الثلاثاء، 31 مارس 2009

الخيانه

بسم الله الرحمن الرحيم


اولا : انا متشكره جداااااااا جدا لكل حد سال عنى وكل حد رد عندى رد جميل حسسنى اد ايه انا حواليه ناس جميله ممكن ارمى عليها حمولى


ثانيا : الحمد لله انا كويسه نفسيا .. ومرتاحه الى حد ما عن اليوم اللى كتبت فيه البوست اللى فات واللى كنت فيه في حاله سيئه جدا

بس الحمد لله الحاله زالت بزوال السبب الى حد ما


ومش عاوزه حد يعتقد ان انا في قصه حب شنيعه وهى سبب ازمتى يعنى لانى حسيت من بعض الردود ان في تخيلات انها قصه حب سببت ليه الحزن ده

الحمد لله انا قلبي حاليا فاضي خالص من اى حب عاطفي


مفيهوش ناس كتير صحيح لكن اللى موجودين فيه حاليا مالينه

الى ان ياتى الحبيب اللى هطرد الكل علشانه ههههههههه


الموضوع ببساطه كان مشكله مع انسانه من اللى جوا قلبي دول وعلشان كده قلبي وجعنى

والسبب مش اننا مش بنحب بعض لكن السبب هو اختلاف الطبع شويه وده شئ عادى طبعا


عاوزه كمان بجد اقول لماما اموله انا بحبك يا ماما ومعلش قلقتك عليه شويه ... واقول لاستاذ احمد انى متشكره جدا على سؤاله الدائم واهتمامه

وايناس كمان ( عاشقه الاحزان ) ... متشكره جدا يا نوسه على اهتمامك وسؤالك



وبجد انا كنت بقرا التعليقات بتعاتكوا وانا سعيده جدا جداااااااا والله فوق متتصوروا .. اد ايه الانسان بيكون سعيد وهو شايف حب الناس ليه

وحب بدون مقابل ولا غرض ... جميل اوى الشعور ده



نيجي بقه للموضوع اللى ولع في اعصابي اليومين اللى فاتوا واستفزنى لدرجه انى اكتبه في لحظه كده بدون ترتيب مسبق


الموضوع هو عن الخيانه ... واقصد هنا الخيانه العاطفيه ... يعنى بالبلدى بين ( زوج وزوجه ... او واحد وخطيبته ولو انها نادره شويه او بين واحد وحبيبته ودى منتشره جدااااا)


انا مش عاوزه اتكلم عن الخيانه نفسها او بتحصل ازاى ؟ ... لان كل واحده وواحد بيشوف الموضوع من وجهه نظره الخاصه

في بنات بتشوف نظره الراجل لواحده تانيه خيانه عظمى .. وناس بتشوف ان الخيانه في التفكير وغيره وغيره لحد منوصل لاشد انواع الخيانه


وللاسف في ناس بقه بترتاح على الخيانه دى .. صحتها بتيجي عليها

مش راحه اللى بيخون او الخائن يعنى لالالالالالالالالا راحه المغفل اللى بيتخان وهو مش عارف


اه والله صدقونى .. في ناس كده بتحب تكون مخدوعه بس مش عارفه ... المهم انها تكون مش عارفه وفاكره انها مسيطره على الموقف


الغريب بقه اكتر .. ان كل واحد بيخون فعلا بيكون مدرك جداااا هو بيعمل ايه

لو ولد : عارف ان ده هيرتد ليه

لو بنت : عارفه كويس انها بتخسر سمعتها لانها لو خانته مش هيسيبها في حالها


لكن اللى بيحصل كمان ان لو الولد خان يجرى يتكلم على البنت هنا وهنا وهنا .. ويغلط فيها وفي سمعتها


طب يا بنى آدم ازاى هى ملوثه كده وانت كنت هتتجوزها ؟؟؟؟؟؟؟؟؟ او حتى مصاحبها على حد التعبيرات السائده


اه مهو انتوا مش عارفين ... ان حتى الولاد الفافي اللى بيصاحبوا بنت النهارده ويسيبوها بكره بيبقي عندهم مفهوم ان دى صاحبتى انا

برضه مش من حق حد يكلمها


سبحانك يارب


طيب وانتى يا بنت الناس ياللى بتلعبي بواد وبتخونيه ... ولو انها قليله لان معظم البنات بتدور على الامان والستر يعنى

