الأحد، 15 فبراير 2009

لقاءنا غير متفق عليه

بسم الله الرحمن الرحيم


اولا: وحشتونى كلكوا .... وحاسه بفراغ كبير اوى لانى مكتبتش بقالي فتره فقلت اصدعكم شويه النهارده وعليكم الاستحمال


عايزه اقول في الاول انى سعيده اوى ...........هقولكم السبب

انا كنت كتبت بوست قبل كده عن شعورى بعدم الاستقرار في علاقاتى الحاليه ( صداقااتى ) وده مسبب ليه حزن كبير

وانى مفتقده انتيمتى لفتره مش قليله بسبب الدراسه واختلاف المجال


الحقيقه مش بس الدراسه هو سبب الفرقه دى ...لكن كان السبب الاكبر هو دخول بعض البنات بيننا اللى عملوا مشاكل كبيره ووصلوا كلام غلط

ولانى انا وصاحبتى مش سذج ولا اغبيه مصدقناش ...لكن رغم كده حصل شرخ في علاقتنا ....الشرخ ده مكنش سببه الكلام ...لكن سبب اننا اساسا حاولنا نتناقش فيه

ويمكن كانت مناقشتنا فيها نوع من توجيه الاتهامات ....لكن بصراحه البنات دى قدرت توقع بيننا كويس


واللى حصل باختصار ...ان من يوم دخولى الجامعه من بعد مدارس كلها بنات محصليش حاله الانبهار بالمجمتع المختلط الجديد

ومحبتش كمان المجتمع ده...والسبب مكنش تدين زياده ورؤيتى ان العلاقات دى حرام ولا كان اخلاقي اوى كونى شايفه ان تكوين الشلل ووقوف البنات مع الولاد في الجامعه شكل وحش

لكن تقدروا تقولوا انها طبيعتى ... مبحبش النظام ده


وكنت انا وانتيمتى متفقين على السيستم ده من بدايه دخولنا كليه واحده ( باختلاف الاقسام )

صادفنا في بدايه العالم الجديد ده بنتين ...اتفقنا انهم ااااااااااااااااااخر بنتين ممكن يكون لنا علاقه بيهم ...(كانوا بيقفوا مع اولاد كتييييييييييير وكبار متخرجين )


كانوا مع صاحبتى في القسم بتاعها

وللاسف صاحبتى اتشدت للعالم ده وانبهرت بيه ....وبقوا البنيتن دول اصحابها في الكليه ولانى رفضت مبادئهم وقعوا بيينا وحصل الشرخ ده فى علاقتنا

لكن علاقتنا متقطعتش ...بمعنى ..............

ان في بيتى عارفين انها انتميتى وفي بيتها نفس الكلام ....في فرحها بكون اول الموجودين والعكس وفي الحزن اول الباكيين والعكس

لكن لسه لحظه اننا نقعد نحل الكسر اللى بيننا مجتش ....على راى ام كلثوم .......وعزه نفسي منعانى.....او ممكن برضه ..وعز عليك تسيب العند وتسامح وعز عليه اكون البادى واتصالح


وفضلنا كده ....هى مندمجه في حياتها المليانه بالشلل والاصحاب من الجنسين ...وانا بانزل الجامعه قليل جدا عشان لوحدى

وجت ايام كتير كان لالازم فيها نقعد سوا ونتكلم في حالنا

تيجي بعد مده تحكى كلللللللللللل اللى حصلها وانا كمان


لكن برضه انا وهى لسه مكسورين


لحد اول امبارح............الساعه 12 الظهر

جرس الباب ............فتحت عينى من النوم لقيت صاحبتى ادامى

ازيك....وحشتينى .... اموااااااااه .............امواااااااااااااااه


دخلت .... قعدنا .... اتكلمنا

بس حاولنا بقدر الامكان نبعد عن تصفيه الحسابات


يعنى نضحك شويه.... نفتكر ذكريات شويه.... ننم شويتين .....ونفضفض كمان شويتين

قالتلى ان لسه حبيبها بتاع ثانوى في دمها ... لسه بتحبه ... رغم كللللللللل العلاقات اللى هى مرت بيها وانا كنت رفضاها الا انها لسه بتبكي حبيبها

ولاول مره ممكن اقول ان حبيبها ده هو بطل القصه اللى انا كنت كتباها قبل كده بعنوان ( اليوم مات حبيبها )


قاللتى ...........يا غروب ....انا بحبه .........لا لالالا انا بكرهه

سكت انا .... بكت هى قالتلى دمر حياتى بوجوده ودمرها اكتر بموته


ومن هنا بدا البكاء ياخد دوره ... البكي اللى منعناه طول الوقت

وبما انه بدا ..فكان لازم يسيطر وبدانا تصفيه حساباتنا وبدات دموعنا تنزل


بدات تعرف مين ظالم وبدات اعرف مين ظلمها هى كمان .......عرفنا ان دخول اى حد بين اتنين اصحاب بيدمر العلاقه بكلام اتقال وكلام اتعاد

