الجمعة، 12 سبتمبر 2008

أنا مش آسفه


ممكن اقول انا آسفه بفرحه وممكن اقولها وانا زعلانه

بس بقولها بكل وضوح ...مش بلبس توب الخجلانــه

لكن عمرى م اقوها وبعد م اقولها ارجـــــــــع ندمـــانه

أصلي لكونى أقول أنا آسفه لازم احس ان انا غلطانه

وانا مغلطتش فيكي وفيه .....بعتى حياتك واشترتيه

انتى الادرى فين مصلحتك......ومهما انا هعمل ف أنا مش أختك

يعنى لا عمرى انا هبكي بدالك ......ولا مصلحتى أكون أنا ضدك

ليه فكرانى مش بنى آدمه ؟ لا مشاعر ولا حب؟؟؟ دى صدمه

حاسه بفرحى لتعبك ليــــه؟ دانا من بعد حبيبي ف عتــــــــــــمه

يعنى لما هتبكي حبيب .........انا هبكيلك

ويوم متقولى ده كله نصيب.........انا هدعيلك

وانا يوم جرحى وتعبي ونارى .......مين يشكيلك

آخر كلمه ممكن أقولها هى بحبك

من قلبي او مش من قلبي مش هيضرك

لكن ظنك فيه وثقتك فيكي شئ هيغرك

أنا هستنى منك رد حروف من ايدك

ممكن يفرق حرفك عندى ويمكن عندك مش هيزيدك

آخر كلمه انا قولتها ليكي لكن آسفه مش هتفيدك

وعشان كده انا مش آسفه ..........وآدى هديه قلمى لعيدك.

46 التعليقات:

SHAPE YOUR LIFE (ABOALI) يقول...

حلو عنوان البوست
انا مش اسفة
وانا كمان مش اسف
اهو بقا عند فى عند
ومش عارف
انتى مش اسفة
ولا انا مش اسف
بس اللى اعرفه
انك دماء قلبى
ولايمكن اكون اسف
وبقولك اهو
انا مش اسف
بس خلى بالك
انى بتنفس هواكى
ومقدرش اقول اسف
تعرفى
انا هاقولك اعتراف
تقبليه منى
ولا هاتقولى
انا مش اسفه
قولى يلا
بلاش عند عيون
ولسان يمكن يكون عليها ديون
ها هاتقبلى ولا
طيب خلاص هاقول
بلاش عيونك
تكون زرقا كده
اصلى باشوف لون
سما صافية ومش عارف
تعبتى من كلامى
صح
طيب خلاص هاعترف


انا اسف


تحياتى على رقتك ومشاعرك

أمل حمدي يقول...

بجد ياسارة بوست رائع عجبني جدا لرقة اسلوبة حتى على من لاتريدي ان تتأسفي لهم
بجد حسيت ان قلبك ابيض
ربنا يصلح حالك
وخليكي دايما كدا

محمد فكري يقول...

جميل يا سارة بجد..
..............
ومرة فـ مرة هايكون فيه الأجمل كمان.
........
تسجيل حضور ومتابعة..

وان شاء الله اكون مودود على طول..

وكل سنة وانتي طيبة..

غروب يقول...

ابو على شكرا على زيارتك وكلامك

غروب يقول...

ماما اموله زيارتك احلى زياره وكلامك ارق واحلى كلام ....والبوست اللى جاى مفاجأه ليكى..( بوووووووووسه)

غروب يقول...

محمد فكرى :

اخيرا نورت المدونه ....رايك مهم اوووى وتشجيعك جميل من انسان جميل ومجامل وخدوم ...ودى شهاده حق

عموما ادعيلي جااااايز نوصل هههههههه

غير معرف يقول...

البوست جميل جد ا جدا
عجبني كلماته فعلا البوست تحفه تحفه وجميل جدا جدا


تسلم ايد

وعلي فاكرة انا بجد اللي اسف اني جيت متأخر

كان نفسي اكن اول تعليق ملحوقة

تحياتي

فراشة البساتين يقول...

