الخميس، 19 مارس 2009

انا كده.... وده حقي



بسم الله الرحمن الرحيم


مش عارفه هبدا ازاى ؟؟؟؟؟

بس بجد انا اتحنقت وعايزه اتكلم بصراحه بقه واطلع كل اللى جوايه ومش هيهمنى زعل حد علشان انا واثقه انى مش غلطانه في حد


اه هقول بقه كل اللى في نفسي ...... ورغم انى بكره الجمله دى بس فعلا انا بقولها دلوقتى بكل ثقه ( انا كده اللى عاجبه عاجبه واللى مش عاجبه الحيط موجود )


لما قولت الجمله دى قريب وسط اصحابي قاللولى لا غلط

وانا عارفه ان الجمله غلط ....... واتباعها غلط اكبر .......لكن فعلا مش هاعمل بعد كده غير بيها

لان عكسها مش نافع ... لما باحترم مشاعر الناس بيدوسونى


لا بقه معلش من هنا ورايح انا مش هراعي مشاعر حد ... وهدوس على اى حد عاوز يتعبنى او ياخد منى حاجه بتاعتى


لما كنت بقدر مشاعر الناس ... خدوا منى صاحبتى انتيمتى ........ ولسه بعانى من فتور علاقتنا رغم انها مستمره


راعيت مشاعر بنات جديده هى صاحبتهم والل حصل انهم وقعوا بينى وبينها ودمروا العلاقه لفتره


نقطه تانيه : انسان غالي عليه جدا وبعتبره اخ ... لما راعيت مشاعر الانسانه اللى هو مرتبط بيها بقيت انا اللى وحشه وانا منافقه والخ الخ

ويظهر ليه نفاق الناس ومدى تخليهم عن اخلاقهم يوم ورا التانى


نقطه تالته : واحده من اصحابي الحاليين كل اما نزعل مع بعض عايزانى اروح اعتذر حتى لو هى اللى غلطانه

وباعتبار انى انا اللى غلطانه .... انا قولتلها مليووووون مره ممكن ننهى المشكله بدون محد يعتذر وبدون كمان عتاب لكن ازاى لالالالالالا لازم انا اللى غلطانه

ولو قولت في يوم انى مش مرتاحه في علاقاتى الحاليه يبقي انا وحشه وعايزه الفراق وبسعى وراه او على حد قولهم ( احساسي بقرب الفراق هيوصلنى ليه )


منتدى كنت فيه وبتعامل مع كل اعضاؤه بحب وسذاجه و براعي مشاعر الكل وفجاه الاقي حوار كاااامل واصلنى من احد الاعضاء مليش علاقه بيها اساسا بتشتمنى

وتغلط فيه رغم انها متعرفنيش ...لكن اهو بقه مجامله او ان وقع العجل كترت سكاكينه لحد مسيبت المنتدى وامتنعت عن المنتديات اساسا ... لحد فتره قريبه


الانسان الى عطيته قلبي بجد وحبيته حقيقي وتحملت رفض الكل لشخصه برضه عرف واحده تانيه وسابنى علشانها لما انا اتنازلت عنه وقولتله روح لها متفرقش معايا


ايه ؟؟؟؟؟؟؟؟؟؟؟؟؟؟؟؟؟


انا بتنازل عن حقي كتير ليه كده ؟؟؟؟؟

صاحبتى... واخوبه ...ومنتداى....ومدونتى قبل كده .....واللى كان حبيبي ....بقول اللى كان لسبب ... الشخص ده انا فعلا مش عيزاه بمزاجى


وغيرهم كتير ..........ليه ؟؟؟؟؟؟


لا بقه من النهارده بجد انا مش هسيب حاجاتى ومش هتنازل عن اى حق بتاعى

الا اذا انا مش عاوزه الحق ده


وبقولها اهو باعلى صوت ...... انا كده واللى عاجبه عاجبه واللى مش عاجبه يقطع علاقته بيه


مش هسيب اى فرصه بتاعتى وهاخد كل حقوقى من هنا ورايح


وهبقي مستغله بجد .. بس مستغله لحقوقي انا


وهعيش لنفسي بس ... علشان غروب وبس ...


