفروض عندى امتحان في برنامج معين على الكمبيوتر وللاسف البرنامج ده مش كان عندى والمستر مش فاضي
وطبعا اتاجل للنهارده ادعولى بقه
من يومين بقه راحت حاله الاكتئاب دي واتبدلت بحاله حلوه اوى من السعاده والحب ولقيت ان كل شئ حواليه بيتغير من نفسه وبيتصلح لوحده
ان شاء الله تستمر الحياه كده
بما انى بقه كنت مطنشه حاجات كتير فانا كان جايلي تاج او يعنى سؤال من عاشقه الاحزان وهجاوبه دلوقتى
وان شاء الله ابدا اتابع تانى
السؤال :
اذكرى 10 اشياء صادقه في حياتك ؟
بسم الله
اولا طبعا انا مؤمنه علشان كده عارفه ان الله حق ..ورسله حق.. وملائكته حق ..وكتبه حق ..والموت حق ..والجنه والنار حق
اما بالنسبه لحياتى الشخصيه فالحقايق فيها ممكن تبقي زى اى حد
يعنى عمرى حقيقه غير قابله للتغيير ومش ممكن يرجع بيه الزمن
الحب حقيقه كبيره اوى في حياتى ومؤمنه جدا بوجوده
الماضي حقيقه وده برضه لانه مرتبط بالزمن
العائله وشروطها وقوانينها الاجتماعيه حقيقه احيانا بتعوقنى بغض النظر عن ماما وبابا
الصداقه حقيقه جميله احب دايما اصدقها حتى لو مش صادقه
الفراغ احيانا حقيقه.... لسه لحد دلوقتى مش عارفه اغيرها ولا استغلها صح
ظروف البلد اللى عايشه فيها حقيقه مش خيال ههههههههه وده مش قادره استوعبه ربنا يستر على مصر بجد
اختلافي المستمر في وجهات النظر مع بابا حقيقه لم ولن تتغير والسبب مجهول
حبي الجنونى لجوز خالتى حقيقه جامده جدا ..وده اكتر حد بحبه في الدنيا واكتر حد ممكن اتكلم معاه وانا مطمنه
سذاجتى وثقتى السريعه في الاخرين حقيقه وحشه اوى بس حقيقه
كده عشره صح ؟ كفايه
السؤال بقه اديه لمين ؟؟؟؟؟؟؟؟؟؟
انا جيت اجرب دلوقتى اديه لحد لقيت انى ممكن انسي ناس وتزعل منى فبلاش احسن
يلا سلام بقه
غروب
الأحد، 2 أغسطس 2009
بسم الله الرحمن الرحيم
انا جيت النهارده ابلغكوا شويه اخبار سعيده بسرعه كده ويمكن بعدها اتاخر تانى
اولا : انا نجحت الحمد لله واخدت الاسانس ( آداب انجليش ) .
ثانيا : سمكه بنت خالتى اتجوزت اخيييييرا بعد عذاب وتعب وارهاق ..الحمد لله وربنا يسعدها يارب وعقبال كل البنانيت
ثالثا : ان ابن عمى كمان كريم ومنى اتجوزوا وربنا يسعدهم
رابعا : شهد فرحها بقي في العيد باذن الله هنا في مصر
خامسا : بكره فرح بلال ابن خالى
كفايه بقه
سلام وعقبالكوا كلكوا
غروب
الأحد، 26 يوليو 2009
الاثنين، 20 يوليو 2009
اولا : ازيكوا كلكوا ..وحشنى ناس كتير اوى هنا وبعتذر للكل عن تاخيري عليهم وعلى مدونتى احيانا بس انا مشغوله جدا اعذرونى النهارده بقه مش عاوزه اتكلم في نقطه واحده .. تؤ تؤ دول كذا حاجه عاوزه اتكلم فيهم
اول حاجه عاوزه اتكلم فيها هى النفاق ... ما شاء الله بقه عمله مسجله فعلا ومحدش يزعل منى في هنا معانا ناس منافقه كتير بطريقه بصراحه تجيب ضغط مستعجل
