مرت سنة
قبل 6 أعوام
السبت، 28 فبراير 2009
بسم الله الرحمن الرحيم
اتحدث اليوم عن جميله وابنه عمها عبير
بنات عم ... عاشوا في بيت عيله لاكتر من 16 سنه ...يفصلهم بضع سلالم تتعد على اصابع اليد الواحده
عاشوا العمر سويا .. حقا لم تكن حياتهم معا ورديه ولم تخلو من النزاعات وذلك هو المعتاد ... الحياه متقلبه لا شك
كان بيتهم بيت كبير وجميل ولم يخلو ابدا من الاحبه ففي الدور الاول تسكن الجده والثانى عبير واهلها والثالث جميله واهلها
عائله جميله ..( الوالد .. الوالده .. الاخت الاصغر)
عائله عبير ..( الوالد..الوالده .. الاخت الاصغر)
وذلك لتقارب سن زواج الاخين
مرت عليهم السنوات .. بين ضحك .. وخصام
ولكن من المعتاد حينما يري الصغار تشاجر الكبار يدير كل منهم وجهه عن الاخر
مرت 16 عام من الحياه المختلطه بينهم الى ان شاء القدر ان ياتى عمرو اخا لعبير .. ويقرر الوالد اخذ بيت اكبر منفصل لاجل تامين مستقبل ولى العهد الوحيد
وبما ان البيت الذى كان الجميع يسكنه بيت يندرج تحت مسمي ( ورث) فقرر ابو جميله اعطاء اخوه تمن شقته وياخذها
وبالفعل حضر نقوده وقررا الذهاب الى بيت الاخ الاكبر لتوقيع عقد القسمه ... كان للاسف عقد قسمه الاخين مدى الحياه
اقسم اننى ابكي الان على ما حدث
لم يلحظ الاخين انا هناك عقد قسمه اصلي قد وقعه الجميع حينما طلبت اختهم الاصغر حقها .. واخذته بثمن البيت انذاك
تناسوا شرع الله .. وان للاخ ضعف ما اخذته اخته منذ زمن .. وقررا اعطائه نصيبه حسب ثمن البيت الان
ووافق ابو جميله على ذلك قائلا انه لا مانع من مساعده اخيه
وذهب الجميع الى بيت الاخ الاكبر
ابو جميله .. وابو عبير .. واخوهم الاصغر ( ابو محمد)
وفجاه يعود ابو محمد الى زوجات الاخين قائلا بان الاخين تشاجرا معا وتبادلا الشتائم
ولكن اضاف ان ابو عبير بدا بالسب في حين انه الاصغر
وكرد فعل طبيعي اغلقت كل منهما بابها في وجه الاخرى وانعزل الابناء
وفي صباح اليوم التالى .. رحلت عائله عبير الى البيت الجديد
بلا ادنى تعليق او كلام مع اى طرف من عائله ابو جميله
وتمر سنه تلو الاخرى ... مرت خمس سنوات ..دون اى سلام او كلام بين اطراف العائلتين
خمس سنوات لم تعرف جميله بيت عمها
خمس سنوات جميله لم تخاطب ابنه عمها (اختها التى تربت معها 16 عام )
خمس سنوات لم ترى جميله ابن عمها الاصغر ( الطفل حديث الولاده )
خمس سنوات جميله لم تلقي حضن عمها الاقرب الى قلبها
مرت خمس سنوات بلا تعليق
بلا اى محاوله من اى طرف للاصلاح .. خوفا من الشجار والخطأ
الى ان اتى اليوم التى قررت فيه جميله اخذ دورها في اصلاح ما كان
اتصلت جميله بعمتها الكبري
جميله تبكي: عمتى ... هل انت راضيه عما يحدث ؟؟؟؟؟؟ هل ترضي بوضع عائلتنا ؟؟؟
العمه : لا يا جميلتى ولكن ما باليد حيله ماذا افعل؟
جميله : انا اريد الاصلاح ... ماذا يحدث لو انهم تقابلا معا لقراءه الفاتحه وتصفيه النفوس دون عتاب
دون ابداء اراء او اسباب ... دون تذكر من المخطئ ؟؟؟؟؟؟ لما لا ؟؟؟؟؟؟؟
العمه : اتمنى ذلك والله ولكن يا حبيتى انتى الان لستى صغيره وتعرفى اننى متزوجه وامرى ليس بيدي ولا استطيع فعل اى شئ
خصوصا وانتى تعلمى مدى عصبيه والدك وعمك
جميله: ما رايك يا عمتى بان اتصل بعمى الاكبر واقترح عليه اصلاح الاخوين؟
العمه: اتمنى ذلك وانتى يا حبيبتى رقيقه وجميله وانا احبك لانك تخافي على عائلتنا
