الثلاثاء، 14 أبريل 2009

البقاء لله .. ام غاليه




بسم الله الرحمن الرحيم

الحقيقه البوست النهارده يمكن يطول معايا شويه ولانى لما بدخل مدونه فيها كلام كتير ورغي على الفاضي بزهق وبسيبها

فانا مش عاوزه حد يكون زهقان منى .. اللى مش عاوز يقرا بلاش وياريت محدش يرد عليه علشان مجرد المجامله

لان بجد البوست النهارده اكتر بوست مش مستحمل مجاملات ...واكتر بوست بكتبه بقلبي مش بقلمى .. كلام بكتبه مش غصب عنى صحيح لكن بكتبه وانا تعبانه انى هصدم ناس في وشها بصراحتى اللى ساعات بتقتل ناس عزيزه عليه

حاجات كتير اوى عاوزه اقولها دلوقتى .. ودلوقتى بس لانى يمكن مش هقولها تانى

مش عاوزه حد يزعل من صراحتى ...

الاول هبدا بشويه رسايل لاشخاص بعينها

اولهم اخويه : وحشتنى جداااااااااااااااااااااااااا والبقيه في حياتك ومنتظراك يا اجمل اخ .. امر بالتعديل

تانى حد : واحده .... عارفه نفسك صح ؟؟؟؟؟؟؟؟؟؟
عارفه انتى عملتى ايه ؟؟؟؟؟؟؟؟؟؟؟؟؟؟ مبسوطه دلوقتى ؟؟؟؟؟؟؟؟؟؟؟؟؟؟
اخدتى اللى انتى عاوزاه ؟؟؟؟؟؟؟؟؟؟؟؟ امتلكتى ؟؟؟؟؟؟
وصلتى لهدفك ؟؟؟؟؟؟ حققتى حلم عمرك ؟؟؟؟؟؟؟؟
كسرتى اللى عاوزه تكسريهم ؟؟؟؟؟؟؟؟؟؟
مرتاحه ؟ ضميرك مرتاح ؟؟؟

بتقولى تعبانه ؟؟؟؟؟؟؟؟ واللى عملتيه مش يستاهل عقاب من ربنا ؟؟؟؟؟؟

بجد لاول مررررررررره .. اقول فيكي انتى ... حسبي الله ونعم والوكيل

ربنا هو المنتقم

الثالث جالى امر بالحذف

رابعهم : بنت .. معرفهاش كويس

اقتحمتى حياتى اوى ودخلتينى في حياتك وانا مش ليه علاقه بيكي ؟
عاوزه تثبتيلي ايه ؟؟؟؟؟؟

انتى صادقه ؟؟؟؟؟؟ هو كداب ؟؟؟؟؟؟؟؟؟؟؟

مش مشكلتى

انا معرفكوش انتوا الاتنين

ومش عااااااااااااااوزه
فرحانه بشكلك وانتى بتثبتى للكل انك صاحبتى
لالالالا
انتى مش صاحبتى وانا تعبانه من وجودك في حياتى
انا مش عاوزه اكلمك تانى بجد..

يمكن مش قادره اقولك الكلمه دى صريحه
لكن ادينى قولتها
من فضلك اخرجى من حياتى انتى واللى يخصك


خامسهم :

انتى ..... ايوه انتى ......انا مش فهماكى ومش عارفه انتى عاوزه توصلي لايه ؟؟؟؟

بس اللى عرفاه انى هبعد .. وانى مش هعاتب لان لسه بيننا عتاب اخير ونخسر بعض وانا مش عاوزه كده

انتى شايفه ان عدم العتاب لاننا بالفعل خسرنا بعض ... اوك

براحتك بقه
انا تعبت


سادسهم :
مثلث
جرى ضلع تايه علشان يلتصق فيه ويبقي مربع لكن من اول يوم وهو مربع غير متساوى الاضلاع

كل ضلعين متقابلين متوازيين بس مش متساويين
ضلع من المربع مهزوز اوى لكن موجود

موجود علشان يحفظ شكل المربع ... علشان يفضل مربع
وضلع عاوز يتكسر ... بس كسره سمح للهوا يدخل جوا المربع ويهز باقي الاضلاع

والضلعين الباقيين متوازيين ... عمرهم مهيتقابلوا .... ماشيين سوا في طريق واحد ورايحيين لسكه واحده

ومكنش واضح ابدا بعدهم في وجودهم داخل المربع ...... لكن المربع بيتهد

الضلعين اكتشوفوا ان في ضلعين كانوا واقفين بينهم باعدينهم عن بعض بس في نفس الطريق

الضلعين مش عارفيين يكونوا شكل ثابت لوحدهم

المربع بيتكسر ..............
بيدخل هوا ملوث ..............