لكن اللى بتعمل كده فعلا عاوزه توصل لايه ؟؟؟؟؟


انتى لما بتخونيه مش هتخسريه هو .. تؤتؤ

دا انتى خسرتى نفسك الاول .. بقيتى تعرفيه وتعرفي غيره والخ الخ بقيتى سلعه رخيصه يعنى


ويوم مواحد يسيبك لانك وحشه بتبقي هتتجننى وبتشدى في شعرك


والحكاوى اللى بتحصل على النت كمان داهيه سودا والله ... الولد يوهم البنت انه بيحبها او العكس ويتبادلوا الصور ومع اول مشكله الصور تبقي على النت كله


والراجل اللى يبقي متجوز ويبص لواحده تانيه اد بنته .. ايه يا عمو؟؟؟؟؟؟؟ عاوز ايه تانى ؟؟؟؟؟؟؟ استفدت ايه من كلمه او نظره هتخرب بيتك؟؟؟؟

والست اللى تبص لعيل اد اولادها ...... ايه يا طنط فين ضميرك ؟؟؟؟؟؟؟؟ راجلك اولى

والولد اللى يوعد بنت وتانى يوم تلاقيه بيتجوز غيرها ؟؟؟؟؟؟؟ اه البنت غلطانه لكن برضه ليه الخيانه

بدام كلمتها اتجوزها ايه مشكلتك؟؟؟؟؟؟؟؟؟؟



هى الدنيا جرى فيها ايه ؟؟؟؟؟؟؟؟

خيانه بجميع اشكالها

اللهم احفظنا


انا نفسي بجد كل انسان بيتخان يكون اقوى ويعرف ان حقه محفوظ ده لو هو مش غلطان ويرمى حموله على الله ويسيبها للخالق

انا في كلمات كنت كتباها من فتره نفسي كل واحد متخان يقولها للخاين ويعرفه اد ايه هو فاهمه وانه صغييييييييييييييير
اسمها كدبك اصبح مكشوف ودى كنت نزلتها زمان في بوست قديم يارب تعجبكوا
كدبك اصبح مكشوف
كدبك اصبح مكشوف....... بكره هتعرف وتشوف
وتلف ف وسط الوف .......على قلبي وتبكي عليه
قلبك يبقي بيتمنى .......لو فكرنى هقوله استــنى
مهو برضه مهوش معقول ... نازل ف كلام علطول
اعمل نص ما بتقول يمكن ربنا يهديك
مهو لا انا هخرج م الجنه.... ولا قلبي معاك اتهنى
ده فاكرنى هقوله استنى؟؟؟؟؟؟؟؟ قلبك يبقي بيتمنى
وكفايه انا قلبي اتعلم ...... قبل ميختار يتأنى
تحياتى
غروب

43 التعليقات:

♥نبع الغرام♥♪≈ يقول...

اول تعليق
احجز الاول وبعدين ارد
سلالالالالامى

SHAPE YOUR LIFE (ABOALI) يقول...

فى رسالة موجهة سريعة

وحشااااااااااانا يا غروب
وان شاء الله تكونى فى شروق عالطول

يا مزاجانجى

♥نبع الغرام♥♪≈ يقول...

السلام عليكم..
حبيبتى وروح قلبى ساره
كويس انك رجعتى بالسلامه انا كنت هموووووت عليكى قووى ياقلبى ويارب ما نتحرم منك ابدآوتنجحى بتفوق يارب
آشكرك على طرح مثل هذا الموضوع الشائك واحب أن أعلق على كلامك
بالنسبه للخيانه ردود فعل مختلفه
وأقدر شخص على الأجابه هو شخص أحب بصدق وطعن بالخيانه
أنا عن نفسى مريت ياساره بتجربه دبحتنى قووى ووجعت قلبى إلى أقصى حد
الفراق أحسن من ألم الخيانه
أعيش بعيده عنه ولا أعيش بوهم معه
وياريت نصيحه للشياب اللى حب يسيب حبيبته
ياريت يسبيبها فى حالها ده مش ذنبها انها أحبته بصدق وأعطته حب ما كنش يحلم بيه ماينساش أن ربنا مش بيفوت أبدآ
وميغلطش فيها لأن كل شىء بالدنيا سلف ودين وربنا منتقم جبار مش بيفوت أبدآ وحسبى الله ونعمه الوكيل
ويفتكر ان كان فى حاجه اسمها حببينهم فى يوم
معلهش لو طولت عليكى ياساره
بس بجد انتى جميله قووى
لأنك أتكلمتى فى موضوع مهم زى ده فى الوقت المناسب
وحمدالله على سلامتك ياقلبى ووحشتنى موووووووووووت
بحبك قووى
أختك إيناس

SHAPE YOUR LIFE (ABOALI) يقول...