وانتهت المكالمه
وفجاه وجدت جميله نفسها لا تتصل بعمها الاكبر بل تتصل بعبير
لم تسمع صوتها منذ خمس سنوات
يااااااااااه افتقدتك كثيرا يا عبير ( في نفسها )
جميله: عمرو .. ممكن اكلم عبير
عمرو الصغير: مين معايا؟
جميله: جميله
تسمع جميله صوت والده عبير...... مين يا عمرو؟؟؟؟؟؟
دى جميله يا ماما
طيب اقفل السماعه وتعالى
وقد كان .. يغلق عمرو السماعه في وجه جميله ويذهب
تبكي جميله ولكنها تصر
وتتصل مره اخرى
عبير : مين
جميله: انا جميله
عبير تغلق السماعه مره اخرى
اتصال اخر
عبير : انتى عاوزه ايه؟؟؟
جميله: عاوزه اتكلم معاكى
جميله: عاوزه اتكلم معاكى
عبير : وانا مش عاوزه
جميله: ليه؟؟؟؟؟ احنا ولاد عم
عبير: متقوليش كده انا معرفكيش ولا عاوزه اعرفكم
جميله: يا بنتى اكبري احنا مش ولاد صغيرين لسه هنتخاصم انا متصله بيكي لسبب اكبر
عاوزين يكون لينا دور نصالح اهالينا
عبير: ومين قالك عاوزين نصالحكوا وتغلق السماعه
اتصال اخر
عبير : وبعدين بقه؟؟؟؟؟؟؟
جميله: ليه مش عاوزين تصالحونا احنا عملنا ايه
عبير : انتى وابوكى حراميه
جمليه: ايه !!!!!!!!!! انتى ازاى تقولى كده على عمك
عبير: انا مليش اعمام ..... انتى عاوزه ايه دلوقتى
جميله: عاوزه افهم انتى فاهمه ايه وانا فاهمه ايه ونرتب افكارنا سوا
عبير : وليه كل ده علشان نتصالح
جميله: يا بنتى لا انا ولا انتى ولا اى حد كان قاعد في المشكله بتاعت الكبار ومحدش عارف مين غلطان
كمان فات سنين كفيله بتصليح العلاقه بين الاخوات
عبير: يعنى المطلوب منى انى اقول لبابا والنبى صالح عمو
لالالالالالالا يا حبيبتى لان لو بابا نفسه جه قالنا عايزين نصالح عمكوا احنا هنقوله لا مش عاوزين
احنا مش عاوزين نعرفكوا تانى
وقفلت السماعه
انهارت جميله وقررت تنسي اهلها للابد
قررت ان حتى اهلها القريبين منها واللى مش في بينهم مشاكل مش هتعرفم ولا تزورهم
لانها مش ضامنه الايام فيها ايه؟
اذا كان اللى عاشوا معاها عمرها كله باعوها امال اللى بعيد عنها ؟؟؟؟؟؟
اذا كان اللى عاشوا معاها عمرها كله باعوها امال اللى بعيد عنها ؟؟؟؟؟؟
ازاى هى قدرت تنسي القساوه وتبدا بالصلح متوقعه انها عمرها مهتقول لحد ازيك يقولها وانتى ماك؟؟؟وازاى عبير فضلت شايله القساوه دى ومين رباها على كده
ازاى ام جميله كانت واقفه جمب بنتها وهى بتتذل من بنت عمها وتقولها معلش انتى بتعاملى ربنا وازاى ام عبير تقولها اقفلى السماعه في وشها دول مش اهلنا
شوفتوا احنا بقه وصلنا لفين ؟؟؟؟؟؟؟؟؟؟
القصه حقيقيه وحصلت والى الان لم يعرف الاخوه اى شئ عن بعض
القصه حقيقيه وحصلت والى الان لم يعرف الاخوه اى شئ عن بعض
الحقيقه اللى دفعنى اكتب القصه دى هو موقف شوفته بعينى اثر فيه جدا ووجعنى اوى
كنت راكبه مواصله عامه والكل ساكت وهادى ومحدش بيتكلم غير ست وراجل ورا بصوت واطى
وفجاه : بكاء شديد جدا بحرقه اى حد ممكن يحسها من الست وهى بتقول حتى اخواتى مسالوش عنى في العيد
طبعا محدش قدر يطبطب عليها ولا يواسيها .. اصل هيواسيها في مين؟؟؟؟؟ في اخواتها
مهما عملت الست دى؟؟؟؟؟ هل ده مبرر يخلى اخواتها يقاطعوها
ولو قولنا ان البنت عار وممكن احيانا في اسباب تخلى الاهل يتخلوا عن بنتهم
ليه الرجاله الاخوات بيسيبوا ايدين بعض؟؟؟؟؟؟؟ ليه مش قادرين نحس كلمه اخ؟؟؟؟؟؟
بيصعب عليه اووووووى والله لما بشوف المناظر دى ..