بيخرج هوا نضيف ........... لكن بيخرج

المربع اتكسر ................

دموع بتنزف ... لكن بلا امل


معلش يمكن الكلام اخدنى شويه ونسيت اقول انى كنت سعيده جدا بلقاء اليوم .. وسعيده بالناس اللى شوفتها

بس انا فعلا رايحه اللقاء وانا فعلا فاصله ونفسيا تعبانه مش عاوزه حد يكون استرخمنى

بس حقيقي انا كسبت اليوم ناس لطيفه جدا وناس كنت مش حباها اوى على صفحات التدوين لكن طلعت ناس جميله جدا

بشكر كل حد جه

وانشاء الله نتقابل في لقاء كبير بعد الامتحانات

معلش البوست دمه رخم شويه .. بس دي مدونتى ومش عندى مكان تانى اتكلم فيه

غروب

74 التعليقات:

Lady E يقول...

كل ده علشان انا مجيتش اللقاء صح
نياهاهاهاهاهاها
عشان كده زعلانه انا عارفة :)

كالعاده مش فاهمه اييييي حاجه
بس نصيحة يا اختي كمية الناس اللي بيضايقوكي دول ميستاهلوش يكونو في حياتك عشان بيعملولك طاقة سلبية واحاسيس ومشاعير سلبيه

على فكرة البنت رقم 4 في ف حياتي انسانه شبهها جدا انا مش عارفة انتي تقصدي مين بس نفس ذات الموقف حاصل معايا وبعدين دي ناس مريضة اصلا سيبك

اتمنى لك كل سعادة وتوفيق

مسدس صغير يقول...

سعيد بلقاءك النهارده على الرغم ان انا مش مبسوط من اللقاء
بالنسبة للبوست ربنا يهدى النفوس.
ويصلح ذات البين
سلاماتى

yoyo يقول...

اممممم
حابة اتكلم عن البوست من الاخر الاول يا غروب
شىء جميل انك تقابلى مع ناس بتحبيهم بيقربكم من بعض اكتر واكتر والله
ربنا يجمعكم على الف خير يارب

عارفة رغم ان الصراحة احيانا بتكون مؤلمة للاخرين الا انها بيكون فيها راحة
بتحسى انك شيلتى من على قلبك حمل كبييييير اوى
حبيبتى الحياة كدا لازم نتعلم منها ونتصدم فيها مهما كبرنا هنفضل فيها تلامذة مش تخلى حاجة تكسرك مهما كانت كبيرة الضربة تقوبكى اكتر

ربنا يسعدك ويسعد قلبك يااااااارب

تحياتى
يويو

ريمان يقول...

فى ايه بس يا بنتى

ايه الرسايل الجامده دى

اتخدينا بجد

هههههههههههههههه

اهدى بس كده

المهم يا قمر انى انا سعيده جدا جدا انى شوفتك والله

ومش مسترخمينك ولا حاجه اطمنى

ههههههههههههههه

ربنا يخليكى يا قمر


تحياتى ليكى

Soul.o0o.Whisper يقول...

غروب الجميلة

أولا آسفة جدا على تأخيرى عليكى
حقيقى كنت مشغولة جامد


بصى يا قمر ..
فى ناس بنكون واثقسن فيها جدا
و فجأة بنتصدم فيها
نقوم نفقد ثقتنا فى نفسنا
و نبئا عاوزين نتقوقع
و خلاص الدنيا اتهدت



اللى بيتعب الواحد و يحسسه ان الدنيا خلاص ماعدتش فيها حد كويس
ان المشاكل كلها بتيجى من أقرب الناس
فيقول لما أقرب الناس كدا
يبئا الباقى ايه؟؟؟
و خلاص يكره الدنيا


لكن لا يا جميل
الدنيا كبيرة
و ياما نعيش ياما نشوف

بنزعل اه و نتألم
لكن لازم نفوق بسرعة
و نلملم جراحنا
و نستمر إلى أن يشاء الله



و على فكرة زعلانة اوىىىىىىىى
عشان أنا من المنصورة و لسه عارفة النهاردة ان كان فى لقاء
عاااااااااااااااااااا

بجد زعلانة موت موت موت
خاصة ان كان نفسى اشوف ريمان

عاااااااااااااااااااااااااااا



هأستنى لقاء بعد الامتحانات بفارغ الصبر
بس تبئوا تقولولى
ماشى؟؟!!..


