الاثنين، 20 يوليو 2009

كلام x كلام

اولا : ازيكوا كلكوا ..وحشنى ناس كتير اوى هنا وبعتذر للكل عن تاخيري عليهم وعلى مدونتى احيانا بس انا مشغوله جدا اعذرونى
النهارده بقه مش عاوزه اتكلم في نقطه واحده .. تؤ تؤ دول كذا حاجه عاوزه اتكلم فيهم
اول حاجه عاوزه اتكلم فيها هى النفاق ... ما شاء الله بقه عمله مسجله فعلا ومحدش يزعل منى في هنا معانا ناس منافقه كتير بطريقه بصراحه تجيب ضغط مستعجل
الحقيقه انا علاقتى بمعظم المدونين مش علاقه مباشره يدوب كده في حدود لوحه المفاتيح وكلام على الشاشه .. ما عدا شخصين تلاته ويمكن اعرفهم قبل التدوين
ومش هنكر طبعا ان في في التدوين ناس كويسه جدا وعلى درجه كبيره من الصدق ... لكن اللى يصدم بجد لما تتوقع ان في شخص بعينه كويس وفي الاخر تكتشف انه غبي
ومنافق .. بجد حاجه تزعل وتصدم وانا حصل معايا ده ولان صراحتى ساعات كتير بتزعل ناس فانا مش هقولهم في وشهم لكن كفايه انى اقول اللى انا عاوزاه هنا
لما الاقي حد انا كلمته في موضوع ما ... الموضوع ده يمنعه من دخول بعض المدونات او على الاقل يكون الرد على اد الرد ... ويكون رد فعله على الكلام منتهى الاحتقار ...وفجاه مش الاقي بس ردود لالالالالالا دى ردود وتليفونات وميلات وحب متناهى ..زياده عن اللزوم
طبعا انا مليش دعوه ومش هحكم على حد كلم ده وده لا لان كل واحد حر .. لكن حد ينافقنى ليه ؟؟؟؟
ده اول صوره للنفاق هنا
تانى صوره وهى العكس
يعنى مثلا حد معين يقولى فلان عمل وعمل وعمل وانا هعرفه وهوريه وهعمل وهعمل لانه كذا كذا وكله كلام غلط طبعا
واذ فجاتن برضه الاقي الشخص ده في مدونه الاخر بيجامل بطريقه مبالغ فيها بعد شتيمه علنيه في المدونات .. وحب ونفاق
طب ليه يا جماعه كده ؟؟؟؟ انت اخدت موقف من فلان خلاص بقه يا اما مش تحكى لحد عن اللى حصل يا اما تلتزم بموقفك
انت بتنافق ليه ؟ هو في حد في بلوجر ده ماسك ذله للتانى ؟؟؟؟؟؟
ودى كانت تانى صوره شوفتها ادامى وضايقتنى جدا
تالت صوره :
لما برضه الاقي مدون متبع سياسه التلقيح بالكلام على فلان وعلان ... وهما اشخاص معروفه لبعضها ولبعض المقربين ومش كده بس لا يكره الناس فيه لدرجه ان في ناس تانيه تكتب تهين الطرف التانى مجامله للطرف الاول
وفجاه ومن ورا الكل يروح الطرف الاول اللى بيلقح كلام للطرف التانى يخبط على بابه ويقوله تعالى نتكلم سوا شويه ؟؟؟؟؟؟؟؟
يا سبحاااااااااان الله
بجد النفاق بقه كتير اوى انا بدات ازهق واتخنق .. ايه يعنى لما انت مش بتحب فلان تقوله انا مش بحبك ومش هكلمك سواء بقه ادامه او من وراه
مش لازم تغلط صحيح لكن برضه مش لازم ننافق بعضنا
على فكره معظم الحالات اللى اتكلمت عنها كانت ادامى وبعض النفاق موجه ليه انا يعنى مش بظلم حد
تانى حاجه عاوزه اتكلم فيها ان بجد والله العظيم ربك يمهل ولا يهمل
في شخص في حياتى ظلمنى من حوالى خمس سنين ظلم بيّن واتسبب ليه في ضرر كبير .. وطبعا مش عاوزه حد يربط بين الظلم والجرح لان من خمس سنين كنت لسه عيله في ثانوى يعنى الناس اللى بتحب دايما تشغل مخها في قصص الحب تعرف انها مش قصه حب .