الخيانه
كلمة كبيره جدااااااااا
ويتوقف تاءثيرها على معناها
مع المتلقى لها

وفى مثل بيقول
اضربنى على قفايا بس منغير ما احس

فمابالك بمن يتعرض للخيانه

بس دى طبع بشرى
ومش شرط تكون قاصرة على الحب

فى خيانات متعدده

وانا شايف
ان الخيانه اليومين دول بين الشباب فى الحب يعنى

دى مش خيانه

دى هرتله وكمان شخصيات مريضه
و لا تعرف المسؤليه
يعنى لعب عيال يعنى

كتوموتو

الموضوع كبير

ولنا عودة فى شروق جديد


وعودا احمدا

AHMED SAMIR يقول...

مش عارف اقوللك ايه؟ بس اللي انا عارفه ان الخيانة دي مسألة نسبية
يعني ممكن جدا اللي انتي بتعتبريه خيانة عظمى يكون حاجة عادية بالنسبة لحد تاني
انما انا عن نفسي ليا تعريف للخيانة وهو ان لما يبقى قلبك مش مع شريك او شريكة حياتك....هنا تبقى الخيانة
سيبك انتي من النظرات والخيانات المادية
انا باشوف ان المشاعر هي دي الخيانة

ســـهــــر يقول...

اولا الحمد لله انك بخير وربنا ميجيبها ايام تانى فيها حزن عليكى يارب
والحمد لله اننا اطمنا عليكى

والخيانة احيانا يا جميلة بتبقا مرض
حاجة كدة فى الدم او فى الجينات الله اعلم تلاقى الواحد معاة ست بيتحلف بيها ومش مقره بحقة فى اى حاجة وبيخونها لو جيتى تسالى لية مش هتلاقى جواب
وكذلك الست ربنا بيكون رازقها بحد يخاف عليها ومحتويها وبتخونة حاجة اخر تهريح والله

واللى بيخون زى متفضلتى وقولتى بيخسر نفسة واحترامة ليها مش اى حاجة تانية

وطولت عليكى اكيد

والف حمد لله على سلامتك

Lady E يقول...

وكفايه انا قلبي اتعلم ...... قبل ميختار يتأنى

تسلم ايدك بجد

yoyo يقول...

صباحك سكر يا سارة
حمد لله على سلامتك يا قمر
ربنا يبعد عنك الاحزان يارب و يسعدك ويسعد قلبك اللهم آآآمين يارب

الخيانة هى الخيانة مهما كانت شكلها او حتى مبرارتها
و بتكون صعبة اوى لما تحسى انك بتتخانى من اقرب الناس لكى ومن الانسان اللى وهبت له حب و اخلاص الدنيا دى كلها وقتها الانسان بيحس انه عاش فى وهم كبير اوى اسمه حب واخلاص للانسان مش يستحق وقتها بيكون الجرح مؤلم اوى بس اهون من انك تعيش طوال العمر فى دور آخر من يعلم
مش بيحس بوجع الخيانة الا اللى بجد عاشها وحس بيها اوى
ربنا يبعدنا الخيانة ووجعها

دمتى بالف خير
تحياتى
يويو

الشاعر الحزين يقول...

غرووووووووب الجميله

فى البدايه أحب أقولك مليون حمدا لله على السلامه

تانى حاجه أحب أقولك ابدأى من دلوقتى اطردى الناس اللى فى قلبك دول عشان أنا جاى أقعد لوحدى
ههههههههههههههههه

بهرج معاك طبعا أنا عارف انى فى قلبك لوحدى ههههههههههه

برده برهج معاك تانى

أنا الحمد لله يا أختى قلبى مليان بس مكسور وحزين

المهم

بقى أنتى بتتكلمى عن الخيانه وأنا موجود ؟؟؟؟

عموما ماشى هعديها المره دى بس المره الجايه ؟؟؟؟


هعديها برده

بجد كلامك كله جميل قوى ومظبوط قوى

ولكى منى كل التحيه والتقدير

رومانسى مشاكس يقول...