سلام يا جميل

أحمد الصعيدي يقول...

السلام عليكم
أحم أحم
أولا وقبل ما أبدأ كلامي أتمني إنك تكوني بخير طبعا انتي بتتكلمي كلام مبهم بالنسبة للقارئ لكن مش عارف حاسس إن في علاقات عاطفية مشبوهة ومش موزونة وأختيارات خاطئة ..
عموما انتي دايما ضحكتك علي شفايفك ماتخليش أي هم يكسرك وأتمني يارب كل المشاكل اللي حواليكي تنتهي
ابقي طمنينا عليكي
السلام عليكم

غروب يقول...

ليدي

اه يا حبيبتى ياريتنى كنت اشوفك فعلا

ههههههههه
مش فاهمه ؟

طبيعي لانه راسائل لبعض الناس

ربنا يهدى الجميع

نورتى

غروب يقول...

مسدس صغير

اولا انا زعلالالالالالالالالالالالالالالالانه منك جدا جداااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا

نشوف بقه كلامك ده على الايميل

انا ضفتك عندى

سي يو

غروب يقول...

يويو

كلامك جميل يا يويو

بس انا محجروحه لدرجه انى حتى مش شايفه الناس الكويسين

حاسه انى مخنوقه وبس

غروب يقول...

ريمان

انا كمان سعيده جدا بلقائك والله يا ريمان

بس يمكن مش هقدر اصرح بالسبب اللى خلانى اجى مخنوقه اساسا

الحمدد لله

غروب يقول...

سول ويسبر

اهلا وسهلا يا حبيبتى

اعتقد دى اول زياره ؟؟؟؟؟؟؟؟؟؟؟؟؟؟؟؟

عموما نورتى وانا عارفه مدونتك كويس وعجبانى جدا

كلامك صح طبعا

ليه مش قولتى انك من المنصوره د احنا فضلنا ننااااااااادى

عموما تتعوض باذن الله

غروب يقول...

شجر الليمون

انا بخير الحمد لله يا صعيدي

علاقات عاطفيه ومشبوهه كمان ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ايه ده يا صعيدي

ده تخريف لا مؤاخذه

اولا كلمه مشبوهه دى ضحكتنى من كتر مهى وحشه

وعلى فكره

والله ما في اىىىىىىىىىىىىىى رساله من دول موجهه لحبيب

لان اساسا مش في في حياتى اى قصه حب

طبعا كلمتك دى زعلتنى

ما علينا بقه

مهو كله بيغلط

سلام

ahmed_k يقول...

أيه الموضوع؟؟؟؟
رسايل ومربعات وأضلاع
أنا مش فاهم حاجه ,
لكن بوست فيه صراحه لأشخاص معينين

ولأن المدونه هي المكان الشخصي المتنفث لصاحبه فقولي ما تريدين عي صفحتها
وعبري كما تريدين عن ما يجول بخاطرك

مع خالص تحياتي

غروب يقول...

استاذ احمد

م انت عارف المربعات والمثلثات

انت مش عاف انى شاطره في الرياضه

ههههه

نورتنى

أحمد الصعيدي يقول...

أنا أسف
ماعدتش أدخل المدونة تاني
وبكرر أسفي مش قصدي المعني اللي وصلك خالص
أسف للمرة المليون
يارب ربنا يهون عليكي
أنا والله مش قصدي المعني اللي وصلك خالص ولا انك علي علاقة بحد والله ولا ابدا أقصد كدة
عموما يمكن أنا غلطت في توصيل الأسلوب
أنا أسف
السلام عليكم

محمد يقول...

السلام عليكم ورحمة الله وبركاته

أختي الفاضلة

رغم أنها أولي زياراتي التي جاءت من قبيل الصدفة البحتة إلا أنني لست نادما حيث وجدت كلمات صادقة رغم الحزن الذي يكسوها وما أملك من الكلمات شيئل لأقوله إلا أن أقول لك استمعي إلي هذه الأنشودة فلعلها تجيبك هي

http://www.emanway.com/play_anasheed.php?cid=1&id=207

خالص شكري وصادق دعائي

Soul.o0o.Whisper يقول...

فـ مين يا غروب؟؟؟

إنا لله و إنا إليه راجعون

بس مش تقولى مين؟؟؟


اوعى يكون عليكى

الأمير يقول...