لكن هو واحد ظلمنى وظلم والدى وظلم ناس من عيلتى كتير واتسبب في مشاكل كبيره وخساير
عرفت امبارح انه اتعرض لحادث حريق كبير هو وابوه .. وفي نفس الوقت كان في واحد صاحبه شاهد زور اتعرض لنفس الظلم واخته اتجوزت شهرين واتطلقت بسبب الشهاده دى
انا مش شمتانه والله بالعكس انا زعلت لما عرفت
لكن ده كان درس ليه وحبيت انقله ليكوا .. اللهم لا شماته بس ربنا مش بيضيع حق حد
اتكلم كمان بما انى كده كده صدعتكوا في نقطه الظلم
ناس كتير بقت بتظلم بدون متحاول تفهم الحقيقه وتتهم ناس وترميهم بالباطل بدون اى وجه حق .. انا كل اللى بقوله يا جماعه قبل محد يكتب كلمه او يقول كلمه يقصد بيها شخص تانى يعرف كلمته دي رايحه فين وممكن تعمل ايه
زى م انت ممكن تتعب اوى لو حد ظلمك ممكن كلمه صغيره منك تظلم غيرك وتقتله
اقول كمان انى متضايقه اوى من انعدام لغه الحوار في بعض البيوت وللاسف احيانا ده بيحصل في بيتنا
من كام يوم كان عندنا عمو وطنط وعمتو وبنت عمتى
يعنى كنا قاعدين كلنا .. واتفتح موضوع هل المسلم المفروض يقرا في الانجيل ولا لا؟؟؟؟؟؟؟ وطبعا اختلفت الاراء بس اللى ضايقنى وخلانى اسكت خالص ومش اقول راي
انى مش لاقيه حد بيسكت علشان يسمع راى التانى
كله بيتكلم مع بعضه ؟؟؟؟؟؟ مع انى بحب انى حد يسمعنى لحد لما اخلص وبعدين اسمعه وهكذا
اقووووووول كمان ان الجواز فعلا مش سهل :
كنت دايما اسمع من ماما ان ايام الفرح بيبقي فيه بعض مشادات ونقاشات ساخنه بين العروسه وبباها والعريس والاهالى وكده وه شئ طبيعي
بس كنت مش بشوف بعينى لحد من كام يوم
بقالي كام يوم في نقاشات حاده جدااااااااا بين سمكه بنت خالتى وبااها وعريسها ومامتها وماما وانا وكله على كله
هو صحيح مش خناق لكن حوار مش بارد كده وسهل لالالالا حوار على نار هاديه زى مبيتقال ...بس تفضل نار
بس انا زعلانه النهارده ومتضايقه لان انا وسمكه كنا بنتناقش في حاجه بس ادام ماما وخالتو وتاتو .. وشدينا سوا في الكلام قالتى ساره انتى متتكلميش ومش ليكي دعوه ودى عمرها محصلت بينى وبينها .. وللاسف انا كنت صايمه وتعبانه جدا واقسمت انى مش ليه دعوه بيها ولا بالفرح من اليوم وده مزعلنى جدا ومزعلها ومشيت قبل منتصالح
مااااااا علينا
اقول كمان انى بدات ازهق جداااا من الاجازه مع ان النتيجه لسه مش بانت بس انا عاوزه اشتغل جدا بس شغل يكون مريح يعنى مش اصحي بدرى ولا امشي في الحر ولا كده حد عنده شغل ؟؟؟؟؟؟ هههههههه
خبر سريع : بعد ما عملنا حنه شهد هنا في مصر وسافرت تتجوز في السعوديه زعلت مامت العريس واحنا كنا زعلانين طبعا صدر فرمان بتاجيل الفرح لتانى يوم العيد على شرط انه يتعمل هنا في مصر في احلى قاعه فيكي يا منصوره نياهاهاهاها انا سعيده للخبر ده جدا
انا حاسه ان في كلام كتير اووووى لسه عندى بس مش النهارده بقه علشان محدش يدعى عليه لو قرا البوست
سلالالام
غروب

40 التعليقات:

♥نبع الغرام♥♪≈ يقول...