الحقيقه انا علاقتى بمعظم المدونين مش علاقه مباشره يدوب كده في حدود لوحه المفاتيح وكلام على الشاشه .. ما عدا شخصين تلاته ويمكن اعرفهم قبل التدوين
ومش هنكر طبعا ان في في التدوين ناس كويسه جدا وعلى درجه كبيره من الصدق ... لكن اللى يصدم بجد لما تتوقع ان في شخص بعينه كويس وفي الاخر تكتشف انه غبي
ومنافق .. بجد حاجه تزعل وتصدم وانا حصل معايا ده ولان صراحتى ساعات كتير بتزعل ناس فانا مش هقولهم في وشهم لكن كفايه انى اقول اللى انا عاوزاه هنا
لما الاقي حد انا كلمته في موضوع ما ... الموضوع ده يمنعه من دخول بعض المدونات او على الاقل يكون الرد على اد الرد ... ويكون رد فعله على الكلام منتهى الاحتقار ...وفجاه مش الاقي بس ردود لالالالالالا دى ردود وتليفونات وميلات وحب متناهى ..زياده عن اللزوم
طبعا انا مليش دعوه ومش هحكم على حد كلم ده وده لا لان كل واحد حر .. لكن حد ينافقنى ليه ؟؟؟؟
ده اول صوره للنفاق هنا
تانى صوره وهى العكس
يعنى مثلا حد معين يقولى فلان عمل وعمل وعمل وانا هعرفه وهوريه وهعمل وهعمل لانه كذا كذا وكله كلام غلط طبعا
واذ فجاتن برضه الاقي الشخص ده في مدونه الاخر بيجامل بطريقه مبالغ فيها بعد شتيمه علنيه في المدونات .. وحب ونفاق
طب ليه يا جماعه كده ؟؟؟؟ انت اخدت موقف من فلان خلاص بقه يا اما مش تحكى لحد عن اللى حصل يا اما تلتزم بموقفك
انت بتنافق ليه ؟ هو في حد في بلوجر ده ماسك ذله للتانى ؟؟؟؟؟؟
ودى كانت تانى صوره شوفتها ادامى وضايقتنى جدا
تالت صوره :
لما برضه الاقي مدون متبع سياسه التلقيح بالكلام على فلان وعلان ... وهما اشخاص معروفه لبعضها ولبعض المقربين ومش كده بس لا يكره الناس فيه لدرجه ان في ناس تانيه تكتب تهين الطرف التانى مجامله للطرف الاول
وفجاه ومن ورا الكل يروح الطرف الاول اللى بيلقح كلام للطرف التانى يخبط على بابه ويقوله تعالى نتكلم سوا شويه ؟؟؟؟؟؟؟؟
يا سبحاااااااااان الله
بجد النفاق بقه كتير اوى انا بدات ازهق واتخنق .. ايه يعنى لما انت مش بتحب فلان تقوله انا مش بحبك ومش هكلمك سواء بقه ادامه او من وراه
مش لازم تغلط صحيح لكن برضه مش لازم ننافق بعضنا
على فكره معظم الحالات اللى اتكلمت عنها كانت ادامى وبعض النفاق موجه ليه انا يعنى مش بظلم حد
تانى حاجه عاوزه اتكلم فيها ان بجد والله العظيم ربك يمهل ولا يهمل
في شخص في حياتى ظلمنى من حوالى خمس سنين ظلم بيّن واتسبب ليه في ضرر كبير .. وطبعا مش عاوزه حد يربط بين الظلم والجرح لان من خمس سنين كنت لسه عيله في ثانوى يعنى الناس اللى بتحب دايما تشغل مخها في قصص الحب تعرف انها مش قصه حب .
