الثلاثاء، 24 فبراير، 2009

ضحك ولعب وجد وحب

بسم الله الرحمن الرحيم


ازيكوا يا جماعه .. اولا انا بشكر كل اللى قدم ليه اى نصيحه في البوست اللى فات وكل اللى عطانى راى مهم ..

وان شاء الله ربنا يقدم اللى فيه الخير ولو حصل اى جديد بالنسبه ليه اكيد هتكونوا اول اللى يعرفوا باذن الله


ثانيا : انا بقدم اعتذار لكل المتابعين لمدونه حاجات عيال بالنيابه عن صاحبتها جهاد مشالي لانها كانت تعبانه شويه

وده سبب ترك المدونه لفتره ...وهى الحمد لله كويسه دلوقتى وخرجنا كلنا امبارح ...........اه من امبارح ده واللى حصل فيه


عايزين تعرفوا ؟؟؟؟؟؟؟؟؟ ماشي هقولكم ..

اللى حصل كالاتى :

اتفقنا طبعا كالعاده انا وايناس صاحبه مدونه معجزات وجهاد صاحبه حاجات عيال وسلمى صاحبتنا الرابعه

اننا ننزل الجامعه بقه لاننا منزلناش من اول الترم ...


نزلت جهاد وايناس بدرى لان كان عندهم تربيه عملى .. والست جهاد هانم تتصل بيه الساعه سبعه الصبح ال ايه ؟ بتصحينى علشان انزل وعلشان انا كنت قايله لها صحينى بدرى

طبعا رديت اديتلها كلمتين كويسين نمت تانى لحد 11 وبعدين صحيت كلمت سلمى ونزلنا نقابل جهاد وايناس


اتقابلنا احنا الاربعه .... وطبعا كالعاده نازلين كلنا من غير فطار وبما ان جهاد وايناس نازلين من بدرى كانوا جعانين ممكن ياكلونا

اتفقنا نروح سنتر الجامعه ناكل ...


ملحوظه على الهامش بخط صغير : انا اللى عزمت جهاد ... ههههههههههههههه ده بس علشان اكون صادقه ليس الا .. واواعى تفهمى صح يا جهاد


المهم اكلنا وبعدها مش قادره اقولكم الشوز عملت في رجلى ايه ؟؟؟؟؟؟؟؟ كنت خلاص بعيط منها ... لانها بكعب وانا اساسا مليش في الكعب بس هعمل ايه بقه في تحكمات ماما

المهم تعبتنى جداااااااااا فرحت مبدله انا وايناس الشوزات .. وطلعنا من الجامعه ركبنا تاكسي للمحل اللى احنا رايحين ليه


دخلنا اتفرجنا بس ايناس هى كمان رجليها وجعتها .. فقالتلى لالازم نبدل تانى ..

دخلنا محل قماش علشان جهاد فقولنا خلاص هنبدل هنا ..اتفرجنا في الدور الاول شويه وبعدين طلعنا الدور التانى ملقيناش حد فقولنا نبدل الشوز هنا


وبدلنا الفرده الاولى وفجاه طلع الراجل وطبعا ايناس ولا همها منه وراحت قالعه الفرده التانيه وراحت سلمى وجهاد ماشيين وانا وقفت بقه تنحت ادام الراجل والشوز وايناس قاعده ولا على بالها بتقولى يلا


يا بنتى يلا ايه الراجل واقف ايه الذكاء ده ؟؟؟؟؟؟؟؟؟

المهم عطيت للراجل ضهرى وضحكت فراح نازل وبدلنا الشوز


خرجنا من المحل ... قلتلهم خلالالالالالالالالالالالالالاص انا مش قادره انا هركب تاكسي واروح انا رجلى هتتقطع .. طبعا قالول ماشي بس زعلوا

فماشيين كده لقيت انا وايناس في وشنا محل شوزات بس صغير كده وشكله مش اوى يعنى فاقترحت عليه الهانم اجيب اى سابو مثلا يقضي الغرض وخلاص


