الخميس، 19 فبراير 2009

اعمل ايه ؟

بسم الله الرحمن الرحيم
النهارده حاسه احساس غريب اوى ..صحيح مش اول مره احس بالحزن ..لكن اول مره احس بــــــــــ... انا حتى مش لاقيه اى اسم لاحساسى ده
حاسه انى عماله اتخبط في الدنيا .. عماله اتصدم في شخص ورا التانى
حاسه ان الدنيا كلها وحشه اوى .. مفيش حد صادق فعلا والله
اول حد اتصدمت فيه كان الحب ... الحب اللى كسرنى ودمر حياتى العاطفيه
الحب اللى وصلنى لانى افقد الاحساس بالكلام الحلو حقيقي
الحب اللى خلانى افقد الثقه فى اى شخص انه يدخل حياتى باى شكل
يعنى كتير اوى البنات العاقله تخاف من انها تخوض تجربه عاطفيه بعيد عن اهلها عشان متتجرحش
انا بقه خايفه حتى من اى علاقه رسميه .. خايفه من اى واحد عاوز يدخل بيتى
اصل حبي الاولانى مكنش من ورا اهلى بالعكس .. دخل البيت .. اتحدد ميعاد خطوبه .. والخ
مش عايزه احكى كتير فيه .. لكن بعد كل ده برضه خان .. خان البيت كله الحمد لله بدون خطوبه ولا اى شئ يحسب عليه غير جرح بيتداوى مع الايام وبيتنسي
خان حبي.. خان اهلى ..خان نفسه كمان ..مش مهم ازاى كل ده
المهم انى اهو شوفت بعينى ان حتى اللى بيدخل البيت من بابه زى مبيتقال بيخون وبيلعب وبيكدب وبيخترع مليووووووووون حجه للخيانه
والنهايه هى الكسر .. بس مش زى كسر البنت اللى غلطت ................... لانها عرفت من ورا اهلها ويخونها ويجرحها بترجع تقول لما تفوق ان هى اللى غلطانه
هى اللى خانت اهلها من الاول وعرفت شخص بدون معرفتهم .. لكن انا بقه اللى مسمحتش بمعرفه شخص من ورا اهلى اقول ايه
ايوه .. ايوه اسنيت الشخص اللى يدخل بيتى من نفسه ويقول عاوزها .. وبما انى بنت زى اى بنت رفضت كتير من جواز الصالونات
والشخص ده للاسف حقق شرطين متضادين وده سر حبي ليه .. اولا حبيته جوا بيتى وادام اهلى وف نفس الوقت معرفتوش من برا ..لا انا عرفته من بابا
يعنى الشرطين كانوا الحب (مش صالونات) ومعرفه اهلى
اعمل ايه دلوقتى بقه ف اى واحد يقرب منى بهدف عاطفي .. اقوله ادخل البيت؟؟؟؟؟؟؟؟؟؟؟؟؟؟ ولا احبه من ورا اهلى ؟؟؟؟؟؟؟؟؟؟؟؟؟
م الاتنين متساويين .. ولا محبش خالص واعيش بدون مشاعر طول عمرى
المشكله انى اليومين دول محطوطه في وضع لا احسد عليه
شخص بيقولى معجب بيكي وعايز اكلم اهلك ... طب اعمل ايه؟
اقوله لا ؟ واخاف من الجرح؟؟؟؟؟؟؟؟؟؟؟
ولا اقوله اه ؟ واستنى خيانه جوا البيت او فشكله الموضوع لاى سبب وبرضه النتيجه واحده وهى الجرح وكسر القلب
المشكله مش و قوعى في مشكله الاختيار لان ببساطه عقلي بيقولى لالالالالالالالالالالالالالالا بكل الطرق ..لكن للاسف مش قادره اخدع نفسي واقول ان اعجابه بيه
و اهتمامه الزايد وكلامه مأثر فيه وعاجبنى ... ايوه عاجبنى ان في شخص بيحبنى .. شخص عاوز يربط مصيري بمصيره
خايفه اوى من القرارين ..
خايفه لما اقول لا يبقي بضيع حب حقيقي
وخايفه لما اقول ايوه يبقي بحط نفسي في بشاير جرح جديد
بس الجرح المره دى هيفرق جامد.. اصل جرح الحب الاول كان غير مقصود خالص لانه كان حب انا مش منتظراه
حب جه كده لوحده.. دق الباب فجاه.. ودق القلب فجاه بدون سابق انذار او انتظار
لكن الحب التانى ده .. هيجي بعد جرح وهيجي بعد انتظار لانى اعيش قصه تعوضنى عن قصه فاشله
على فكره انا مش باكتب القصه عشان اطلب نصيحه .. لان ممكن جدا اسمع كلام والظروف تجبرنى اعمل ضده
انا بس باكتب لانى هنفجر .. ومش عارفه اتصرف
لما بيكلمنى بحنان بحس انى خلاص هقوله موافقه اهو .. وفجاه والله العظيم الاقي عقلي يقولى لا يا بنتى فوقى انتى نسيتى اللى حصلك والاقينى فجاه بعد نوبه من الرقه والكلام بصوت واطى .. صوتى يعلى والرقه تروح واخرف في الكلام واقوله من فضلك انا مشغوله ... او اى حجه بحيث انه يبعد عنى خالص
دى كانت اول خبطه اتخبطها بجد في حياتى ودى نتايجها اللى مش عارفه اتصرف فيها ..
بعدين بقه ابقي اقول الخبطه التانيه
اشوفكم على خير
غروب

69 التعليقات:

غروب يقول...

ايناس :

ايه حكايتك؟

نو كومنت كذا مره؟؟؟؟

استفدت انا ايه ؟؟؟؟؟

خلاص بدام هى نو كونت مكنتش تدخلى بقه على الكومنتس

نفرتارى يقول...

جميلتى غروب ،،

لانك رقيقة وذو حس مرهف فأن الالم يؤثر فيك بشكل كبير .. فأدعو من الله عز وجل ان تمر هذه الازمة على خير وتكون فى احسن حال مع اللى يحبك بجد من كل قلبه وتحبه ومافيش حاجة تبعدكم عن بعض ان شاء الله .