السلام عليكم


دى اول زيارة للمدونة الرائعة دى بجد مدونتك فوق الوصف


واسمحيلى انى اكون من المتابعين للمدونة الجميلة دى


بجد كلامك مليئ بالاحساس والمشاعر


فما اصعب الخيانة بكل اشكلها




الى مزيد من التميز



تحياتى


رومانسى مشاكس

طـائر الليــل الحـزين يقول...

حمد لله على السلامة
بالنسبة لموضوع البوست جاااااااااامد
بس من كتر ما بقى بيحصل حوالينا
خلاص الواحد اتعود على الحكايات اللى بيسمعها وكأن الموضوع بالنسبة للناس بقى عااادى
الكلماتك اللى عبرتى بيها بجد حلوة قوى
تحيااااااااااتى يا قمر
دمتى بكل ود

ريمان يقول...

السلام عليكم ورحمه الله

ازيك يا قمر

عامله ايه

سعيده جدا انك احسن من الاول

ربنا يخليكى يا قمر ويريح بالك يا رب

انتى اتكلمتى فى قضيه مهمه جدا

وللاسف بتكرر كل يوم وبنشوفها وبنسمع عنها

واصعب شىء بجد هو الخيانه

الايام دى تقريبا كده كل واحده وكل واحد مش بيملى عينه الا التراب

والناس بقت عنيها فارغه اوى اوى

ربنا يحفظنا

aidy يقول...

ايه يا ست غروب انتى كنتى عاوزة تعرفى غلاوتك عندنا ولا ايه ;)

انتى عارفة انا فرحت اد ايه لما لقيت بوست جديد إتنشر

بجد والله ..

متعمليهاش تانى بقى :)

بالنسبة لموضوعك يا قمر عن الخيانة ..

تعرفى انى عمرى ما فكرت فى رد فعلى هيكون ايه لو إتخانت من حد بحبه

اكيد يعنى هيبقى نهاره أسود من قرن الخروب

بس بردوا مش عارفة هتصرف ازاى طب لو زوجى هطلب الطلاق ولا هتغاضى عشان الحياة تمشى

بس انا مش بعرف أتغاضى فى الخيانة
يعنى انا من النوع اللى ممكن يهد المعبد بدام فيها خيانة ومديش فرصة تانية ...

أصل بدام انا إنسانة مخلصة ليه يكون جزائى الخيانة

وكمان لو إتغاضيت وإتكررت الخيانة بشكل أو بآخر تفتكرى ساعتها ممكن أقدر أسكت ..

ساعتها هكون إدتله فرصة وضيعها

واللى زى ده لازم يكون مصيره إنه يتفرق فى إكياس بلاستيك ومش على الغلابة عشان حرام علينا
على الكلاب :)

موضوع جميل يا غروب

نورتينا يا قمر ,,

غروب يقول...

عاشقه الاحزان:

مكانك مجحوز يا انوسه دايما يا حبيبتى

غروب يقول...

ابو على:

ربنا يخليك ليه وميحرمنيش من رسايلك يارب

انتوا كمان بتوحشونى دايما والله

ويارب يكون الايام اللى جايه شروق بقه اصلي تعبببببببببببببببببت اووووووووى والله يا ابو على

غروب يقول...

عاشقه الاحزان:

ربنا يخليكي يا ايناس

بجد انتى من الشخصيات اللى عرفتها في وقت قليل وحبتها برسعه

رنبا يسعددك يارب

اما كلامك عن الخيانه وتجربتك اللى بتقولى عليها
فزى م دايما بقول

انسي اللى ناسيك

نورتينى يا حبيبتى

وربنا يخفف عنك

غروب يقول...

ابو على::::

لالالالالالالالالالا اسمحلى اختلف معاك في شئ

الخيانه مش طبع البشر

احنا مش مخلوقين كده

السبب بقه فيها ايه ؟؟؟؟؟؟

ده اللى نفسي اعرفه فعلا

وطبعا كلامك صح بان الخيانه ليها اشكال وانواع كتييييييير

بس انا استفذنى اوى الخيانه العاطفيه لان الكل تقريبا بيعانى منها معتش حد مخلص باين يا ابو على

والبنات تبكي والولاد تبكي وحاجه توجع القلب

يلا ربنا يرحمنا

نورتنى وبتنورنى دايما

غروب يقول...