ايه ده


وسع انت وهو

انا اول تعليق

محدش يقف فى طريقى افرمه

♥نبع الغرام♥♪≈ يقول...

احم احم

انا فى حلم ولا علم

منوره ياغروب هانم


نورتى البلوجر من تانى


احلى سلام وتحيه لاجمل غروب على الكره الارضيه

♥نبع الغرام♥♪≈ يقول...

احمدك يارب طلعت الاول والتانى والتالت كماااااااااااان


ايه مالكم فى حاجه مدونة صاحبتى واختشى الانتيم

اعمل اللى يعجبنى

عاااااااااااااااااااااا


عاااااااااااااااااااااااا

اللى هيكلمنى هضربه بالمصاصه

واحدفه باللبان

♥نبع الغرام♥♪≈ يقول...

احمدك يارب طلعت الاول والتانى والتالت كماااااااااااان


ايه مالكم فى حاجه مدونة صاحبتى واختشى الانتيم

اعمل اللى يعجبنى

عاااااااااااااااااااااا


عاااااااااااااااااااااااا

اللى هيكلمنى هضربه بالمصاصه

واحدفه باللبان

♥نبع الغرام♥♪≈ يقول...
أزال المؤلف هذا التعليق.
♥نبع الغرام♥♪≈ يقول...

انا بقا ياساره بقيت من هواة الاحتلال مش بيعدى عليا مدونه اللا لما بفرمها فرم


هع هع هع

♥نبع الغرام♥♪≈ يقول...

نقول الاول

وحشتينى قوووى ياساره للدرجة كبيره موووت

وطبعآ يعنى مش كتير لانى بطمن عليكى على الميل

بس بجد مبسوطه قوووى لما لاقيتك نزلتى بست

ربنا يروق بالك ويبعد عنك الحزن والهم
الهم امين
وان شاء الله يحقق ليكى كل ما تتمنى

بحبك قووى

خدى دى
موووووووووووووووووواه

♥نبع الغرام♥♪≈ يقول...

اروح بقا اشوف البوست ده بيتكلم عن ايه

شكل العنوان كبيررررررررررر

كلام × كلام


ربنا يستر

اروح اشوف وارجع
محدش ياخد مكاتنى الا لما اخلص

♥نبع الغرام♥♪≈ يقول...

انا طبعآ قريت البوست مره واتنين وتلاته

وبجد كلامك مش يزعل ولا حاجه

انا عن نفسى ياساره حصل ليا موقف مع احد المدونين وكانت الامور ساءت قوووى بينا واكيد انتى فهمه انا اقصد ايه

المهم بعدت وسلمت امرى لله وحده

وبعدين من كام يوم دخل عندى وساب ليا تعليق

قلت وكفا الؤمنين شر القتال ورحت شكرته وخلاص

بس ده مش يمنع ان لسه فى جرح جوايا والاثار لسه موجوده

بس خلاص هيفيد بأيه بقا فى الاول والاخر احنا مسلمين وربنا بيسامح يبقا العبد مش يسامح وهقول برده دوام الحال من المحال

واكيد كلنا بنتعلم من أخطئنا ياساره وربنا غفور رحيم
وفى الحالة اللى زى دى بفوض امرى لله هو وحده منتقم جبار بيخلص حقوق المظلومين

بجد كلامك مش كتير ولا حاجه كلامك عسل قوووى وهى دى الحقيقه واللى يزعل يزعل
احيك على صدق قلبك وطيبة مشاعرك

واحساس نيتك

ربنا يبارك فيكى ويعزك وان شاء الله نتيجتك زى الفل

وبدعيلك من كل قلبى

وياريت مش تزعلى منى ياساره

بحبك قوووى
اختك
ايناس

وردة يقول...