لازم غروب تبقي فرحانه دايما ومش تبكي تانى ابدا ابدا


كفايه بقه



غروب

54 التعليقات:

طـائر الليــل الحـزين يقول...

اول تعليق

طـائر الليــل الحـزين يقول...

وانا معاكى
انا دايما بقول اللى فى قلبى واللى يحصل يحصل ومش بعرف عمرى انافق حد واللى بيغلط فى حقى بعاتبه فى وشه وبقوله انه معرفته متلزمنيش تانى
بس انا ليه تعقيب صغير متصدقيش اى حاجة تتقالك على لسان حد عشان الناس بقوا واحشيين قوى وانا عن نفسى مؤمنة بالمثل اللى بيقول شتمك من بلغك
يارييت تعملى بيه لكن اللى تكونى فعلا واثقة انه مش بيتقى الله فى علاقته بيكى ايا كان
معرفته بناقص بيها
تحياااااااااااتى يا قمر

ahmed_k يقول...

أيه ده ؟؟؟
واضح أن الموضوع كبير
يا غروب أنا مقدر مشاعرك بس
حقولك حاجه مهمه
دايما أعملي الخير وأرضي ضميرك
ولا تنتظري الجزاء إلا من الله
وغلط أنك تعيشي لنفسك بس
بالعكس حتى وأن كان ردود فعل اللي حواليكي فيها نوع من الجحود حاليا
قتأكدي أنه سيأتي اليوم الذي تزال فيه الغشاوه من على أعينهم ويقدروا مواقفك وأفعالك
وإن لم يأتي ذلك اليوم فيكفيكي أنكي عملتي ما تشعرين أنه يرضي الله عنكي

دمتي بكل خير

ماء تشرين يقول...

غاليتى انا حسه انك متأثره اوى ومتخديش قرار وانت متأثره انا عايزكى تفهمى كويس انك حلوة وكويسه مش عشان الناس عشان انت كده اما هما فهم الخسروكى انت مخسرتيش حاجه هما هما بس الخسرو قلب طيب وحب مش هيعرفو يعوضو ومتقوفيش حياتك على حد أعرفي غيرهم وهتلاقى أكيد ناس كتير بتحبك

SHAPE YOUR LIFE (ABOALI) يقول...

ياااااااااااا غروب يا جامد
برافووووووووووووووو

فى نوع من انواع الاتصال والاندماج بين الناس اسمهASSERTIVE COMUNICATION
مش لاقى ترجمة حرفيه مناسبة ليها
بس بوستك عمل ليه ترجمة حرفيه

وهى معانها

انك تاخدى حقك وغيرك ياخد حقه
بدون ان يجير احد على حقك

وانا هاكتب ليكى مثل
فى موضوع الشتيمة بتاعة المنتدى اللى انتى تركتيه


ممكن تقولى

انا مقدرة طبعا الراءى والراءى الاخر
واحب اقول ان كل واحد بعبر عن راءية فى حريه
ولكن فى حدود اللياقة والعرف المتبع ومش هاسمح لاءى شخص يخرج ان ذلك العرف المتبع

دى مثلا اجابه


مثال تانى صحبتك اللى كل مرة عاوزاكى تعتذى

طبعا انتى عارفة معزتك وغلوتك عندى
وانا مقدرة ان انتى حاسة انى غلطت فيكى
لكن احب اوضح الامور دى
1-
2-
3-
ومن كل اللى شوفتيه ده يثبت انى انا مش لازم اعتذر



كل الطرق دى يا غروب دى ترجمة لبوستك
بس انتى بتقوليه وانتى تحت جرعات من الثورة و عدم الهدوء
انتى محتاجة فى حياتك انك تكونى ASSERTIVE

علشان تقدرى تواجهى كل الوان البشر بسهوله

وانا متاءكد انك هاتنجحى فى ده


لك كل التحية
ده ايميلى ABOALI26M@YAHOO.COM

اعشق فى الليل ضوء القمر يقول...