فوافقت لانى كنت عايزه اكمل مشي معاهم الصراحه

دخلنا لقينا ست مسيحيه .. جابتلى بلورينا كده نص كم ... بس كانت ارضي ومريحه وشكلها لطيف بفيونكه ههههههههههه


المهم ان ايناس حلفتنى اقول سعرها .. كانت بلا فخر يا جماعه ب 15 جنيه


المهم لبستها وحطيت شرابي في الشنطه والشوز في شنطه جهاد علشان كبيره ومشينا تانى


لقينا ادامنا محل فساتين زفاف وخطوبه .. وكنا لسه قبلها بنتكلم في موضوع لطيف كده تبع جهاد .. بس لسه مجررررررررررررررررد كلام


المهم دخلنا المحل وجهاد لبست فستان ...ههههههههههههه شكله وحش اوووووووووووى


وخرجنا الفكره عجبتنا .. قلنا نروح محلات على المشايه بتكون انضف وارقى وطبعا اغلى احم احم


ركبنا تاكسي وروحنا المشايه لقينا نفسنا ادام الصياد وده من اشهر بتوع الايس كريم في المنصوره


قولنا ناكل ايس كريم فالست جهاد قالت ميزانيتها لا تسمح .. بت بخيله باين

المهم قولت خلاص انا عزماكو بقلب جامد

دخلت على اعتبار ان الواحده ب 2 جنيه الوسط .. وهدفع 8 جنيه


عطيت للراجل 20 وقبل ميطلع الشيك لقيت ايناس ورايا بتضحك اوووووووى وطبعا لما اخدت الشيك والباقي عرفت هى بتضحك ليه

اتارى الواحده طلعت با 4 جنيه وايناس كانت واخده بالها وسابتنى برضه ادفع ... ندااااااااااااااااله

قلت يلا مش خساره فيكوا 16 جنيه ايس كريم ... اه يا نااااااااااااااارى


دخلنا اكلنا الايس كريم وانا مقدرتش اكمل بتاعتى اللى كانت فرواله مع شيكولاته .. وقلت هاخدها اعطيها لاى حد برا وطبعا كان الحد ده ايناس

قامت بالواجب ...


شويه ودخلنا محل لبس عادى علشان نتفرج فلقينا فساتين سهره بس شيك جدا بجد

وبما ان فرح اخت ايناس الكبيره لسه عليه شهور قليله قالت تاخد فكره


قاست فستان جميل جدااااااااااا بجد زى ميكون اتعمل علشانها ومقاسه بالظبط

كان ب 900 بعد الخصم .. وطبعا بما اننا مش داخلين نشترىه دلووقتى دخلت واحده تانيه مع خطيبها الامور شافته باين على ايناس راحت جيباه قيساه وشكلها اشترته


ههههههههههههههه .. يا عينى عليكي يا ايناس .. البت اتصدمت


طلعنا نكمل هوايه الفرجه على فساتين الخطوبه ... احم احم مش عوانس لالالالالالالالالالالالالالا دي بس مجررررررررررد هوايه

دخلنا بقه محل كويس على المشايه واسعاره كانت معقوله بجد يعنى الفستان حدود 3 الاف

قاست جهاد كام فستان طلع منهم الكويس ومنهم الوحش ومنهم واحده ههههههههههههه مش هقول كان عامل ازاى بس المهم اننا ضحكنا ضحك عليها


وبعدين خرجنا نتفرج على جاكت اسود ليه لقينا واحد بس كان مش او بس تفصيلته اللى انا بحبها في الوقت ده مامت ايناس اتصلت


انتى فيييييييييييييييييييييييييييييييييييين يا هانم؟؟؟؟؟؟؟؟؟؟؟؟ مع ان الساعه كانت لسه 5 ونص تقريبا

المهم قولنا لالالالالالالازم نروح بقه ...