نفرتارى

AhMeD RaDy يقول...

اممممممممممممممم

عادة بتبقى التعليقات عبارة عن نصايح او تحذير او تشجيع

وفى الاخر اللى بيكون كاتب .. مش اكتر من انه يقول بس عن الحالة لان كل انواع النصايح .. اتحفظت خلاص ومدركها وفاهمها

لكن برده هقول حاجة

صوت العقل يكسب ... ايه اللى يضمن النجاح ....

وحظ موفق لاختيار افضل

ahmed_k يقول...

يا غروب خليكي زي ما كنتي
متخليش التجربه السابقه تأثر فيكي
ولا تغير إسلوب تفكيرك
بالعكس أعتبريها تجربه مفيده بتبين لكي معادن الناس ومن هو الذي يستحق حبك
وأعلمي أن الزواج قدر
فإستخيري الله أن يرزقك بالشخص الصالح المناسب ليكي الذي يحفظك ويكرمك

دمتي بكل الخير

E73 يقول...

نو كمنت كانت لأني عارفة الحكاية وسبق وقلتلك تعليقي عليها في التليفون

مش معنى ان الصح منفعش مرة اننا نتصرف غلط
وعارفة كمان هتردي عليا بايه
هتقوليلي انا مش بتصرف ولا هتصرف غلط

هقولك خلاص يبقى نو كمنت
نوع من انواع المشاركة الوجدانية
لكن فعلا لا تعليق معنديش جديد اقوله
ومش معنى اني معنديش جديد اني اقعد ساكتة

لكن ادخل واقولك نو كمنت

EMMY BABY يقول...

اااااااااااااااه يا غروب انت بتوصفى احساسك انتى بجد حسيت والله ان انا اللى بكلم مش انتى

مش عارفة اقلك ايه بس كل اللى اقدر اقولهولك متضيعيش حب ممكن يكون هو الاخير بسبب واحد جبان خاين مكنش يستاهلك

فى غيرك حد محتاجلك بجد حد عايزك ومستعد يضحى علشانك مينفعشى تاخديه بذنب اللى قبله

ربنا يهديكى للخير يارب

تحياتى

ايمى

dina يقول...

غروب
انتى شكلك تعبانه جدا
هو تقريبا الدور بنسمله لبعض
بس خلينى اقولك حاجه
تقدر تحلفيلى ان الناس كلها شبه بعضها؟؟
لا طبعا
وبما اننا متاكدين من ده ازاى بقى نقول ان ده ممكن يكون جرح جديد

كمان انتى مش بتصدقى ربنا سبحانه وتعالى ؟
باذن الله طبعا
يبقى لما ربنا سبحانه وتعالى يقول كل امر المسلم خير
يبقى خير يا جميل
انتى اكيد حفظتى نفسك واستنيتى الحلال فى بيتك
عشان ربنا
وان الله لايضيع اجر من احسن عملا
ولما جالك العريس صليتى صلاه استخاره
وسلمتى امرك كله لله
بس حصل اللى حصل
طب هقولك هو ربنا يرضى لعبده الاذى؟؟
حبيبتى صدقينى رغم جرحك والخيانه والتعب اللى مريتى بيه
لكنه كان فى مصلحتك
هتقوليلى مصلحتى اتجرح واتاذى
ساعات اه
عشان نتعلم حاجه او عشان نكفر عن حاجه او عشان نرفع ايدينا لربنا وندعى ونبكى
وده احب لربنا ان يسمع صوت عبده انه محتاجله ويقوله ملييش غيرك يارب
تخيلى بقى
ان ربنا عاوز يسمع صوتك بتدعيه ويكون بقوه وببتذلل
انا بقول لو الف جرح هيخلينى اعمل اللى ربنا بيحبه
ييجوه ولا هيهمنى

صدقينى مش بقول كلام فى الهوا
اكيد مريت بحاله زيك وغيرنا كتير
والمشاعر ساعات بتقتل فينا وتدمر حاجه جوانا

لكن بجد اوعى تندمى على حاجه عملتيها تبتغى وجه ربنا
اوعى
وتاكدى ان ربنا رحيم
وبعدين هقولك تانى
اليس الله باحكم الحاكمين؟
ردى انتى ياغروب

حبيبتى ده جرح وانتهى
كان قاسى اوى وجرحك واذاكى لكن باذن الله انتى اقوى
واكيد اتعلمتى منه حاجه
مثلا اتعلمتى تختارى الانسان اللى هترتبطى بيه صح
اتعلمتى مش تامنلى لحد مش يستاهل
اتعلمتى ان الحلال بردو بيعزك

اوعى تقولى ان الطريقين زى بعض
ابدا

صدقينى اهدى كده وصلى قيام الليل واتكلمى مع ربنا وتذللى له وادعيه
وقوليله يارب محتاجالك
ساعدنى ودلنى اعمل ايه

واتكلمى مع نفسك بصراحه بدون اى مقارنه بين الشخص ده واى حد لانك كده هتظلميه
اسالى نفسك مشاعرك ايه تجاهه
ومستعده تديله فرصه ولا لا
وصلى صلاه استخاره وادعى الدعاء كل شويه

لحد ما تاخدى قرار
واللى تاخديه اوعى تندمى عليه
مادام لوجه الله

يارب اكون فيدتك باى حاجه لانى يعز عليا اشوفك او اشوف اى حد كده

وربنا يوفقك لما يحبه ويرضاه
ويسعدك بالحلال عن قريب

بس اوعى مش تعزمينى على فرحك :)

غروب يقول...

نفرتارى:

ازيك يا قمر

انا متشكره اوى على كلامك الرقيق ده

ودعوتك الجميله وان شاء الله ربنا يستجيب

نورتينى يا حبيبتى

غروب يقول...