السلام عليكم ورحمة الله وبركاته
اولا شكله كده الموضوع ده كبير قوى و بمعنى أخر مأثر فيكى كثير
أنا هقول كلمتين
من حق لكى إنك تقولى إللى إنت عايزاه بطريقة لاتجرح مشاعرى أو أذنى لكن السكوت ممنوع نفسيا وعصبيا
انا إتعلمت حاجات كثيرة أوقات كثيره السكوت مش مراعات المشاعر السكوت فى أوقات كثيرة بتكون فعلا لغه العقلاء
حاجات كثيرة لازم تشوفيها فيها مصلحه ليكى شخصية ماشى ملكيش فيها مصلحه يبقى كل واحد يدافع ويدور على إللى عايزه وفى نفس الوقت يساعد أى شخص طلب المساعده منه وميكنش فيه خطا يعود على
كويس الحاله إللى إنت فيها بتخليكى تفكرى لكن صححى مجال الرؤيا ليكى
وخلى من نقاط ضعفك قوة ليكى
معلش مبقتش كلمتين
سلامى

ســـهــــر يقول...

واضح جدا أنك مشحونة والموضوع تعبك وانا مقدرة موقفك ولو مكانك هقول كدة وأكتر
بصى يا حبيبتى اوعى تفرطى فى حقك او تيجى على نفسك علشان حد
اللى بيقلل من نفسة علشان حد بيحبة فى ألآخر بينداس علية
اة للاسف دة اللى بيحصل
أتعاملى ك أنتى مش حد تانى عشان ترضى حد واللى مش حابب اسلوبك ينسحب فى هدوء وأدب
واصحابك اللى ميقدرش منهم كونك انسانة ليكى أخطاء وليكى مميزات وعيوب يبقا مش صاحب
اللى تسمح لطرف تانى انة يفسد العلاقة دى تبقا عمرها م أعتبرتك جزء منها
حاسة ان كلامى قاسى حبتين بس حبيت اوضحلك انك صح

وسلامى لقلبك يا جميلة

ريمان يقول...

والله انتى بنت جدعه

اللى مش عاجبه يتفلللللللق


والله يا بنتى اللى بيراعى مشاعر الناس ويعمل حسابهم فى الدنيا دى وبيبقى طيب معلش يعنى اسفه فى اللفظ بيداس بالجزمه وانا مجربه وعارفه كويس اوى

بصى

انا بعامل كل واحد بالمعامله اللى يستحقها وبقيت بعرف اقدر كل واحده بقدره واحجمه بحجمه

Ahmed يقول...

مش حاسس أنك هتكوني سعيده بده
مش حاسس أنك هتقدري تعيشي بالطريقه ديه
لو كنتي تقدري مكونتيش تبقي بالعصبيه ديه

بصي بالراحه بس كده وواحده واحده

اللي انتي حكتيه ده كله أزمات حقيقيه مش هينه ولا بسيطه
بس أكيد في ناس تانيه كتير في حياتك أكتر من الناس ديه بتهتم بيكي ونفسهم يشوفوكي في أحسن وضع

حاولي تتخطي أزماتك بالشكل اللي يقويكي مش اللي يهدمك

اللي يشتريكي يبقى يستاهلك, واللي يبيعك يبقى هو اللي خسرك, لكن أكيد في غيره كتييييييييييييييييير نفسهم يكسبوكي

أتمنالك هدوء أعصاب حقيقي واتمنى أسمع عنك كل خير

طوبه فضه وطوبه دهب يقول...

طبيعا انك تقولى انك كده ومش هتتغيرى غلط لكن اتغيرى وقت ما تلاقى اللى يستاهل انك تتغيرى عشانه اللى كانت صحبتك وبعدت عنك اصلا ما تستاهلكيش ولا تستاهل تزعلى عليها اللى حبتيه وحب غيرك لو كان حبك بجد كان اتمسك بيكى مش رضى بالتنازل وعجبه الوضع اللى فى المدونه كل مكان فيه الحلو والوحش وطول ما انتى بتتشتمى يبقى اكيد انتى صح وشتيمتها غيره تتنازلى عن حقك لا دا ضعف لكن تتغيرى اه بس عشان اللى يستاهل واتمنى انى اشوفك فى احسن حال اختى الحبيبه وتعلمى متى تتغيرى ولمن تتنازلى اطيب التحيات

hasona يقول...