يالا حظى ..

السلام عليكم ..

المدونه الكريمه " غروب "

الحقيقه حضرتك قولتيها بنفسك
ان الكل بيغلط " موجوده فى تعليق لحضرتك "
المهم .. لو هتعملى كل الخير للناس دى ومنتظره منهم هما يردوا ليكى الخير ويعاملوكى بالمثل .. فده خطأك انتِ
لانهم وبكل بساطه .. ليسوا ملائكه
لانهم بكل وضوح .... بشر ..
ثم .. الم يعمل احدهم ما يسركِ ابداا
ام انكِ تذكرين الجانب السىء فقط ..
انا لست ضدك .. وايضا لست ضدهم .
ان عملتى لله .. والله اختنا ستسعدى .
قدمى ولا تنتظرى .. لانكِ ربما تحزنى من فعلهم ... ممكن حضرتك تزعلى منى ..
وممكن تحذفى التعليق .. لكن والله لم اقصد الا الخير .. وتنبيهك ان الدنيا لا تساوى حتى " دمعه " فحتما ستأتى ساعة
" الغروب " ونرحل ... فإن فعلتى افعلى لله ... وعندهااا .. حتما
ستبتسم لكِ الحياه ...
انا عارف ان انا طولت .. علشان كده
انا سعيد بزيارتى لمدونتكم اختنا
اسعد الله ايامكم ...

وافر احترامى ..؛؛

aidy يقول...

ولو انى معرفش حد منهم كلهم

بس مش عارفة ليه حاسة انى حسيت كلامك كلوا

بس اهم حاجة لما تاخدى قرار تطلعى صديقة او حد من حياتك بيكون صعب وبيكون ليه اسباب صعبة عشان كده لازم تبعدى عن اى انفعال وانتى بتاخدى قراراتك

لازم تفكرى كويس هل اللى انتى زعلانة منهم يستحقوا ده فعلا ولا زعلك هو اللى مخليكى تشوفيهم كده

لو بعد ما هديتى وطلعتى نفسك من الصورة وحسبتيها لقيتى انتى اللى صح متتنزليش عن وجهة نظرك وطول ما انتى صح لازم تكونى مرتاحة

يعنى لازم تتغلبى على مشاعر الزعل والغضب اللى جواكى

فهمتينى

سلام يا احلى غروب

ماء تشرين يقول...

اتمنى انها تكون مرحله وتعدى ويرجع المربع كل ضلع فيه يحضن التانى لانه لو بقه كل ضلع لوحده هيتوه ومش هيعرف يرجع

غروب يقول...

شجر الليمون

انت كبرت الموضوع ليه يا صعيدي

مش هتدخل تانى عندى

كده ازعل بجد من نفسي

انا مش كان قصدى وحش في الرد

انا بس ضايقتنى اول كلمه بتاعت علاقه عاطفيه مشبوهه دي ؟؟؟؟؟؟

انت شايفها صح ؟؟؟؟؟؟؟؟؟؟؟؟

كمان لما انا اعاتبك في كلمه زعلتنى احسن ولا لما اشيل في نفسي او احذف التعليق زيك زي اى حد مش يهمنى

بص يا صعيدي

انا مش بعاتب غير الغاليين

فهمتنى

وبجد اانا اسفه لانى رديت وانا اساسا منفعله البوست كله انفعال

بس اعذرنى انا نفسيا مش مرتاحه

عموما منتظراك دايما يا راجل انت فاااااهم ؟؟؟؟؟؟

ست الكل غروب ههه

غروب يقول...

هذه حياتى

اسعدتنى زيارتك الاولى وان شاء الله اسمع الانشوده

نورتنى

غروب يقول...

سول ويسبر

انا لله وانا اليه راجعون في ام غاليه

الله يرحمها ويدخلها فسيح جناته

غروب يقول...

الامير

انا مش كنت منتظره من حد معامله الملايكه لانى ببساطه مش بعاملهم المعامله دى

لكن كنت منتظره انهم يعاملونى ز م انا بعاملهم

كمان انا مش ببيع كل الرسايل الموجهه دى

لان ببساطه منهم اخويه
واعتقد لازم اعاتب اخويه

ومنهم مربع غالي عليه وصعبان عليه كسره

ومنهم صديقه بس مش قادرين نتواصل خلالالالالاص بقالنا كتيييييييير

ومنهم واحده فعلا اقتحمت حياتى ومش قادره اواجهها بانى مش عاوزاها

اظن ده من حقي

فقولت اقول للكل هنا وعارفه ان الكل منهم هيشوف وهيعرف نفسه

فهمتنى

انا مش زعلانه من كلامك خالص
ومش هحذف التعليق طبعا لانه ببساطه تعليق مهذب

لكن صدقنى انا مش بنسي الخير

ومش بقسي على حد

انا بس تعبانه

بعاتب وبهرب وبخلص حسابات

لانى مش هقدر اتعامل مع حد انا زعلانه منه او مش عاوزاه في حياتى

انا طبعي كده

لازم اكون صافيه اوى من ناحيه البنى ادم اللى بعامله

بس

نورتنى

غروب يقول...