اتنين اخوات رجاله بيضربوا بعض
اتنين بيموتوا بعض على ميراث
ابناء طالعه متعرفش بعضيها
ليه كل ده ؟؟؟؟؟؟؟؟؟؟
تعرفوا انا فعلا بزعل عليهم بقول فعلا اللى ف ايده نعمه مش مقدرها
اناي اما اتمنيت يكون لى اخ ... واعطيه عنيه لو طلبها والله
اخ يحمينى .. اخ يكون ضهرى وسندى في الدنيا
اخ لما اتجوز ويكون عندى اولاد يدخل عليه يسال عنى ويضم اولادى
اخ اترمى في حضنه في اى مصيبه
ياااااااااه .. اد كده الناس دي مش عارفه يعنى ايه اخ؟
مش عارفه اقول ايه ؟؟؟؟؟؟؟؟؟؟؟؟؟
يارب اصلح حال الامه وارفع مقتك وغضبك عنا يا ارحم الراحمين
غروب
الثلاثاء، 24 فبراير 2009
بسم الله الرحمن الرحيم
ازيكوا يا جماعه .. اولا انا بشكر كل اللى قدم ليه اى نصيحه في البوست اللى فات وكل اللى عطانى راى مهم ..
وان شاء الله ربنا يقدم اللى فيه الخير ولو حصل اى جديد بالنسبه ليه اكيد هتكونوا اول اللى يعرفوا باذن الله
ثانيا : انا بقدم اعتذار لكل المتابعين لمدونه حاجات عيال بالنيابه عن صاحبتها جهاد مشالي لانها كانت تعبانه شويه
وده سبب ترك المدونه لفتره ...وهى الحمد لله كويسه دلوقتى وخرجنا كلنا امبارح ...........اه من امبارح ده واللى حصل فيه
عايزين تعرفوا ؟؟؟؟؟؟؟؟؟ ماشي هقولكم ..
اللى حصل كالاتى :
اتفقنا طبعا كالعاده انا وايناس صاحبه مدونه معجزات وجهاد صاحبه حاجات عيال وسلمى صاحبتنا الرابعه
اننا ننزل الجامعه بقه لاننا منزلناش من اول الترم ...
نزلت جهاد وايناس بدرى لان كان عندهم تربيه عملى .. والست جهاد هانم تتصل بيه الساعه سبعه الصبح ال ايه ؟ بتصحينى علشان انزل وعلشان انا كنت قايله لها صحينى بدرى
طبعا رديت اديتلها كلمتين كويسين نمت تانى لحد 11 وبعدين صحيت كلمت سلمى ونزلنا نقابل جهاد وايناس
اتقابلنا احنا الاربعه .... وطبعا كالعاده نازلين كلنا من غير فطار وبما ان جهاد وايناس نازلين من بدرى كانوا جعانين ممكن ياكلونا
اتفقنا نروح سنتر الجامعه ناكل ...