مشيت انا وجهاد لان طريقنا واحد وايناس وسلمى راحوا قابلوا بابا ايناس وصلهم بعربيته

وبعدين سبت جهاد بعد مضحكنا شويه على بنتين ماشيين مع ولدين عمال الواد يكلمها وهو مركز معايا انا وجهاد

هههههههههههه


المهم اننا روحنا اخيراااااااااااا واخدت شوزى من شنطه جهاد ومشيت


بس خلالاص


كان يوم كله ضحك .. شكلنا مش هنفلح الترم ده

ملحوظه وشكوى في نفس الوقت :

يا مسئولين ... ينفع يعنى نكون موجودين في كليه تربيه جامعه المنصوره واجى اشترى كوبايه فااااااااااااضيه يا ناس تطلع بربع جنيه

وبلاستيك ؟؟؟؟؟؟
امال لو كان عطانى فيها ميه كان دفعنى كام؟؟؟؟؟؟؟؟؟؟؟؟؟؟؟؟؟؟؟؟؟؟؟؟


صدعتكوا مش كده .. معلش بقه بس ايناس حلفتنى انزل البوست بحذافيره


اشوفكم على خير

غروب


60 التعليقات:

نفرتارى يقول...

اوووووووووول تعليق .. لجميلتى .

نفرتارى يقول...

بجد حكاياتك جميل وربنا يسعدك انت واصحابك ويديم عليكم السعادة .
وعلى فكرة انت بوحشينى جدااااااااااً

تحياتى ،،

نفرتارى

E73 يقول...

البوست فكرني بحاجات كتير قوي حصلت في اليوم ده هلكتني من الضحك
بصي انا حاسة ان اليوم بتاعك ناقصه كتير قوي
انا هنزل البوست تاني باسلوبي في كلام في سري على يوم جديد وشوفي الفرق وانهو احلى
بس بجد طول مانا بقرأ بفتكر واسخسخ من الضحك

اعشق فى الليل ضوء القمر يقول...

سؤال بسيط فين النار مع وجد الأيس كريم
على فكره كنت بحقد عليكى أنا بحب الأيس كريم فرواله مع شيكولاته عرفتى ليه مقدرتيش تكمليها
هههههههه
انا لى قرب من المنصوره ساكن قريب من حديق الحيوانات لما يرجع من سفره هبقا أنزل هناك ممكن ساعتها أشوف الحيوانات إللى فى الحديقه

ربنا يديم محبتكن معا
سلامى

غروب يقول...

نفرتارى حبيبتى :

والله يا قمر انا بحبك في الله جدا بدون ما اعرفك شخصيا

بس بجد انتى كمان بتووحشينى جدا

وانتى زى الثكر

وربنا يخليكي ويسعدك انتى كمان يا قمرايه

غروب يقول...

ايناس:

اضحكى اضحكى ده اللى انتى شاطره فيه

ورينى يا ستو هتكتبي ايه ؟؟؟؟؟؟؟؟؟؟

غروب يقول...

اعشق في الليل ضوء القمر:

يا ساتر وانا اقول بطنى وجعتنى ليه

هههههههههههههه

بس ايناس قامت بيها

هههههههههه

وان شاء الله تبقي تشوف الحيوانات فعلا

وسلملى عليها

ههههههههههههههه

تحياتى

نورت

طـــائر الليــــل الحـــــزين يقول...

ايه يا قمر الحكايات الجااااااااامده دى
لاء وكمان موضوع الشوز اللى بكعب فطصنى من الضحك والا الكباية ام ربع جنيه
بجد دمك شربات
وكمان اصحابك شكلهم لذاذ زيك
تحياااااااااتى يا قمر
وان شاء الله بالتوفيق الترم ده

E73 يقول...

http://www.yomgded.com/vb/blogs/1679/blog183.html

ده رابط البوست في مدونة كلام في سري
بس خلي بالك انكط لازم تكوني مسجلة دخول في المنتدى علشان تعرفي تشوفي البوست

غروب يقول...