احمد راضي:

يا اهلا يا اهلا بجيوش مصر البواسل

حمد الله ع السلامه

ايه بس اخبار الحروب البشعه اللى احنا سمعناها دى هههههه

اجازه سعيده ان شاء الله يسا احمد

فعلا دايما الردود ممكن تكون نصايح وعشان كده انا قلت انى مش طالبه النصيحه انا بس بفضفض عن حاله تعبانى مش اكتر

واديك واحد من ضمن اللى اختلفت ارائهم مع الباقي بتقول صوت العقل يكسب

وعقلي راااااااافض

شوفت بقه ان الاراء ممكن تختلف وانا ممكن اعمل العكس

ما عليناااااااااا

المهم انك نورت البلوج بجد وان شاء الله نستناك تانى في الاجازه اللى جايه

انت هتخلص خالص امتى؟؟؟؟؟؟؟؟؟؟

غروب يقول...

ahmed_k:

استاذ احمد نورتنى بجد

وبانتظر زيارتك وكلامك دايما

فعلا التجربه اللى فاتت استفدت منها في تحديد انواع الاشخاص

لكن غصب عنى مش باقدر اثق في حد حتى لو الحد ده ماشي جد

يعنى المشكله دلوقتى مش في تحديد الكويس من الوحش المشكله ان حتى الكويس مش واثقه فيه

فاهمنى؟؟؟؟؟؟؟؟؟؟؟؟؟

ربنا يخليك على الدعوه دى وربنا يستجيب

SHAPE YOUR LIFE (ABOALI) يقول...

غروب - ساسو

كم تمر علينا الليالى ونظن ان الليل اتى بظلامه معلنا بدء السكون
ولكن فى ظل هذا الليل تاءتى النجوم مسرعة دليلا لنا ويشاركها القمر

التعرض للفشل او تجربه فاشلة
دايما بتكون دافع للتقدم الى الامام لاءننا ناخذ منها العبرة

طريقه عرضك لقصتك يا غروب
تدل انك من اصل طيب وتربيتك و اخلاقك مميزة

ونظر" لتلك التربيه والاخلاق
اى جرح تتعرضين له سيكون له اثر
لاءن عطاءك اللامحدود ينتظر من يقابله ان يعطى نفس العطاء

ولكن الحياه يا غروب ليست هكذا

فهناك نفوس مريضة واخرى مشتته

عندما جاء زوج يشكو زوجته لاءمير المؤمنين عمر بن الخطاب

قائلا" له انه سئل زوجته هل تحبيننى
والح عليه فى السؤال
فقالت له لا احبك

فاستتدعاها سيدنا عمر وسئلها لماذا قالت هذا الكلام

فقالت لقد الح على فى الجواب وانا احسن عشرته ولم اصل الى حبه بعد
ولم اشأ ان اكذب

فقال لها يا امة الله ليست كل البيوت تبنى على الحب


لذا الحب ركن من اركان الزواج ولكن العشرة الطيبه وحسن ادب الراعى وهو الزوج هما فرسا نجاح الحياه والزواج

انظرى بعينك الى من يتقدم او يخطبك
ليس بالضرورة ان تحبيه
ولكن كيف هو فى اهله
معاملاته مع غيره
صدقه
صلاته
احترامه
اسئليه لما تتزوج ؟
فاءن قال لاءكمل نصف دينى فهو يحتاج الى الدين وفقهه

لاءننا نتزوج لنعمر الارض ونبنى جيلا"
عابد لله يحفظ عهده ويكون خليفه له


لا تكونى عثرة فى طريق حياتك

بتذكر الجروح

لاءنها تترك بذلك حسرة فى القلب


انتى من اصل طيب فاجعلى لك عنوانا" طيبا وزوج طيب وحياه طيبه


تحياتى

ورأيى دينا فى التعليق السابق راى رائع فخدى به

SHAPE YOUR LIFE (ABOALI) يقول...

هههههههههه
وكويس انك موجوده بتردى على التعليقات
علشان اشوف النتيجة

Ahmed يقول...

انا مش هقدم نصايح
بس هقول لو مكانك ممكن اعمل ايه (او فعلا عملت ايه)

مقدرش اخد الموضوع ببساطه واقول اهو موضوع وعدا

لكن لازم اخد وقت كافي عشان اقدر احكم

يعني هخوض التجربه (الخوف من الفشل ممكن يخيلني افشل)
اااه هخاف من الجرح, لاني هعاني كتير من ألمه (وده اللي حصل) بس بكل الأحوال مندمتش لأني عودت نفسي أن ممكن تتألم

فهماني؟

غروب يقول...

ايناس هانم :

طيب يا ايناس لكونك عارفه الموضوع والوحيده اللى كانت تعرف تقومى تدخلى تقولى نو كومنت

بتستفذينى انتى ...؟؟؟؟؟

انا مش عايزه اتصرف غلط ولالله يا ايناس علشان الصح فشل

بس مش قادره اقول ان الاحساس عاجبنى

انا لسه قلبي ممتش

اياكى بقه تقولى نوكومنت دى تانى هطردك شررررر طرده من البلوج بتاعت فاهمه

باى

غروب يقول...

ايمي:

ازيك يا حبيبتى

نورتى المدونه ومنوره التدوين كله

مبسوطه اوى انك حسيتى كلامى

مش عارفه ارد على كلامك لانى خايفه اقول اه وخايفه برضه اوقول لا


ربنا يخليكي ليه

باى يا قمر

غروب يقول...

دينا:

ازيك يا جميله وحشانى جدااااااا

دينا كلامك جميل بس انا خااااااااااايفه

مش عارفه اوصفها ازاى
زى مقلت انا مش خايفه من الحب والدليل انى مش قادره انكر احساسي بشئ جديد لكن خايفه من اللى هيحصل بعده حتى لو كان صح


ايناس قاللتلى برضه اصلي استخاره

تعرفى انى في المره الاولى من اول يوم قلت لماما انى حاسه ان الموضوع مش هيتم رغم انه كان في اوله جميل وماشي كويس وكل شئ
لكن مصلتش استخاره ويمكن ده السبب
واحساسي كان صادق

هحاول اصليها المره دى

وربنا يخليكي ومتشكره لدعوتك الجميله

نورتينى يا قمر

غروب يقول...