غروب
ازيك يا حبيبتي
انا يمكن حتكلم في نقطة معينة
هي النفاق هنا في المدونات
اي نعم انا بقالي فترة صغيرة
بس شوفت العجب
بجد
ناس مش فارقة معاها بتجامل عمال علي بطال سواء البوست حلو وحش يتجامل
وناس بتلقح كلام
وناس غريبة والله
وناس فاتحة علي الرابع وكلام حلو وكلام مينفعش
وانتي مطالبة تتعملي مع كل دووول
طبعا علي قد ما بنقدر بننصح لو في ود او اتصال مع حد
ولو مفيش بنحاول نكون محايديين
بس كله الا كلمه الحق
ديه بقي حسابها كبير عن ربنا
لازم نقولها
ولو حد زعل من الحق يبقي الغلط مش عندك
المهم نقدر نقول كلمة الحق ديه بأسلوب مهذب ومن غير ما نجرح حد
ربنا يكرمك يا غروب ويفك كربك وهمك
وتتصلحي انتي وسمكة
انتو في الاول والاخر اخوات
"وخيركم من بدأ بالسلام"
ربنا يوفقك
سلام

الشاعر الحزين يقول...

غروب

أولا حمدا لله على السلامه

ثانيا النفاق

صدقينى يا غروب

فى الزمن ده أصبحنا كلنا منافقين

أيوه كلنا منافقين دا احنا حتى قبل ما ننافق غيرنا بننافق نفسنا

لأننا أساسا مش قادرين نعرف احنا عايزين ايه بالظبط

ثالثا بقى وهو ده الأهم

والحاجه اللى زعلتنى جدا جدا
هى عدم تصالحك مع سمكه

أنا اللى أعرفه واللى أنتى كتبتيه عن علاقتكوا مع بعض انها علاقه جميله قوى

وبعدين أنتى أكيد عارفه انها مشدوده شويه من المواقف اللى بتدور حواليها

لازم تسامحى وتبدأى بالصلح

خيركم من يبدأ بالسلام

وأنا متأكد ان أنتى لو مابدأتيش هى هتبدأ لأن أنتوا أكيد متقدروش تتخلوا عن بعض

عشان كده عايزك أنتى اللى تبدأى وتكسبى الثواب

عموما حمدا لله على السلامه مره تانيه

ونورتى مكانك من جديد

دمتى بالخير

ريمان يقول...

يالهووووووى

ده انتى شكلك شايله فى قلبك كتير


انا جالى اكتئاب

زهرة الحب يقول...

اولاً زى مانتى قولتى ان النفاق بقى علامه مسجله وده اكيد طبعا عن تجربه يعنى تانى حاجه روحى صالحى سمكه ومفيش حاجه تستاهل انكم تتخاصموا هى بس هتلاقيها متوترة شويه علشان الفرح قرب وكده ودى عادى يعنى وعلى فكرة مدونتك حلوه اوى ياريت تدخلى بتاعتى وتقوليلى ايه رأيك

غير معرف يقول...

بصى يا جميل اى مكان لازم يكون فيه الصالح و الطالح مش عشان احنا مدونين و المفروض ان المدونين بيكونوا فئة مثقفة و راقية حبه يبقى الناس اللى فى العامل ده يكونوا حد كويس..لأ لأن التدوين لملم و بقى يدخلوا ناس ملهاش علاقة بأى حاجة..فا دايما لما تتعاملى مع حد ميبقاش حسن الظن هو اللى 100% لأ لازم يكون فى مساحة لسوء الظن..يمكن يكون غلط بس انا بعمل كدة و الحركة دى بتخلينى لما اتخم فى حد متصدمش اوى..و على فكرة لو كل واحد اتعامل بتشغيل مخ مع حد بيعرفه لاول مرة ممكن بعد تالت أو رابع قعدة من خلال الكلام يعرف إيه القناع اللى الشخص ده جطه..بس ده لو ركزنا اوى فى كل كلمة بيقولها الشخص

و متزعليش من سمكة الواحد ممكن لما يبقى قرفان و الدنيا حر كدة بيطلع بكلام هو مش قصده اساسا

حاجــ عيال ــات يقول...

ايه ده انت عطشانة كلام يابنتي
ربنا يفرحك قلبك ياروح قلبي
يارغاية

ماء تشرين يقول...