لكن هو واحد ظلمنى وظلم والدى وظلم ناس من عيلتى كتير واتسبب في مشاكل كبيره وخساير
عرفت امبارح انه اتعرض لحادث حريق كبير هو وابوه .. وفي نفس الوقت كان في واحد صاحبه شاهد زور اتعرض لنفس الظلم واخته اتجوزت شهرين واتطلقت بسبب الشهاده دى
انا مش شمتانه والله بالعكس انا زعلت لما عرفت
لكن ده كان درس ليه وحبيت انقله ليكوا .. اللهم لا شماته بس ربنا مش بيضيع حق حد
اتكلم كمان بما انى كده كده صدعتكوا في نقطه الظلم
ناس كتير بقت بتظلم بدون متحاول تفهم الحقيقه وتتهم ناس وترميهم بالباطل بدون اى وجه حق .. انا كل اللى بقوله يا جماعه قبل محد يكتب كلمه او يقول كلمه يقصد بيها شخص تانى يعرف كلمته دي رايحه فين وممكن تعمل ايه
زى م انت ممكن تتعب اوى لو حد ظلمك ممكن كلمه صغيره منك تظلم غيرك وتقتله
اقول كمان انى متضايقه اوى من انعدام لغه الحوار في بعض البيوت وللاسف احيانا ده بيحصل في بيتنا
من كام يوم كان عندنا عمو وطنط وعمتو وبنت عمتى
يعنى كنا قاعدين كلنا .. واتفتح موضوع هل المسلم المفروض يقرا في الانجيل ولا لا؟؟؟؟؟؟؟ وطبعا اختلفت الاراء بس اللى ضايقنى وخلانى اسكت خالص ومش اقول راي
انى مش لاقيه حد بيسكت علشان يسمع راى التانى
كله بيتكلم مع بعضه ؟؟؟؟؟؟ مع انى بحب انى حد يسمعنى لحد لما اخلص وبعدين اسمعه وهكذا
اقووووووول كمان ان الجواز فعلا مش سهل :
كنت دايما اسمع من ماما ان ايام الفرح بيبقي فيه بعض مشادات ونقاشات ساخنه بين العروسه وبباها والعريس والاهالى وكده وه شئ طبيعي
بس كنت مش بشوف بعينى لحد من كام يوم
بقالي كام يوم في نقاشات حاده جدااااااااا بين سمكه بنت خالتى وبااها وعريسها ومامتها وماما وانا وكله على كله
هو صحيح مش خناق لكن حوار مش بارد كده وسهل لالالالا حوار على نار هاديه زى مبيتقال ...بس تفضل نار
بس انا زعلانه النهارده ومتضايقه لان انا وسمكه كنا بنتناقش في حاجه بس ادام ماما وخالتو وتاتو .. وشدينا سوا في الكلام قالتى ساره انتى متتكلميش ومش ليكي دعوه ودى عمرها محصلت بينى وبينها .. وللاسف انا كنت صايمه وتعبانه جدا واقسمت انى مش ليه دعوه بيها ولا بالفرح من اليوم وده مزعلنى جدا ومزعلها ومشيت قبل منتصالح
مااااااا علينا
اقول كمان انى بدات ازهق جداااا من الاجازه مع ان النتيجه لسه مش بانت بس انا عاوزه اشتغل جدا بس شغل يكون مريح يعنى مش اصحي بدرى ولا امشي في الحر ولا كده حد عنده شغل ؟؟؟؟؟؟ هههههههه
خبر سريع : بعد ما عملنا حنه شهد هنا في مصر وسافرت تتجوز في السعوديه زعلت مامت العريس واحنا كنا زعلانين طبعا صدر فرمان بتاجيل الفرح لتانى يوم العيد على شرط انه يتعمل هنا في مصر في احلى قاعه فيكي يا منصوره نياهاهاهاها انا سعيده للخبر ده جدا
انا حاسه ان في كلام كتير اووووى لسه عندى بس مش النهارده بقه علشان محدش يدعى عليه لو قرا البوست
سلالالام
غروب
السبت، 4 يوليو 2009
بسم الله الرحمن الرحيم
اننا احيانا قد نعتاد الحزن حتى يصبح جزءا منا ونصير جزءا منه ..وفي بعض الاحيان تعتاد عين الانسان على بعض الالوان ويفقد القدره على ان يرى غيرها ..ولو انه حاول ان يرى ما حوله لاكتشف ان اللون الاسود جميل ولكن الابيض اجمل منه وان لون السماء الرمادى يحرك المشاعر والخيال ولكن لون السماء اصفي في زرقته .....فابحث عن الصفاء ولو كان لحظه
..وابحث عن الوفاء ولو كان متعبا وشاقا ولا تترك قلبك ومشاعرك وايامك لاشياء ضاع زمانها واذا لم تجد من يسعدك فحاول ان تسعد نفسك
..وابحث عن الوفاء ولو كان متعبا وشاقا ولا تترك قلبك ومشاعرك وايامك لاشياء ضاع زمانها واذا لم تجد من يسعدك فحاول ان تسعد نفسك
جمله طويله صحيح ... لكن جميله ........صح؟؟؟؟؟؟
الجمله دى كانت اجابه صاحبتى لما سالتها ليه اتخطبتى للشخص ده بالذات ؟؟؟؟؟؟؟؟
هو انتى نسيتى فلان ؟؟؟؟؟
لا مش نسياه ... بس تفتكرى هفضل فكراه لامتى؟؟؟؟؟؟ وايه النتيجه ؟؟؟؟؟
طيب انتى سعيده بالخطوبه دى؟؟؟؟؟؟؟؟
عااادى
عاادى؟؟؟؟؟؟؟ يعنى ايه ؟ واشمعنه ده ؟؟؟ولما انتى ناويه تنسي فلان اشمعنه الشخص ده اللى وافقتى انه ياخد مكانه مع ان كان قدامك احسن منه كتير ؟؟؟
اسئلتك كتير اوى
...........