السلام عليكم

واضح انك تحملتي فوق طاقتك
و الضغط الديد يولد الانفجار
ــ،،،،ــ
افعلي ما يرضي الله
افعلي الصواب دايما ولا تهتمي بما يقوله عنك الناس
أصدقائك جديرين بمعرفتك
وأنت جديرة بأن تحافظي علي قلبك وعلي صورتك أما نفسك

خلي علاقتك طبيعية بالناس
من يستغلك أو يتلاعب بمشاعرك عليك أن تتجنبيه لكي لا تتغير مشاعرك الجميلة التي تحمليها داخلك

تحياتي

غير معرف يقول...

انت طيبة ودا احساس التمرد جواكي

بلاش يتغلب عليكي

سيبي كل ظالم لربنا واكيد ربنا هايجيبلك حقك

يمكن البوست فرغ شحنة جواكي

متخليش الناس تغيرك خلي ساسو الطيبة زي ماهي

أم فريده يقول...

اتمسكى بحقك

انا معاكى بس بشرط لما يكون حقك ويستاهل التعب والمعاناة انك تحافظى عليه

لكن متزعليش منى فى كل اللى انتى قولتيه

انك مش بتعرفى تحسنى اختيار حد حوليكى بدا من انتيمك لحد حبيبك

واوعى فى يوم تندمى ولا تزعلى الا على الغالى والثمين

وكل اللى كانوا حواليكى كانوا فالصوا ومن النوع الرخيص

حبيبتى الصدمة اللى متكسرناش تقوينا

والاحسن تقوينا
كونى قوية

تحياتى

فشكووول يقول...

ازيك يا غروب .. مش حلو كدا يا غروب

بلاش تزعلى حد منك

صحيح كل اللى قلتيه صح .. ودا بيدل على انك انسانه متسامحه .. بس مش تقدرى تعملى اللى انت بتقولى عليه ..
اصل عينتك مش تقدر تنفذ الكلام ده
دا بس عشان انتى زعلانه وبعدين حترجعى لطبيعتك الطيبه المتسامحه
وبعدين انا بقى اخاف منك كدا واخاف تقولى روح يا عم فشكول اخبط راسك فى الحيط
على فكره انا بالغيظ فيكى كنت عند جهاد مشالى ولسه جاى من عندها ليكى على طول

تحياتى

aidy يقول...

دى اول زيارة ليا هنا

بس بجد عجبتنى مدونتك ده اولا

اما بالنسبة لموضوعك

انا دايما كنت بحب اقدم حسن النية

بس الحياة علمتنى ان مفيش مانع من وجود حبة حرص وحذر عشان ميكونش فى صدمات

حبيبتى مش كل الناس نتعامل معاهم كده
فيه ناس تستاهل اننا نكون كويسين معاهم ونضحى عشانهم

وفيه ناس حلال فيهم الاذى والعنف
بس لازم تعرفى حاجة

انتى لما بتقابلى حد وحش وتتعاملى معاه بحسن

ده عشان انتى كويسة مش عشان هو كويس

واخيرا بقي : ـ

حسن الاختيار للأشخاص المتواجدين فى حياتك هو اللى مش هيحطك فى موقف زى ده تانى

تحياتى ,,

الشاعر الحزين يقول...

غروب

أنا مش معاكى فى كلامك ده

صدقينى أنتى كنتى الأول مظلومه ويابخت من بات مظلوم

أنتى فعلا عندك حق انه مينفعش تسيبى حقك

لكن خليكى فاكره ان أنتى فى كل المواضيع اللى قولتيها مسيبتيش حد
هما اللى سابوك واتخلوا عنك يبقى هما أحرار وأنتى أوعى تشيلى فى نفسك أو تزعلى نفسك عشان خاطر ناس متستاهلش
دايما اعرفى أن أنتى على حق
وخليكى واثقه فى نفسك أكتر من كده
وعلى فكره
كلمة أسفه دى أوعى تقوليها لأى حد الا اذا كان يستاهل وبشده

معلهش طولت عليكى لكن الموضوع بجد مثير للأهتمام

تقبلى خالص تحياتى

غروب يقول...

طائر الليل الحزين

اول تعليق منور يا قمر

انا كمان والله بقول دايما في الوش وللاسف مش بعرف اتعامل ممع حد انا زعلانه منه

علشان كده بروح اقوله انا زعلانه علشان كذا وكذا وبعدها خلالالالالالالالاص ولا كان شئحصل وبقي مسامحه

بس انا مش صدقت كلام على لسان حد يا حبيبتى

انا عارفه مين بالضبط اللى بيغلط فيه وليه

عارفه ليه ؟؟؟؟؟؟؟ لانى مش منافقه

ما علينا بقه

بس انا مرتاحه اوى لقراري

انتى نورتينى ومش تغيبي عليه يا حبيبه قلبي

غروب يقول...