طائر الليل الحزين:

ازيك يا حبيبه قلبي وحشتينى اووووووووى والمدونه ملهاش طعم في غيابك بجد

انا مبسوطه انى قدرت اضحكك ويارب دايما مبسوطه يا حبيبتى

ربنا يسعدك

غروب يقول...

ايناس :

هههههههههههههههههههههه

البوست بتاعك موتنى من الضحك

ايه ده حرام عليكي

دى فضاااااااااااااااااااااااااايح

ههههههههههههههههه

ريمان يقول...

ههههههههههههه


ههههههههههههههه


هههههههههههههههه


ايه المغامرات دى


بجد والله زى العسل انتى واصحابك

بجد فعلا يستاهل البوست انه يتسمى ضحك ولعب وجد وحب

تحياتى ليكى يا قمر

شوكرا على سؤالك

قريب ان شاء الله هنزل الجديد

وكمان انا معرفتش انتى نزلتى البوست ده امته

انا هحط مدونتك عندى فى الريدر بعد اذنك طبعا عاشن ابقى اعرف اول ما تنزلى مووضع جديد

تحياتى ليكى حبيبتى

اموااااااااااااااااااااه

Lady E يقول...

بجد يوم لذيذ

انا مش من المنصورة بس جيت المنصورة قريب وتهت على ما وصلت للماشية بس فعلا المحلات راقية جدا هناك وغالية في نفس ذات الوقت كنت بدور على مكتبة بوكس اند بينز

كويس اوي كده ضمنت حاجتين
اول حاجة لما اعمل كتابي بعد عمر طويل ان شاء الله هتحضري حفلة التوقيع لاني هعملها في المنصورة
وتاني حاجة هتعزميني انا كمان على ايس كريم نياهاهاهاهاها

غروب يقول...

ليدي اي:

معقول اوعى تكونى كنتى بتدورى على مكتبه بوك اند بينز علشان حفله توقيع كتاب اشرف توفيق

اصل انا كنت هناك وكان نفسي اقابل اى مدونين

يلا حصل خير عموما لما تيجي تانى ابقي اعطينى خبر واعزمك على ايس كريم من ابو اربعه جنيه يلا مش خساره فيكي

نورتينى يا جميله

غروب يقول...

ريمان:
انت اللى زى العسل يا حبيتى

ومتشكره عى ردك

ومتظره جديدك

وانتى يا قمر يشرفنى انى مدونتى تبقي عندك

ومنتظراكى في اى وقت

نورتى يا جميله

شخـا بيــط مـحـجـوب يقول...

هههههههههههههه
الله عليكى

ربنا يخليكو لبعض ومايحرمكوش من بعض

تحياتى ليكى

شخابيط mahgoub

ماما أمولة يقول...

ازيك يا ساسو وحشتيني

فسحة حلوة ربنا يسعدكم يارب

سلميلي على كل صحباتك

سلام حبيبتي

ايوشة يقول...

احلى ايام ايام الجامعة ربنا يسعد ايامكم دايما يارب

fashkool يقول...

العزيزه غروب .. والله فسحه جميله مع شله جميله .. اتارى دهاد مش بتيجى ومش بتعلق عندى .. يبقى انت اللى شاغلاها .. ولا يمكن مشروع .... ربنا يسهل ونبارك قريب لها .. انا حاروح عندها عشان اشوف اخبارها ايه ..
تحياتى

fashkool يقول...

الا الشوز اللى كان بيوجع رجلك رمتيه فين

zainab يقول...

عزيزتى غروب

كيف حالك ؟؟

البوست جميل و دمه خفيف

على فكرة احنا جيران أنا من دمياط

تحياتى

غروب يقول...

شخابيط محجوب:

ازيك منور المدونه

متشكره خالص على الرد

وربنا يسعدك انت كمان مع احبابك

غروب

غروب يقول...