جاوبينى
كان لازم افرح واخلى اللى حواليه يفرحوا معايا وكان زيه زى غيره وده الوقت المناسب لانى اكون لابسه دبله
كملى
يعنى زى مقولتلك في الاول : ان لم تجد من يسعدك حاول ان تسعد نفسك
يعنى احساسي وانا مخطوبه احلى من احساسي وانا منتظره عريس (الحب)
بحاول اكون في احسن حالاتى وبس وهو انسان كويس يعنى
...................................................................................
انا مش موافقه على المبدا ده .. انتى ازاى تربطى نفسط بشخص لمجرد انك تعيشي احساس معين
افرضي بقه طلع احساس مؤقت ... انتى مش متاكده من النتيجه لانه احساس جديد الله اعلم هيدوم ولا لا؟؟؟؟؟؟
اللون الاسود جميل بس الابيض احلى : انا عشت الاسود كتير في حب انتهى بجرح وفي انتظار وفي امل اتحطم وذكريات سيئه
وعايشه الابيض في حلم قابل للتنفيذ حاليا في دبله وفستان ابيض وفي زغروطه حلوه خارجه من بيتنا ولمه اصحابي وجيرانى حواليه وضحكه امى وفرحه ابويه
اى كفه هتوزن اكتر ؟؟؟؟؟؟ الاسود ولا الابيض؟؟؟
يا بنتى انا متفقه معاكى في كل الفرح ده بس افرضي بعد فتره مش استريحتى معاه لاى سبب
عادى جدا :::::: ابحث عن الصفاء ولو كان لحظه
هبقي عشت لحظات حلوه وفرحت وجربت احساس احلى من احساس الانتظار والجرح
وافرضي حبتيه وانتهت العلاقه بشكل يجرحك تانى زى الاول؟؟؟؟ وخليكي فاكره ان الجرح الاول كان جرح ليكي لوحدك لكن التانى هيكون ليكي ولكل اللى فرحوا معاكى دول اللى بسببهم كسبت كفه الابيض ؟؟؟؟؟
ابحث عن الوفاء ولو كان متعبا وشاقا : هدور تانى .. حياتى ف ايدي
طيب قدر هو ينسيكي اللى فات ؟؟؟؟؟؟؟؟؟
وهنا بكت بكاء شديد وقالت وصوتها مخنوق :
لا تترك مشاعرك وايامك لاشياء ضاع زمانها
اسئلتى كلها كان ليها اجابات عندها في الجمله اللى بدانا بيها حوارنا
تفتكروا ممكن حد يعيش كده يعيش حياته في جمله واحده ؟؟؟؟؟؟؟
يا ترى انا حياتى كام جمله ؟؟؟؟؟؟؟
..........................................................................
هاتعمل ايه لو نمت يوم وصحيت بصيت شوفت نفسك ف المرايه بكيت ؟؟؟
جواك سؤال تصرخ تقول انا مين ؟؟ انا مين ؟؟
انا زى م انا ولا اتقسمت اتنين ؟؟
وبعدين ؟؟؟؟؟؟؟؟؟
قول ياللى ف المرايه ..فهمنى ايه الحكايه ؟؟
فرحان..تعبان ..مرتاح ..ندمان
حاجات كتير في حياتنا اتسببت في حيرتنا.. وادينا
عايشين ..راضين..جايين ..ورايحين
هاتعل ايه لو نمت يوم وصحيت ولقيت اقرب ما ليك ف الدنيا مش حواليك؟
هو انت مين اللى عمل كده فيك ؟؟ مش انت ولا في حد غمى عنيك؟
وبعدين ؟؟؟؟؟
قول ياللى في المرايه ... فهمنى ايه الحكايه؟؟
فرحان..تعبان..مرتاح..ندمان
حاجات كتير في حياتنا اتسببت في حيرتنا ..وادينا
عايشين..راضين..جايين ..ورايحين
غروب
الاشتراك في:
الرسائل (Atom)