ايدي

مش عارفه اقولك ايه ؟؟؟؟؟

بس انا لسه لحد دلوقتى مش عاوزه اقول انى واخده قرار بانى اطلع حد من حياتى في دول كلهم الا البنت المتطفله ومعارفها

لكن بجد تعبانه من الباقيين


ربنا يسهل

نورتينى يا قمر

غروب يقول...

ماء تشرين

ان شاء الله يا قمر
ادعيلي

أريــــــــــــــــــــج يقول...

السلام عليكم ورحمة الله وبركاته


كلماتك حزينه قوي اختي الغاليه لكن لا عليك كلنا بنمر بلحظات صعبه الاهم نعرف ازاي نتخطاها ونكون اقوياء ولا نستسلم لها..........


ربنا ييسر امورك ويسعدك

تقبلي ودي واحترامي

جنّي يقول...

السلام عليكم

اليقاء لله وندعو للمتوفاة بالجنة وكل موتانا وموتى المسلمين ..

وياليت رسايلك تصل لمن تقصديهم ..

لا زلت ادعوكي للعفو عمن اساء اليكي

أحمد الصعيدي يقول...

بركة اللي شفناكي بتضحكي
أما من ناحية الفشل في اللغة ده أكيد عرفته من قبل ماتقولي واضح انك مش بتفهمي يوووووه قصدي مش بتفهمي عربي كويس ..معلهش بقققا صعيدي وبحدف طوب
هههههههههههه

انا عايزك تعلقي علي الكلمات

اعشق فى الليل ضوء القمر يقول...

؟؟؟؟??????؟؟؟؟
؟؟؟؟؟؟؟
؟؟؟؟؟؟؟؟؟؟؟؟
؟؟؟؟؟؟
؟؟؟

ذلك ما فهمت من الموضوع
أكيد طبعا علشان انا مش عارف بترسلى رساله لمين و علشان إيه
بس الحاجه المبسوط بيها
إنك قدرتى تقولى إللى إنت عايزاه تقوليه بعيد عن تعاسه او فرح حد غيرك
كلام قلناه من كام يوم فاتو تقريبا فاكره

مـجـنـووون يقول...

ايه يا بنتي انتي دخله شمال كده ليه

بس تصدقي البوست في منتهي الروعه

ولحظة صراحه مع النفس ومع الغير

وكويس انك وقفتي مع نفسك واخذتي القرارت الي ان شاء الله تكون في مصلحتك

علي فكرة الحكاية بتاعت المثلث موتتني من الضحك وحسستني أني زي الأرطش في الزفة هههههههههه والا انتي بتختبري ذكائي هههههههههههه

خدي بالك من نفسك وعلي فكرة رخمي براحتك واحنا هنقول الي احنا عيزينه والا انتي عندك مانع ؟؟؟؟

تقبلي مروري
مجنووون

الشاعر الحزين يقول...

بسم الله

أولا البقاء لله على من رحل من أموات المسلمين وأسكنه الله فسيح جناته

ثانيا

عايز أقولك أوعى تزعلى نفسك بسبب حد مش ليه أى أهميه فى حياتك
أوعى نفسيتك تتأثر بسبب انسان أو انسانه أنتى مجرد عرفتيهم عن طريق الشاشه

انسى وطلعى من دماغك صدقينى مفيش حد يستهل انك تضايقى نفسك علشانه سواء هو أو هى أو هم أو أى حد عرفتيه عن طريق الشاشه

أتمنى تكون رسالتى وصلت

وثالثا وأخيرا أنا سعدت جدا برؤيتك فى اللقاء بالرغم من الظروف السيئه اللى حصلت فيه

خالص تحياتى لكى

مسدس صغير يقول...

انا لله وانا اليه راجعون
..
عظم الله اجركم
...
انتى بقى زعلانه منى ليه؟؟
ربنا ميجيب زعل..