استاذ احمد:

اهلا بيك

وحمد الله ع السلامه واسفه جدا لان النت عندى وحش والله وبيفصل مع نفسه


انا فضلت طول عمرى اعمل الخير ومش منتظره مقابل وقبلت احيانا اهانه بعض الناس بدافع الخير وارضاء ربنا

لكن والله العظيم صدقنى كان المقابل العكس وبطريقه مهينه جدا

ومنهم ناس قريبين جدا منى

فخلاص بقه اللى هيراعينى اراعيه غير كده مش هاعمل خير لحد

انا عايزه المقابل

ومش معنى انى هعيش لنفسي بس انى زعل الناس منى او ابقي انانيه

لا انا بس هقدر اللى يقدرنى وهعمل اللى يخلينى سعيده بس

لان اللى براعى مشاعرهم بيتعسونى ف بناقص بقه

متشكره جدا لاهتمامك

نورتنى

غروب يقول...

ابو على الجميل

منور

جميل اوى كلامك واتمنى فعلا انى انجح بعد نوبه الثوره دي

واحقق ده حتى في هدوءى

انا ضيفت الايميل

ميرسي

غروب يقول...

ماء تشرين

شكرا ليكي يا قمر

انا عارفه انى حلوه وكويسه
هههههههههههه

لا بجد انا عارفه ان الناس دى خسرت

بس نجحت في انها تدمر اعصابي لفتره علشان انا ابقي كويسه واراعي ربنا في تصرفاتى

لكن هتقولى ايه بقه
ما علينا

المهم انتى نورتينى وادعيلي

غروب يقول...

عاشق ضوء القمر:

اهلا وسهلا

منور

الحقيقه انا كمان مقتنعه جدا بان احيانا السكوت ابلغ من اى كلام لكنة مش في كل المواقف

عارف ليه ؟؟؟؟؟؟؟

مش العيب فينا

لا العيب في الاخرين اللى بيفهموا السكوت ضعف

علشان كده انا في حقي بجد مش هاسكت تانى واللى هيغلط فيه مش هسكتله

بس مش عاوزه اخد دلوقتى حقوق باثر راجعى

بس اى جديد مش هيحصل طيب

هههههه

شايف القوه

نورتنى واشكرك على الكلمتين وبسسسسسسسس

غروب يقول...

سهر

انتى جميله وكلامك مريح بالنسبه ليه اوى

وده اللى انا قصدته بجملتى اللى عاجبه عاجيه مش عاجبه بالسلامه

فعلا انا ليه اخطاء مش ملاك

بس نفترض ان العيوب دي مش هتتغير لانى شيفاها صح مثلا

مهو كل واحد شايف نفسه صح

خلاص يبقي اللى عاوزنى بعيوبى دي اوك

زى م انا هقبله بعيوبه برضه

كنت لسه والله بتناقش مع ايناس صاحبتى في الموضوع ده امبارح وكويس اوى انك قولتيه في التعليق علشان اقدر ارد

نورتينى

غروب يقول...

ريمان:

وحشتينى يا ريمو

هههههههه

بالجزمه يا لهووووى

الحمد لله لسه موصلتش ليها

وكويس بقه انى فقت قبلها

وياريتنى ابقي زيك واقدر اعمل كل واحد بمعاملته

اصل الطيبه بقت بتستغل اسوء استغلال والله

وتبقي ضعف في ايامنا

سيبك انتى

المهم انك نورتينى

وانا بحبك جدا والله

بنت الماضي يقول...

يااااه لسه دلوقتي يا بنتي؟
انا كده طوول عمري
وبقولهم اللي عاجبه عاجبه واللي مش عاجبه يضرب راسه في اتخن حيط
يابنتي محدش بيتعامل مع حد غصب عنو اللي حاببني يتعامل معاها واللي مش حاببني الباب يفوت فيل مش جمل بس ....
صدقيني ادام بتعاملي الناس بما يرضي الله هتلاقي كل الناس بتحبك وبتعاملك كويس واللي مش عاجبه يشرب من البحر...ولا يهمك :)

غروب يقول...