سارة

دى اول زيارة ليا عندك

وبصراحة مدونتك عجبتنى جدا

انا قريت معظم موضوعاتك

وبجد اشعارك حلوة جدا

وان شاء الله مش هتكون اخر زيارة

غروب يقول...

a few good men

يا اهلا يا اهلا كلامك حلو اوى اخجلتم تواضعنا والله

عموما مسمحاك على التاخير .هههههه بس متعملهاش تانى ..

غروب يقول...

fire bird :

اهلا وسهلا نورت المدونه وشكرا جدا على كلماتك وتشجيعك ليه

واتمنى دوام التواصل وكل سنه وحضرتك طيب

أمير البلانكو يقول...

saso

بوست جميل جدآ والموضوع بجد أجمل

الي مزيد من التألق والابداع ان شاء الله

غروب يقول...

شكرا جداااااااا يا امير

نورتنى ....

كلام حسام يقول...

يا سلام انا اول تعليق
العنوان هايل والابيات معبرة جدا عن حالة غير يائسة بالمرة
دمت مبدعة

غروب يقول...

انت بتتريق يا استاذ حسام:

حضرتك جاى متاخر وكمان بتهزر ؟؟؟؟؟

ما شاء الله ما شاء الله ههههههههه

عموما نورت والحاله زى م انت شايف بقه

شهد الكلمات يقول...

ما شاء الله عليكي كلماتك معبرة جدا و قوية اوي

عجبني اول جزء جدا جدا

بتمني ربنا يلهمك الصبر علي الموقف ده

و فوضي امرك لربنا

تسلم ايدك

تحياتي

غروب يقول...

اختى شهد الكلمات ( هاجر) ده اسم اختى على فكره

نورتينى بجد وبنتظر زيارتك حقيقي

بالنسبه للموقف ربنا فعلا يخرجنى منه لانى بجد مظلومه ...وربنا شاهد على كده

بس ربنا رحيم بعباده ...ورنبا يصبر الطرف الاخر هى كمان معذوره ...

ربنا يستر ويعديها على خير

elsha3er يقول...

hالسلام عليكم بجد دام ابداعك ودام قلمك جميلة جدا جدا جدا واتمنى ان تكونى الى الامام اكثر واكثر

احمد الشاعر

قلم رصاص يقول...

السلام عليكم

ازيك ياساره

بجد البوست المرة دي جميل عن حق
كلماتك بتوصل لأهدافها بسرعه

هههههههههههههه

ربنا يوفقك

ومنتظر كل جديد منك

تقبلي تحياتي

غروب يقول...

اخى : احمد الشاعر

اشكرك جداااااااا على زيارتك وعلى كلماتك اللطيفه

واتمنى دوام التواصل باذن الله


قلم رصاص:

اخى : سيد

اشكرك جدااا على المتابعه وعلى كلامك الجميل

ربنا يوفقك

سارة درويش يقول...

كويس انك قولتى والله كنت هعلق على البوست اللى تحت ..

بالنسبة للكلمات بقى فهى بحد روووووووووووووعة وتنفع من بنت لبنت صاحبتها وتنفع من واحد لحبيبته اللى باعته واختارت صاحبه جامدة بجد وانا مبسوطة اوى انى زرت مدونتك

غروب يقول...

سمو الاميره ساره:

طبعاااااااااااا لازم اسم ساره يتحط جمبه مليووووووون لقب ( الاميره - الاموره - العسوله- ...........الخ)
طبعا ده لان اسمي ساره هههههههههههه

نورتينى والله وكلامك جميل وفعلا الكلام زى مقولتى هو فعلا موجه من .... الى....

اتمنى تزورينى دايما وكل سنه وانتى طيبه يا قمر

غروب يقول...

( جمعاوى) .....