أحمد الصعيدي يقول...

بخخخخخخخخخخخخخخخخخخخخخخخخ
طبعا حضرتك تعملي تحديث عندك وتكملي الموضوع عندي أنا فاهمك أصل أنا فتك انتي طمانة في المدونة بتاعي بأمارة ماقولتيلي زمان سرقت القالب بتاعي وأنا بشبه علي اسمك أنا عارفك انتي انتي منهم بطلوا بقي
بنت مين في مصر انتي هه قولي بنت مين
هههههههههههههههه
بطلي طمع وزودي الكلام شوية عندي يا بخيلة

ahmed_k يقول...

إنا لله وإنا إليه راجعون
رحم الله الراحله وأسكنها فسيح جناته
وألهم اهلها وأحبائها الصبر وحسن العزاء

yoyo يقول...

ان لله وان اليه راجعون
البقاء لله

غروب يقول...

الايام

وعليكم السلام ورحمه الله وبركاته

الحمد لله على كل شئ

وسعيده جدا بالزياره والتعليق

نورت

غروب يقول...

جنى

ربنا يرحمها يارب ويسكنها فسيح جناته

يارب امين

لازلت اسمع دعوتك بانى اسامح

بس صدقنى في ناس مش عارفه اسامحهم رغم انى طيبه والله

يلا بقه الحمد لله والله اعلم هنوصل لفين

اشكرك

غروب يقول...

شجر الليمون

مش جديده يا استاذ

اوعى تفكر انك بتفضحنى يعنى

نياهاهاهاها

كل الناس عارفه انى فاشله في اللغه العربيه وبجيب فيها اعلى الدرجات من تحت

هههههههههه

علقت على كلاماتك

غروب يقول...

اعشق في الليل ضوء القمر

انت فين يا عمووووووووووووووو

مش بتيجي ليه
؟؟؟؟؟؟؟؟؟؟؟؟

بس عارف انا كمان والله مرتاحه اوووووووووووووى انى خرجت اللى جوايه بالصراحه دى

لانى عارفه ان كل شخص هيوصله الكلام اللى يخصه

الحمد لله

نورتنى

غروب يقول...

مجنون

ازيك

منورررررررررررررررررر

انا كمان مبسوطه بالبوست وان الكلام وصل تقريبا لاصحابه

حكايه المثلث بقه اعتقد كلل الناس فهمتها ليه كده يا مجنون مش فهمتها

دى اسهل رساله

ما علينا

المهم انى قولت انى كنت رخمه

انت بقه عاوز تقول ايه ؟
هااااااااااااااااااا؟

سمعنى

خايف من ايه ؟؟؟؟؟؟؟؟؟

غروب يقول...

الشاعر الحزين:

البقاء لله وحده

الحمد لله

اشكرك على التعليق

غروب يقول...

مسدس صغير

الحمد لله وربنا يرحم كل موتى المسلمين

بالنسبه لزعلى منك هقوله ليك بينى وبينك

انا ضفت ايميلك

غروب يقول...

شجر الليمون

ايه ده يا راجل انت؟؟؟؟؟؟؟؟؟؟؟؟؟؟

انت مش عارف انت بتكلم مين ؟؟؟؟؟؟؟؟؟؟؟؟؟؟

ايه يا ربي ده؟

كمان انت فعلا كنت لاطش القالب منى

لانى قبل م احط القالب الحالى كنت حاطه الاخضر اللى انت كنت حاطه برضه

بلاش بقه امور السرقه العلنى دى؟

يا سااااااااااااااااتر

كمان الواحد مش يعرف يفضفض شويه عندك

جاى تفضحنى ؟؟؟؟؟؟

ماشي يا صعيدي

كمان فين البخل ده

د انا كاتبه موضوع انشاء باين عندك

بجد كنت باكتب عندك وانا في حاله سيئه جدا
وكان واصلنى كذا خبر وحش في نفس اليوم

معلش بقه لو كان كله اتصب عندك

مش هتستحملنى يعنى

؟؟؟؟؟؟؟؟؟؟؟؟؟؟؟؟

غروب يقول...

استاذ احمد

البقاء لله وحده

اشكرك

غروب يقول...

يويو

البقاء لله

أحمد الصعيدي يقول...

السلام عليكم
يا قمر أنا بضحك معاكي
انتي تشرفي المدونة ولو عايز كمان الباس وورد اديهولك علشان تستعمريها بالمر اوعي تزعلي مستني تكتبي المانشيت الطويل بتاعك عندي
بعدين بطلي كلمة يا راجا انت دي علشان بتطلع منك زي السكر
شكرا لمرورك يا قمر

أحمد الصعيدي يقول...