احمد ابو العلا:

اهلا وسهلا

يادى النور

انت كلامك كده معايا وضدي في نفس الوقت بدايته انى مش هاقدر انفذ كلامى ونهايته قدرى اللى يقدرك وارمي اللى يكسرك

طب مهو ده قراري

انا هاخد حقي بس

مش اكتر

غروب يقول...

طوبه دهب وطوبه فضه:

بصي انتى اتكلمتى على الشخص اللى يستاهل اتغير علشانه

ده موضوع تانى

لان التغيير ده هيبقي عادى

لكن اللى مش عادى واللى انا باتكلم عليه هو انى استحمل غلط الناس علشان بس مش اجرحهم

ولما باعمل كده بررررررررضه ببقي وحشه

ف ادام انا وحشه في الحالتين يبقي اخد حقي بقه يمكن ابقي حلوه

نورتى

غروب يقول...

حسونه:

اهلا وسهلا

منور

ان شاء الله احتفظ بما داخلى بس اسمحلى ازود عليه انى مش هسامح حد يغلط فيه

بس

مش ده حقي برضه؟؟؟؟؟؟؟؟؟؟؟؟؟؟؟

غروب يقول...

ماما اموله:

اول مره هقولك لا يا ماما

انتى اتكلمتى معايا امبارح مثلا وانا منفعله

لكن بجد انا النهارده هاديه اهو ولسه متمسكه بقراري يا ماما

مش هبقي طيبه بعد كده لدرجه العبط

يعنى مش هاعمل حاجه لحد

انتى عارفه كويس انى عملت كتير علشان ناس كتير

بعد كده هاعمل لنفسي بس

انا ابقي مبسوطه وبس

حد تانى هو حررررررررررررررررررررررررر


بس لو غلط بدون سبب مش هاسكت

حقي ولا لا يا ماما ؟؟؟؟؟؟؟؟

غروب يقول...

زجه عنيده:

ازيك يا قمر الاول

هتمسك بحقي اوك

لكن صدقينى كل الانواع اللى انا اخترتها مش كانت نوع رخيص ولا شئ

بس لانى انا اللى اتنازلت عن حقي فيهم راحوا وسابونى

يمكن لو كنت اتحديت الدنيا واتمسكت بيهم كانوا فضلوا

علشان كده قولت انى مش هسيب حاجه بتاعتى تانى

نورتى

غروب يقول...

عمو فشكول

هههههههه

انا اللى رحت قبلك بقه

وانت اللى تتغاظ ههههههههه

كمان انا عمرى مازعل من عمو فشكول

ولا اقول كده

اما بقه الطيبه والتسامح

فاعتقد انها هتبقي بمزاجى

يعنى اسامح في اللى احس انى قادره اسامح فيه

لكن اللى مش هاقدر عليه مش هاضغط على اعصابي لا هاخد حقي

يارتنى اخدت القارا من بدرى

نورتنى يا عمو

غروب يقول...

ايدي

اولا اسمك جميل اووووووووووووووووى بجد

ومتشكره اوى على رايك في المدونه

ثانيا بقه

بجد حسن النيه ده ودانى في داهيه

مش نااااااااااااااااااااااافع

بس الناس الكويسين اكيد برضه هتعامل معاهم صح وبطيبه

انا بس اتكلمت عن حقوقي اللى طيبتى ضيعتها

مش هاعمل كده تانى

نورتينى

غروب يقول...

الشاعر الحزين:

طب ليه انا دايما ارضي انى اكون مظلومه بقه

انا مش هكون ظالمه لكن مش هقبل اكون مظلومه تانى

يعنى اللى هيظلمنى مش هسامحه وهاخد حقي

غروب يقول...

بنت الماضي:

وحشتينى اوووووووووووووى يا ايمان


تخيلي بقه انى لسه جايه اعمل كده دلوقتى

ادعيلي

mahasen saber يقول...

ومين قالك انك تتنازلى عن حقك يا قمر

بس غلب اليى اتكلمتى عنهم المشكله بينكوا سوء تفاهم ليس الا

بس افكرك يا غروبتى
من عفا واصلح

ربنا يصلحلك الحال يا حبيبتى دايما

جنّي يقول...