ماما اموله:

وحشتينى اوووووى يا عمرى

حمد الله على سلامه اختك

مدونتك نورت تانى بيكي يا حبيبتى

منتظراكى بقه

غروب يقول...

ايوشه:

انا والله محسيت باليام دى غير لما عرفت اصحابي دول وعرفتهم على كبر في اخر سنه


الحمد لله

نورتى يا جميل

اعشق فى الليل ضوء القمر يقول...

و سؤال كان نفسى أسأله
مين بالظبط كان بيقيس الفساتين
على شان أخد بالى

غروب يقول...

فشكول:

اهلا وسهلا

اقول لحضرتك بقه عمو الفشكول زى جهاد؟؟؟؟؟؟؟؟؟؟؟؟؟؟؟


عموما انا سعيده جدا بوجود حضرتك في المدونه

وان شاء الله قريبا تشوف شئ جديد لجهاد

نورتنى

غروب يقول...

زينب:

اهلا يا قمر نورتى واحلى جيران انتى

اتمنى اشوفك تانى

واهى المسافه مش بعيده بقه

ههههههههه

تحياتى

غروب

غروب يقول...

فشكول:

اهلا وسهلا

اقول لحضرتك بقه عمو الفشكول زى جهاد؟؟؟؟؟؟؟؟؟؟؟؟؟؟؟


عموما انا سعيده جدا بوجود حضرتك في المدونه

وان شاء الله قريبا تشوف شئ جديد لجهاد

نورتنى

غروب يقول...

اعشق في الليل ضوء القمر:

اهلا بيك

اللى كانت بتلبس فساتين الخطوبه هى جهاد

اما احنا كنا بنشوف لبس عادى

بس ايه مغزى السؤال الخبيث ده؟؟؟؟؟؟؟

هههههههههههههههههه

ABOALI يقول...

هههههههههههههههههه
ايه ده يا غروب
سى ان ان
ولا ايه
ادق التفاصيل
بس صحيح هو مقاس الشوز كام؟
لسه معرفناش
وكمان انتى طولك كام
علشان ماما بايان عليها خايفه عليكى من الزمن
هههههههههههههههه


جمعكم الله فى الافراح
امين

غروب يقول...

ابو على:

هههههههههه

مقاسي ؟؟؟؟

لالا مش ممكن اقول

اما بقه الطول فانا بلا خجل مش طويله

بس مش قزمه

ولا قزعه على راى اقرب الناس

ربنا يكرمك ومتغبش عليه تانى بقه ومنتظره جديدك
نورت يا سبب تفاؤلي في الحياه

اعشق فى الليل ضوء القمر يقول...

بدل هو خبيس بتسألى ليه
(عين مفتوحه و الثانيه ‘ين ثعلب )

غروب يقول...

اعشق في الليل ضوء القمر:

يعنى بلاش اسال؟؟؟؟؟؟؟؟؟؟؟؟؟؟؟

mahasen saber يقول...

يعنى تلفيفينى وراكى فى البلوجر وتشحططينى وراكى

وفى الاخر عايزه تتخانقى معايا

اه منك يا غروبتى وقعتك بمبى مشكل

mahasen saber يقول...

بس وحششششششششششششششششينى قوى قوى برضه

ومكنتش اعرف خالص انك وحاجات عيال صحاب والله شئ جميل
الملايكه على ارواحها تقع

ربنا يسعدكوا يا حبايبى ويباركلكوا فى كل من تحبون

الا قوليلى مش عايزه تغير البلوج تانى قولى قولى ما انا ركبى دابت خلاص

غروب يقول...

محاسن صابر:

انا اقدر ااتشاكل معاكى يا حبي

لالالالالالا

بس انتى خدتى بس شويه ردود كتير عند ابو على ينفع بقه ؟

عموما مسمحاكى

هههههههه

وسلامتك من اللف

اخص عليه انا وحشه

غروب يقول...