ملحوظه على الهامش بخط صغير : انا اللى عزمت جهاد ... ههههههههههههههه ده بس علشان اكون صادقه ليس الا .. واواعى تفهمى صح يا جهاد
المهم اكلنا وبعدها مش قادره اقولكم الشوز عملت في رجلى ايه ؟؟؟؟؟؟؟؟ كنت خلاص بعيط منها ... لانها بكعب وانا اساسا مليش في الكعب بس هعمل ايه بقه في تحكمات ماما
المهم تعبتنى جداااااااااا فرحت مبدله انا وايناس الشوزات .. وطلعنا من الجامعه ركبنا تاكسي للمحل اللى احنا رايحين ليه
دخلنا اتفرجنا بس ايناس هى كمان رجليها وجعتها .. فقالتلى لالازم نبدل تانى ..
دخلنا محل قماش علشان جهاد فقولنا خلاص هنبدل هنا ..اتفرجنا في الدور الاول شويه وبعدين طلعنا الدور التانى ملقيناش حد فقولنا نبدل الشوز هنا
وبدلنا الفرده الاولى وفجاه طلع الراجل وطبعا ايناس ولا همها منه وراحت قالعه الفرده التانيه وراحت سلمى وجهاد ماشيين وانا وقفت بقه تنحت ادام الراجل والشوز وايناس قاعده ولا على بالها بتقولى يلا
يا بنتى يلا ايه الراجل واقف ايه الذكاء ده ؟؟؟؟؟؟؟؟؟
المهم عطيت للراجل ضهرى وضحكت فراح نازل وبدلنا الشوز
خرجنا من المحل ... قلتلهم خلالالالالالالالالالالالالالاص انا مش قادره انا هركب تاكسي واروح انا رجلى هتتقطع .. طبعا قالول ماشي بس زعلوا
فماشيين كده لقيت انا وايناس في وشنا محل شوزات بس صغير كده وشكله مش اوى يعنى فاقترحت عليه الهانم اجيب اى سابو مثلا يقضي الغرض وخلاص
فوافقت لانى كنت عايزه اكمل مشي معاهم الصراحه
دخلنا لقينا ست مسيحيه .. جابتلى بلورينا كده نص كم ... بس كانت ارضي ومريحه وشكلها لطيف بفيونكه ههههههههههه
المهم ان ايناس حلفتنى اقول سعرها .. كانت بلا فخر يا جماعه ب 15 جنيه
المهم لبستها وحطيت شرابي في الشنطه والشوز في شنطه جهاد علشان كبيره ومشينا تانى
لقينا ادامنا محل فساتين زفاف وخطوبه .. وكنا لسه قبلها بنتكلم في موضوع لطيف كده تبع جهاد .. بس لسه مجررررررررررررررررد كلام
المهم دخلنا المحل وجهاد لبست فستان ...ههههههههههههه شكله وحش اوووووووووووى
وخرجنا الفكره عجبتنا .. قلنا نروح محلات على المشايه بتكون انضف وارقى وطبعا اغلى احم احم
ركبنا تاكسي وروحنا المشايه لقينا نفسنا ادام الصياد وده من اشهر بتوع الايس كريم في المنصوره
قولنا ناكل ايس كريم فالست جهاد قالت ميزانيتها لا تسمح .. بت بخيله باين
المهم قولت خلاص انا عزماكو بقلب جامد
دخلت على اعتبار ان الواحده ب 2 جنيه الوسط .. وهدفع 8 جنيه
عطيت للراجل 20 وقبل ميطلع الشيك لقيت ايناس ورايا بتضحك اوووووووى وطبعا لما اخدت الشيك والباقي عرفت هى بتضحك ليه
اتارى الواحده طلعت با 4 جنيه وايناس كانت واخده بالها وسابتنى برضه ادفع ... ندااااااااااااااااله
قلت يلا مش خساره فيكوا 16 جنيه ايس كريم ... اه يا نااااااااااااااارى
دخلنا اكلنا الايس كريم وانا مقدرتش اكمل بتاعتى اللى كانت فرواله مع شيكولاته .. وقلت هاخدها اعطيها لاى حد برا وطبعا كان الحد ده ايناس
قامت بالواجب ...