السلام عليكم

مثل عامي بيقول : اللي باعك بيعه وبارخص تمن ..

بمعنى عدم التمسك بمن تركك او سبك ( شتمك )

والناس الحلوة كتير بس محتاجين الشاطر اللي لا يخدع او يلدغ من جحر مرتين ..

عن أبي هريرة ، قال : قال رسول الله صلى الله عليه وسلم : « المؤمن غر كريم ، والفاجر خب لئيم »
الغر : غير المجرب للأمور وحَسَنُ الأخلاق السمح الذي لا يفطن إلى الشر لسلامة صدره
الخب : الخداع
----------
ولكن يجب الا نكون خب ولا الخب يخدعنا

جارة القمر يقول...

بصي ياغروب انا عاوزة اقولك حاجة
اولا حاولي تهدي لاني انا حسيت في كلامك بعصبية كبيرة اوي ويمكن دة بيضيع منك حاجات كتير
ثانيا اعملي اللي يرضي ضميرك واللي انتي تكوني مرتاحة بعد ماتعمليه ومش تفكري في ان كل حاجة بتحصل انتي السبب فيها وفعلا انتي طيبة علشان كدة متضايقة من تصرفات الناس اللي حواليكي بس فكري تاني وحاولي تهدي اكتر وتركزي
تحياتي لكي

أمير البلانكو يقول...

عزيزتي غروب

ازيك


الله ينور عليكي هوا دا الكلام الصح
واللي المفروض الناس كلها تعمل بيه
مفيش حد يتنازل عن حقه الا للانسان اللي بجد يحس انه يستاهل

أسف لتأخيري

عاشقة الاحزان يقول...

أختى الغاليه غروب
انا معاكى فى كل كلمه قولتيها لانى بجد حاسه بيكى قووى وربنا منتقم جبار صدقينى ارمى همومك لربناواعملى مثلى وهو قادر على كل شىء
وانا بجد سعيده بيكى قووى لمرورك وياريت بجد نفسى اتعرف بيكى اكتر وتسيبى الميل ليا بتاعك
وربنا يوفقك يارب
اختك
عاشقة الاحزان

محمد عتلم يقول...

غروب
اولا كل سنه والامهات كلهم طيبين
ثانيا انا مزرتكيش بقالى كتير اوى ولما زرتك النهارده لقيتك زعلانه من حاجات كتير اوى .. ومن ناس كتير .. نصيحه خلى اللى مش عاجبه يخبط دماغه فى الحيط فعلا طالما انتى متأكده انك معملتيش حاجه غلط ... طز فى الآخرين طالما انتى صح.. وحاولى تتعاملى مع الناس وتعيشى معاهم بس مش لدرجة ان حد يعرف اسرارك ويتدخل فى حياتك من اى جانب علشان الدوشه والمشاكل وعشان مياخدش منك حق مش بتاعه وترجعى تدورى على حقك . دايما اعملى حدود للطرف الاخر وخطوط حمرا عشان ميتعداهاش .
دى نصيحه مش اكتر

غروب يقول...

محاسن صابر

اهلا يا حبيبه قلبي

منوره

مهو انا قولت يا محاسن انى ممكن اتنازل في حاله واحده انى انا اللى مش عاوزه الحق ده

لكن اسامح حد غلط فيه ليه؟؟؟؟؟؟؟

د انا سامحت ناس بدات بالغلط وبدات انا بالصلح وسامحت ناس غلططت في شخصي بدون متعرفنى اصلا

والنتيجه في الحالتين واحده

يبقي اسامح ناس متستاهلش بقه؟؟؟؟؟؟؟؟؟

غروب يقول...

جنى:

بجد جبت المفيد

شكرا جداااااااااا

وان شاء الله لا اكون خب ولا اسمحله يخدعنى

نورتنى

غروب يقول...

جاره القمر:

والله انا فعلا كنت متعصبه جدا

بس حتى لما هديت كنت متمسكه بقرارى ودي اووووول مره بدون كدب

مش هسيب حقي واللى هيغلط هاغلط

واللى هياذينى هحااااول ائذيه برضه

عموما انا مش هبدا

وان شاء الله ربنا يكون راضي

نورتينى يا جميله

غروب يقول...