اولا حمد لله على السلامه ياجميل

بالنسبه للنفاق ده بقه الطبيعى اصلك منزلتيش مجال العمل بكره تعرفي حجات كتير وعموما النفاق انواع مش بقولك لسه مش هتعرفي دلوقتى

وربنا يفرح قلبك انشاء الله يارب

EMMY BABY يقول...

هههههههههههههههههههههه ايه الكربسة دى كلها بتفكرينى بنفسى بفكر فى ميت حاجة فى وقت واحد

بالنسبة للشغل ناقص والله تقولى انا عايز شغل يجيلى لحد البيت ديلفيرى هههههههههه

بالنسبة لموضوع النفاق انا عن نفسى كرهته وانا صريحة جدا برضه ومبعرفشى ساعات امسك لسانى

بالنسبة لسماع الراى الاخر ده للاسف احنا معندناش ثقافة الحوار وتقبل الراى الاخر

بالنسبة لتاخيرك علينا فانا عن نفسى مش زعلانة خالص مالص الحال من بعضه والله

ويارب النتيجة تطلع وترفعى راسنا بقى

اممممممواة

اموت واعرف انا ليه حاسة انى اعرفك من زمان

ماحلينا

تحياتى

ايمى

الازهرى يقول...

اولا الحمد لله كلنا بخير

ثانيا اتكلمى براحتك وفضفضى
كل الحاجات دى بنقابلها فى حياتنا ، اتمنى انى اكون مش منافق زيهم ولكن فعلا شىء سخيف وبيكون مفضوح جداجدا جدا

انما بقى لو جينا للبيت يبقى لازم تفوتى شويتين يعنى مهما كان تقدرى تعملى كده والمركب تمشى

انما بقى موضوع المناقشات ده مشكلة حقيقية والرأى فيه حاليا بيكون للاعلى صوتا وليس للاصح

والكارثة بقى انى شخصيا باحب السكوت وفى النهاية باسيب كل واحد يقول اللى فى نفسه واسمع انا

وعلى فكرة فى موضوع قراءة الانجيل ده انا شخصيا أحفظه كحفظى للقرآن هو والتوراة أيضا ولا أجد غضاضة فيمن يقرأه أو يقرأ غيره من الكتب المهم ثبات العقيدة

الازهرى يقول...

غروووووووب

عفا اله عما سلف
دى تاريخ كبير محتاجة ترجعى فى المدونة شويتين علشان تعرفيه
لكن هى فى نفس الوقت مش تهريج
لانى اتعودت لازم يبقى فى معنى فى لموضوع وانا باكتب

*******************
اما بخصوص قراءة الانجيل والتوراة وغيرهم من الكتب سواء لمسلمين او لغير للمسلمين او حتى للملحدين
فكان موضوعا لنقاش واسع بينى وبين اصحابى واكثرهم يعارضوننى
ورأيي الذى سألت فيه الكثيرين وآخرهم الدكتور محمد عمر الأستاذ بقسم الأديان ببكلية الدعوة الاسلامية
أنه يمكننى أن أقرأ ما أريد بشرطين
الأول أن يكون هذا وأنا على يقين مما أنا عليه (ولهذا فنحن نحفظ القرآن أولا وندرس تفسيره واعجازه وبعدها ندرس ما سواه )
والثانى أن نلجأ فى حالة الشك وفورا إلى أقرب عالم نثق به ليفسر لنا ما يعترض فهمنا أو ما نسىء تأويله وهو ما فعلته كثيرا مع الشيخ عطية صفر ولمسير رحمهما الله والدكتور الجوهرى وغير هم من الأساتئه الموجودين رزقهم اللخ الصحة جميعا

تحياتى دوما
وأهلا بالنقاش والإختلاف

أحمد زاهر يقول...

ربنا يكون فى عونك

وعلى رأى المثل " اللى يشوف بلاوى الناس تهون عليه بلاويه "

VÖltaa يقول...