A.samir:

اهلا وسهلا بيك في زيارتك الاولى

نورتنى

فعلا كلامك صح وانا قولت فعلا ان مفهوم الخيانه بيختلف من شخص لاخر واللى ممكن حد يشوفه خيانه عظمى ممكن شخص تانى يتغاضي عنها

فعلا عندك حق خيانه المشاعر بتوجع اكتر

نورتنى ومتشكره اوى على الزياره والتعليق

غروب يقول...

سهر

ربنا يخليكي ليه يا قمر وميحرمنيش من سؤالك

هههههه بقه الخيانه زى الجينات ؟؟

من امتى

؟؟؟؟؟؟؟؟؟

بصراحه لسه مش عارفه ليه الخيانه خصوصا انى ساعات بشوف خالات خيانه من ناس بتحب بعضها جدااااااااااااا

طب ليه بقه ؟؟؟؟؟؟؟؟؟

هى فارغه عين وخلاص؟؟؟؟؟؟؟؟

ربنا يارب يرزقك باللى يقدرك ويصونك يا قمر

نورتينى يا حبيبتى

غروب يقول...

ليدي اى:

ههههه بس ده اللى عجبك؟؟؟

المهم انك نورتينى يا حبيتى وان شاء الله نقدر نحسن الاختيار يارب

نورتى

غروب يقول...

يويو :

يسعد صباح الحلوين

الله يسلم عمرك يا قمر

وحشانى جدداااااا والله

ربنا يكفيكي شر وجع الخيانه يارب

وان شاء الله محدش يعيش في الوهم اللى قولتيه ياااااارب

نورتينى

غروب يقول...

الشاعر الحزين

متشكره جدا

وهزارك مقبول

ربنا يخفف عنك

نورتنى

غروب يقول...

رومانسي مشاكس

متشكره جدا على زيارتك الاولى وتعليقك الجميل ورايك في المدونه

وان شاء الله يدوم التواصل

نورتنى

غروب يقول...

طائر الليل الحزين

اهلا وسهلا يا حبيبه قلبي

منورانى يا جميله

بتوحشينى اوى والله

فعلا الخيانه بقت ما شاء الله عمله مسجله وكل واحد ليه شكله الخاص زى البصمه كده

ربنا يعافينا

كويس ان الكلمات عجبيتك

يارب دايما

نورتى

غروب يقول...

ريمان

الله يسلمك يا عيونى

متشكره اوى

فعلا الناس معتش بيملى عينها غير التراب

ربنا يكرمك

نورتينى يا قمر

غروب يقول...

ايدي

اه بعرف غلاوتى

هههههههههههه

انتى كمان غاليه عندى والله بدون م اشوفك ويارب نتقابل قريب

ضحكتينى اووووووووى بقرن الخروب دي
هههههههههههههه

بس تصدقي انك خلتينى اخد بالي من نقطه غريبه اوووووى

فعلا لو انا اتحطيت في موقف خيانه زوجيه هاعمل ايه ؟؟؟؟؟؟؟؟؟؟؟

يا لهووووووووووووووى

اصل الخيانات بتاعت الحب دي سهله البنت ممكن جدا تسيبه وخلاص وتنهار فتره وانتهينا

لكن جوزها؟؟؟؟؟؟؟؟؟ يعنى حياه وبيت ؟

يا نهار ابيض

ياااااااااااااااارب متكتبهاش على حد واهدي الرجاله الخاينه والستات كمان يارب

والا مصيرهم نفس الاكياس البلاستيك بتاعتك
ههههههههههههه

نورتى يا حبيبه قلي وضكتينى والله

اعشق فى الليل ضوء القمر يقول...

ياه جه إنت شايله فى قلبك و ساكته كل ده
بس عندك حق تتعبى
موضوع شائك و للأسف مفيش مبرر غير نتيجه واحده الكل خسران

غروب يقول...

اعشق في الليل ضوء القمر

لالالالالالالالالالالالا انت فهمت غلط

مش انا اللى بتعرض للموضوع

ومش ده سبب البوست اللى فات

انت شكلك مش قريت كويس

نورت

الفراشة الصغيرة يقول...

الله الله الله
بجد كلمات حلوه
موضوع بقى منتشر كتير قووووووووووى
ومقاش له حل

وبقت الكطلمه السائده دلوقتى
يا عم فكك
يا بنتى كبرى
وصراحه مش عارفه هنفضل مكبرين وفاكين لحد امتى

اعشق فى الليل ضوء القمر يقول...