السلام عليكم ساسو

وفعلا كلماتك المرة دى عالية ةأوى ومعبرة عن الموقف جامد

وربنا يارب يعينك لأن شكلك كده حد مزعلك جامد أوى

بس انتى الحمد لله اعلنتى وفائك واعلنتى موقفك :-(ممكن يفرق حرفك عندى ويمكن عندك مش هيزيدك)
موقفك متميز جداااااااااااا
ربنا يكرمك عليه

دمتى لنا بخير ويلا سلام



للاسف انا كنت عامله حساب كده...حضرتك علقت في البوست اللى فات ..
انا كتبت ملحوظه ان التعليقات فووووووق

عموما حصل خير وكونك تكتب ف اى مكان ده شئ يسعدنى

وربنا يخليك على كلامك انا فعلا اعلنت موقفي ولو هى عاوزه تصدق ....تصدق

عاوزه مش تصدق ......انا عذراها

شكرا ليك مره تانيه

وسلالالالالام

Unknown يقول...

ساسو
عارفة كلماتك لها رنين
وصدق لافت للنظر
عارفة للاسف مش كلنا بنعرف نعتذر عن ما بدر منا من اخطأ
تحياتى لك
ولقلمك المبدع

عدنان أحمد يقول...

السلام عليكم

بجد كلامك جميل اوي
و المدونة كمان جميلة

كل سنة و انتِ طيبة

غروب يقول...

عزيزتى نهر الحب:

اولا نورتينى واشكرك جدا على المتابعه

عايزه اقولك انى مش بخجل انى اقول كلمه انا آسفه لو غلطانه لانها مش هتوجعنى ولكن هتريح الطرف الاخر وممكن تنهى مشكله

لكن ما بالك لو انى اطال بالاعتذار عن شئ لم افعله بمعنى ادق عن جريييمه لم ارتكبها والله

من هنا اتى الصدق الذى تتحدثي عنه لانها كلها مواقف في حياتى لم افتعل اى منها

عموما ربنا يستر ..ومشكوره على زيارتك

غروب يقول...

عزيزى : اسير حبيبتى

نورت المدونه واشكرك على كلامك الجميل والحمد لله ان المدونه عجبتك

وكل سنه وانت طيب واتمنى تنورنى دايما

مـجـنـووون يقول...

الله علي الأحساس الرقيق ، والكلمات الجميله

ويوم متقولى ده كله نصيب..انا هدعيلك

وانا يوم جرحى وتعبي ونارى .مين يشكيلك

آخر كلمه ممكن أقولها هى بحبك


أجمل حاجه في الدنيا لما نكون حد جرحنا وأحنا بندعيله أن ربنا يوفقه ويهديه من قلبنا
وده بيدل علي أن الشخص إلي أنجرح نفسه طيبه ومسامحه

تقبلي مروري
مجنووون

غروب يقول...

اخى : مجنووووون

انا بدعيلها لانى حاسه بيها حتى لو جرحتنى بدون قصد


شكرا على الزياره الجميله

فارس بلا جواد يقول...

كلماتك وانا باقرأها حسيت انها لازم تتلحن وتتغني
بجد موهبتك حلوة في كتابة الشعر الغنائي
الفكرة حلوة والاوزان كانت مظبوطة جدا
تسلم ايدك

غير معرف يقول...

اولا :احسن حاجه عملتيها انك وضحتى التعليقات فين ...
ثانيا: انا مش اسفه هيا افهمها على انها انى مش زعلانه ..ولا انا مبفهمش ..
اصلى البوست من جماله لخبطنى..
بس البوست ده وبقيت بوستات المدونه رائعين فعلا وانتى واضح ان احاسيسك زجاجيه وناعمه ..
ربنا يوفقك وتكتبى ما هو احسن كمان..

ahmed_k يقول...