شويه ودخلنا محل لبس عادى علشان نتفرج فلقينا فساتين سهره بس شيك جدا بجد
وبما ان فرح اخت ايناس الكبيره لسه عليه شهور قليله قالت تاخد فكره
قاست فستان جميل جدااااااااااا بجد زى ميكون اتعمل علشانها ومقاسه بالظبط
كان ب 900 بعد الخصم .. وطبعا بما اننا مش داخلين نشترىه دلووقتى دخلت واحده تانيه مع خطيبها الامور شافته باين على ايناس راحت جيباه قيساه وشكلها اشترته
ههههههههههههههه .. يا عينى عليكي يا ايناس .. البت اتصدمت
طلعنا نكمل هوايه الفرجه على فساتين الخطوبه ... احم احم مش عوانس لالالالالالالالالالالالالالا دي بس مجررررررررررد هوايه
دخلنا بقه محل كويس على المشايه واسعاره كانت معقوله بجد يعنى الفستان حدود 3 الاف
قاست جهاد كام فستان طلع منهم الكويس ومنهم الوحش ومنهم واحده ههههههههههههه مش هقول كان عامل ازاى بس المهم اننا ضحكنا ضحك عليها
وبعدين خرجنا نتفرج على جاكت اسود ليه لقينا واحد بس كان مش او بس تفصيلته اللى انا بحبها في الوقت ده مامت ايناس اتصلت
انتى فيييييييييييييييييييييييييييييييييييين يا هانم؟؟؟؟؟؟؟؟؟؟؟؟ مع ان الساعه كانت لسه 5 ونص تقريبا
المهم قولنا لالالالالالالازم نروح بقه ...
مشيت انا وجهاد لان طريقنا واحد وايناس وسلمى راحوا قابلوا بابا ايناس وصلهم بعربيته
وبعدين سبت جهاد بعد مضحكنا شويه على بنتين ماشيين مع ولدين عمال الواد يكلمها وهو مركز معايا انا وجهاد
هههههههههههه
المهم اننا روحنا اخيراااااااااااا واخدت شوزى من شنطه جهاد ومشيت
بس خلالاص
كان يوم كله ضحك .. شكلنا مش هنفلح الترم ده
ملحوظه وشكوى في نفس الوقت :
يا مسئولين ... ينفع يعنى نكون موجودين في كليه تربيه جامعه المنصوره واجى اشترى كوبايه فااااااااااااضيه يا ناس تطلع بربع جنيه
وبلاستيك ؟؟؟؟؟؟
امال لو كان عطانى فيها ميه كان دفعنى كام؟؟؟؟؟؟؟؟؟؟؟؟؟؟؟؟؟؟؟؟؟؟؟؟
امال لو كان عطانى فيها ميه كان دفعنى كام؟؟؟؟؟؟؟؟؟؟؟؟؟؟؟؟؟؟؟؟؟؟؟؟
صدعتكوا مش كده .. معلش بقه بس ايناس حلفتنى انزل البوست بحذافيره
اشوفكم على خير
غروب
الخميس، 19 فبراير 2009
بسم الله الرحمن الرحيم
النهارده حاسه احساس غريب اوى ..صحيح مش اول مره احس بالحزن ..لكن اول مره احس بــــــــــ... انا حتى مش لاقيه اى اسم لاحساسى ده
حاسه انى عماله اتخبط في الدنيا .. عماله اتصدم في شخص ورا التانى
حاسه ان الدنيا كلها وحشه اوى .. مفيش حد صادق فعلا والله
اول حد اتصدمت فيه كان الحب ... الحب اللى كسرنى ودمر حياتى العاطفيه
الحب اللى وصلنى لانى افقد الاحساس بالكلام الحلو حقيقي
الحب اللى خلانى افقد الثقه فى اى شخص انه يدخل حياتى باى شكل
يعنى كتير اوى البنات العاقله تخاف من انها تخوض تجربه عاطفيه بعيد عن اهلها عشان متتجرحش
انا بقه خايفه حتى من اى علاقه رسميه .. خايفه من اى واحد عاوز يدخل بيتى
اصل حبي الاولانى مكنش من ورا اهلى بالعكس .. دخل البيت .. اتحدد ميعاد خطوبه .. والخ