السلام عليكم
الأمر لله - مين
أنا أول مرة أخد بالي
معلش أنا أسف - سبحان من له الدوام
بكرر أسفي

فشكووول يقول...

السلام عليكم غروب
انت جميله يا غروب
ما علهش بوست وفات
بلاش تانى تزعلى اصحابك منك ولا حد خالص
اصل انت زعلت كل تقريبا اللى حواليك
يمكن تكونى متوتره شويه ... لكن متهيأ لى الوقت انت هديت وعيدى تفكيرك تانى يمكن تلاقى فيه حاجه غلط
وان كان فعلا اللى حصل يبقى عندك حق
بس اللى اعرفه انك بيضاء من الداخل
تحياتى غروب

الازهرى يقول...

تعرفى صعب اقول ان الخزن ده كله زعلنى بالعكس
انا حسيت بيه وبزعلك من ناس كتيييير
لكن صدقينى لو حطيتى الموضوع فىدماغك كتر انسان هيضر انتى
حاولىتفرغى دماغك من اى حد لانه اكيد مش يستاهل

ولو زعلتى تانى اكتبى تانى برضه علشان تفضفضى
صدقينى اسوأ شىء انك تكتمى احزانك جواكى


اسف انىاتأخرت فى الزيارة

وحي القلم يقول...

مش معنى ان حضرتك مضايقة من حد تفضحيه ع الملا كده
البقاء لله

طـائر الليــل الحـزين يقول...

غروب
بصراحة انا جيت وقريت
بس مش حسة انى ممكن اعلق
عشان البوست طبعا رسالة موجهة
فحسة انى مش فاهمة حاجة
بس طبعا حبيت اقولك انى اهوة
تحيااااااااااتى يا قمراية

غروب يقول...

شجر الليمون

لالالالالالالالالالا مش عاوزه الباس ولا شئ انا اقدر احتلها بدونه


نياهاهاهاها ( ضحكات شريره متقطعه )

كمان ايه زى السكر دى؟ انت بتعاكسنى

يالهوووووووووووووووووووووووووووووى

والله الم عليك الناس

وانا ورايه رجاله

هههههههههههههه

عارف بقه لو قولت زى العسل والكر والشربات وكل شئ عسول

هسكت خالص

غروب يقول...

شجر الليمون تانى

وبعدين بقه ؟؟؟؟؟؟؟؟؟؟؟؟

البقاء لله وحده

ربنا يرحمها ويدخلها فسيح جناته يااااااااارب

غروب يقول...

عمو فشكول

ازيك

مبسوطه اوى انك جيت

بص انا مش مزعله كل اللى حواليه ولا شئ

انا بس طردت اللى بيزعلونى دايما او اللى بتعمدوا يزعلونى

انا مش عاوزاهم معايا

لكن مش كلهم طبعا لان انا حواليه كتير


يعنى اقولك

ارجوك اوعى تغير .. انا حواليه كتير

هههههههههههههههه

نورتنى

غروب يقول...

الازهرى

مش كده برضه مش لما اخرج اللى جوايه احسن

قولوهم والنبي

عموما انا مزعلتش حد غالي والله

دى ناس ثانويه في حياتى

بس كان لالالالالالالالالازم كل واحد يعرف حدوده بس كده

نورتنى يا محتل

غروب يقول...

مصعب صلاح

لو انت عرفت شخصيه واحده منهم تعالى قولى عليها

غروب يقول...

طائر الليل الحزين

كويس يا حبيبتى انك طمنتينى عليكي

وجودك بس مريحنى

مش تتاخرى بقه وعاوزه اشوف جديدك قريب

موااااااااه

أحمد الصعيدي يقول...

في الأستخبس من غير ماحد ياخد باله
في بوست عندي في الأرشيف تحت باسم الطاووس إقريه هيعجبك أوي بس ياريت تحطي تعليقك عليه حضرتك
علشان انتي بتحبي العامي
بس بسرعة أحسن أحرمك من دخول المدونة وانتي طبعا لاجئة عندي اليومين دول ههههههههه

غروب يقول...

شجر الليمون

من عيونى يا صعيدي

انا لاجئه

وانت محتل

أحمد الصعيدي يقول...

بنت صغيرة ممكن تفهم ان البساطة والمثالية ** غرور **
قصدك غرور ولا غروب
هههههههههههه

رحــــيـل يقول...