ابوعلى :

كلامك رائع بجد والله انا باحس براحه كبيره اوى لما بقرا كلامك

والقصه جميله

بس برضه هرجع اقولك ان خوفي مش بايدي
احساس مش قادره لسه اسيطر عليه

رغم ان القصه الاولى مش لسه من فتره قريبه دى قصه خلصت بقالها 3 سنين

وفي السنين دى مسمحتش لحد يدخل منطقه معينه ( قلبي )

رغم انى مش متبلده المشاعر ويمكن حسيت بعض احساسات مزيفه ضد البعض

لكن الشخص ده عاوز شئ رسمي

يعنى يدخهل بيتى بجد

زى الاول ولكده انا دايما بخاف من الخطوه دى

عموما انا حاسه انى مش عارفهاوصل احساسي

انا متشكره اوى على كلامك اللى هدى نفسي جداااااااا

ربنا يكرمك

غروب يقول...

م : احمد ابو العلا

اهلا بيك نورت المدونه

واحب اقولك الاول ان مدونتك جميله بجد

ودمها خفيف


التجربه عدى عليها 3 سنين واكتر

ولسه احساس الخوف مسيطر تفتكر اعمل ايه بقه

انا خايفه من كتر التفكير اقول لا لمجرد انى عايزه ارحم نفسي واللى حواليه من توتر الاعصاب

لكن خايفه ارجع اندم

اعشق فى الليل ضوء القمر يقول...

طيب أقول كلمتين و أجرى
الأولى
لو هتعرفيه علشان حب ومشاعر ووجع قلب وعين وحنيه ودوشت دماغ معنديش حل
الثانيه
لو جواز وعشرة وسكن أقول كلمتين أيضا وأجرى
أ)قال النبى محمد صلى الله عليه وسلم من جائكم من ترضون دينه و امانته فزوجوه وليه الدين و الأمانه معا ومعنى الأمانه هنا معاملاته فى كل شئ
لأنها الشئ الوحيد إنه حتى لو لم يحبك لن يعصى الله فيكى
ب)صلاة الستخارة وهى جميله جدا لأن الرد بيكون من مدبر الأمر فى السماء و الأرض ومش لازم بالمعنى أه أو لا ممكن براحه نفسيه وشرطها عدم الميول لرأى
بس خلاص

فيه حاجه معلش أتكلم فيها
فيه ناس بتقول صليت صلاة الإستخارة ووجدت الخير فى ذلك بعد فتره تم الفسخ
أنا بعرفك حاجه ممكن الفتره التى تم الإرتباط بها خطوبه زواج حتى لو فيه أطفال كانت فتره حمايه و خير لطرف أو كيلا الطرفين كان من الممكن كثيرا الوقوع فى كبيره أو رذيله و الله حمانا منها بهذا الإرتباط أو حاجــــــات كثيرة الله وحده يعلمها

yoyo يقول...

شوفى يا حبيبتى التجربة اللى تكسرك تعلمك و تسفيدى منها مش تخليها قدامك و تقوفى حياتك لا خليها قدام وحاولى تتعلمى منها و تتفادى الاخطاء اللى حصلت

انا حاسة بيكى اوى والله و بالتجربة دى أسئلى مجرب بقى

افتحى قلبك يا غروب
مش تقفليه خليه يحب و يتحب
ان كان انجرح مرة يمكن و ان شاء الله اكيد الحب دا يداوى ويعوض الجرح اللى فات
اعتقد انك فى اول الطريق حاولى تحكمى عقلك للحظة و ابداى بعدها اشركى قلبك فى الحوار
بس مش تقسى على قلبك و تحبيسه اكثر من كدا فى تجربة مضت وانتهت حتى لو كانت مؤلمة انت فى حاجة الى محواها

ربنا يسعدك ويسعد قلبك يااارب

تحياتى
يويو

♥ R ♥ يقول...

بصي ياقمر الأكيد اللي لازم تسمعي فيه صوت عقلك هو انك متغلطيش ومتعمليش حاجة من ورا أهلك انتي اخترتي طريق صح خليكي صح ومتتغيريش عشان أي حد أي كان

ثانياً انتي مسمية مدونتك ما بعد الغروب واللي بعد الغروب بيكون دايماً "شروق"
ليه بقى عايزة تفضلي معيشة نفسك في لحظة الغروب وتغمي عنيكي عن شروق أمل جديد

مش يمكن ربنا بعتلك الشخص ده عشان يعوضك عن اللي حصل مع اللي قبله
"لولا إحساس الحزن عمر الإنسان ما كان هيحس طعم السعادة"
مش عايزة اقولك تعملي إيه لأني عارفة ان مش كلامي اللي هيخليكي تاخدي أي قرار لازم تكوني مقتنعة بيه من جواكي

وأي كان كان قرارك تأكدي إن ده هو الخير ليكي وأكيد ربنا كان ليه حكمة في اللي حصل وأكيد ليه حكمة في اللي بيحصل
أتمنى تكون فكرتي وصلت
وربنا يقدملك اللي فيه الخير ويريح قلبك :)

أمير البلانكو يقول...

غروب

ازيك

أول ماجيت علشان أزورك
قلت هلاقي عند ساسو الحاجه اللي ممكن تخليني أفرح بكلماتك الجميله لكن لما دخلت لقيت حزن رهيب وبجد انا زعلت عليكي أوي أوي أوي وبصي انا لسه عايز أتكلم كتير في المشكله بس ياريت توسعي صدرك ليا علشان أنا عايز أتكلم براحتي ماشي

استنيني أكيد جايلك تاني

غروب يقول...

اعشق في الليل ضوء القمر:

صح كده
انت كده تعتبر اكتر واحد قربت من دماغي

انا فعلا كنت بقول على الحب والحاجات دى بلاش وجع دماغ واخدها من قصيرها

بالنسبه بقه لرايك في الجواز هو ده المشكله انى لما اتحطيت في موقف بجد معرفتش اخد القرار وحصلت المقارنه والشعور بالقلق والخوف

وف نفس الوقت في شعور جديد كويس حساه بيفرحنى ويخوفنى مع بعض

عموما ان شاء الله اصلي الاستخاره وربنا يصلح الحال

اشكرك على الرد والمتابعه

غروب يقول...