المهم بعد البكي ...ارتاحنا اوى احنا الاتنين وعرفنا مصيرنا سوا ....عرفت انها لسه بتاعتى وانا بتاعتها


ممكن نسميه احتكار ...لكن احنا راضيين بده

اتفقنا اتفاق غريب اوى ...ان هى عاجبها العالم المختلط ده وعايزه تكمل الشهرين الباقيين فيه وتعيش حياتها

وانا افضل مع اصحابي الحاليين اللى برضه بحبهم جدا ....لحد ميخلصوا الكام شهر دول ونرجع تانى ...نقعد تانى ونتكلم

وترجع الامور لطبيعتها


هو اتفاق غريب شويه ...لكن مفيش ادامنا غيره ...اول مره في علاقتنا سوا نفكر في حل عقلانى مش عاطفي

بس قرار مريح لينا

انا حاسه انى وجعت دماغكوا

يلا سلام بقه


غروب

17 التعليقات:

غير معرف يقول...

.....................
no comment
Enas

ahmed_k يقول...

الصداقه الحقيقيه مفيش أروع منها
وهي شيئ صعب جدا
فليس من السهل أن الشخص يجد خل وفي
لدرجة أنه أدرج كأحد المستحيلات الثلاث
فإن عثر عليه يجب أن لا نضيعه أبدا
ربنا يخليكم لبعض
ولا يفرقش بينكم أبدا

خالص تحياتي

SHAPE YOUR LIFE (ABOALI) يقول...

ازيك يا غروب
مجتمع غريب متعدد الالوان مجتمع الجامعة
لو سئلتى كل واحد فى الجامعة انتى وظيفتك ايه فى الجامعة
غالب الظن ستجدى عجب العجاب فى الاجابات
مع انى الغالب هو اجابه واحدة شغلتى ووظيفتى طالب
انمى معرفتى ومهاراتى

والله والدى وانا فى الجامعة عمرى ما سئلنى انت نجحت ولا لا
لاءنه عارف انى بعمل وظيفتى طالب بيذاكر
وكان دايما يقول
لا تعبر النهر حتى تبلغه

يعنى لما تتخرج تفكر فى الشغل
ولما تشتغل تفكر فى الزواج وهكذا

الصاحب ساحب

اما الى طريق الورد
او طريق الشوك

وواضح جدا انى صحبتك متمردة على الواقع
ونفسها تجرب وتعيش يومين وكله بثوابه
الذى كان يفعل شيىء وهو عنده يقين به
لا يتغير ولا يتزعزع عن مبادئه
وصديقتك صينى يعنى سهلة الكسر ومبادئها مش يابانى

المهم شكلى طولت

تحياتى

نفرتارى يقول...

وحشتينا يا جميلتى ،،

الصداقة شئ رائع وجميل .. ولكن اصعب شئ هو الاختيار من تكون صديقة .. ومن تكون زميلة .. ومن تكون اخت .
وعندما تحدد الصفة تحدد العلاقات .
واتمنى لكى حياة سعادة هانئة .

تحياتى ،،

نفرتارى

yoyo يقول...

صباحك سكر يا قمر

انت وحشتنى اوى اوى والله
ياقلبى مش تقولى كدا يارب دايما منورنا

يارب دايما سعيدة ومبسوطة
عارفة الصداقة دى شىء جميل اوى اوى
و خصوا اصدقاء الدراسة
لعلمك انت حكيت موقف متشابه معايا انا شخصيا انا وانتيمتى كنا فى جامعة واحدة ومختلفين الاقسام انا انجليزى وهى اثار و الحمد لله كنا مستمرين فى صداقتنا ومازال مستمرة حتى الان يعنى عشرة عمر من ايام الثانوى لجد دلوقتى وان شاء الله على طول مع بعض
دا مش يمنع ان فى ناس بتحاول انها تدمر العلاقة الجميلة دى بس المهم انكم تكونوا واثقين فى بعض و الاجمل انكم مش تشيلوا من بعض و تتصارحوا على طول

ربنا يخليكوا لبعض و مش يحرمكم من بعض ابدا ابدا

تحياتى
بوبو

اعشق فى الليل ضوء القمر يقول...

موضوع جامد وقوى وبيحصل كثير وحصل معى شخصيا مع صديق عمرى طالت صداقتنا أكثر من 11 عام لكن حدث ما جرى
سؤالى هل فعلا إحنا أصحاب و لا مجرد شخصين بيرتاحوا مع بعض ومتفاهمين شويتين وعرفين صعب شويه نجد صاحب تانى مثله مع إمكانيه تكرار سبب الفجوه الحادثه يا ريت لو لقيتى إجابه عرفينى علشان الفجوه بيننا لا زالت كبيره لكنها متحجمه بعلاقاتنا المستمره

غروب يقول...