مش عايزه احكى كتير فيه .. لكن بعد كل ده برضه خان .. خان البيت كله الحمد لله بدون خطوبه ولا اى شئ يحسب عليه غير جرح بيتداوى مع الايام وبيتنسي
خان حبي.. خان اهلى ..خان نفسه كمان ..مش مهم ازاى كل ده
المهم انى اهو شوفت بعينى ان حتى اللى بيدخل البيت من بابه زى مبيتقال بيخون وبيلعب وبيكدب وبيخترع مليووووووووون حجه للخيانه
والنهايه هى الكسر .. بس مش زى كسر البنت اللى غلطت ................... لانها عرفت من ورا اهلها ويخونها ويجرحها بترجع تقول لما تفوق ان هى اللى غلطانه
هى اللى خانت اهلها من الاول وعرفت شخص بدون معرفتهم .. لكن انا بقه اللى مسمحتش بمعرفه شخص من ورا اهلى اقول ايه
ايوه .. ايوه اسنيت الشخص اللى يدخل بيتى من نفسه ويقول عاوزها .. وبما انى بنت زى اى بنت رفضت كتير من جواز الصالونات
والشخص ده للاسف حقق شرطين متضادين وده سر حبي ليه .. اولا حبيته جوا بيتى وادام اهلى وف نفس الوقت معرفتوش من برا ..لا انا عرفته من بابا
يعنى الشرطين كانوا الحب (مش صالونات) ومعرفه اهلى
اعمل ايه دلوقتى بقه ف اى واحد يقرب منى بهدف عاطفي .. اقوله ادخل البيت؟؟؟؟؟؟؟؟؟؟؟؟؟؟ ولا احبه من ورا اهلى ؟؟؟؟؟؟؟؟؟؟؟؟؟
م الاتنين متساويين .. ولا محبش خالص واعيش بدون مشاعر طول عمرى
المشكله انى اليومين دول محطوطه في وضع لا احسد عليه
شخص بيقولى معجب بيكي وعايز اكلم اهلك ... طب اعمل ايه؟
اقوله لا ؟ واخاف من الجرح؟؟؟؟؟؟؟؟؟؟؟
اقوله لا ؟ واخاف من الجرح؟؟؟؟؟؟؟؟؟؟؟
ولا اقوله اه ؟ واستنى خيانه جوا البيت او فشكله الموضوع لاى سبب وبرضه النتيجه واحده وهى الجرح وكسر القلب
المشكله مش و قوعى في مشكله الاختيار لان ببساطه عقلي بيقولى لالالالالالالالالالالالالالالا بكل الطرق ..لكن للاسف مش قادره اخدع نفسي واقول ان اعجابه بيه
و اهتمامه الزايد وكلامه مأثر فيه وعاجبنى ... ايوه عاجبنى ان في شخص بيحبنى .. شخص عاوز يربط مصيري بمصيره
خايفه اوى من القرارين ..
خايفه لما اقول لا يبقي بضيع حب حقيقي
وخايفه لما اقول ايوه يبقي بحط نفسي في بشاير جرح جديد
بس الجرح المره دى هيفرق جامد.. اصل جرح الحب الاول كان غير مقصود خالص لانه كان حب انا مش منتظراه
حب جه كده لوحده.. دق الباب فجاه.. ودق القلب فجاه بدون سابق انذار او انتظار
لكن الحب التانى ده .. هيجي بعد جرح وهيجي بعد انتظار لانى اعيش قصه تعوضنى عن قصه فاشله
على فكره انا مش باكتب القصه عشان اطلب نصيحه .. لان ممكن جدا اسمع كلام والظروف تجبرنى اعمل ضده
انا بس باكتب لانى هنفجر .. ومش عارفه اتصرف
لما بيكلمنى بحنان بحس انى خلاص هقوله موافقه اهو .. وفجاه والله العظيم الاقي عقلي يقولى لا يا بنتى فوقى انتى نسيتى اللى حصلك والاقينى فجاه بعد نوبه من الرقه والكلام بصوت واطى .. صوتى يعلى والرقه تروح واخرف في الكلام واقوله من فضلك انا مشغوله ... او اى حجه بحيث انه يبعد عنى خالص
دى كانت اول خبطه اتخبطها بجد في حياتى ودى نتايجها اللى مش عارفه اتصرف فيها ..