يويو:

ازيك يا حبيبه قلبي

جميل اوى انك حاسه بيه ... يعنى عارفه كويس انى مش مستقره على راى لو حد يقولى اعطى لنفسط فرصه للتفكير الكويس والخروج من التجربه الاولى

انا خاجه من التجربه الاولى بقالى 3 سنين تقريبا

عموما انا فعلا بحاول دلوقتى افتح قلبي وابعد مبدا الشك

او ساعات بقول لنفسي يا بنتتى جربي مش هتخسري

بس الله اهلم لسه الخير فين

انتى نورتى يا حبيبتى وربنا ميحرمنيش منك

غروب يقول...

رضوى:

انا قبلت الاضافه يا قمر وتعبك راحه والله

بس اللى ما بعد الغروب مش الشروق

اللى بعد الغروب ه الليل

ان شاء الله

وربنا يقدم الصالح

ادعيلي

ومنظراكى في اى وقت يا جميله

غروب يقول...

امير البلانكو

ازيك يا ابنى

اخبارك ايه

ان شاء الله يا امير تلاقي الكلمات اللى تعجبك قريب

في الخطه والله وعلشانك مخصوص والله

ومنتظره ردك

وكلى اذان صاغيه

IIOrganzAII يقول...

الصدمة إحساس صعب أوي
خاصة لما تكون من الحب
بتكون أقوى بكتير من أي صدمة تانسة

انا لحد دلوقتي مش عارفة
اتصدمت قد ايه في حياتي
بس مش اللي اعرفه
إني طول الوقت خايفة اتصدم من الحب

مش هقولك غير ان الوقت بينسي

...

شيماء جمال(شيمو القمر) يقول...

خلى دايما عقلك متحكم فى تصرفات قلبك وفى نفس الوقت خلى قلبك يحس كل ده .
صدقينى كل الولاد مش زى بعض ، يمكن الأول خائن لكن ممكن التانى يكون كويس والأول أكيد ليس من قدره لك الله ، استخيرى ربك دائما فى كل اختياراتك صدقينى ستجدى ما يسعدك

أنا لا أملى عليك نصائح ولكن لاأريد أحد أن يكره الحب فالحب جميل ولكن نحن من نشوهه

تحياتى
شيمو القمر

طـائر الليــل الحـزين يقول...

غروب
انا جيت اسلم عليكى
واقولك واحشتينى
وطبعا قريت البوست ده اللى كله حزن وانا حساكى فيه بتتكلمى مع نفسك
عشان كده مش هعلق واقول رأى
عشان انا هعتبر الكلام اللى قولتيه فى البوست فضفضة
وتسلمى دايما يا قمر
وكل اللى هقدر اقوله
سبيها على الله هو العالم وهو القادر
تحياااااااااتى

غروب يقول...

ليالي القمر:

يا حبيبتى ربنا يحميكي من الصدمات

ومتعديش الصدمات

تقريبا دى بقت شئ طبيعي

وان شاء الله الوقت يلعب دوره

نورتينى يا جميله

غروب يقول...

اعترافات قلب:

ازيك يا قمر

مدونتك عسوله اووووووووووى

بس مش ناويه تكتبي شئ جديد بقه عيد اللحب فات من فتره

ولا لسه عندك؟؟؟؟؟؟؟؟

ربنا يجعل ايامك كلها حب د

متشكره يا قمر على ردك وكلامك العقلانى اوووووووووووووووى

نورتى

غروب يقول...

طائر الليل الحزين :

ازيك يا حبيبه قلبي

وحشتينى اووووووووووووووووووووووووووووووووووووووووووووووووى

الحمد لله انك عرفتى اللينك الجديد

متغيبيش تانى بقه

فعلا البوست كان شويه فضفضه بس الظاهر كده ان في حاله من الحيره والحزن مسيطره على الناس اليومين دول؟

ملاحظتيش كده؟؟؟؟؟؟؟؟؟؟؟؟

نورتينى يا جميلتى

اعشق فى الليل ضوء القمر يقول...

انا عديت بالليل ومعى نور القمر بكره لى كلمتين معاكى هقولهم و أجرى أيضا إذا سمحتى طبعا

غروب يقول...

اعشق في اليلي ضوء القمر:

ان شاء الله منتظره

romansy يقول...

مش هندى نصايح ولا حاجه
كل اللى اقدر اقوله ان الطريق قدامك كبير لسه
فكرى فى الفرصه الللى جايه وسيبك من اللى فات

Yasmine Madkour يقول...

اتعلمي منها لكن متتشائميش وصوابعك مش زي بعضها .. و اللي بيحبك ده ممكن أوي يبقي إنسان كويس و انتي واضح إنك مرتحاله .. بس خوفك من التجربه اللي قبل كده هو اللي كل شويه يطلعلك علي الشاشه يقولك اقفلي الجهاز (عذرا التشبيه مش مناسب) ..

جربي مش هتخسري حاجه بجد انتي كده كده مجروحه و نصيحه مني قوليله علي كل اللي جواكي يعني قوليله انك مرتحاله و لو بتحبيه قوليله و قوليله انك اتجرحتي قبل كده عشان لو بيحبك بجد هو اللي هيقف جمبك و يساعدك عشان متخافيش

ده رأيي و الله أعلم و سوري لو كنت نصحتك و انتي قولتي مش عاوزه نصيحه !!

عاشقه وغلبانه يقول...

اممممممممممم

الخيانه اكيد شئ وحش
وكل كلام الناس مش هايقلل اثرها عليك
الزمن بس والايام هي اللي قادره تساعدك تنسي

انا رأي ادي لتفسك فرصه تانيه
مش كل الناس بتخون
وكمان مش كل الناس صادقه
بس لو عيشتي خايفه من كل ارتباط يبقي اسفه في الكلمه هاتفشلي

الخوف والتردد اول خطوات الفشل
جمدي قلبك
ادي لروحك فرصه تثقي في الناس
وادي الناس فرصه تحاول تخليكي تثقي فيهم
مش هايحصلك اكتر من اللي حصل

اول جرح خلاص عدي بصعوبته
لو اتكرر تاني بنفس الطريقه مش هايكون بنفس القسوه

ادي لقلبك فرصه يتفتح علي حب جديد وماتنسيش وانتي بلتحبي تفكري شويه

تحياتي

غروب يقول...