غروب
انا قرت كويس بس إنت مفهمتيش تعليقى كويس
انا مربطتش الموضوع ده بالسابق
خالص إنت إللى ربطتى كلامى مش انا
ومقلتش برده إنك بتتعرضى للموضوع ده
ما قصدته إنك قلتى :
نيجي بقه للموضوع اللى ولع في اعصابي اليومين اللى فاتوا واستفزنى لدرجه انى اكتبه في لحظه كده بدون ترتيب مسبق
علشان كده قلت ليكى حق تتعبى مقصدتش تعبك فى البوست الثانى مع علمى بإنك وضحتى سبب تعبك كما فهمت من قولك :
الموضوع ببساطه كان مشكله مع انسانه من اللى جوا قلبي دول وعلشان كده قلبي وجعنى
والسبب مش اننا مش بنحب بعض لكن السبب هو اختلاف الطبع شويه وده شئ عادى طبعا

إلا لو فيه حاجه ثانيه و إنت مقلتيش عنها حاجه و مخبياها
وش بغمزه مكر مع إبتسامه خفيفه

اعشق فى الليل ضوء القمر يقول...

بقالى صحيح فتره مبشوفكيش عندى ليه يا ترى
وش واضع إيده على خده و بيبص فى السماء

mahasen saber يقول...

الخيانه والعياذ بالله منها

من ادنئ افعال البشر

الحيوانات مبتخنش بعض
انما الصفه دى فى البشر بس للاسف

نورتى وحمدالله على السلامه يا غروب

جارة القمر يقول...

لمذا يتلاعبون بنا
يرفعوننا الى السماء ثم يلقوننا الى الأرض فيكسرون كل ماهو جميل بنا
ترفعي عنهم وكوني بخير
الضربة التي لاتميت تجعلك تستمري ولكن أقوى
كوني بخير

♥نبع الغرام♥♪≈ يقول...

السلام عليكم
ساره روح قلبى
وحشتنى موووووووووووووت
عندى ليكى تاج
تعالى عشان تاخديه
منتظراك يا قطه
إيناس حبيبتك

فشكووول يقول...

ازيك يا غروب
تحياتى

هما ناس هبل يا غروب الناس الخاينين دول
لا كلمه ح تشفع ولا لمسه ح تنفع
كل واحد ح ياخد او خد نصيبه
واللى غير كده مش نصيبك
يبقى ليه الخيانه
وليه وجع القلب
خليك فى بتاعك
هو اللى دايم
بحق يا غروب انت اخت نسمه(عاشقه الاحزان)
تحياتى لك ولنسمه

mk يقول...

الخيانة شئ بشع جدًا .
وقانا الله اياها

غروب يقول...

عاشق ضوء القمر

اوك كده وصلت

نورت والله انا تعبانه جدا معلش ان شاء الله اكون عند الكل قريب

غروب يقول...

الفراشه الصغيره

عندك حق والله التكبير بقه على الاخر

مش عارفه ايخ اخرتها لما كلنا نكبر والكل يعيش مجروح ويعيط

ليه كل ده ؟؟؟؟

نورتينى يا حبيبتى

غروب يقول...

محاسن صابر

اولا وحشتينى جداااااااا والله

والله يسلمك يارب ويخلينى ليكى ههههه

فعلا والله يا حبيبتى الحيوانات مش بتخون

مش عارفه ليه دلوقتى بقت الخيانه صفه سائده عن البشر

ربنا يرحمنا

نورتينى

غروب يقول...

جاره القمر

الله عليكي كلمتك جابت الفايده

الضربه اللى مش تموت تقوى

اه والله صح

بس يا حبيبتى احنا محدش يقدر يكسرنا

انا عاوزه اى حد يتخان بجد يبقي اقوى ويعرف ان بجد ربنا كان عاوز كده لحكمه معينه ربما تكون انقاذه من الشخص ده

نورتى

غروب يقول...

عاشقه الاحزان

وانتى كمان وحشتينى والله بس معلش انا تعبانه اوى عندى دور برد جامد

وان شاء الله اجى اخد التاج دلوقتى

غروب يقول...

عمو فشكول

وحشنى خالص يا عمو

صح كل واحد بياخد نصيبه علشان كده مش لازم حد يزعل او يضيع عمره في جزن على اللى راح

بص يا عمو

عاشقه الاحزان اسمها ايناس مش نسمه

ثانيا هى صاحبتى وزى اختى

نورتنى

غروب يقول...

mk:

اللهم امين

نورت

 

ما بعد الغروب © 2008. Design By: SkinCorner