بعدين بقه ابقي اقول الخبطه التانيه
اشوفكم على خير
غروب
الأحد، 15 فبراير 2009
بسم الله الرحمن الرحيم
اولا: وحشتونى كلكوا .... وحاسه بفراغ كبير اوى لانى مكتبتش بقالي فتره فقلت اصدعكم شويه النهارده وعليكم الاستحمال
عايزه اقول في الاول انى سعيده اوى ...........هقولكم السبب
انا كنت كتبت بوست قبل كده عن شعورى بعدم الاستقرار في علاقاتى الحاليه ( صداقااتى ) وده مسبب ليه حزن كبير
وانى مفتقده انتيمتى لفتره مش قليله بسبب الدراسه واختلاف المجال
الحقيقه مش بس الدراسه هو سبب الفرقه دى ...لكن كان السبب الاكبر هو دخول بعض البنات بيننا اللى عملوا مشاكل كبيره ووصلوا كلام غلط
ولانى انا وصاحبتى مش سذج ولا اغبيه مصدقناش ...لكن رغم كده حصل شرخ في علاقتنا ....الشرخ ده مكنش سببه الكلام ...لكن سبب اننا اساسا حاولنا نتناقش فيه
ويمكن كانت مناقشتنا فيها نوع من توجيه الاتهامات ....لكن بصراحه البنات دى قدرت توقع بيننا كويس
واللى حصل باختصار ...ان من يوم دخولى الجامعه من بعد مدارس كلها بنات محصليش حاله الانبهار بالمجمتع المختلط الجديد
ومحبتش كمان المجتمع ده...والسبب مكنش تدين زياده ورؤيتى ان العلاقات دى حرام ولا كان اخلاقي اوى كونى شايفه ان تكوين الشلل ووقوف البنات مع الولاد في الجامعه شكل وحش
لكن تقدروا تقولوا انها طبيعتى ... مبحبش النظام ده
وكنت انا وانتيمتى متفقين على السيستم ده من بدايه دخولنا كليه واحده ( باختلاف الاقسام )
صادفنا في بدايه العالم الجديد ده بنتين ...اتفقنا انهم ااااااااااااااااااخر بنتين ممكن يكون لنا علاقه بيهم ...(كانوا بيقفوا مع اولاد كتييييييييييير وكبار متخرجين )
كانوا مع صاحبتى في القسم بتاعها
وللاسف صاحبتى اتشدت للعالم ده وانبهرت بيه ....وبقوا البنيتن دول اصحابها في الكليه ولانى رفضت مبادئهم وقعوا بيينا وحصل الشرخ ده فى علاقتنا
لكن علاقتنا متقطعتش ...بمعنى ..............
ان في بيتى عارفين انها انتميتى وفي بيتها نفس الكلام ....في فرحها بكون اول الموجودين والعكس وفي الحزن اول الباكيين والعكس
لكن لسه لحظه اننا نقعد نحل الكسر اللى بيننا مجتش ....على راى ام كلثوم .......وعزه نفسي منعانى.....او ممكن برضه ..وعز عليك تسيب العند وتسامح وعز عليه اكون البادى واتصالح
وفضلنا كده ....هى مندمجه في حياتها المليانه بالشلل والاصحاب من الجنسين ...وانا بانزل الجامعه قليل جدا عشان لوحدى
وجت ايام كتير كان لالازم فيها نقعد سوا ونتكلم في حالنا
تيجي بعد مده تحكى كلللللللللللل اللى حصلها وانا كمان
لكن برضه انا وهى لسه مكسورين
لحد اول امبارح............الساعه 12 الظهر
جرس الباب ............فتحت عينى من النوم لقيت صاحبتى ادامى
ازيك....وحشتينى .... اموااااااااه .............امواااااااااااااااه
دخلت .... قعدنا .... اتكلمنا
بس حاولنا بقدر الامكان نبعد عن تصفيه الحسابات
يعنى نضحك شويه.... نفتكر ذكريات شويه.... ننم شويتين .....ونفضفض كمان شويتين
قالتلى ان لسه حبيبها بتاع ثانوى في دمها ... لسه بتحبه ... رغم كللللللللل العلاقات اللى هى مرت بيها وانا كنت رفضاها الا انها لسه بتبكي حبيبها