رومانسي:

ربنا يستر على اللى جاى مهو ده اللى مخوفنى

غروب يقول...

عاقله على ارض الجنون:

اولا: مدونتك حلوه اوى وكلمات جميله اوى اوى

بصي انا مرتاحه للاحساس

زى اى بنت بتحب احساس ان في حد مهتم بيها وكده

لكن مقدرش اقوله اى حااااااااجه خالص دلوقتى

ادعيلي بس

ومتتاسفيش كلامك جميل يا قمر وتقولى اللى انت عايزاه

نورتينى يا جميله

غروب يقول...

عاشقه وغلبانه:

ازيك يا قمر

انتى قولتى كلمه حلوه اوى بتدور في دماغي كتير ان فعلا اول جرح عدى خلاص بقسوته يعنى لا لالالالالالالالالالالالالالالالالالا قدر الله لو حصل جرح تانى مش هيكون بنفس القسوه

بس برضه انا خااااااايفه يا ناس


عموما انا متشكره اوى على زيارتك وكلامك

وان شاء الله اوصل لقرار قريب

نورتى

E73 يقول...

انا عرفتك منين يا بنت انتي
ايه الناس الشرانية دي؟!
اعوذ بالله
طيب انا بدخل اقولك نو كمنت
انتي بتقوليها من غير ما تعتبي مدونتي خالص
مش عارفة انا انتي صايمة عنها ولا ايه

سوسو الاموره يقول...

جربي تحبي من غير خوف جربي مش هتخسري حاجه البك انجرح مره مش هينجرح تاني لانك هتكوني عامله حسابك من الي سبق بس ما تظلميش وقتك وعقلك جربي ومش هتخسري ومش تظلمي الي ادامك مش كل صوابعك يشبهوا بعض او وحده لكي مني كل الاماني الحلوهوتحققي كل الي في بالك وتبعدي الخوف عنك يارب وخبي وعيشي

Unknown يقول...

عايز اقولك على حاجة مبقولهاش غير بس لأخواتى المدونين
انا قعدت احب لمدة 4 سنين وفى الاخر قالتلى مننفعش لبعض
والقصة دى لحد دلوقتى مقدرش انساها
بس دلوقتى وانا سايبها حاسس ان فى شئ ناقصنى
عارف ان دى فطرة فى الانسان ولازم يحب ويتحب
بس لما بنحب بنتعب وبنقول يارب يوصل لأرتباط رسمى
ولما مش بنكون على حب بنضايق وبنقول يارب نلاقى الحب بجد
وهل اكيد اللى بيحب بيحب بجد؟
مش عارف
المدونة جميلة وانا بجد خلاص هكون من احد القراء الدائمين للمدونة بإذن الله
ومتزعليش دا القدر
اسلام ديو

شخـا بيــط مـحـجـوب يقول...

تحياتى ليكى يا اختى

موضوعك جميل ومهم جدا وحساس ويمكن ناس كتير غيرك بيكونو فى نفس الموقف
بس انا ليا وجهت نظر اخرى
اولا اصابعك ليست كمثل بعضها اى ليس بالضرورى ان كل الناس تكون زى بعضها
بس انا شايف ان الصح صح لازم يكون
انا مش معاكى انك تحبى من برة علشان متجرحيش اهلك ولاكن ممكن يكون الجرح اكبر
انشاء اللله ربنا هيكرمك بالشخص المحترم يكون جدير بيكى وتكونى تاج لة انشاء الله بس الصبر
وتنسى الماضى وكأنة لم يكن

تحياتى ليكى بالتوفبق

شخابيط mahgoub

أمير البلانكو يقول...

غروب

ازيك

انا جيت تاني زي ماتفقت معاكي

معلش اتأخرت بس صدقيني غصب عني معلش انا مغترب وظروف الشغل بتبعدني شويا عن المدونه

بصي بقي ياستي الاول مشكلتك دي انا شايف انك تتحملي جزء من المشكله دي وكمان والدك مع كامل احترامي ليه بس انا شايف انه يتحمل جزء من المشكله دي برضه لانه المفروض لما احد يجيي يخطبك المفروض ان والدك يسأل عليه كويس أوي وكمان علي يسأل علي أهله لان الانسان دا اللي انتي بتحكي عنه دا يعتبر في الاصل مش متربي تربيه كويسه ودا عيب من الاهل اللي هما ممكن يكونا ناس مش كويسه
والله أعلم انا بوصف الشخص اللي انتي بتتكلمي عنه وانتي يا ساره المفروض انك في الفتره اللي هوا خطبك فيها كنتي انتي تكوني جمعتي معلومات كتير عنه علي المستوي الاخلاقي ازاي تفتحي قلبك لواحد وانتي مش تعرفي عنه حاجه
انا مش عارف أقولك ايه بجد
انتي صعبانه عليا أوي وبجد زعلت عليكي كتيرررر
وزي ما انتي بتقولي انك مش مستنيه نصائح من أي حد

بس انا عندي نصيحه ليكي وياريت تتقبليها

يا غروب أتأني شويا في الاختيار الجديد مش كفايه ايه يكون معجب بيكي المفروض يكون مش بيعرف يتنفس غير من هواكي انتي وكمان انتي ماتسلميش قلبك بسرعه لحبيبك سيبي جزء منه ليكي علشان تتحملي أي حاجه ماتعجبكيش ممكن تحصل بعد كدا

في الاخر بقولك يا ساسو

ربنا يوفقك في حياتك ويكرمك بأنسان محترم ذو أخلاق عاليه يعوضك عن اللي خانك في الاول

صديقك لو تقبلي

أمير البلانكو

mohamed ghalia يقول...

غروب
وعسى ان تكرهوا شيئا وهو خير لكم
محدش عارف نسيبه فين
وإن كان على النسيان الأيام ياما بتنسى
دمتى بكل الود

اعشق فى الليل ضوء القمر يقول...