امير البلانكو:

مش كده برضه؟؟؟؟؟؟؟

انت كنت فين كل ده؟؟؟؟

غروب يقول...

عاشقه الاحزان :

اهلا يا قمر

نورتينى وانا اسعد والله ومدونتك باذن الله هتبقي جميله

ومن عنيه اسيبلك الايميل عندك

بس ياريت تمسحيه مجرد رؤيتك ليه

نورتى

غروب يقول...

محمد عتلم:

اهلا بيك

المدونه نورت بجد

شوفت بقي الدنيا بتتغير بسرعه جيت لقيتنى بخبط في الناس هههههههه

طبعا انا معاك في رايك

واللى مش عاجبه...............اكمل النقط

بس صدقنى والله انا في ناس اذتنى معرفهاش اساسا

ومش يعرفوا عنى حاجه علشان اقول انا اللى غلطانه انى عطيتهم مساحه كبيره

ابدااااااااااا

هاقول ايه

حسبي الله ونعم الوكيل

Ahmed Hishmat يقول...

ياااااااااااه ... كل ده
على فكرة
حقك بس هو ... اللي يفضلك
مش اللي يروح منك
حقك اللي يبقى عليكي
مش اللي تبقى عليه
حقك يعني مش اللي تتمني يكون
لا ... اللي يكون فعلا موجود
فكري كتير قوي قبل ما تردي على كلامي ده
.............................
.............................
وربنـــــــا يعينـــك

غروب يقول...

احمد حشمت:

كلامك صح جدا

بس انا عاوزه احافظ على اللى موجود ده

محدش ياخد منه تانى

لانه كان اكتر وناس اخدت منه استغلال

ف الباقي مش هسمح لحد يقلله

متشكره جدا

نورتنى

وردك جميل جدا

أم فريده يقول...

فى مقولة انا سمعتها وعجبتنى اوى

هى انك لما تكونى عايزة حاجة سبيها لو رجعتلك يبقى بتاعتك لو مش رجعت يبقى مش بتاعتك من الاول

ودا كان قصدى ان اللى باعوكى ميعرفوش قيمتك

واللى ميعرفش قيمتك ميلزمكيش

نصيحة منى اوى تتمسكى بحد بايعك لان كدة بتشترى الرخيص بالغالى

وربنا معاكى

غروب يقول...

زوجه عنيده:

نصيحه غاليه اوووووووووى

وان شاء الله اعمل بيها

نورتينى

الرومانسي الأخير ... يقول...

اللي قبلنا قالوا جمله مميزه فعلا ...

"لا تكن صلبا فتكسر ... ولا لينا فتعسر"

أعتقد ده الحل الأسلم حاليا

و مع الوقت هتكتسبي خبره ازاي تمشي علي الخط الرفيع بين احتفاظك بشخصيتك و احتفاظك بحب الناس و ولائهم ليكي

ربنا يحميكي و يرعاكي

hasona يقول...

السلام عليكم

حقك طبعا

انك مش تسامحي أي أحد يغلط في حقك

بس تعرفي أنك بتسامحي
لأنك الافضل
ولأن التسامح مقدرة لا يقدر عليها الجميع - الاقوياء الأنقياء فقط

غروب يقول...

الرومانسي الاخير:

فعلا الجمله جميله جدا

وممكن احاول اعمل بيها

نورتنى

غروب يقول...

حسونه

كلام معقول

وربنا يقدرنى عليه

نورت

عابرة السبيل يقول...

امال انا حاسة ليه انك بتبكى ؟
صحيح لا يضيع حق ورائه مطالب
بس بشويش وهدوء وحيلة وذكاء

امال الكيد بتاعنا ليه ؟وامال احنااتقال علينا ليه "ان كيدهن عظيم"

بهدوء ومن غير عصبية تدافعى عن حقك وتاخديه من بق الاسد
عمرك شفتى حد خد حق مش حقه الا بالمكر والدهاء يبقى احنا اولى ناخد ونحافظ على حقنا بنفس الاسلوب

ربنا معاكى والحيطان كتيييييييير للى مش عاجبه

 

ما بعد الغروب © 2008. Design By: SkinCorner