ولاول مره ممكن اقول ان حبيبها ده هو بطل القصه اللى انا كنت كتباها قبل كده بعنوان ( اليوم مات حبيبها )
قاللتى ...........يا غروب ....انا بحبه .........لا لالالا انا بكرهه
سكت انا .... بكت هى قالتلى دمر حياتى بوجوده ودمرها اكتر بموته
ومن هنا بدا البكاء ياخد دوره ... البكي اللى منعناه طول الوقت
وبما انه بدا ..فكان لازم يسيطر وبدانا تصفيه حساباتنا وبدات دموعنا تنزل
بدات تعرف مين ظالم وبدات اعرف مين ظلمها هى كمان .......عرفنا ان دخول اى حد بين اتنين اصحاب بيدمر العلاقه بكلام اتقال وكلام اتعاد
المهم بعد البكي ...ارتاحنا اوى احنا الاتنين وعرفنا مصيرنا سوا ....عرفت انها لسه بتاعتى وانا بتاعتها
ممكن نسميه احتكار ...لكن احنا راضيين بده
اتفقنا اتفاق غريب اوى ...ان هى عاجبها العالم المختلط ده وعايزه تكمل الشهرين الباقيين فيه وتعيش حياتها
وانا افضل مع اصحابي الحاليين اللى برضه بحبهم جدا ....لحد ميخلصوا الكام شهر دول ونرجع تانى ...نقعد تانى ونتكلم
وترجع الامور لطبيعتها
هو اتفاق غريب شويه ...لكن مفيش ادامنا غيره ...اول مره في علاقتنا سوا نفكر في حل عقلانى مش عاطفي
بس قرار مريح لينا
انا حاسه انى وجعت دماغكوا
يلا سلام بقه
غروب
الاثنين، 9 فبراير 2009
بسم الله الرحمن الرحيم
الحقيقه انا باكتب دلوقتى وحاسه انى سعيده اوى لكونى باكتب في المكان ده ...مدونتى الاولى كلمات
ايوه هى دى مدونه كلمات اللى كنت قفلتها وبعدت عنها وبدات ادون في مدونه ما بعد الغروب ..
الحقيقه مدونه غروب كنت باحاول اعمل فيها نيو لوك فباظت خالص وللاسف فقدت كل البوستس بتاعتها
بس الغريب انى مزعلتش على فقدان البوستس دى ...وعلى النقيد كنت حريصه جدا دايما على اى حرف كتبته في كلمات
انا عارفه انى متقلبه وموديه جدا ...بس فعلا انا حاسه بسعاده كبيره ...سعاده طفل ساب بيته لفتره وراح بيت جديد
بس مكنش فرحان بالبيت الجديد ده غير في اوله واديما كان يرجع يبص لبيته القديم ويطمن عليه .....انا كنت باعمل كده
كنت باكتب في غروب ودايما اجى هنا اشوف حاجاتى واكتب حاجات بس محدش يشوفها غير واحده صاحبتى بس وهى الحت عليه
كتير اوى انى ارجع كلمات بس انا كنت بارفض ....كنت بارفض وقتها لانى متعلمتش مبدا انى احافظ على ممتلكاتى لحد اخر نفس
سيبتها بسهوله لبعض المشاكل البسيطه ...اتخليت عن كلماتى عشان اسباب عاديه ممكن يمر بيها اى حد ....بس من النهارده انا مع كلماتى
ومش معنى كلامى انى مش بحب الغروب ...بالعكس انا حبيت مدونه ما بعد الغروب جدا ...وحبيت جدا اسمي ( غروب ) وده السبب اللى خلانى
اسيب اسم المدونه ما بعد الغروب بس البوستس اللى موجوده حاليا هى من كلمات ....انا مسحت منها بعض البوستس اللى ملهاش لزمه وفي حجات هنا برضه
كنت نفسي امسحها لكن الحقيقه مقدرتش ....
يعنى باختصار انا اخدت من الغروب ( البيت الجديد ) زهوته وشياكته والديكور بتاعه واخدت من كلمات ( البيت القديم) جماله وذكرياته وعملت ميكس
بين الاتنين ...الميكس ده هيبقي اغلى شئ عندى لانه يجمع بين احلى حاجتين بحبهم
بجد انا سعيده جداااااااا انى باكتب هنا من تانى
وان شاء الله تفضل كلمات وغروب طول م انا عايشه
واتمنى الشكل الجديد يعجبكوا
غروب ....( saso)
الاشتراك في:
الرسائل (Atom)