السلام عليكم ورحمة الله وبركاته
أولا أنا بـ أعتز بشده مميته
أنا بفعلا كنت ناوى أدخل أمس و أعلق لكن كان فيه مشكله فى السنرال التابع ليه وفيش توصيل نت عندى فى البيت غايت ما نزلت إلى عملى النهارده الصبح
وانا دخلت من الشغل الأن لكن أيضا لن أستطيع
أنا فقط بعتز وإن شاء الله إذا صلح العطل فى السنترال ستجدينى عندك مساء اليوم
معلش سلام الأن عندى شغل ولازم أمشى الأن
تقبلى إعتزارى
السلام عليكم

غروب يقول...

ايناس تانى ؟؟؟؟؟؟؟؟؟؟؟؟

ايه ده انتى مين؟؟؟؟؟ ومين سنحلك تدخلى هنا

ايه ده يا ربي

كمان انتى عرفتى راي في البلوج حاليا وابوس ايدك كبري الخط اتعمينا

غروب يقول...

سوسو الاموره

ازيك يا قمر

نورتى المدونه
انتى برضه وصلتى لنقطه دايما بفكر فيها

وهى انى انجرحت مره يعنى مش هيكون جرح جامد لو حصل شئ لا قدر الله

عموما ربنا يهيئ الخير

نورتى

اعشق فى الليل ضوء القمر يقول...

السلام عليكم ورحمه الله
السلام على من إتبع الهدى

أنا بعتز قبل كل شئ
وإسمحى لى ضيف تقيل شويه مش هجرى على طول بس همشى بسرعه
جيد جدا بوجود تواصل بين الأفكار
نتكلم شويه
ما فيه من شعور طبيعى وذلك طبعا لطبيعتك كـ بنت وده طبيعى
هقولك حاجه زمان سيدنا عمر كان يقول لا نتزوج عن حب ولكن نتزوج لننجب الولد طبعا الحب المقصود به ما يحدث بين الفتاه و البنت فى أى مرحله
أما الولد سواء ولد أو بنت المقصود رفع الإسلام به
حتى الأن ذلك موجود
أنا لما بفكر أتجوز هتجوز واحد تحافظ على بيتــــى ومالــى وشــــرفـــــى
وعيالــــى
ممكن أتعرف على أى بنت لما يأتى الجواز الموضوع بيختلف
وبالتالى حب الشاب للفتاه بيتكون وبيزيد و بيعمر بعد الجواز أكثر منه قبل الجواز وذلك لما أتزوج بنت أجدها محافظه على نفسها لى فقط حتى يوم البناء وبتحافظ على بيتى وبتخاف عليا ومهتمه بى وبأسرتى غصب عنى لازم أحبها ومش بس كده أنفق دمى رخيص تحت قدمها
ومثال لذلك كثيره منهم أباكى وأمك و جدك وجدتك خالتك وعمتك حتى لو فيه قصه حب بتكون بشكل مختلف عما نعيشه حاليا
أنا مش كبير فى السن بس فكرتى ليه العلاقات القديمه بتعيش وبتعمر
وكمان إفتكرى كلامى فى التعليق الأول
انا حتى الأن أجد أمى وأبى يتشاجرون وبينهم خلافات وذلك طبيعى بس شوفى لو واحد فيهم واخد برد بيعمل إ]ه للتانى وأكيد إنت شوفتى نموذج مثل ذلك
طبعا عندى كــــــــلام كثير عايز أقوله لكن مش عايز أكون ضيف تقيل أكثر من ذلك على العموم لنا لقاء أخر

غروب يقول...

اسلام ديو:

اهلا بيك نورت المدونه

مش عارفه الحقيقه اقولك ايه

بس ربنا معاك وكلنا لها ههه

نورت المدونه وتشرفنى ف اى وقت

غروب

غروب يقول...

شخابيط محجوب:

اهلا وسهلا نورت

صوابعي مش زى بعضها ؟؟؟؟؟؟

غريبه

ههههه

عموما ادعيلي وربنا يقدم الخير

غروب يقول...

امير البلانكو:

اتكلمت انت في نقطه خطيره لو حد تانى غيرك كنت حذفت تعليقه هههه

بهزر

المهم

بص يا امير الشخص الاولانى مكنش وحش

واتسال عليه كويس
كان من عيله ممنازه وكانت اهله ناس كويسين

بس حيثيات الموضوع كتيره مش عايزه افتكرها اساسا

لكن صدقنى الغلطه مكنتش من عدم السؤال

المهم ان شاء الله ربنا يصلح الحال

ادعيلي بقه

غروب يقول...

محمد غاليه:

اهلا وسهلا

اخيرا نورتنى

منور المدونه

عندك حق

اشكرك جدا على التعليق

غروب يقول...

اعشق في الليل ضوء القمر:

انت ضيف جميل وتنور فى اى وقت والله

كلامك جميل

بس في كلمه لفتت نظرى اوووووى

انت قولت عادى اتعرف على بنات لكن ساعه الجواز بتفرق

طب ليه تتعرف بقه مش دى خيانه للبنت لما تتعرف عليها وف الاخر تقولها اسف مش انتى اللى اتجوزها شئ غريب اوووووى

لكن فكرتك في الجواز وصفات الزوجه جميله وربنا يوفقك وتلاقيها باذن الله

نورت

اعشق فى الليل ضوء القمر يقول...

انا مبعرفش بنات إلا فى ثلاث مواقف
اولا أقاربى وجميعهن فى نفس سنى يعنى متربين مع بعض ولو واحده فيهم غلطة أو شوفت حاجه بتكلم معاها على طول كأخ وممكن بزعق كمان
ثانيا زميلاتى فى العمل ومش أكثر ولو فيه سبب للمعاملات مفيش خلصت
ثالثا فى المدونات وذلك بيكون من بعد وأكثر ما بتزيد التواصل بكتب اختنا

أما عن كلامى كنت أقصد الفكره العامه عند الشباب
وكما قلت فى أول تعليق إنت عرفتى رأى فى الموضوع ده أما لو تكلمنا عن الشباب ليه بيعملو كده فى حاجات كثيره
ومن ضمنها البنت نفسهاأنا على فكره كنت عايز أقول كلام ثانى خالص غير ما قلته لكن كنت عايز أعرف حاجه قبل ما كنت أتكلم لكن على العموم عرفت تقبلى مرورى

غروب يقول...