اهلا ياغروب

كل ده رغى .. صدعتينا ياشيخة ^_^

ههههه
ياستى ربنا يصلح الاحوال ان شاء الله والحمدلله الواد اللى ظلمك ربنا عاقبه وان شاء الله تتصالحى انتى وسمكة وحوار النفاق فكك منه لأنك هتلاقى كتير منه قدام

وان شاء الله كله يبقى تمام

ahmed_k يقول...

كل ده جو قلبك وساكته
يا ساره دعي الملك للمالك
فاللي يعيش ياما يشوف
وأحيانا بتحصل مواقف ممكن تكوني فهماها غلط فأسلم الحلول هي المواجهه المباشره والصريحه لكي يدافع باقي الأطراف عن مواقفهم فلربما حدثت أمور لا تعلميها في وسط الأحداث هي ما دفعتهم للتغيير
المقصود دايما هو جعل المتهم بريئ حتى تثبت إدانته

وتقبلي خالص تحياتي

وحي القلم يقول...

السلام عليكم

ايه يا طانت
اغيب شوية ارجع الاقي الدنيا بايظة كدا

عموما

النفاق بيحصل كتير
انسان بيحبك وعارف انك بتحبه
واول ما تقوله على سر يقوله للناس
ويعمل مشاكل ليك مع اهلك
ايه رأيك ف الشخص ده
تقبلي مروري

غروب يقول...

عاشقه الاحزان :

تمن تعليقات ؟؟؟؟؟؟؟؟؟؟؟؟؟؟؟؟؟؟؟


!!!!!!!!!!!!!!!!!!!!!!!


مش عارفه ارد على ايه ولا ايه ؟

عموما انتى كمان وحشانى واعذرونى انا مشغوله اوى لحد شهر تمانيه وبعديه مش عارفه ظروف الشغل هتكون ايه بصراحه ؟

ادعولى بقه

ثانيا : موضوعك اللى انا عارفاه انا فعلا استغربت ازاى يعنى بعد اللى حصل يحصل العكس عموما مااااااا عليه

نورتى

غروب يقول...

وردتى

والله بجد بدون نفاق انتى من الناس الجديده في مدونتى يعنى بتتواجدى من فتره قيبه بس انا ببقي مبسوطه بوجودك وكلامك

فعلا والله الواحد ياما بيشوف

على راى ايناس صاحبتى

اللى يعيش يامل يشوف واللى يموت يشوف اكتر

والله يا وردتى انا من يوممممممممى مش بحب النفاق

يعنى مثلا مثثثثثثثثلا على سبيل المثال كنت حكيت قريب عن مدى سوء علاقتى بانتيمتى بسبب ناس تانيه وصاحبت ناس تانيه وصلوا معايا برضه لدرجه عاليه جدا من الصداقه لكن عمرى مقولت لواحده فيهم انها اغلى من انتيمتى او انى ممكن اضحي بيها علشان حد

وهما تقبلوا الموقف رغم ان دول اولى الناس بانى انافقهم

نيجي بقه للتدوين

بجد الاقي ناس معرفهاش اساسا وداخله تجامل مجالمه مبالغ فيها وانا بزهق

ونتاس علاقتى بيها محدوده وتفهم النماس من خلال الردود ان علاقتنا اييييييييييه عايشين سوا يعنى وده برضه بيضايقنى

وناس تلقح على ناس ويبقي الباقي عارفين

فعلا عجب؟؟؟؟؟؟؟؟؟؟؟؟؟؟؟؟

المهم

نورتينى يا قمر وربنا ميحرمنيش منك

غروب يقول...

الشاعر الحزين

اولا الله يسلمك

اشكرك

ثانيا بالنسبه لاننا بننافق نفسنا ومش عارفين احنا عاوزين ايه

لا طبعا يا علاء فينا اللى عارف اهدافه وبيسعس وراها فعلا اما بقه اللى بينافق نفسه بيقي عارف وهو اللى بيتوه نفسه في دوامه ممكن مش يطلع منها

هو عاوز يفضل كده ويوهم نفسه رغم ان ف ايده الحل

والدنيا هتستمر

المهم:

انا وسمكه اتصالحنا امبارح وانا اللى بدات بالصلح بناء على امر من شخص عزيز جدا

والحمد لله كله تمام ونازلين النهارده نكمل حاجات الفستان

عقبالك

غروب يقول...