ايناس:

انتى فهمتى البوست غلط

ومش هرد على عدم تعليقك دلوقتى

غروب يقول...

ahmed_k:

الصداقه فعلا جميله وانا مقدر اعيش بدون اصحابي اللى بحبهم

متشكره لدعوتك الجميله

نورتنى

غروب يقول...

ابو على:

الله يسلمك انا بخير الحمد لله

عندك حق والله اعرب المجتمعات هو الجامعه ده بتشوف فيه كل شئ

بس اعتقد الغلط بيكون اكتر

صاحبتى مكنتش متمرده بس هى عاجبها الحياه الجديده المختلطه بس في حدود

هى شايفه ان وقوف الشلل بنات مع اولاد شئ عادى بدام فب نطاق الجامعه وحوالين الناس

وانا العكس

لكن مبادئها مش مكسوره صدقنى

انت نسيت انها انتيمتى ولا ايه؟؟؟؟؟

غروب يقول...

نفرتارى:

انتى وحشتينى اكتر

فعلا تحديد المسميات صعب اووووى

خصوصا لما يكون عندك انتيم

وتواجهىى شخصيات تانيه يبقوا غاليين اوووى عليكي لكن مش لاقيه مسمى

ومينفعش تقولى انتيم لكن المكانه دى مشغوله

ربنا يكرمك

نورتينى

غروب يقول...

يويو:

ازيك يا قمر وحشانى جداا


مساءك شربات مكرر


اهلا اهلا
د احنا طلعنا زميايل بقه

انا كمان قسم انجليزى بس صاحبتى قسك كلاسيك (يونانى لاتينى )

ربنا يخليها ليكي

ويخليكي ليها

واحنا كمان بقه

ههههه

ورينا يعاقب الناس الوحشين اللى عايزين يوقعوا بينا

غروب يقول...

اعشق في اليل ضوء القمر:

اهلا وسهلا منور بجد

انا سعيده جدا ناك عرفت مكان البلوج الجديد

احنا كمان لسه علاقتنا متحجمه

وكانت متحجمه اكتر قبل المقابله دى

لاننا مكسورين ومعاندين في نفس الوقت

او مش عايزين نقلب جراح

يلا الحمد لله على كل حال

انت نورتنى

اعشق فى الليل ضوء القمر يقول...

انا عرفت البلوج الجديد بس شكلك كده نسيتى إنت العناوين إللى كانت موجوده عندك

غروب يقول...

اعشق في الليل ضوء القمر:

لا والله منستش ولا حاجه

بس هو الجهاز كان بايظ عندى ولسه باحاول الم الحاجت واللينكات اللى ضاعت منى

EMMY BABY يقول...

اممممممممممممم بجد كلامك اثر فيا اوى بيصعب عليا اوى اشوف اصدقاء بيسيبوا بعض

وتقدرى تقولى ان دى من ضمن مشاكلى

بس فعلا يا غروب فى اى مشكلة تانى تتعرضلها مع صحبتك متسبيش المشكلة موجودة مع الايام حاولوا تكلموا فيها لحد ما من جواكم يكون صفى خالص

وجددوا دايما حبكم ببعض

وربنا يهدينا جميعا

من الجمل اللى بحبها جدااااااااااا

من السهل ان تضحى من اجل صديق ولكن من الصعب ان تجد الصديق الذى يستحق التضحية

ربنا يارب يوفقكم وميدخلش اى حاجة وحشة مابينكم

تحياتى

ايمى

غروب يقول...

ايمي :

ازيك يا حبيبتى نورتينى

كلامك جميل

وربنا يحللك مشاكلك اللى دى من ضمنها

والجمله بتاعتك جميله اوووووووى واثرت فيه بجد

تسلمى يا قمر

E73 يقول...

غروب
******
أنا مفهمتوش غلط
ومش معنى لا تعليق اني زعلانة
لكن فعلا لا تعليق
انا ميزعلنيش سعادتك ولا راحتك النفسية
وانتي عارفة كويس من البداية انا ايه وجهة نظري في علاقتك مع آية وعارفة كويس ان (حتى لو) رجعت علاقتك بيها زي الاول
و(حتى لو) مبقناش اصحاب هكون سعيدة انك رجعتي لنصك التاني

وحتى لو هنا تفيد اني فهمت قصدك كويس
مش مفهمتش

متحمليش نفسك مسئولية انتي مش مسئولة عنها

انا مزعلتش ولايمكن ازعل اصلا

 

ما بعد الغروب © 2008. Design By: SkinCorner