إزيك يا ساسو
أخبارك أيه ؟ يارب تكوني بخير
وحكاية التعليقات اللي فوق عندك أنا الحمد لله إكتشفتها وموقعتش فيها
لأني في مره كنت حعلق على بوست عندك فلقيت الناس بتتكلم في حاجه تاني خالص
قلت مش معقول الناس دي كلها عامله دماغ
بالتاكيد العيب عندي أنا
وجات سلامات
المهم اولا كلماتك سهله وجميله
وتحمل الكثير من معاني العتاب
والعتاب لا يكون إلا للأحبه
فمن نكرهه لا نعاتبه
بل نكسر قله وراه
فمادام حدث العتاب
فبإذن الله سيأتي الصفاء

وتقبلي مني خالص تحياتي

غروب يقول...

فارس بلا جواد :

ربنا يخليك على كلماتك الجميله وان شاء الله اكون عند حسن ظنك دايما بالنسبه للتلحين لو اقل من عمر مصطفي او وليد سعد مش هقبل ههههههههههههههههههههههه

غروب يقول...

عايزه اتطلق:
طبعااااااااا بتفهمى واحسن من احسن حد انا بعاب لانى مش زعلانه لكنى محوطه ف موقف صعب ....ومتهمه بشئ لم ارتكبه وربنا اعلم



وانا مبسوطه اوى لان المدونه عجباكي يا قمر

غروب يقول...

ahmed_k

اولا انا بخير الحمد لله كان ناقصنى زيارتك بس

ثانيا لما لقيت من اول تعليق الناس بتتلخبط عشان النيو لوك قلت اوضح احسن ومع ذلك برضه حصل غلط بس مش مشكله

بس ضحكتنى اووووووووووووى حكايه ان مش معقول الناس كلها عامله دماغ ههههههههههههههههه

بالنسبه للبوست انا كتبته لانى حسيته ولانه موقف ف حياتى مش ممكن يعدى بالساهل

متبقاش تتاخر علينا ...

غير معرف يقول...

what happened to the other one?

غير معرف يقول...

when will you go online?

غروب يقول...

what happened to the other one

......................


when will you go online?


i don't know

☼♫♪ عمــاد الدين يــوسف ☼♫♪ يقول...

اختي الكريمه
ديه اول مره ادخل فيها على مدونتك وهي بالفعل جميله وتحديدا البوست ده لاني قريته وهكمل الباقي
تحياتي لكي وبعد اذنك مدونتك في قائمة المفضله عندي

غروب يقول...

الاستاذ الفاضل :

عماد الدين يوسف نورتنى وزيارتك شئ يسعدنى وطبعا رايك في المدونه اسعدنى

وبالطبع وبدون استئذان المدونه بتاعتك

Blue Nile يقول...

الله عليكي
فكرة جميلة واسلوبك جميل وبسيط
تحياتي

غروب يقول...

blue nile:

نورتينى يا حبيبتى ومدونتك احلى بكتير

شكرا على كلامك وكل سنه وانتى بخير

تامر المصرى يقول...
أزال المؤلف هذا التعليق.
تامر المصرى يقول...

السلام عليكم
لو قولت جميلة ابقى ظلمتك يا سارة بس بجد هى اكتر من جميلة وكلمتها معبرة مش مهم نكتب الكلام ازاى بس المهم ان الناس يوصل لها وتفهمه بكل البساطة ديه وشكرا على الكلامات الجميلة ويا رب ما اشوفك زعلانة من حد ومتاكد ان شخص زيك عمره ما يزعل حد
كل سنة وانتى طيبة

غروب يقول...

تامر المصرى:

شكرا يا تامر ربنا يخليك

انا مش زعلانه من حد طبعا ولا احب اى شخص يزعل منى

نورتتنى وكل سنه وانت بخير

ragabhpl يقول...

انا بردو مش اسف انى مريت على مدونتك




دعواتك

غروب يقول...

عبد التواب محمد

طبعا مش اسف ونورت المدونه :

وربنا يوفقك

 

ما بعد الغروب © 2008. Design By: SkinCorner