ريمان

يا بنتى وايه اللى جابرك بس على كده؟؟؟؟؟؟؟؟

مكنتيش تقري ولا تجيبي لنفسك الاكتئاب ده

غروب يقول...

زهره الحب

ربنا يكفينا شر النفاق والمنافقين ويبعدك عنهم

وانا اتصالحت مع سمكه يا ستى

واكيد مدونتك احلى وان شاء الله اجى حااالا

نورتى

غروب يقول...

انا ودماغي

جيتى عند نقطه حلوه اووووووووى بس انتى بتعملى عكس اللى انا باعمله للاسف

انتى بتبداى بسوء الظن انا ببدا بحسن الظن وكتيييييييير بكون غلط للاسف

بس ان بعض الظن اثم؟؟؟؟؟؟؟

طيب وبعدين ؟؟؟؟

اما بقه كوننا مدونين فئه راقيه والخ الخ

لا الحقيقه انا من يوم دخولى وانا اتصدمت في النافقين يمكن لان اول احتكاكى بالتدوين كان مع الناس دول

عموما نورتينى ورايك جميل وربنا يقدرك وتستمرى في الشكل ده من معالمع الناس ويكفيكي شرر النفاق والمنافقين

وصالحت يا ستى سمكه

اشكرك

غروب يقول...

حاجات عيال

وحشتينى اووووووووووووووووووووووووووى يا جهاد

تعالى بقه يا بنتى مش كنتى قايله هتنزلى الثلاثء يا كدابه انتى؟؟؟؟؟؟؟؟؟؟؟؟

كمان وحشتنى مدونتك وعيالك

امتى هنتلم تانى بقه ؟؟

ادعيلي

وربنا معاكى يا حبيبتى ويوفقك

غروب يقول...

ما تشرين

هههههههههههههه ربنا يستر انا اساسا بدور على شغل بالمواصفات اللى ذكرتها مش عندك بقه ؟؟؟؟؟؟؟؟؟؟؟؟؟؟؟

نورتى يا حبيبتى

غروب يقول...

ايمي بيبي

ههههههههه

بتحصلك يعنى الحمد لله مش لوحدى

علشان محدش يقول ان غروب مجنونه اهو الجيل كله

هههههههههه

ربنا يكفيكي شر النفاق يا قمر وجميل انك صريحه زى حالاتى برضه وده باين اللى جايبنا ورا

وانا فعلا عاوزه شغل ديلفرى عندك ؟
ههههههههههههههه

وسماع راى الاخر فعلا مبقاش موجود
كله عاوز يتكلم حتى لو بيتكلم غلط المهم انه يتكلم مش يسمع هو فقاكر انه كده بيثبت نفسه مع ان ساعات الصمت افضل تستفي من ده وده والخ

حاسه بقه انك تعرفينى من زمان يمكن نكون نعرف بعض ولا نطلهع اخوات من ام واب مختلفين

يااااااااااه لتحكم القدر

الدمعه هتفر من عينى

هههههههههه

بجد انا كمان بحبك جدا يا ايمي

وحاسه انك زى اختى الصغيره كده

نورتى يا قمر

غروب يقول...

الازهرى

جميل انك عارف انه بيبقي مفضوح جدااااااااااااااااااااااا

ياريت الكل يعرف

انا كمان بحب اسكت واسمع واهو انا المستفيده

لما الاقي راين مختلفين وكل واحد بيثبت رايه ببراهين مختلفه يبقي انا استفدت من الاتنين وف الاخر حتى لو مش عندى خبره ولا راى ف الموضوع اقدر اكون راى وافهم الموضوع

لكن الشئ لامزعج انهم مش بيستنوا لما كل واحد يخلص كلامه خالص يمكن عمو بس اللى كان بيعمل كده الباقي كله على كله