ازيك ياغروب يارب تكونى بخير

يابنتى هى فعلا مدونتك وتكلمى فيها براحتك اوقات مش بنعرف نقول للناس فى وشها الكلام ده بس طالما ممكن يوصلهم من خلال مدونتك يبقى خير

شوفى بقى ياقمر
اولا انا كنت مع ماما اموله يوم بورسعيد وسألتنى اذا كنت اعرفك ولا لاء وانا مكنتش اعرف مدونتك ولا انك من الدقهلية

اما بالنسبه لان مفيش لقاءات فى المنصوره مين قالك كده
احنا عملنا تسع لقاءات وحضر معانا مجموعه من مدونين الدقهليه وكمان فى ناس كان بيجو من بره الدقهلية
اخر لقاء كانا لخميس اللى قبل لقاء بورسعيد انا خلصته وطلعت على هناك

ده لينك الجروب بتاع مدونى الدقهلية
احنا المفروض بنتقابل كل اسبوعين بس هنوقف شويه عشان الامتحانات ان شاء الله نشوفك معانا بعد كده

http://www.facebook.com/group.php?gid=18252776335

غروب يقول...

اما صعيدي صحيح

ههههههههههه

التعليق اللى فوقي يا عمر كاتبي غرور ؟؟؟؟؟؟؟؟؟؟؟؟؟؟

ما علينا انا هقوم اتغدى بقه ولما ارجع اشوف البوست اللى قولتلى عليه

غروب يقول...

رحيل

جميل اوووى

سعيده جدا بيكي

وربنا مش يحرمنى من ماما اموله
وان شاء الله احاول افهم شئ في الفيس بوك ده واشترك معاكوا

وان شاء الله نتقابل بعد الامتحانات

متشكره اووووى

الفراشة الصغيرة يقول...

بوست عامل زى الدنيا

اللى احنا عايشينها

محدش عارفه مين وايه وليه

اى حاجة

غروب يقول...

الفراشه الصغيره

ش كده برضه

ههههههههههههه

نورتينى

Unknown يقول...

أنا مش فاهم حاجة خالص ومربع ومثلث وواحدة أولى وتانية

براحة عليا شوية أنا دماغي ساح

ويبقى التواصل

مـجـنـووون يقول...

عمرك شفتي مجنون بيخاف

غروب يقول...

معتز شاهين

معلش بقه

حصل خير

عالم ماريونت يقول...

جميل جدا
واصلني احساسك اوي مع اني مقدرتش افهم طبعا انتي بتتكلمي عن اية؟
وان كنت قدرت اخمن انتي بتتكلمي عن اية مع اني معرفكيش بس مش عارفة لية حاسة ان تجربتكة تقريبا نفس تجربتي

؟؟؟؟؟؟؟؟؟؟؟؟؟؟
بجد مش عارفة لية بس انا كان عندي واحدة صاحبتي فضلت تقرب مني جدا جدا وانا متصورة انها بتحبني وعشان كدة بتقرب مني بس اكتشفت في الاخر انها بتقرب لي عشان غرض في دماغها افتكر انه نفس غرض صاحبتك
بس انا جوايا ناحيتها نفس المشاعر الي انتي وصفتيها دي بالضبط
بجد لمستيني جدا مع ان افكارك غامضة بس مشاعرك وصلتني جدا جدا

تحياتي ليكي
رنا

غروب يقول...

مجنون

اه شفتك

ههههههههههه

غروب يقول...

عالم ماريوم نت

ربنا مش عارفه اقولك ايه

بس واضح ان الافكار يمكن مع اختلافها الا انك حستيها


حسيتها لانك عاوزه تحسيها ولانها فكرتك بقصتك

بس انا مبسوطه اوى باحساسك ده

وبرزياترك وتعليقك

اشكرك

أسطى في زمن البلي يقول...

اشكرك يا سارة ع التعزية اللي قدمتيها في مدونتي و اشكرك كمان ع تعزيتي هنا كمان


و اشكرك على التعزية برسالة قصيرة


ربنا يبعد عنك الحزن دايما

او اقول : ربنا يجعلك دايما فوق الاحزان .. لانه بالفعل الدنيا مليئة بالاحزان

غروب يقول...

اسطي في زمن البلي :

البقاء لله وحده

وربنا يجعلها اخر الاحزان

وحمدا لله على سلامتك

 

ما بعد الغروب © 2008. Design By: SkinCorner