اعشق في الليل ضوء القمر:

انا كده توهت منك

حاجه ايه اللى كنت عاوز تعرفها وعرفتها دلوقتى

ممكن توضح؟

اعشق فى الليل ضوء القمر يقول...

توهتى فى إيه
وعايزه أوضح إيه

غروب يقول...

حضرتك قولت ان في شئ نت عاوز تعرفه ودلوقتى عرفته

ايه هو ده؟؟؟؟؟؟؟؟؟؟؟؟؟؟؟

راجع كلامك

اعشق فى الليل ضوء القمر يقول...

غروب دائما عندما يكون الأنسان فى وضع بيحتاج فيه النصيحه بينقصم لنصفين
الأول بيحب يسمع إللى عايز يريحه يعنى مثل ما بنقول الكلام إللى بيريحه وخلاص بعيد عن معنى النصيحه المطلوب
الثانى بيحب فعلا يسمع النصيحه بجد بس برده بيحب يسمعها فى شكل بيحبه متكنش صدمه يعنى
أما كنت عايز أقول إيه مبقاش مهم علشان لو مهم كنت قلته ولو عايزه أقوله هقوله ليكى
أنا لا أتناسى ولكنى أنسى معه إنه وارد ضعيف
لو عايزه أوضح ثانى أقول

غروب يقول...

اعشق في الليل ضوء القمر:

انا مدونتى مفتروحه ليك في اى وقت

وسعيده جدا باى نصيحه من اى حد

ومش معنى انى قلت انى مش عايزه نصيحه انى مش عايزه اسمع

انا بس قولت اننى ممكن اسمع نصيحه حد وتعجبنى لكن الظروف تجبرنى اعمل العكس مش اكتر

عموما انا مش هاقول انت تقول ايه او مش تقول ايه

لو حاسس انك عاوز تقول شئ تانى انا هاسمعه وهارد عليه

اشكرك على المتابعه

اعشق فى الليل ضوء القمر يقول...

غروب شكرا ليكى وانا تحت أمرك تذكرى بوجد أخ لكى يريد مساعدتك
بس ما قلته مكنش علشان كلمتك علشان حاجات ثانيه
أما كنت عايز أقول إيه كنت هسألك بصراحه هتعملى إيه وفكرتى فى إيه
وقررتى إيه بعد الأراء الموجوده ليكى

غروب يقول...

اعشق في الليل ضوء القمر:

انا قولتلك انت تيجي وتقول اى حاجه في اى وقت

اما قرارى

ف انا لسه عقلي بيقول لا

وقلبي مش بيتحرك

اعشق فى الليل ضوء القمر يقول...

عارفه انا بضحك دلوقتى بالأمس مثل اليوم كلانا موجودين على النت منتظر رد الثانى
بفكرك لا تنسى صلاة الإستخاره لو عايزه الدعاء أقولهولك وكيفيه الصلاه
وكمان صلاة قضاء الحاجه
أختنا تذكر خلقك الله لكى تكونى ملكه لا يمسها غير زوجها وواصيفتها
فكونى ملكه كماأرادك الله فى كنغه ورعايته تهنئ لك الدنيا وما فيها
ملحوظه متلحوظه فى نفسها
رفقا بالقوارير

غروب يقول...

اعشق في الليل ضوء القمر:

هههههه شكلنا قلبناها شات

ههههه

عموما متشكره جدا على اهتمامك وكلامك

اغتيال حلم يقول...

ان شاء الله مش هاتدونى خبطة تانية..ما هو أنتى لازم تتعلمى من تجربتك الأولى..ومش معنى ان الآخرين خانونا ان احنا ما كناش جديرين بيهم فانسحبوا من حياتنا..بالعكس دا خروجهم المبكر من حياتنا أفضل ألف مرة..تخيلى الموقف ده أتأخر كام سنة لغاية ما اتجوزتوا وبقى عنكم أطفال.استعيدى ثقتك بنفسك وبالنسبة للجاى حطى أسوأ احتمالات ممكن تحصل واستعدى ليها..هتلاقى نفسك عاملة حائط صد قوى..
هأقولك نصيحة غير رومانسية بالمرة بس الظاهر بتجيب نتيجة كويسة..لو قربتى منه خطوة هايبعد عنك اتنين..ولو بعدتى عنه خطوة هايقرب منك عشرة..للأسف بقت حرب محتاجة خطط واستراتيجيات وتكتيك..
خلى اللى جاى يخبط على بابك أو قلبك المرة الجاية يحترم عقلك..وما يستضعفشى مشاعرك..لو قدرتى توصليلة النقطة دى هاتنعمى بالسعادة وراحة البال..
ولا تبحثى عن الحب..أتركية يأتى اليك صاغرا..ودعى الآخرين يرفعوا هاماتهم لينعموا برضاك..
وهاترتاحى من كل الفلسفة دى لو قدر الله لكى رجلا يخشاه..وأدعوا الله لكى بذلك...Romel

غروب يقول...

روميل:

اهلا وسهلا بيك

ايناس قالقتلى عليك تقريباااااا

عموما كلامك جميل اوووووى

واحلى نصيحه سمعتها بتاعت اقرب خطوه هيبعد اتنين

بجد والله جميله

تسلم نورت

shaimaa rady يقول...

بوصي هرد عليكي وعلي كلامك، اللي فكرني كتير بشيماء من حوالي 6 سنين...
بس الاول ابقي بصي علي الفديو ده، وركزي في الكلام اللي في الاول..
http://shemolife-shemo.blogspot.com/2009/02/blog-post_26.html

غروب يقول...

شيمو الكليب تحفههههههههه بجد

انا بحب المسلسل وبتابعه حاليا للمره التانيه

تسلم ايدك

 

ما بعد الغروب © 2008. Design By: SkinCorner