محاسن حبيتى تانى:

انتى كمان يا حبيتى وحشتينى خالص والله العظيم

وبوسيلي عبد الرحمن خطيبي هههههه

موافقه ولا هو مرتبط؟؟؟؟؟

وتخيلي بقه انى انا وجهاد نطلع اصحاب ؟؟؟؟

الدنيا ياما بتحدف على الواحد ناس غريبه
هههههههههههههههههه

بس قدرنا بقه


ربنا يكرمك ويسعدك مع بودى يا حبيبتى

وان شاء الله لا تغيير بعد اليوم علشان خاطرك انتى بس

نورتينى يا غاليه

اعشق فى الليل ضوء القمر يقول...

أنت يا باشا تسأل و إحنا علينا نقول على طول

غروب يقول...

اعشق في الليل ضوء القمر:

م انا سالت

فين الانسر؟؟؟؟؟؟؟؟؟

اعشق فى الليل ضوء القمر يقول...

يعنى المفترض فى هذه الحاله الكل بيجرب اللبس بس إنت مقلتيش لبستى إيه مع إنى كنت متخيل لبس ثانى بيتقاس

غروب يقول...

انا مفهمتش حاجه ولذلك

لا تعليق

اعشق فى الليل ضوء القمر يقول...

قصدت فستان بامبه أو أزرق يعنى الفساتين إللى بتلبسهم العرائس وقت خطبتهم يعنى ملبستيش واحد أو عينك وقعت على واحد ومتخيلتيش نفسك فى الفستان ده

اعشق فى الليل ضوء القمر يقول...

إنت عارفه أنا بفكر أكتب بوست على المدونات وما يحدث فيها من تقارب و تبادل للمعلومات و الأفكار و التقرب
فكرت أعمل إستفتاء فى المدونه عندى على عمل إشتراك فى إحدى المسنجرات الموجوده ولتكن ياهو أو سكاى بى لسريه المعلومات نتبادل فيها كالمقهى أو المجالس العامه لكن على النت
نفتح فيها مواضيع و حوارات مختلفه بعيد عن التدوين كلنا نشترك فيها أو البعض شات لكن للمدونين مثل ما نفعل أنا و أنت الأن إيه رايك
لكن بعد البوست إللى هعرضه بعد عشر دقائق

ahmed_k يقول...

أولا إزيك يا غروب
وألف سلامه على جهاد
وبالفعل كان يوم مرح ولذيذ
كفايه فيه آيس كريم علشان يبقى لذيذ
رغم ان الآيس كريم صيفي بس ما علينا
والشوز ابو كعب عالي غلط على الفقرات يا غروب فخلي بالك

ربنا يديم محبتكم وصداقتكم

تقبلي خالص تحياتي

اصحى يا مصر : اسلام ديو يقول...

ههههههههههههه انا لو مكانك اروح اخنقها واخد الفستان واقول للرجل هبقى ابعتلك الحساب .

لا جميل ان احنا نكتب على حواديت حياتنا دى من الناحية الفنية جامدة اوى تسلم ايدك بجد

غروب يقول...

اعشق في الليل ضوء القمر:

الله هى فكره كويسه

بس مش فاهمه ممكن تتنفذ ازاى؟

غروب يقول...

ahmed k
اهلا وسهلا

منور

وجهاد حاليا كويسه الحمد لله

اما بقه الايس كريم ده معانا ملوش وقت

وببقي احلى في الشتا

حتى ابقي جرب

ههههههههههه

والشوز بكعب مش راى والله ولا عايزاه بس ماما اللى مصممه بما انى بقيت انسه كبيره بقه

ههههههههه

غروب يقول...

اسلام ديو:

ههههههههههههههه

كويس فكره كويسه نحاول نعملها بقه المره الجايه اصل جهاد شكلها ناويه تعملها تانى

وطبعا جميل ان الواحد يسجل ايامه الحلوه
علشان دايما تبقي ادامه

وفي وقت الحزه يعرف انه ياما فرح

والدنيا كده وكده

نورتنى

انت تسال والكمبيوتر يجيب يقول...