هههههههه

يلا ما علينا

اما بقه حكايه قرائتك في الانجيل دي

انا بصراحه ارفض

لاننا مش علماء وجايز جدا يحصل خلل او زعزعه

خصوصا ان الانجيل الموجود محرف

كمان احيانا بيكون المسلم مجرد ديانته كده في البطاقه

يعنى مسلم بالاسم

بس مسلم

بمعنى انه ممكن جدا يكون في فروض عليه مش بيعملها وممكن يكون مستتقلها احيانا بس عارفه انها موجوده ولابد منها والنوع ده كتييييير

يعنى تلاقي عنده عادى جدا لو ساب فرض في صلاته

لو فطر يوم اللهم عافينا

لو لو لو لو

مسلم زى ده مهمااااا كانت اخطائه لو قعد مع مسيحي هيفضل فاكر انه مسلم وهو مسيحي

لكن تخيل بقه لو نففففففس المسلم قرا الانجيل المحرف وحطلى تحت المحرف مليون خط

طبعا هيلاقي الموضوع اسهل بكتييييير وممكن يعتنقه لو مش علشان اقتنع هيبقي علشان اسهل ليه

وطبعا المسلم اللى اقوى منه شويه هيسال يا ترى اقتنع ليه ؟؟؟؟؟ ويبدا يقرا ويمكن يقتنع

يبقي قراءه الانجيل في نظرى للعلماء فقط

اتمنى تكون فهمتنى وانا منتظره المناقشه برضه

حتى مع الاختلاف ومرحبه بده جداااااا

نورت

غروب يقول...

ازهرى

بعت ليك الرد

وطبعا مش كان قصدى بكلمه تهريج تقليل الموقف

لكن يعنى حسيت انكوا ممكن تكونوا اصحاب وده هزار وان شاء الله ابقي اراجع الموقف

نورت تانى

واهلا بالنقاش

غروب يقول...

بن الخطاب

ربنا يكون في عوننا كلنا

ويهون علينا

نورت

غروب يقول...

محمد

اهلالالالا يا باشا

نورت

ومعلش انا متاخره عليك

اديك شايف اللى انا فيه

وزى مقولت ربنا يمهل ولا يهمل

واخد اخد اللى يستاهله اللهم لا شماته

والنفاق بقه ؟؟؟؟؟؟؟؟؟؟؟؟؟؟؟

وانا اتصالحت مع سمكه

نورتنى ومش تتاخر تانى منفهوم

هههههههه

غروب يقول...

استاذ احمد

اممممم


فهمت كلامك دلوقتى

عموما زى وقلتلك بالظبط في مساله انه يمكن جدت امور غيرت المواقف

وعلى رايك اللى يعيش يا ما يشوف

نورت

غروب يقول...

مصعب صلاح

اه شوفت بقه متبقاش تتاخر تانى يا بيه

كنت فين يا واااااد؟؟؟؟؟

هههههه

طمنى عليك وعلى الكليه يا عم مين ادك؟؟؟؟

نورت طانت

وراى انك تسيب

غير معرف يقول...

النفاق .. والظلم ..
معاني صعبه اوي ، بس للاسف بقت منتشره اوي :((

بس عارفه
حكاية ان ربنا يمهل ولا يهمل دي صح اوي
اصلنا ماشيين في دايره مقفوله.. لو حد فيها داس علي حد .. هيجي حد تاني ويدوس عليه اوي كمان ..

تحياتي :)

الازهرى يقول...

غرووووووووووووب

المهم إنك تستفيدى منهم

نرجع بقى للإنجيل
أولا أنا عارف إنهم محرفين
يعنى أنا مثلا عندى فى البيت الأناجيل الأربعة وكمان إنجيل برنابا الغير معترف بيه منهم لأنه بيعترف بنبوة النبى عليه الصلاة والسلام
والأناجيل حاليا عددها بالألاف والرقم ليس مبالغة

أما عن قرائة أى منهم فذلك لا بأس به لأن من يريد الرقاءة غالبا سيكون على وعى
كما أننى أشرت إىلى وجوب أن يلجأ لأهل العلم فى ما يلتبس عليه من الأمور
أما مسلم البطاقة فهو عادة لا يقرأ القرآن أساسا فهل تعتقدى أنه سيصبر على قراءة غيره ؟

تحياتى دوما

 

ما بعد الغروب © 2008. Design By: SkinCorner