دعوه
الأخ العزيز/او الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://dear.to/cairo

سمو الأميرة سارة يقول...

ههههههههههههههههههههههه فطستيني م الضحك يا بنوتة بس ع فكرة انتي ما سيبتيش واحدة من اصحابك غير وسيحتي لها هههههههههههه ربنا ما يحرمكم من بعض ابداً يارب

اعشق فى الليل ضوء القمر يقول...

انا هفسر ليكى أكثر أنا كنت عامل بلوج تانى لكنى لم أستخدمه كنت مسميه عجبنى كنت هعرض فيه حاجات بس عدلت عن الفكره
انا هستخدمه فى كتابه موضوع أى موضوع أقترحه أو يقترحهأى حد وبدل ما تكون المشاركه فيه عن طريق الرد لاكل واحد علشان يشترك فيه نستخدمأى ما سنجر و ده سهل إن الواحد يعمله إميل جديد أو بنفس إميله نحدد وقت ولتكن بعد الساعه التاسعه لمناقشت الموضوع ده
ومش لازم للتدوين ممكن تكون فكره عامه للشات نتعرف فيه على بعض وكما يحدث معى وبعض المدونين و أصبحنا نتقابل على أرض الواقع كل فتره ولكن هنا كل واحد محتفظ بكينونته أيضا كما أنا أعشق فى الليل ضوء القمر سأظل ذلك و لن يسألك أحد على إسمك مثلا
طالما لا ترغبين فى ذلك
أنا مثلا عامل إميل لى خاص بالنت و المدونه بعيد عن الأميل الخاص بعملى وواضع الأميل فى البروفيل بتاعى وظاهره لأى شخص يريد التواصل
يعنى فكره عامه كده
فهمانى ولا مو فهمانى نوضح أكثر

غروب يقول...

انت تسال والكمبيوتر يجيب:

ان شاء الله يكون في زياره ليكم قريبا

غروب يقول...

ساره:

ازيك يا قمر

وحشتينى اوى واخيرا نورتى المدونه تانى

ربنا يسعدك وتضحكى دايما

اما اصحابي فهما قاموا باللزم واكتررررررررررر في المنتدى
هههههههه

نورتى

غروب يقول...

اعشق في اييل ضوء القمر:

فكره كويسه بس عايزه تجميع اراء

اعشق فى الليل ضوء القمر يقول...

تجميع أرارء على إيه

بسمـــة مســـــلّم يقول...

اولا سلام لان دى زيارتى الاولى بجد اسلوبك فى القص حلو اوى المهم انك انبسطتى دفعتى كام مش مهم باى واكيد منتظرة تعليقك

صباح الصباح يقول...

ههههههههههههه

عجبنى موضوع الشوز وفكرنى لما جزمتى فكت من بعضها وانا يادوب خارج من باب الكلية .. وكملت زحف طول الشارع لاقرب جزمجى.. بس بجد انا قعدت اضحك وخت الموضوع بيس

غروب يقول...

اعشق في الليل ضوء القمر:

على ما فهمت انك عاوز تعمل شبه مكان يتناقش فيه المدونين

طيب مهو علشان تعمل كده محتاج انك تاخد رايهم ولا انا شكلى فهمت غلط ؟؟؟؟؟؟

غروب يقول...

بسمه مسلم:

اهلا يا جميله في اول زياره

المدونه نورت

والحمد لله ككان يوم لطيف مع احلى صحبه

وان شاء الله اجى عندك

بس جهزى واحد لمون

غروب يقول...

صباح الصباح:

هههههههههههههههههه

حلوه اوى زحفت دى هههههههههههه

م احجحنا كمان اخدناها ضحك بس المشكله ان الشوز وجعلى رجليتى

نورتنى

بيس ؟؟؟؟؟؟؟؟؟؟؟؟؟؟؟

 

ما بعد الغروب © 2008. Design By: SkinCorner